1. Христиан кижи незиле агашка тӱҥей болор керек? (Анайда ок јурукты кӧрӱгер.)

 «ЭЭЛГИР агаш салкынга сынбас». Бу кеп-сӧстӧ јаан учуры бар. Кезик агаштар ээлгиринеҥ улам салкын канайып та тыҥ соксо, бир де сынбай јат. Анайып ла христианин кижи кӧгӱс јанынаҥ ӧзӧргӧ турган болзо, агаш чылап ээлгир болор керек. Бу не дегени? Ӧскӧртӧ айтса, биске керсӱ болор керек. Темдектезе, кижиниҥ јӱрӱминде айалга канайып ла солынып турза, ол ого эптежип алат. Анайда ок ӧскӧ улустыҥ кӧрӱм-шӱӱлтезин де тооп јат.

2. Солынып турган айалгаларга эптежерге, кандый кылык-јаҥдар болужар ла бу јӧрмӧлдӧ бис нени шӱӱжерис?

² Бис Иеговага иштеп јадыс, оныҥ учун керсӱ болорго кӱӱнзейдис. Анайда ок бис јобош ло килемкей болорго албаданадыс. Бу јӧрмӧлдӧ јӱрӱминде солынталар болгон христиандарга эптежип аларга бу кылык-јаҥдар канайып болушканын кӧрӧрис ле биске канай болужарын кӧрӧрис. Је озо баштап, Иегова ла Иисустыҥ темин кӧрӱп ийектер.

3. Иегованыҥ керсӱ болгоны недеҥ кӧрӱнет?

³ Иегова «Кайа» деп адалат, нениҥ учун дезе ол сӱреен бек ле турумкай (Јаҥ. т. 32:4). Је бу ла ок ӧйдӧ Иегова керсӱ Кудай. Бӱгӱнги јӱрӱмде айалга јаантайын солынып јат, је бистиҥ Кудайыс бойыныҥ амадузын бӱдӱретен эп-арганы тӱрген табып ийет. Кудай кижини бойына кеберлеш ле кандый ла айалгага эптежер эдип јайаган. Анайда ок ол биске принциптер берген, олор биске кӱч ӧйлӧрдӧ ойгор болорго болужат. Иегованыҥ теми ле принциптери оны кайадый сӱреен бек  деп кӧргӱзип турган да болзо, Иегова керсӱ Кудай.

4. Иегованыҥ керсӱ болгонын кӧргӱзип турган тем куучындап береер (Левит 5:7, 11).

⁴ Иегованыҥ ӱзе јолдоры бийик кеминде, ол кажы ла немеде керсӱ. Иегова улуска кату эмес, олордоҥ эдип болбос неме некебей јат. Оныҥ керсӱ болгоны израильтяндарга канайып баштанганынаҥ кӧрӱнет. Ол јокту да, бай да улустаҥ бир тӱҥей тайылга экелзин деп некебейтен. Керек дезе кезик учуралдарда тайылганы, арга-чагы кандый ондый тайылга экелзин деп јарадып туратан. (Левит 5:7, 11 кычырыгар.)

5. Иегованыҥ јобош ло килемкей болгоныныҥ темин куучындап беригер.

⁵ Иегованы керсӱ болорго, килемкей ле јобош болоры кӱӱнзедет. Темдектезе, Иегованыҥ јобош болгоны Содомды јоголтор тушта кӧрӱнген. Иегова ангелдер ажыра Лотты ла оныҥ билезин кырлардӧӧн качсын деп јакарган. А Лот коркый береле, јанындагы јаан эмес Цоар деп каладӧӧн качайын деп, Иегованы јайнай берген. А Иегова Цоарды база јоголторго сананган болгон. Иегова Лоттоҥ оныҥ айтканын чике бӱдӱрзин деп некеер аргалу болгон, је ол оной этпеген. Ол Цоарды јоголтпой, анайып Лоттыҥ сураганын бӱдӱрип салган (Баш. 19:18—22). Канча јӱс јылдар ӧткӧн кийнинде Иегова Ниневияныҥ албатызын база килеген. Ол судурчы Ионаны Ниневия ла оныҥ албатызы јоголтылар деп, јар айтсын деп ийген. Је Ниневияныҥ албатызы кинчегин алынып ийерде, Иегова олорды тирӱ артыргызып салган (Иона 3:1, 10; 4:10, 11).

6. Иисус Иегованыҥ керсӱ болгонынаҥ кандый тем алган?

