1. Нениҥ учун ар-бӱткенниҥ тӱбегине белетенип алары ойгор болот?

 БЕЛЕТЕНГЕНИ јӱрӱмди аргадаар аргалу. Темдектезе, ар-бӱткенниҥ тӱбегине озолондыра белетенип алган кижи бойыныҥ да јӱрӱмин аргадап алар аргалу, ӧскӧ дӧ улуска болужар аргалу. Бир Европаныҥ гуманитарный организациязы: «Јакшы белетенгени јӱрӱмди аргадаар аргалу» — деп айткан.

2. «Улу тӱбекке» биске нениҥ учун белетенер керек? (Матфей 24:44).

² «Улу тӱбек» (ЈТ) кенетийин башталар (Матф. 24:21). Је ол ӧскӧ тӱбектерге кӧрӧ, ончо улуска сакыбаган јанынаҥ болбос. 2 000 јыл кире кайра Иисус бойыныҥ ӱренчиктерине бу кӱнге белетенип алар керек деп айткан. (Матфей 24:44 кычырыгар.) Бу тӱбекке белен болзоос, ол јеҥил эмес ӧйдӧ турумкай артарыс ла ӧскӧ улуска болужар аргалу болорыс (Лука 21:36).

3. Бистерге улу тӱбекке белетенип аларга, сӱӱш, килемји ле турумкай болоры канайып болужар?

³ Улу тӱбекке белетенип аларга болужатан ӱч кылык-јаҥ шӱӱжип ийектер. Бистерге јаргылу јарды айтсын деп јакыза, ол ок ӧйдӧ бӱтпей турган улус удурлажып баштаза, бис канайдарыс? (Ачыл. 16:21). Иегованы угарга ла ол бисти корулап алар деп алаҥзыбаска, бистерге — турумкай артары болужар. Ака-эјелерис ар-јӧӧжӧзин јылыйтып алза, бис канайдарыс? (Авв. 3:17, 18). Олорго болужарга, килеҥкей болор керек. Албатылардыҥ коалициязы табарган тушта ака-эјелерле тапчы јерде јажынарга келишсе, бис нени эдерис? (Иез. 38:10—12). Биске бу јеҥил эмес ӧйди кожо ӧдӱп чыгарга, олорды сӱӱр керек.

4. Агару Бичик сӱӱшти, килемјини ле турумкай болорын тыҥыдар керек деп канайып кӧргӱзет?

⁴ Агару Бичик бистерди сӱӱшти, килемјини ле турумкай болорын тыҥытсын деп кӱӱнзедет. Лука 21:19-та  (ЈТ): «Турумкай болуп, јӱрӱмигерди аргадап алыгар» — деп айдылат. А Колоссыдагыларга 3:12-де (ЈТ): «Килеерин... кийимди чилеп кийип алыгар» — деп айдылган. Анайда ок 1 Фессалоникадагыларга 4:9, 10-до: «Кудай бой-бойыгарды сӱӱрге ӱредип койгон ине. [...] Је слерди кычырып турубыс, карындаштар: бой-бойыгарды оноҥ тыҥ сӱӱгер» — деп бичилген. Бу сӧстӧр бу ӱч кылык-јаҥды јӱрӱминде кӧргӱскен чындык христиандарга айдылган. Је андый да болзо, олорго бу кылык-јаҥдарды оноҥ ло ары тыҥыдар керек болгон. Биске база анайып ла эдерге не болужарын кӧрӱп ийектер. Баштапкы чактыҥ христиандары бу кылык-јаҥныҥ кажызын ла канайып кӧргӱскенин шӱӱжип ийектер. Оноҥ бис олордоҥ кандый тем аларын кӧрӱп ийерис. Анайып, улу тӱбекке бис белен бе деп кӧрӱп ийерис.

5. Озогы христиандарга кӱчтерди турумкай артып ӧдӧргӧ не болушкан?

