31 ӰРЕНЕТЕН ЈӦРМӦЛ
«Турумкай ла бек болугар»
«Кару карындаштарым, турумкай ла бек болугар» (1 КОР. 15:58, ЈТ).
122 КОЖОҤ Турумкай болуп, јана баспагар!
БУ ЈӦРМӦЛДӦ a
1, 2. Христиан кижини нениҥ учун кӧп этажтарлу турага тӱҥейлеерге јараар? (1 Коринфтегилерге 15:58).
1970 ЈЫЛДЫҤ учында Токиодо 60 этажту тура тудулган. Ол ӧйдӧ улус ол тураны јерсилкиништерди канайып чыдашкай не деп кайкашкан. Бу тура канайып тудулган? Бу тура јер силкинзе келген толкунаҥ аҥтарылбай, карын оны араайладып ийетен конструкцияла тудулган. Христиандарды бу турага тӱҥейлеерге јараар. Нениҥ учун?
2 Христиан кижи ӧйинеҥ ӧткӱре кату да, ӧйинеҥ ӧткӱре јымжак та болбос учурлу. Бир јанынаҥ ол Иегованыҥ јасактарын ла нормаларын бир де буспай јат. (1 Коринфтегилерге 15:58, ЈТ кычырыгар.) Анайда ок Иеговага сӧсуккур болот ло улустыҥ кӧрӱмине јайылбай јат (Иак. 3:17). Је бу ла ок ӧйдӧ ого јымжак болор керек. Айалганы кӧрӱп, башкартуларды ойгор тузаланар керек. Бу јӧрмӧлдӧ озо баштап турумкай ла бек болорго нени эдер керек деп кӧрӧрис. Оноҥ Сатананыҥ бисти Иегованаҥ јайа тартарга кандый беш эп-арга тузаланып турганын кӧрӧрис. Анайда ок Сатанага удура турарга нени эдер керек деп шӱӱжерис.
ТУРУМКАЙ БОЛОРГО НЕНИ ЭДЕРИС?
3. Апостолдордыҥ ижи 15:28, 29-та Эҥ Бийик Јасак Чыгараачыныҥ кандый јасактары бичилген?
3 Иегова, Эҥ Бийик Јасак Чыгараачы, албатызына јаантайын јап-јарт јасактар чыгарат (Иса. 33:22). Темдектезе, баштапкы чакта башкару јӧп христиандар мындый ӱч немеде Иегованыҥ јасагын буспас учурлу деп айткан: 1) бис чалуларга эмес, јӱк ле Иеговага бажырар учурлу, 2) канды агару деп, кӧрӧр учурлу, 3) библиялык нравственный нормаларды буспас учурлу. (Апостолдордыҥ ижи 15:28, 29, ЈТ кычырыгар.) Христиандар бу ӱч суракта улустыҥ кӧрӱмине канайып јайылбас аргалу?
4. Бис јӱк ле Иеговага бажырып турганысты канайып кӧргӱзерис? (Ачылта 4:11).
4 Бис јӱк ле Иеговага бажырадыс. Иегова израильтяндарга ӧскӧ кудайларга бажырбазын деп некелте берген (Јаҥ. т. 5:6—10). Оныҥ уулы, Иисус Христос то, Дьяволго ченедип турарда, бисти јӱк ле Иеговага бажырзын деп јап-јарт айткан (Матф. 4:8—10). Оныҥ учун бис чалуларга бажырбай јадыс. Анайда ок бис кудай јаҥныҥ башчыларын, политиктерди, спортчыларды эмезе шоу-бизнестиҥ јарлу улузын кудайлар этпей јадыс. Бис јӱк ле ончоны јайаган Иегова Кудайга бажырадыс. (Ачылта 4:11 кычырыгар.)
5. Кан ла јӱрӱм јанынаҥ јасакты бис нениҥ учун буспай јадыс?
5 Канды агару деп кӧрӧдис. Нениҥ учун дезе кан — ол јӱрӱм. А јӱрӱм — ол Иегованыҥ сӱреен баалу сыйы (Лев. 17:14). Иегова улуска этти јиирге јараткан да болзо, је канды јибезин деп јакарган (Баш. 9:4). Кийнинде, Иегова бу ла јасакты израильтяндарга Моисей ажыра айткан (Лев. 17:10). А баштапкы чактыҥ башкару јӧби ажыра Иегова бастыра христиандарга «кан... јибегер» деп јакарган (Ап. ижи 15:28, 29). Бӱгӱнги кӱнде бис эмдениш јанынаҥ сурактарда бу јасакты бир де буспай јадыс b.
