1. Слер Агару Бичикти ӱренип баштайла, нени билип алганаар?

 АГАРУ БИЧИКТИ канайып ӱренип баштаганаарды эске алып ийзеер де. Слер Кудайда ады бар деп билип ийеле, сӱреен кайкаган болороор. Кудай отту таамыда улусты кыйнабай турган деп угала, кӧксигерде јеҥил боло берген болор. Анайда ок божоп калган јуук улузаарды ойто катап кӧрӧрӧӧр лӧ олорло кожо райда јадараар деп угала, не аайлу сӱӱнген болороор!

2. Кӧгӱс ӧзӱмигерди куучындап беригер (Эфестегилерге 5:1, 2).

² Агару Бичикти канча ла кире кӧп ӱренип баштараарда ончо ло кире Иеговага сӱӱжеер тыҥыган. А бу сӱӱш билип алганаарды тузаланарга кӱӱнзеткен. Библиялык принциптерди тузаланып баштараарда, јӱрӱмеер јакшы јанындӧӧн солынган. Анайда ок слер Иегованы сӱӱндирерге кӱӱнзегенеер. Оныҥ учун бойыгардыҥ санаагарды ла керектереерди солыганаар. Канайып бала ада-энезине тӱҥей болорго кӱӱнзеп јат, анайда ла слер Иеговага тӱҥей болорго албаданып баштаганаар. (Эфестегилерге 5:1, 2 кычырыгар.)

3. Бойыска кандый сурактар берерге јараар?

³ Бойыгардаҥ сурагар: «Иеговага сӱӱжим чӧҥӱрилгенимнеҥ бери оноҥ тыҥ болуп калган ба? Мениҥ кӧрӱмим ле эдип турган керектерим Иегованыҥ кӧрӱм-санаазына тӱҥей бе? Темдектезе, мен ака-эјелерге сӱӱжимди кӧргӱзип тургам ба?» «Баштапкы сӱӱжигер» бир эмеш сооп калган болзо, санааркабагар. Бого тӱҥей неме баштапкы чактыҥ христиандарында база болгон. Је Иисус олорды таштабаган. Ол слерди де таштабас (Ачыл. 2:4, 7). Анайда ок Иисус сӱӱжигерди ойто тыҥыдып алараар деп алаҥзыбай јат.

4. Бу јӧрмӧлдӧ бис нени кӧрӧрис?

 ⁴ Бу јӧрмӧлдӧ озо ло баштап Иегова ла јуугыска оноҥ ло ары сӱӱжибисти канай тыҥыдарын кӧрӧрис. Анайда ок оноҥ ло ары сӱӱжисти ӧскӱрзеес, кандый алкыштар аларысты шӱӱжип ийерис.

5, 6. а) Апостол Павел кандый кӱчтерге туштаган? б) Павелге Кудайга оноҥ ло ары чӧкӧбӧй иштеерге не болушкан?

⁵ Апостол Павел Иеговага иштеп тура сӱӱнчилӱ јӱрӱм јӱрген. Је андый да болзо, оныҥ јӱрӱминде ас эмес кӱчтер болгон. Ол кӧп јорыктайтан. Је ол ӧйдӧ јорыктаарга јеҥил эмес болгон. Јолдо ол кӧп катап јеткерге туштаган. Темдектезе, сууларда јеткерлӱ айалгада болгон, тонокчыларга туштаган, анайда ок оны чындыктыҥ ӧштӱлери канча катап соккон (2 Кор. 11:23—27). Кезикте акалар оныҥ акту кӱӱнинеҥ олорго болужарга албаданганын баалабайтан (2 Кор. 10:10; Флп. 4:15).

⁶ Павелге чӧкӧбӧскӧ не болушкан? Ол Бичимелдеҥ ле бойыныҥ ченемелинеҥ Иегова оны сӱреен тыҥ сӱӱп турган деп билип алган (Рим. 8:38, 39; Эф. 2:4, 5). Ол бойы да Иегованы тыҥ сӱӱген. Оныҥ бу сӱӱжи кӧп катап «агаруларга болушканы[наҥ]» кӧрӱнет (Евр. 6:10).