⁵ Озогы христиандарга турумкай болор керек болгон (Евр. 10:36). Олордо бастыра улуста болуп турган кӱчтердиҥ ӱстине ӧскӧ дӧ ченелтелер болгон. Темдектезе, олордыҥ кӧп сабазы јаҥыс ла иудей кудай јаҥныҥ башчыларыныҥ эмезе Римниҥ башчыларыныҥ эмес, је јуук тӧрӧӧн-туугандарыныҥ да удурлажуларына табарткандар (Матф. 10:21). А кезикте олорго јуунныҥ ичинде јана баскандардыҥ ла олордыҥ ӱредӱлериле тартыжарга келишкен болгон (Ап. ижи 20:29, 30). Је андый да болзо, ол христиандар турумкай арткан (Ачыл. 2:3). Олорго не болушкан? Агару Бичикте Иовтый турумкай арткан улустыҥ темин шӱӱп сананганы болушкан (Иак. 5:10, 11). Анайда ок олор мӱргӱп, Иегованаҥ ийде-кӱч сураган (Ап. ижи 4:29—31). Бого ло коштой турумкай артса, Иегова олорды кайралдаар деп ундыбагандар (Ап. ижи 5:41).

6. Удурлажуларды ӧдӱп чыгарга Меританыҥ теми слерге канайып болужар?

⁶ Агару Бичиктеҥ ле бистиҥ бичиктердеҥ турумкай болгон улустыҥ темин јаантайын шӱӱп сананып турзаас, бис база турумкай артар аргалу. Бу Албанияда јадып турган Мери́тага билезиниҥ удурлажузын ӧдӱп чыгарга болушкан. Ол куучындайт: «Мениҥ јӱрегимге Иовтыҥ теми сӱреен тыҥ тийген. Ол андый тыҥ шыралаган. Керек дезе кемнеҥ улам шыралап турганын билбеген де болзо, ол: „Ӧлӧрдиҥ ӧлгӧнчӧ јек јок болуп артарым!“ — деп айткан. Мен санандым, мениҥ кӱчтеримге кӧрӧ, Иовтыҥ кӱчтери канча киреге кӱч болгон, је Иовко кӧрӧ, мен кемнеҥ улам шыралап турганымды билгем» (Иов 27:5).

7. Слерде эм тургуза тыҥ кӱчтер болбой до турган болзо, нени эдерге ӱренип алар керек?

⁷ Слер јаантайын јӱрегерде не барын ӱзе Кудайга ачып, мӱргӱп турзаар, оноҥ турумкай болуп калараар (Флп. 4:6; 1 Фес. 5:17). Је слерде эм тура кӱчтер болбой до турган болзо, бойоордоҥ мынайып сурагар: «Мен нени эдерин билбей де турган айалгада, санааркап турган тужымда, Иегова Кудайдаҥ болуш сурайдым ба?» Кандый да кӱчтер болуп турза, Кудайдаҥ болуш сурап ӱренип калган болзоор, слердиҥ јӱрӱмеерде тыҥ ченелтелер башталза, слерге Кудайга баштанарга јеҥил болор. Ол тушта Иегова качан ла канай болужарын билер деп, слер бир де алаҥзыбазаар (Сар. 27:1, 3).

8. Бис бӱгӱнги кӱнде болуп турган ченелтелерде турумкай артып турзаас, болотон ченелтелерди ӧдӱп ийерис деп, Мираныҥ теми канайып кӧргӱзет? (Иаков 1:2—4). (Јурукты база кӧрӱгер.)