6. Иегованыҥ бийик нормаларыла јӱрерге бис нени эдедис?
6 Иегованыҥ бийик нравственный нормаларын буспай јадыс (Евр. 13:4). Апостол Павел бисти балыр керекке экелгедий кӱӱннеҥ айрылзын ол эмезе оны јоголтсын деп кӱӱнзедет. Оныҥ да учун бистер сексуальный кӱӱнисти тыҥыдып ийгедий јуруктарды ајыктабай јадыс, ӧскӧ дӧ неме этпей јадыс (Иов 31:1; Кол. 3:5). Анайда ок јаман неме эдип ийетен кӱӱн келзе, Кудайла колбуларысты бузуп ийгедий немедеҥ тууралап јадыс.
7. Биске нени эдерге бек шӱӱп алар керек? Нениҥ учун?
7 Иегова бисти ого акту јӱрегистеҥ сӧсуккур болзын деп кӱӱнзейт (Рим. 6:17). Бис оныҥ јасактарыныҥ кажызын тузаланарын талдабай јадыс (Иса. 48:17, 18; 1 Кор. 6:9, 10). Нениҥ учун дезе оныҥ јакылталары ончозы биске тузалу. Бис анайып Иегованы сӱӱндирерге ле сарнаачыныҥ кӧрӱмиле јӱрӱп јадыс: «Сениҥ јасактарыҥды јажын-чакка бӱдӱрип јӱрерге бек шӱӱп алдым» (Сар. 119:112). Је Сатана бисти Кудайга чындык артпазын деп, кандый ла аргалар тузаланат.
САТАНА БИСТИ ИЕГОВАНАҤ ТУУРАЛАДАРГА НЕНИ ЭДЕТ?
8. Сатана бисти Иегованаҥ туураладарга канайып истежет?
8 Истежӱлер. Дьявол бисти Иегованаҥ туураладарга, кажыбысты ла «јуда салайын» деп албаданат. Оныҥ учун Кудайдыҥ ишчилерине каршу јетирип јат (1 Пётр 5:8). Баштапкы чакта христиандарды ӧштӱлер Кудайга багынарга турганы учун кезедип туратан, согуп туратан, керек дезе ӧлтӱрип те туратан (Ап. ижи 5:27, 28, 40; 7:54—60). Сатананыҥ мындый истежӱлери бӱгӱнги де кӱнде болуп јат. Темдектезе, Россияда, оноҥ до ӧскӧ ороондордо ӧштӱлер ака-эјелерге јаман баштанып турганын кӧрӱп јадыс. Је Сатана мынаҥ да ӧскӧ буудактар эдет.
9. Кӧскӧ кӧрӱнбес ченелтелерге нениҥ учун белен болор керек? Тем куучындап беригер.
9 Кӧскӧ кӧрӱнбес истежӱлер. Сатана кезикте кӧскӧ кӧрӱнбес те аргаларла истежип јат. Оныҥ учун биске «Дьяволдыҥ куурмакту керектерин» ундыбас керек (Эф. 6:11, ЈТ). Темдектезе, Ро́бертке јаан операция эдер керек болгон. Ол бойыныҥ кан урдырбаска турган кӱӱнин хирургка куучындап берерде, ол јӧпсинген болгон. Је Роберттиҥ тӧрӧӧндӧри јана берерде, эҥирде, операция эдердеҥ озо, оныҥ палатазына анестезиолог кирип келген. Ол айткан: «Бис кан урбазыс, је не-не боло берердеҥ айабас, оныҥ учун бис канды тӱҥей ле белетеп аларыс». Бу врач, байла тӧрӧӧндӧри јӱре берзе, Роберттиҥ санаазы солына берер деп сананган болор. Је Роберт не де болотон болзо, кан урдырбазым деген.
10. Улустыҥ кӧрӱмиле јӱргени неге экелердеҥ айабас? (1 Коринфтегилерге 3:19, 20).