⁶ Иисус Адазы ла чылап керсӱ болгон. Иегова оны «Израильдиҥ азып јӱрген койлорына» јар айтсын деп, јердӧӧн ийген. Иисус дезе бу јакылтаны бӱдӱрип тура, керсӱ болгонын кӧргӱскен. Бир катап израильтян эмес ӱй кижи оныҥ кызычагын кӧрмӧстӧр ээлеп, кыйнап турарда, Иисусты оны јазып ийзин деп сураган. Иисус дезе бу кижини килеп, оныҥ кызычагын јазып ийди (Матф. 15:21—28). База бир учурал кӧрӱп ийектер. Иисус апостолдорына мынайда айткан: «Менеҥ јана тӱшкен кижидеҥ мен де... јана тӱжерим» (Матф. 10:33). Је качан Пётр Иисустаҥ ӱч катап јана тӱжерде, Иисус оны кату каруузына тургуспады. Карын ол Пётрдыҥ бӱдӱмјизин ле кинчегин алынып турганын кӧргӧн. Оныҥ учун Иисус тирилген кийнинеҥ Пётрга келип, оны сӱӱп турганын ла јаманын таштап турганын айткан (Лука 24:33, 34).

7. Филиппыдагыларга 4:5-ле болзо, бис кандый кижи болорго кӱӱнзейдис?

 ⁷ Иегова ла Иисусты керсӱ деп кӧрдис. А бис керегинде нени айдарга јараар? Иегова бисти база керсӱ болзын деп кӱӱнзейт. (Филиппыдагыларга 4:5 кычырыгар.) Агару Бичиктиҥ бир кӧчӱрмезинде Филиппыдагыларга 4:5-те айдылганыла болзо, биске керсӱ болгонысла јарлу болор керек. Бойыгардаҥ мынайып сурагар: «Улус мени керсӱ, јымжак деп билер бе? Эмезе ӧчӧш, кату деп пе? Мен јаантайын бойымдыйын албадайдым ба? Эмезе улусты јазап угуп, олордыҥ айтканын ајаруга аладым ба?» Бис канча ла кире керсӱ болзоос, ончо ло кире Иеговага ла Иисуска тӱҥей болорыс. А эмди дезе, бистиҥ јӱрӱмис солынып турза эмезе ӧскӧ улустыҥ кӧрӱм-санаазы ла шӱӱлтелери бистийинеҥ башка болзо, канайып керсӱ болорын шӱӱжип ийектер.

8. Айалгалар солынза, биске керсӱ болорго не болужар? (Сносканы база кӧрӱгер.)

⁸ Керсӱ болоры айалга солынза, эптежип аларын темдектейт. Айалга солынза, сакыбаган кӱчтер болордоҥ айабас, темдектезе, су-кадыгыс уйадай берер. Экономика ла политика солынза, јӱрӱмис оноҥ кӱч боло берер. Керек дезе организацияда эдип турган ижис солынза, биске јаан ченелте болордоҥ айабас (Эккл. 9:11; 1 Кор. 7:31). Је кандый да кӱчтер болотон болзо, оны ӧдӱп чыгатан тӧрт алтам болужар: 1) эмдиги айалгала јӱрӱгер, 2) ичкери кӧрӱгер, 3) јакшы јанын кӧрӱгер, 4) улуска болужыгар b. Эмди дезе бу алтамдар болушкан улустыҥ учуралдарын кӧрӱп ийектер.

9. Миссионерлер болуп турган эш-нӧкӧрлӧр кенетийин боло берген кӱчтерди канайып ӧдӱп чыккан?

⁹ Эмдиги айалгала јӱрӱгер. Франче́ска эјени ле Эмануэ́ле аканы ӧскӧ ороондӧӧн миссионерлер эдип аткарган. Бу ороонго барала, јаҥы тил ӱренип, јуунла таныжып ла баштаарда, пандемия COVID-19 баштала берген. Мынаҥ улам олорго изоляцияда отурарга келишкен. Оноҥ кенетийин Франческаныҥ энези божой берди. Бу ачу-корон ӧйдӧ Франческа бойыныҥ јуук улузыла кожо болорго кӱӱнзеген де болзо, пандемиянаҥ улам барар арга јок болды. Бу мындый кӱч ӧйди ӧдӱп чыгарга, Франческага не болушкан? Баштапкызында, олор ӧткӱре санааркабаска ла уур-кӱчтерди ӧдӱп чыгарга, Иегованаҥ ойгор сурагылаган. Иегова олордыҥ мӱргӱӱлине бойыныҥ организациязы ажыра каруу берген. Темдектезе, олор бир аканыҥ видеоинтервьюзынаҥ мындый оморкодулу сӧстӧр уккан: «Јаҥы айалгага капшай эптежип алзаас, сӱӱнчи аларыс ла ӧйди калас ӧткӱрбезис c». Экинчизи, олор телефонло оноҥ јакшы јарлаар деп шӱӱп алган, керек дезе Агару Бичикле ӱредӱ де баштаган. Ӱчинчизи, олор јербойындагы ака-эјелердиҥ болужын сӱреен тыҥ баалаган. Темдектезе, бир эје олорго кажы ла кӱн бир јылдыҥ туркунына Агару Бичиктиҥ јакшы шӱӱлтелерин  аткаратан. Бис база ол миссионерлер ле чылап јаҥы айалгага тӱрген эптежип алзаас, база јаан сӱӱнчи аларыс ла бу айалганы тузалу ӧткӱрерис.