⁸ Бис бӱгӱнги кӱнде болуп турган  ченелтелерде турумкай болзоос, бу биске улу тӱбекти ӧдӱп чыгарга болужар (Рим. 5:3). Нениҥ учун мынай айдарга јараар? Кӧп акалар мындый немени ајаруга алган: качан олор ченелте тужында турумкай артарда, база бир келген ченелтени ӧдӧргӧ олорго јеҥил болгон. А бу Иегова олордыҥ јанында ла ол олорго болужарга белен деп бӱдӱмјизин тыҥыткан. А бӱдӱмји болотон ченелтелерде турумкай артарга болушкан. (Иаков 1:2—4 кычырыгар.) Албанияда јадып турган Ми́ра деп пионерге турумкай артарга алдында ӧткӧн кӱчтери болужат. Кезикте јӱк ле ондо андый кӧп кӱчтер деп билдирет. Ол тушта ол калганчы 20 јылдыҥ туркунына Иегова ого канайып болушканын эске алып, бойына мынайып айдат: «Колыҥды бош салба! Иегова сеге не аайлу болушкан эди. Сен оныҥ болужыла андый кӧп ченелтелерди ӧдӱп чыкканыҥды ундыба». Слер де Иегованыҥ болужыла ченелтелерди канайып ӧткӧнӧӧрди эске алар аргалу. Ол тушта улу тӱбек башталар алдында, слерде ченелтелерди ӧдӧтӧн ченемел болор ло оноҥ ло ары турумкай артарга албаданараар. Анайда ок Иегова слердиҥ ӧдӱп турган кажы ла ченелтегерди кӧрӱп турган ла турумкайаар учун слерди кайралдаар деп бир де алаҥзыбагар (Матф. 5:10—12).

9. Сирияныҥ Антиохия деп јериниҥ чындык христиандары килемјизин канайып кӧргӱскен?

⁹ Иудей јеринде коркышту тыҥ торо башталарда не болгонын кӧрӱп ийектер. Сирияныҥ Антиохия деп калазында јадып турган христиандар мыны угуп ийеле, Иудей јериниҥ ака-эјелерин сӱреен тыҥ килеген. Олор килегенин јӱк ле сӧстӧрлӧ эмес, керектериле кӧргӱскен. Оныҥ учун «Иудейде јаткан карындаштарга арга-кӱчи јеткенче болужар болуп јӧптӧштилер» (Ап. ижи 11:27—30). Је Иудей јери ыраак та болгон болзо, Антиохияныҥ ака-эјелери олорго болужарга тыҥ кӱӱнзеген (1 Иоанн 3:17, 18).

10. Тӱбек болгон јерде јадып турган ака-эјелерге килемјибисти канайып кӧргӱзерис? (Јурукты база кӧрӱгер.)

¹⁰ Бис тӱбекке тӱшкен ака-эјелерди килеп турганыс деп база кӧргӱзер аргалу. Темдектезе, аксагалдарга болужарга белен b болгонысты айдадыс, телекейлик ишке акча-манатла болужадыс ла тӱбекке тӱшкендер учун мӱргӱйдис (Укаа 17:17). 2020 јылда COVID-19-таҥ улам шыралагандарга болужарга, 950-неҥ ажыра болуш јетиретен комитеттер тӧзӧлгӧн. Ол комитеттерле кожо иштеп турган ака-эјелерди јылу сӧстӧрлӧ мактап јадыбыс! Килеҥкейинеҥ улам олор ака-эјелерге гуманитарный болуш јетирет, ич-кӧгӱс јанынаҥ бек артарга болужат, а кезик учуралдарда тураларды ла Каандыктыҥ Тураларын јазайт эмезе јаҥыдаҥ туткылайт. (2 Коринфтегилерге 8:1—4 тӱҥдештиригер.)

11. Бистиҥ јакшы керектерис теҥеридеги Адабысты канайып мактайт?

¹¹ Ар-бӱткенниҥ тӱбегинеҥ улам шыралап калган улуска болужып турзаас, эткен керектерис ајару јок артпай јат. Темдектезе, 2019 јылда «До́риан» деген јоткон Багамада Каандыктыҥ Туразын јемирип салган. Качан бистиҥ акалар Каандыктыҥ Туразын орныктырарга, Керечи эмес бир кижини јалдап, ижи учун канчаны тӧлӧйтӧн деп  сураарда, ол кижи айткан: «Мен иштенетен јепселдерди ле улустарды, анайда ок материалдарды анайда ла берерим. Слердиҥ организацияга јакшы та нени де эдер кӱӱним бар. Нениҥ учун дезе слердиҥ бой-бойыгарга болужып турганаар мениҥ јӱрегимди тыҥ томулткан». Телекейде кӧп саба улус Иегованы билбес. Је олордыҥ кӧп сабазы Иегованыҥ Керечилериниҥ керектерин лаптап кӧрӧт. Јакшы керектерисле улусты «килеҥкейиле бай» (ЈТ) Кудайга јууктадары — јаан кӱндӱ! (Эф. 2:4).