10 Улустыҥ кӧрӱм-санаазы. Бис бу телекейдиҥ кӧрӱм-санаазыла јӱрзеес, Иегованыҥ ла оныҥ нормаларын араайынаҥ ундып саларыс. (1 Коринфтегилерге 3:19, 20, ЈТ кычырыгар.) «Бу телекейдиҥ ойгоры» улусты Кудайга удура барзын деп кӱӱнзедет. Пергамдагы ла Фиатирдеги кезик христиандар кирлӱ јӱрӱм јӱрӱп турган ла чалуларга бажырып турган улустыҥ кӧрӱмине кирип калган. Оныҥ учун Иисус бу эки јуунга кирлӱ балыр јӱрӱмин токтотсын деп јӧп берген (Ачыл. 2:14, 20). Бӱгӱнги кӱнде бу телекей бистиҥ санаабысты база булгаарга албаданат. Тӧрӧӧндӧрис эмезе кӧрӱш-таныштарыс бисти уйадыска удура кандый бир кинчек эдип ийзин деп кӱӱнзедердеҥ айабас. Темдектезе, олор биске: «Агару Бичиктиҥ нормалары туку качан эскирип калган. Сен оны кайдарга туруҥ. Бойыҥныҥ јӱрегиҥди ук» — деп айдыжат.
11. Кудайга чындык артарга биске нени этпес керек?
11 Кезикте бис Иегованыҥ јакарулары јарт эмес деп сананардаҥ айабазыс. Оныҥ учун бичилгениниҥ ӱстине кожуп ийер кӱӱнис келер болор (1 Кор. 4:6). Андый немени Иисустыҥ ӧйинде кудай јаҥныҥ башчылары эдип туратан. Олор Кудайдыҥ јасагыныҥ ӱстине бойыныҥ јасактарын кожуп, тегин албатыныҥ јӱрӱмин оноҥ кӱч эткен (Матф. 23:4). Иегова бойыныҥ Сӧзи ле организациязы ажыра јакаруларды јап-јарт берет. Ого бойыстаҥ нени де кошпойдыс (Укаа 3:5—7). Оныҥ учун бис ака-эјелерге уйатла башкарынатан сурактарга бойыстыҥ ээжилеристи тургуспай јадыс.
12. Сатана «куру тӧгӱнди» канайып тузаланат?
12 Тӧгӱн. Сатана «куру тӧгӱнди» ле «бу телекейдиҥ кӧрӱмин» (ЈТ), улусты тӧгӱндеп, бӧлиирге тузаланат (Кол. 2:8). Ол баштапкы чакта улусты канайып тӧгӱндеген? Баштапкызында, улустыҥ сананып тапкан философиязын тузаланган. Экинчизинде, иудейлердиҥ Кудайдыҥ Сӧзине тӧзӧлӧнбӧгӧн ӱредӱлерин ле ӱчинчизинде, христиандар Моисейдиҥ јасагын бӱдӱрер учурлу деген кӧрӱмди тузаланган. Анайып, Сатана кӧп саба улусты чын ойгорды берип турган — Иегова Кудайдаҥ ыраадып салган. Је бӱгӱнги кӱнде ол улусты СМИ ажыра ла социальный сетьтер ажыра тӧгӱндеп јат. Темдектезе, оныҥ мындый тӧгӱнине теория заговора, фейктер ле политический пропагандалар кирет. Бис мыны COVID-19 деп пандемияныҥ ӧйинде јарт кӧргӧнис c. Кандый ла тӧзӧлгӧ јок солундарга бӱткен улус тыҥ санааркаштарга алдырган. Је Кудайдыҥ организациязыныҥ башкартуларын бӱдӱрген Иегованыҥ Керечилери мындый санааркаштарга кирбеген (Матф. 24:45).
13. Ӧйисти ле ийде-кӱчисти айрыйтан керектер кандый каршу экелет?
13 Ӧйисти ле ийде-кӱчисти айрыйтан керектер. Бистерге «эҥ артыгын» ундыбай турар керек (Флп. 1:9, 10). Темдектезе, курсак-тамак, иш-тош, амыраш јӱрӱмисте баштапкы јерге тура берердеҥ айабас (Лука 21:34, 35). Анайда ок бис кӱнӱҥ сайын анда-мында чур-чуманак кӧдӱрилип турганы керегинде ле политический тартыжулар керегинде угуп јадыс. Је бу ӱзе неме тузалу керектерге баратан ӧйисти ле ийде-кӱчисти айрыырдаҥ айабас. Калак, бу слерге тузак болуп калбазын. Нениҥ учун дезе слер биле тура эмезе билбей калала, кемниҥ-кемниҥ јанын талдап алар болороор. Сатана бисти Иегованыҥ нормаларын бузып ийзин деп албаданат. Бу сурактарда санаабыс экиленбезин деп, ого удура турарга нени эдер керек?
БИСКЕ ОНОҤ ЛО АРЫ ТУРУМКАЙ БОЛОРГО НЕ БОЛУЖАР?
