1, 2. Јӱрӱмде нени эдерин талдап, Кудайдыҥ берген јӧптӧрин укканы нениҥ учун ойгор болот? (Јӧрмӧлдиҥ бажындагы јуруктарды кӧрӱгер.)

ЈИИТТЕР јӱрӱмниҥ јаан јолына кирип јатса, олорго кандый јӧптӧр берилбейт дееригер. Сен школдо ӱренип турган болзоҥ, сени ӱредӱчилер, кандый бир профессияга ууландырып турган консультанттар эмезе ӧскӧ дӧ улус, бийик ӱредӱ алып, карьера эдерине јӱткӱдер болор. Је Иегова чек башка јӧптӧр берет. Андый да болзо, Кудай сени школдо јакшы ӱрензин деп кӱӱнзейт, не дезе, јакшы ӱренгениҥ келер ӧйдӧ бойыҥды јеткилдеерге болужар (Кол. 3:23). Анайда ок јаш тужыҥда чыгарган јӧптӧриҥнеҥ бастыра јӱрӱмиҥ камаанду болорын Иегова оҥдоп јат. Оныҥ учун Кудай башкарынатан принциптер берген. Бу принциптер телекейдиҥ калганчы кӱндеринде, Кудайдыҥ амадузын ла кӱӱнин ајаруга аларга болужар (Матф. 24:14).

² Иегова ӱзе немени билер, темдектезе келер ӧй кандый болорын ла чак тӱгенери качан болорын (Иса.  46:10; Матф. 24:3, 36). Анайда ок бис нени этсеес, ырысту ла ырыс јок болорысты база билер. Оныҥ учун улустыҥ берип турган јӧптӧри кезикте јакшы деп билдирзе де, је Кудайдыҥ Сӧзине тӧзӧлӧнбӧй турган болзо, бу јӧптӧрди ойгор деп айдып болбозыҥ (Укаа 19:21).

3, 4. Адам ла Ева Сатананыҥ јӧбиле башкарынарда, олордыҥ ла олордыҥ балдарыныҥ јӱрӱми кандый болуп калган?

³ Улусты тӱбекке экелген баштапкы јӧп Эдем садта айдылган. Бу јӧпти Кудайдыҥ јаҥын блаашкан, бийиркек Сатана берген. Сатана Еваны ла Адамды Кудайдыҥ јӧбиле башкарынбаза, ырысту болор деп бӱдӱмјилеген (Баш. 3:1—6). Сатана Адам ла Еваны, анайда ок олордыҥ балдарын Иегованы эмес, оныҥ сӧзин угуп, ого бажырзын деп кӱӱнзеген. Је Сатана Адам ла Евага нени берген? Нени де эмес. Олордо болгон ончо немени: билени, сӱреен јараш райды, толо кемдӱ эт-канды ла ӱргӱлјиге јӱрер арганы Иегова берген.

⁴ Је Адам ла Ева Кудайдыҥ сӧзин укпай, ол јогынаҥ јӱрерге сананган. Бу коркышту јаан тӱбекке экелген. Олор ӱзӱлип калган чечектий араайынаҥ чалдыгып, учы-тӱбинде божоп калган. Кинчектеҥ улам олордыҥ бастыра бала-барказы да кыйын-шыра кӧрӱп јат (Рим. 5:12). Је андый да болзо, кӧп саба улус Кудайга багынбай, бойыныҥ кӱӱниле јӱрерге кӱӱнзейт (Еф. 2:1—3). Олордыҥ јӱрӱмин кӧрӱп, Иегованыҥ ойгоры эҥ артык деп кӧрӱп јадыс (Укаа 21:30).

5. Иегова улус јанынаҥ неде алаҥзыбаган ла оныҥ алаҥзыбаганы калас болгон бо?

⁵ Андый да болзо, кезик улус, ол тоодо јииттер, Кудай керегинде билгирлер аларга кӱӱнзеер ле ого иштеер кӱӱндӱ болор деп, Иегова алаҥзыбаган (Сар. 103:17, 18; 110:3). Иегова андый улусты тыҥ баалап јат! Сен бойыҥды олордыҥ тоозында кӧрӧдиҥ бе? Эйе болзо, сени ырысту эдип турган Иегованыҥ јакшы сыйларына сӱӱнип турган болорыҥ. (Сарын 103:5 кычырыгар *; Укаа 10:22.) Бу сыйлардыҥ тоозында: артыгынча берилип турган јакшы кӧгӱс курсак, јакшы најылар, туза јетиргедий амадулар ла чындык јайым.