10. Бир эје јӱрӱминде болгон јаан солынтага канайып эптежип алган?

¹⁰ Ичкери кӧрӱп, јакшы немеге ајарып тураар. Японияда јадып турган румын укту Кристина оныҥ јӱрӱп турган английский тилдӱ јууны јок болуп каларда, коркышту кунуккан. Андый да болзо, ол ичкери кӧрӧргӧ албаданган. Кристина японский тилдӱ јуунга јӱрӱп, јарлаар иште эрчимдӱ туружып баштаган. Ол качан да оныла кожо иштеген ӱй кижини ого японский тилди Агару Бичиктиҥ ле «Јажын-чакка ырысту јӱригер!» деген брошюраныҥ болужыла ӱренерге болужып берзин деп сураган. Ол ӱй кижи јӧпсине берген. Бу неге экелген? Кристина японский тилди ӱренип алган, је эҥ учурлузы ол ӱй кижи чындыкла јилбиркеп баштаган. Качан бис ичкери кӧрӱп, јакшы немеге ајару эдип турзаас, сакыбаган јанынаҥ болгон солынталар биске сакыбаган алкыштар экелет.

11. Бир биле экономический кризисти канайып ӧткӧн?

¹¹ Улуска болужыгар. Бистиҥ ижисти токтодып салган ороондо экономический кризис башталарда, бир биледе акча-манат јанынаҥ кӱчтер башталган. Бу ӧйдӧ олор нени эткен? Олор озо ло баштап, јӱрӱмин јеҥилткен, оныҥ кийнинде бойлорыныҥ кӱчтерин сананып отурбай, улуска болужып, эрчимдӱ јарлап баштаган (Ап. ижи 20:35). Ӧбӧӧни айдат: «Бис кӧп јарлаганыс ла агару иште эрчимдӱ турушканыс. Оныҥ учун бисте бойысты карамдап отурар ӧй дӧ јок болгон». Бистиҥ айалга солынып турза, улуска оноҥ ары болужар керек. Је эҥ керектӱзи — Каандык керегинде сӱӱнчилӱ јарды улуска јарлаары.

12. Апостол Павелдиҥ теми биске јарлаар иште эпчил болорго канайып болужат?

¹² Биске јарлаар иште эпчил болор керек. Нениҥ учун дезе бис башка-башка улуска туштайдыс. Олордыҥ культуразы да, угы-тӧзи де, јӱрӱмге кӧрӱми де башка болот. Темдектезе, апостол Павел коркышту эпчил кижи болгон, бис оноҥ тем алар аргалу. Оны Иисус «ӧскӧ калыктарга» апостол эдип кӧстӧгӧн (Рим. 11:13). Апостол Павел бу ишти сӱреен јакшы бӱдӱрген. Ол јӱк ле иудейлерге эмес, је грек те улуска, ӱредӱлӱ де, ӱредӱ јок то улуска, анайда ок чиновниктерге де, каандарга да јарлаган. Бу улустыҥ јӱрегин томултарга, ол «ончозына ончозындый боло берген» (1 Кор. 9:19—23). Павел олорло куучын баштаардаҥ озо, олордыҥ кандый айалгада чыдап ӧскӧнин, культуразын ла кудай јаҥын ајаруга алып туратан. Айдарда, јарлаар иште эпчил болуп, кажы ла кижиге канайып болужарын шӱӱп сананып турзаас, сӱӱнчилӱ јарды соныркап уккан кажы ла кижиниҥ јӱрегин томултар аргалу болорыс.

13. 1 Коринфтегилерге 8:9-та айдылганыла болзо, ака-эјелердиҥ санаа-шӱӱлтезин тооп турзаас, бис нени этпезис?

¹³ Бис керсӱ болзоос, ӧскӧ улустыҥ кӧрӱм-санаазын тооп турарыс. Темдектезе, кезик эје-сыйындарга будынарга јарап јат, је кезиги чек будынбай јат. Ол эмезе бистиҥ кезигис аракыны чек ичпей јат, а кезиги ӧйлӱ-кемдӱ ичип јат. Анайда ок бастыра ака-эјелер су-кадык  болорго кӱӱнзеп јат, је олордыҥ кажызы ла башка эм тус талдап, эмденгилеп јат. Је бис бу сурактарда бойыстыҥ кӧрӱмисти ака-эјелерге албадабай јадыс. Оноҥ башка јуунныҥ бирлиги бузылып, бӱдӱрилетен таш болуп калардаҥ айабазыс. Бис анай кӱӱнзебей турган эмейис! (1 Коринфтегилерге 8:9 кычырыгар; 10:23, 24). Оноҥ ары эки башка суракта, аайлу-башту ла амырды буспаска, библиялык принциптер канайып болужып турганын кӧрӱп ийектер.