Оноҥ ло ары турумкай болорго, бойоордыҥ учурланганаарды ла чӧҥӱрилгенеерди эске алыгар, Агару Бичикти ӱренип, шӱӱп сананыгар, Иеговага чындык болорын тыҥыдыгар ла ого иженигер (14—18 абзацтарды кӧрӱгер.)
14. Чындыкта бек турарга не болужар?
14 Учурланганаарды ла чӧҥӱрилгенеерди шӱӱп сананыгар. Слер бу алтамдарды нениҥ учун эткенеер? Нениҥ учун дезе Иегованыҥ јанын талдап аларга кӱӱнзегенеер. Чындыкка канайып келгенеерди эске алып ийигер. Слер озо ло баштап Иегова керегинде билгирлер алала, теҥеридеги Адагарды тооп ло сӱӱп баштаганаар. Мынаҥ улам бӱдӱмјигер тыҥыган, јастыралараарды алынганаар, оныҥ кийнинде јӱрӱмигерди солып, Кудайдыҥ нормаларыла јӱрӱп баштаганаар (Сар. 32:1, 2). Кудай слердиҥ јаманыгарды таштаган деп билип алала, токунал алган болороор. Анайда ок јуундарга јӱрӱп, билип алганаарды улуска куучындаганаар. Учы-учында Кудайга учурланып, сууга чӧҥӱрилгенеер. Эмди дезе слер ӱргӱлји јӱрӱмге апаратан јолдо барып јадыгар. Бу јолдоҥ качан да тура чыкпаска бек шӱӱп алганыгар (Матф. 7:13, 14).
15. Кудайдыҥ Сӧзин ӱренери ле шӱӱп сананары кандый туза экелет?
15 Кудайдыҥ Сӧзин ӱренигер ле шӱӱп сананыгар. Агаштыҥ тазылы канча ла кире тереҥ болзо, агаш ончо ло кире бек болор. Анайып ла бистиҥ бӱдӱмјибис Кудайдыҥ Сӧзине тӧзӧлӧнип турза, бис те чындыкта бек турарыс. Агаш јаанаган сайын тазылы тереҥжип јат, анайып ла бис Кудайдыҥ Сӧзин ӱренип, шиҥдеп турзаас, бӱдӱмјибис там ла тыҥып, Иегованыҥ јолы эҥ артык деп оҥдоп јадыс (Кол. 2:6, 7). Иегова алдында ӧйдӧ бойыныҥ ишчилерине канайып болушканын, анайда ок оныҥ берген јакарулары олорго кандый туза бергенин шӱӱп сананып туругар. Темдектезе, Иегова Иезекииль деп судурчызына бир кӧрӱлте кӧргӱскен. Бу кӧрӱлтеде Иезекииль ӧргӧӧни јазаптыра кемјип јаткан ангелди лаптап кӧргӧн. Бу кӧрӱлте Иегованыҥ судурчызыныҥ бӱдӱмјизин тыҥыткан. Бис те мынаҥ тузалу ӱредӱ алар аргалу. Бу кӧрӱлтенеҥ ару бажырышка јӧмӧжӧргӧ Иегованыҥ нормаларыла канай јӱрер керек деп оҥдоп аладыс (Иез. 40:1—4; 43:10—12) d. Айдарда, биске Кудайдыҥ сӧзин ӱренерге ле шӱӱп сананарга ӧй таап турар керек.
16. Роберттиҥ Иеговага чындык болгоны оны канай корулаган? (Сарын 112:7).
16 Чындык болугар. Давид каан не де болотон болзо, Иегованы сӱӱрим деп, бек шӱӱп сананып алган болгон. Ол: «Мениҥ јӱрегим сеге чындык, Кудайым» — деп кожоҥдогон (Сар. 57:7). Бис те Иеговага бир де алаҥзыбай иженип турган болзоос, јӱрегис ого чындык болор. (Сарын 112:7 кычырыгар.) Ӧрӧги айдылган Роберт аканы эске алынып ийектер. Ого анестезиолог: «Не-не боло берердеҥ айабас, оныҥ учун канды белетеп аларыс» — деп айткан болгон. Билереер бе ол ӧйдӧ ака нени айткан? Ол: «Меге кан уратан болзоор, мен эмди ле больницанаҥ јӱретем» — деген. Кийнинде ака эске алат: «Ол ӧйдӧ мен недеҥ де коркыбагам».