7. Иеговага сӱӱжисти ӧскӱрерге биске не болужар?

⁷ Иеговага сӱӱжисти ӧскӱрерге, оныҥ Сӧзин тереҥ шиҥдеп кӧргӧни болужар. Слер Агару Бичикти кычырып јатсаар, кажы ла ӱзӱк Иегова керегинде нени айдат деп билип аларга албаданыгар. Бойоордоҥ мынайып сурагар: «Бу ӱзӱктеҥ Иегова мени сӱӱп турган деп канайып кӧрӱнет? Бу ӱлгерлер мени Иегованы сӱӱрге канайып кӱӱнзедет?»

8. Мӱргӱӱл Иегованы тыҥ сӱӱрге канайып болужат?

⁸ Анайда ок Иеговага сӱӱжисти ӧскӱрерге, ого јаантайын бойыстыҥ сезимдеристи куучындап турар керек (Сар. 25:4, 5). Иегова бистиҥ мӱргӱӱлдериске каруу берер (1 Иоанн 3:21, 22). Азияда јадып турган Кхан b эје мынайда куучындайт: «Агару Бичикти ӱренип турала, Иегованы јакшы билип алгам ла оны сӱӱп баштагам. Је Иегованыҥ мӱргӱӱлдеримге каруу берип турганын кӧрӧлӧ, оны оноҥ тыҥ сӱӱй бергем. Мынаҥ улам мен јаантайын Иеговага јараар эдип јӱрерге кӱӱнзеп јадым».

9. Бис Тимофейдиҥ ака-эјелерге сӱӱжин тыҥытканын недеҥ кӧрӧдис?

⁹ Павел христиан болуп калган кийнинеҥ, канча да јылдыҥ бажынаҥ, Тимофей деп сӱреен јакшы уулла танышкан. Ол Иегованы ла улусты тыҥ сӱӱген. Павел Тимофей керегинде Филиппыдагыларга христиандарга мынайда айткан: «Менде Тимофейдеҥ башка, слерге акту јӱрегинеҥ болужатан кӱӱн-санаалу кижи јок» (Флп. 2:20, ЈТ). Мында ол Тимофейди улусты јакшы башкарып турганы ла куучын-эрмектерди јакшы айдып турганы учун мактаган эмес, је оныҥ ака-эјелерди акту кӱӱнинеҥ сӱӱгенине ајару эткен болор. Ака-эјелер Тимофейдиҥ келерин энчикпей сакыган деп алаҥзыбай јадыс (1 Кор. 4:17).

10. Анна ла оныҥ ӧбӧӧни ака-эјелерге сӱӱжин канайып кӧргӱскен?

 ¹⁰ Бис ака-эјелерге болужатан аргаларды база бедирейдис (Евр. 13:16). Ӧткӧн јӧрмӧлдӧ айдылган бир билениҥ учуралын кӧрӱп ийектер. Бу эш-нӧкӧрлӧр јаан јотконныҥ кийнинеҥ бир билениҥ айылына барып јӱрген. Анна эје куучындайт: «Јотконноҥ улам тураныҥ крышазы јемирилип калган. Оныҥ учун олордо ару кийим де артпаган. Бис олордыҥ кийимдерин алып, јунала, јазап туруп утюгтап ийеле, јараштыра салып, олорго апарып бергенис. Мыны эдерге биске бир де кӱч болбогон. Је анайып, бис јуук најылар болуп калганыс. Эмдигенче ле најылажып јадыс». Айдарда, миссионерлер болуп турган бу эш-нӧкӧрлӧрди ол билеге болужарга сӱӱш кӱӱнзеткен (1 Иоанн 3:17, 18).

11. а) Улус бистиҥ сӱӱжисти кӧрӱп, нени сезет? б) Укаа сӧстӧр 19:17-ле болзо, бис улуска сӱӱжисти кӧргӱзип турзаас, Иегова нени сезет?