6. Биске нениҥ учун кӧгӱс керексиништеристи ундыбас керек? Бу јанынаҥ Иегова канайып болужып јат?

⁶ Бисте тындуларга кӧрӧ, кӧгӱс керексиништер бар, ӧскӧртӧ айтса, бис Јайаачыбысты билерге кӱӱнзейдис (Матф. 4:4). Сен оныҥ јӧптӧрин быйанду болуп уксаҥ, оҥдомолды табып, ойгор ло ырысту болорыҥ. Иисус: «Кудайды керектегендер кежиктӱ» — деп айткан (Матф. 5:3, ЈК 2003). Бисте Кудайдыҥ Сӧзи, анайда ок «бӱдӱмјилӱ ле керсӱ кул» ажыра берилип турган башка-башка кӧгӱс курсак бар (Матф. 24:45). Кӧгӱс курсактыҥ  артыгынча берилип турганы бисти чыннаҥ ла кайкадып јат (Иса. 65:13, 14).

7. Иегованыҥ берип турган кӧгӱс курсагы биске кандый тузазын јетирет?

⁷ Иегованыҥ берип турган кӧгӱс курсагы ойгор болорго ло шӱӱп сананарына ӱренип аларга болужар. Бу сени кандый ла айалгаларда корулаар. (Укаа сӧстӧр 2:10—14 кычырыгар *.) Темдектезе, Кудай јок эмезе ырыс акча-јӧӧжӧнӧҥ камаанду ла оноҥ дӧ ӧскӧ шӱӱлтелердиҥ јастыразын оҥдоп ийериҥ. Анайда ок кинчектӱ кӱӱн-санааларла тартыжып, каршулу керектердиҥ кулы болбозыҥ. Оныҥ учун ойгор болорго ло чын тӱп-шӱӱлтелер эдерге бар-јок ийде кӱчиҥди сал. Анайып Иегова сени сӱӱп, сеге эҥ јакшыны кӱӱнзеп турган деп, бойыҥ оҥдоп ийериҥ (Сар. 34:8; Иса. 48:17, 18).

8. Нениҥ учун эмди ле Иеговала кожо колбуларысты тыҥыдар керек? Бу биске келер ӧйдӧ канайып болужар?

⁸ Удабас Сатананыҥ телекейиндеги ӱзе бар-јок неме јайрадылып баштаар. Ол ӧйдӧ Кудайдыҥ болужы јогынаҥ биске курсак та табарга кӱч болордоҥ айабас. Бисти јӱк Иегова корулап алар аргалу (Авв. 3:2, 12—19). Оныҥ учун биске эмди ле теҥеридеги Адабысла колбуларысты тыҥыдып, ончо немеде ого иженерге ӱренер керек (2 Петр 2:9). Ол тушта айландыра неде болуп турза, сен Давид чылап, мындый сӧстӧр айдарыҥ: «Иегова јаантайын кӧзим алдында. Мен бир де алаҥзыбазым, не дезе, ол оҥ колымныҥ јанында» (Сар. 16:8).

9. а) Иоанн 6:44-ле болзо Иегова нени эдет? б) Ака-эјелерле танышканы ӧскӧ улусла танышканынаҥ незиле башка?

⁹ Иегова бойына ачык јӱректӱ улусты јууктадып, олорго бойыныҥ кӧгӱс билезине кожулатан арга берет. (Иоанн 6:44 кычырыгар.) Темдектезе, сен та кемле де јаҥы ла таныжып алган болдыҥ. Бу кижи керегинде нени билериҥ? Ол кижи Иегованыҥ ишчизи эмес болзо, кӧпти ле эмес болбой, јӱк ле оныҥ адын ла чырай-бӱдӱжин билер болбойыҥ. Је бистиҥ ака-эјелердеҥ кемле-кемле таныжып турзаҥ, ол Иегованы сӱӱп турган деп билип јадыҥ. Оныҥ чыккан-ӧскӧн јери, кандый айалгада ӧскӧни башка да болзо, слер бой-бойыгар керегинде кӧпти биледигер.

10, 11. Иегованыҥ ончо ишчилеринде кандый арга бар? Бис бу арга учун нениҥ учун быйанду болодыс?