14. Кийим ле причёска јанынаҥ кандый принциптер болужар?

¹⁴ Кийим ле тыш бӱдӱм. Иегова кандый кийим кийетенине некелтелер тургуспай јат, оныҥ ордына ол биске принциптер берген. Агару Бичикте айдылганыла, Кудайдыҥ ишчилери керсӱ болуп, эптӱ кийинер учурлу (1 Тим. 2:9, 10; 1 Пётр 3:3). Бис тыш бӱдӱмиске улус ӧткӱре јаан ајару этсин деп кӱӱнзебей јадыс. Агару Бичикте айдылган принциптерле акалар јуунныҥ улузына кандый кийим кийерине ле кандый причёскалу болорына ээжилер тургуспай јат. Бир јуунда кезик карындаштар мода аайынча чачын кыска кайчыладып, атрайтып алатан болгон. Олорго аксагалдар бойыныҥ кӧрӱмин айтпай, аймак кӧрӧӧчиниҥ јӧбиле мынайып айткан: «Сценада јакылта бӱдӱрип јатсагар, ака-эјелер слердиҥ айткан сӧстӧрӧӧрди эмес, је тыш бӱдӱмеерге ле чачарга кӧп ајару эдип турган болзо, сананып кӧрӱгер». Анайып, карындаштар нени солыырын оҥдоп ийген, је аксагалдар дезе ээжилер тургуспаган d.

15. Эмденер арганы талдап тура, бис кандый принциптерле, јасактарла башкарынадыс? (Римдегилерге 14:5).

 ¹⁵ Су-кадык аайынча сурактарда. Кажы ла христиан кижи эмденери јанынаҥ суракты бойы кӧрӱп јат (Гал. 6:5). Је јӱк ле эки немеде Иегова јарт јасактар берип салган, биске канды тузаланбас керек ле спиритизмле урушпас керек (Ап. ижи 15:20; Гал. 5:19, 20). Је ӧскӧ немеде ака-эјелер канайып эмденерин бойы кӧрӱп јат. Оныҥ учун бистиҥ кезигис јӱк ле больницаларда эмденип јат, а кезигис алтернативный аргалар бедирейт. Је бис бойыстыҥ кӧрӱмисти бой-бойыска албадабай јадыс. Анайып этпеске биске мындый шӱӱлтелер болужар: 1) јӱк ле Кудайдыҥ Каандыгы башкарза, ӱзе улус су-кадык болор (Иса. 33:24); 2) канайып эмдензе јакшы болорын кажы ла кижи бойы кӧрӧт (Римдегилерге 14:5 кычырыгар, JT); 3) ака-эјелердиҥ талдап алганын јамандабас керек, оноҥ ӧскӧ олорго буудак болуп каларыс (Рим. 14:13); 4) ака-эјелер олордыҥ кӧрӱминеҥ улам јуунныҥ бирлиги бузулып калбазын деп албаданат, анайып олор сӱӱжин кӧргӱзет (Рим. 14:15, 19, 20). Бу шӱӱлтелерди ундыбай турзаас, јуундагы амыр бузылбас.

16. Аксагалдардыҥ јӧптӧжӱзи болуп јаткан тушта, керсӱ аксагал нени этпей јат? (Јурукты база кӧрӱгер.)

¹⁶ Аксагалдар керсӱ болоры јанынаҥ ака-эјелерге тем кӧргӱзедилер (1 Тим. 3:2, 3). Темдектезе, јажы јаан аксагал јиит аксагалдарды јаантайын ла оныҥ кӧрӱмиле јӧпсинер учурлу деп сананбай јат. Нениҥ учун дезе ол оҥдоп јат: Иегованыҥ агару тыны ойгор шӱӱлтени кажы ла аксагалга берер аргалу деп. Оныҥ учун кӧрӱми башка аксагал, библиялык принциптер бузулбай турган болзо, аксагалдардыҥ чыгарган јӧбине јӧмӧжип јат.

17. Керсӱ улуста кандый алкыштар бар?

¹⁷ Бис керсӱ болзоос, кӧп алкыштар аладыс. Темдектезе, ака-эјелерисле нак јӱредис, јуунда да амыр-энчӱ. Кандый ла культуралу, кылык-јаҥду да болзоос, Иегованыҥ јаан билезинде болодыс. Је эҥ ле јаан алкыш — Иеговага, керсӱ Кудайыска, там ла там тӱҥей болуп турганыска сӱӱнип јадыс.