¹¹ Улуска јалакай болзоос, олор бисти Иегованаҥ тем аларга турган деп, кӧрӱп ийет. Бистиҥ јакшы керектерис олордыҥ јӱректерин томултканын бис качан да билбестеҥ айабазыс. Ӧрӧги айдылган Кхан эје ого болушкан эјелерди эске алынып, айдат: «Мени јарлаар ишке алып болушкан эјелерге јаан быйанымды айдадым! Олор машиналу келип, мени отургузала, јарлаар ишке апаратан. Оноҥ бис кожо ажанып ийетенис, оноҥ олор мени јарлаар иштиҥ кийнинеҥ кайра јетиргизип салатан. Эмди мен оҥдоп јадым, анай болужарга база керек ле. Је олор мыны акту сӱӱжинеҥ эткен. Мен олорго коркышту јаан быйаным айдар кӱӱним бар. Мен олордыҥ кайда јадып  турганын билбезим, је Иегова билер. Оныҥ учун Иегова олорго алкыжын јетирзин деп, мӱргӱп тургам». Кхан эје чын айдат, улус биске быйанын айтпастаҥ айабас, је Иегова бистиҥ кичинек те јакшы керектеристи кӧрӱп турган. Бис кемге-кемге болужып ийзеес, Иегова мыны баалап, бойын биске тӧлӱлӱ деп кӧрӧт. (Укаа сӧстӧр 19:17 кычырыгар.)

12. Акалар јуунга сӱӱжин канайып кӧргӱзер аргалу? (Јуруктарды база кӧрӱгер.)

¹² Сен ака болзоҥ, улуска сӱӱжиҥди кӧргӱзерге нени эдер эдиҥ? Джо́рдан деп карындаш ака-эјелерге кӧп болужарга турганын аксагалга куучындаган. Аксагал дезе оны јакшы керектер эдип турганы учун мактап ийеле, кезик јӧптӧр берген. Темдектезе, јуунныҥ туштажузына эрте келип, ака-эјелерди уткып турзын, јуунда јартамалдар берип турзын, бойыныҥ јарлаар ижиниҥ бӧлӱгиле јаантайын јарлап турзын, анайда ок ака-эјелерге канайып болужарын сананып кӧрзин деген. Джордан бу јӧптӧрдиҥ ончозын бӱдӱрген. Анайып, ол јӱк ле керектӱ немелерге эмес, је ака-эјелерди оноҥ тыҥ сӱӱрге ӱренип алган. Джордан мындый неме оҥдогон: јуунда болушчы ишчи болуп калзаҥ, сен улуска јаҥы ла болужып баштап јаткан эмезиҥ, а оноҥ ары болужып јадыҥ (1 Тим. 3:8—10, 13).

13. Кристиан ака сӱӱжин оноҥ ло ары кӧргӱскенинеҥ улам канайып ойто аксагал болуп калган?

¹³ Сен болушчы ишчи эмезе аксагал болбой барган болзоҥ, канайдар? Бир де алаҥзыба, Иегова сениҥ јакшы керектериҥди ле сӱӱжиҥди бир де ундыбаган (1 Кор. 15:58). Ол эмди де сени баалап јат. Кри́стиан деп ака аксагал болбой барарда, коркышту тыҥ  санааркаган. Ол айдат: «Эмди мен аксагал эмес те болзом, Иеговага бастыра ийде-кӱчимди берип, тӱҥей ле оноҥ ары иштеерим деп, бек шӱӱп алгам». Бир канча ӧйдӧҥ Кристиан ака ойто аксагал болуп калган. Ол айдат: «Баштап тарый мен бир эмеш эпјоксынып туратам, је оноҥ Иегова јаманымды таштап, мени аксагалдыҥ ижине ойто јарадып саларда, бу ижимди јакшы бӱдӱрерим деп санангам. Нениҥ учун дезе Иегова Кудайымды ла јуунда ака-эјелеримди сӱӱп јадым».

14. Грузиядагы эјениҥ сӧстӧри слерди неге ӱредет?