12. Эмдиги ӧйдӧҥ ала килеҥкей болорына ӱренип турганы́с улу тӱбекке белетенерге канайып болужар? (Ачылта 13:16, 17).

¹² Нениҥ учун биске улу тӱбектиҥ ӧйинде килеҥкей болор керек? Политикага јӧмӧшпӧй тургандарда бӱгӱнги де кӱнде, улу тӱбектиҥ де ӧйинде кӱчтер болор деп, Агару Бичик јарт айдат. (Ачылта 13:16, 17 кычырыгар.) Оныҥ учун ака-эјелер эҥ керектӱ немелерге јединбей барардаҥ айабас. Удабас бистиҥ Кааныс, Иисус Христос, Кудайдыҥ јаргызын бӱдӱрерге келер. Айдарда, бу ӧйдӧ биске ака-эјелерге килеҥкей болор керек. Ол тушта Иисус биске: «Каандыкты энчиленигер» — деп айдар (Матф. 25:34—40).

13. Павелдиҥ Римдегилерге 15:7-деги берилген јӧби баштапкы чактыҥ христиандарына сӱӱжин тыҥыдарга канайып болушкан?

¹³ Баштапкы чактыҥ христиандары сӱӱшле аҥыланган. Олорго бу кылык-јаҥды кӧргӱзерге јеҥил болгон бо? Тем эдип, Римдеги христиандардыҥ јуунын кӧрӱп ийектер. Ол јуунда башка-башка улус болгон. Ондо јаштаҥ ала Моисейдиҥ јасагын бӱдӱрген еврейлер де, чек башка айалгада ӧскӧн язычниктер де болгон. Олордыҥ ортозында јайым улус, кулдар да, кулдарлу улус та болгон. Олорго бу немелерге кӧрбӧй, бой-бойына сӱӱжин тыҥыдарга не болушкан? Апостол Павел олорды: «Бой-бойыгарды акту-кӱӱнигердеҥ јуудып турыгар» — деп кӱӱнзеткен. (Римдегилерге 15:7 кычырыгар.) Ол нени айдарга сананган? «Акту-кӱӱнигердеҥ јуудып турыгар» деген сӧстӧр «кемди де айылына кычырып, јылу уткыырын» эмезе «најыларыныҥ тоозына кожуп аларын» темдектейт. Темдектезе, Павел Филимонды качкын Онисимди акту кӱӱнинеҥ јуудып алзын деп кӱӱнзеткен (Флм. 17). Акила ла Прискилла дезе олорго кӧрӧ, христиан јаҥ керегинде ас билген Аполлосты айылындӧӧн кычырган (Ап. ижи 18:26). Ол христиандар башка-башка да болгон болзо, је бирлигин јылыйтпай, карын бой-бойлорын акту кӱӱнинеҥ јуудып тургандар.

14. Бир миссионер болуп турган биле сӱӱжин канайып кӧргӱскендер?

¹⁴ Ака-эјелерге бойыстыҥ јӱрегисти ачып, тыҥ албаданзаас, олор биске удура база јӱректерин ачар (2 Кор. 6:11—13). Аннаныҥ темин кӧрӱп ийектер. Аннаны ӧбӧӧниле кожо Кӱнбадыш Африкадӧӧн миссионерлердиҥ ижин эдерге кӧстӧп ийерде, COVID-19 деп пандемия башталган. Мынаҥ улам олордо јуунныҥ улузыла јууктада таныжатан арга јок боло берген. Је олор сӱӱжин канайып кӧргӱскен? Олор јуунныҥ улузыла таныжарга, видеосвязьла колбожып куучындашкылаган. Ол миссионерлердиҥ албаданып турганын кӧрӱп, јуунныҥ улузы олорго телефон согуп, СМС-тар бичиген. Анна ла ӧбӧӧни нениҥ учун мынайып албадангандар? Анна куучындайт: «Мениҥ билем кӱч те ӧйлӧрдӧ, сӱӱнчилӱ де ӧйлӧрдӧ ака-эјелердиҥ сӱӱжин јаантайын сескен. Бу  санаамга артып калган. Оныҥ учун сӱӱжимди кӧргӱзерге тыҥ кӱӱнзегем» — деп, Анна айтты.