Бистиҥ кӧгӱзис бек болзо, кандый ла ченелтени ӧдӱп, Кудайга чындык артарыс (17 абзацты кӧрӱгер.)
17. Роберттиҥ теми бисти неге ӱредет? (Јурукты база кӧрӱгер.)
17 Роберт бир де коркыбаган. Нениҥ учун дезе нени айдатанын больницага јадардаҥ озо сананып койгон. Ол озо ло баштап Иегованы сӱӱндирерге кӱӱнзеген. Оныҥ кийнинде Агару Бичиктеҥ ле ого тӧзӧлӧнгӧн бичиктердеҥ јӱрӱм ле кан агару деп темаларды шиҥдеп алган. Анайда ок Иегованыҥ некелтелери биске бойыска ла тузалу деп бӱдӱмјиленип алган. Анайып, бис те не де болотон болзо, Кудайыска чындык артар аргалу.
Варак ла оныҥ јуучылдары Сисараныҥ черӱзин јалтанбай сӱрӱжип јат (18 абзацты кӧрӱгер.)
18. Иеговага иженери јанынаҥ Варактыҥ теминеҥ неге ӱренедис? (Кадарындагы јурукты кӧрӱгер.)
18 Иеговага иженигер. Јаргычы Варак Иеговага иженгени учун јеҥӱ алган. Израильдиҥ черӱзинде куйак та, јыда да јок болгон болзо, Иегова олорды коркышту тыҥ мылтык јепселдерлӱ Сисараныҥ черӱзине удура барзын деген (Јарг. 5:8). Иегова судурчы Девора ажыра Варакты 900 јуучыл абралу Сисараныҥ черӱзине удура тӱшсин деп јакарган. Сананып ийзеер де, тӱс јерде ол абралар Варактыҥ черӱзин кырып салар эди. Андый да болзо, Варак Иегованыҥ сӧзин угуп јат. Анайып, Варак черӱзиле кожо Фавор кырдаҥ тӱжӱп јадарда, Иегова теҥеридеҥ ургун јааш ийген. Мынаҥ улам Сисараныҥ абралары балкашка бадалып, туруп калды (Јарг. 4:1—7, 10, 13—16). Анайып Варак Сисараныҥ черӱзин јеҥип алган. Бис те Иеговага ла оныҥ улузы ажыра берилген башкартуларга сӧсуккур болзоос, јеҥип аларыс (Јаҥ. т. 31:6).
ТУРУМКАЙ БОЛУГАР
19. Нениҥ учун слер Иегованыҥ јанына бек туруп аларга кӱӱнзейдеер?
19 Бис бу телекейде јадып турган тужыста биске чындыктыҥ јолынаҥ бек тудунарга јаантайын албаданар керек (1 Тим. 6:11, 12; 2 Пётр 3:17). Оныҥ учун истежӱлерге, кӧрӱнбес истежӱлерге, улустыҥ кӧрӱм-санаазына, тӧгӱнге ле ийде-кӱчисти ле ӧйисти айрыйтан не немелер биске чаптыгын јетирип болбозын (Эф. 4:14). Бек ле турумкай болуп, Иеговага чындык артып, оныҥ јакаруларын јаантайын угуп турактар. Ол ло ӧйдӧ биске керсӱ болор керек. Келер јӧрмӧлдӧ бис Иегова ла Иисустыҥ керсӱ болгоныныҥ темин шӱӱжип ийерис.
129 КОЖОҤ Турумкай болорыс
a Сатана кижини Адам ла Еваныҥ јайалганынаҥ ла бери јакшызын, јаманын бойы талдазын деп кӱӱнзедет. Ол бисти де Иегованыҥ јасактарын ла Кудайдыҥ организациязыныҥ јакаруларын бӱдӱрерин, бӱдӱрбезин бойы кӧрзин деп кӱӱнзедет. Бу јӧрмӧл биске кемге де багынар кӱӱн јок кӧрӱмнеҥ туралаарга ла Иегованыҥ јанына оноҥ ло ары бек турарга болужар.
b Кудайдыҥ канга кӧрӱмин «Јажын-чакка ырысту јӱригер!» деп бичиктиҥ 39-чы урогынаҥ кӧптӧдӧ билип аларга јараар.
c jw.org сайтта «Защитите себя от дезинформации!» деген веб-статьяны кӧрӱгер.
d Кӧптӧдӧ «Чистое поклонение Иегове восстановлено!» деген бичиктиҥ 13, 14 бажалыктарынаҥ билип алыгар.