¹⁴ Иегованыҥ ишчилери ӧскӧ дӧ улуска сӱӱжин кӧргӱзет (Матф. 22:37—39). Грузияда јадып турган Елена мынайда айдат: «Мен баштап тарый јӱк ле Иегованы сӱӱп турганым учун јарлап туратам, је Иегованы оноҥ тыҥ сӱӱп баштаарымда, улусты да сӱӱп баштагам. Мен улуста кандый кӱчтер болуп турганын ла олорго не керегинде куучындазам јилбилӱ болор деп сананарга албадангам. Мыны канча ла кире сананзам, улуска ончо ло кире кӧп болужарга кӱӱнзегем» (Рим. 10:13—15).

15, 16. Јурукты кӧрӱгер. Улуска сӱӱжин кӧргӱзип тургандарга кандый алкыш берилер?

¹⁵ Ака-эјелериске кӧргӱскен сӱӱжис ӧскӧ дӧ улуска тузазын јетирет. Темдектезе, COVID-19 деп пандемияныҥ  ӧйинде, Пао́ло деп ака ӱйиле кожо јажы јаан ака-эјелерди јарлаар ишке туружар аргалу болзын деп, телефонло эшле тузаланарга ӱреткен. Бир эјеге планшетле тузаланарга коркышту кӱч болгон, је олордыҥ болужыла ол тӱҥей ле ӱренип алган. Анайып, эје Кайраканныҥ Эҥирине бойыныҥ тӧрӧӧндӧрин кычырарда, видеосвязь ажыра 60 кижи кожулган! Айдарда, Паоло аканыҥ ла оныҥ ӱйиниҥ ижи бу да эјеге, оныҥ тӧрӧӧндӧрине де тузазын јетирди. Кийнинде бу эје Паоло акага мындый сӧстӧр бичиген: «Бистерди, карганактарды, ӱредип турганаар учун јаан быйан. Иеговага ла бистерге эдип турган ижеерди качан да ундыбазым!»

¹⁶ Паоло бойына јаан ӱредӱ алган. Сӱӱш кижиниҥ билгирлеринеҥ ле јайалталарынаҥ артык. Ол айдат: «Мен алдында аймак кӧрӧӧчи болгом. Ака-эјелер куучын-эрмектеримди туку качан ундып салган болор, је билерим, олор, мениҥ олорго эткен јакшы керектеримди, эмдигенче ундыбаган».

17. Улуска болужып турзаас, база кемге туза болот?

¹⁷ Бис улуска болужып турзаас, бойыска кандый туза болорын кезикте билбей де турган болорыс. Андый учурал Јаҥы Зеландияда јадып турган Джо́натан деп акада болгон. Бир катап, ол изӱ суббот кӱнде јолдыҥ јанында јаҥыскан јарлап јӱрген пионер аканы кӧрӱп ийген. Оны кӧрӧлӧ, Джонатан келер субботто оныла кожо јарлаар ишке барарым деп сананды. Је оныҥ болужы оныҥ бойына кандый туза экелерин ол билбей де турды. Ака куучындайт: «Ол ӧйлӧрдӧ мен јарлаарга тыҥ ла сӱӱбейтем. Је ол пионер аканыҥ улусты канай ӱредип турганын ла улуска чындыкты угарга канай болужып турганын кӧрӱп, јарлаар ишти сӱӱй бергем. Анайда ок кӧгӱс јанынаҥ ӧзӧргӧ, јарлаар ишти сӱӱрге ле Иеговага јууктаарга болушкан сӱреен јакшы најылу болуп калгам».

18. Иегова бистеҥ нени сакыйт?

¹⁸ Иегованыҥ кӱӱниле болзо, бис ого до, улуска да сӱӱжисти тыҥыдар учурлу. Иеговага сӱӱжисти тыҥыдарга, Агару Бичикти кычырар, шӱӱп сананар ла кӧптӧдӧ мӱргӱп турар керек. Ака-эјелерге сӱӱжисти тыҥыдарга, олорго болужып турар керек. Ол тушта Иеговага да, кӧгӱс билегиске де оноҥ јуук болуп каларыс. Анайда ок олорло јажын-чакка најылажарыс!