15. Бисти Ванессаныҥ теми ончо ака-эјелерди сӱӱрге канайып ӱредет? (Јурукты база кӧрӱгер.)

¹⁵ Бис јуунда башка-башка культуралу, кылык-јаҥду ака-эјелерге туштаар аргалу. Оныҥ учун биске олордыҥ јакшы кылык-јаҥына ајару эдер керек. Ол тушта бистиҥ олорго сӱӱжис тыҥыыр. Јаҥы Зеландияда јарлап турган Ване́ссага кезик ака-эјелерле јеҥил эмес болгон. Је андый да болзо, ол ого јарабай турган ака-эјелердеҥ ырабай, карын олорло кӧп ӧй ӧткӱрерге албаданган. Бу ого Иегова олорды нениҥ учун сӱӱп турганын кӧрӧргӧ болушкан. Ванесса куучындайт: «Качан мениҥ обӧӧним аймак кӧрӧӧчи болуп каларда, бистиҥ куучындажып турган башка-башка кылык-јаҥду улустыҥ тоозы кӧптӧй берген. Је бу меге буудак болбогон, нениҥ учун дезе мен башка-башка улусты сӱӱрге ӱренип алгам. Иегова да сӱӱп јат. Нениҥ учун дезе ол бисти башка-башка болгоныска кӧрбӧй, бойына јууктадып алган». Качан улуска Иегованыҥ кӧзиле кӧрӱп турзаас, олорго сӱӱжисти кӧргӱзип јадыс (2 Кор. 8:24).

16. Нениҥ учун сӱӱш анчада ла улу тӱбектиҥ ӧйинде керектӱ болор? (Јурукты база кӧрӱгер.)

¹⁶ Улу тӱбектиҥ ӧйинде сӱӱшти кӧргӱзери анчада ла учурлу болор. Улу тӱбек башталза, Иегова бисти канайып корулаар? Мидо-Персияныҥ черӱзи Вавилонго табару эдип турарда, Кудайдыҥ албатызына нени эдер керек болгон? Агару Бичикте айдылат: «Мениҥ албатым, тӧриндеги кыптарыҥа кирип, эжиктерди бӧктӧп ал. Мениҥ чугулым ӧтпӧгӧнчӧ, бир эмеш ӧйгӧ јажынып ал» (Иса. 26:20). Бу сӧстӧр биске, улу тӱбектиҥ алдында јадып тургандарга, келижип турган ошкош. «Тӧриндеги кыптар» бистиҥ јуундарысты темдектеп турган болор. Бисти Иегова кӧгӱс билегисле кожо болзоос, улу тӱбектиҥ ӧйинде аргадап алар. Оныҥ учун бистерге ака-эјелерди јӱк ле чыдажар керек эмес, је сӱӱр керек. Мынаҥ бистиҥ јӱрӱмис камаанду!

17. Бис эмди ле белетенип турзаас, улу тӱбектиҥ ӧйинде нени эдер аргалу болорыс?

¹⁷ «Иегованыҥ улу кӱни» бастыра кижиликке коркышту коркымчылу ӧй болор (Соф. 1:14, 15). Иегованыҥ албатызына база јеҥил болбос. Је эмдештеҥ ле белетенип турзаас, ол ӧйдӧ токыналу артып, ӧскӧ дӧ улуска болужар аргалу болорыс. Ол тушта јолыбыска туштаган кандый ла кӱчтерди турумкай ӧдӱп чыгарыс. Анайда ок бистиҥ ака-эјелер тӱбекке тӱшсе, олорды килеп, канча кире аргабыс бар, олорго болужарыс. Бисти сӱӱген ака-эјелеристеҥ не де ырадып болбос. Ол тушта Иегова бисти кыйын-шыра јок ӱргӱлји јӱрӱмле кайралдаар (Иса. 65:17).