¹⁰ Иегованыҥ Керечилери бой-бойын чындыктыҥ «ару тилиниҥ» болужыла танып јат (Соф. 3:9). Бу тилле куучындап турган ака-эјени угуп, ол сен ле чилеп Иеговага бӱдӱп турганын, ак-чек болорыныҥ бийик нормаларыла јӱрӱп, келер сӱреен јакшы ӧйгӧ иженип јат деп оҥдоп јадыҥ. Бу, кижини билип алатан эҥ учурлу јетирӱлер болуп јат, не дезе, мындый јетирӱлерге бек најылык колбулар тӧзӧлӧнӧт.

¹¹ Сен Иегованыҥ ишчизи болзоҥ, сенде эҥ артык најылар бар деп айдарга јараар. Олор бастыра јердиҥ ӱстинде јадып јат, олордыҥ кӧбизиле сенде таныжатан арга болор! Мындый кайкамчылу арга Иегованыҥ албатызынаҥ ӧскӧ, база кемде де јок.

12. Кандый кӧгӱс амадулар тургузарга јараар?

¹² Јарлыкчы 11:9—12:1 кычырыгар *. Сенде кӧгӱс амадулар бар ба? Темдектезе, сен кажы ла кӱн Агару Бичикти кычырарга, јакшы шӱӱп алган јартамалдар берерге эмезе јуунныҥ туштажуларында берилген јакаруларды јакшы бӱдӱрерге, анайда ок јарлаар иште Агару Бичикле оноҥ јакшы тузаланарга албаданып турган болорыҥ. Сен бойыҥныҥ једимдериҥди кӧрӱп турзаҥ эмезе једимдериҥди ака-эјелер ајаруга алып, мактап турза нени сезедиҥ? Мынаҥ сен јаан сӱӱнчи алар болорыҥ. Нениҥ учун дезе мынайып, сен Иисус чылап, Кудайдыҥ табын эҥ баштапкы јерге тургузып јадыҥ (Сар. 40:8; Укаа 27:11).

13. Кӧгӱс амадулар бу телекейдиҥ амадуларына кӧрӧ, нениҥ учун артык?

¹³ Сен баштапкы јерге Иеговага иштеерин тургузып турзаҥ, чыннаҥ ла ырыс экелип турган иш эдип јадыҥ, не дезе, бу иш качан да куруга калбас. Элчи Павел: «Кӧп иштеп јӱргенигер Кайракан алдында калас эмезин билип,  турумкай болыгар, јана баспагар, Кайраканга иштеерине бастыра бойыгарды беригер» — деп бичиген (1 Кор. 15:58). Је бу телекейдиҥ амадуларын баштапкы јерге тургузып турган улусты ырысту деп айдып болбозыҥ. Не дезе, олор једимдӱ болуп та калза, јӱрегинде сӱӱнчи сеспей јат (Лука 9:25). Бу, Соломон каанныҥ теминеҥ јарт кӧрӱнет (Рим. 15:4).

14. Соломонныҥ јӱрӱминиҥ ченемели бисти неге ӱредет?

¹⁴ Соломон сӱреен бай, јаан јаҥду кижи болгон. Ол «бастыра берилген сыйларла јакшызынып, јыргап кӧрӧргӧ сананган» (Јарл. 2:1—10). Соломон туралар туткан, садтар ла парктар отургыскан, кӱӱнзегениниҥ ончозын бӱдӱрген. Је мынайып Соломон кӱӱнине јединди бе? Сӱӱнчи эмезе ырыс алды ба? Соондо Соломон бойы мындый сӧстӧр айткан: «Колымныҥ эткенине ајарып, бу ончозы шакпырт деп кӧрдим... Неде де туза јок» (Јарл. 2:11). Бу биске јаан ӱредӱ болот! Јӧп чыгарар тушта, сен Соломонныҥ сӧстӧрин сананарыҥ ба?

15. Нениҥ учун бӱдӱмјибисти тыҥыдар керек? Сарын 32:8-ле болзо, мындый бӱдӱмји биске неде болужар?

¹⁵ Иегова бисти јаан јастыралардаҥ корулап аларга кӱӱнзейт. Оныҥ учун Кудайдыҥ сӧзин угарга ла оныҥ табын баштапкы јерге тургузарга бӱдӱмји керек болот. Мындый бӱдӱмји чыннаҥ ла баалу, не дезе, ол сени качан да чӧкӧндирбес. Иегова, оныҥ адына болуп кӧргӱскен сӱӱжиҥди, качан да ундыбас (Евр. 6:10). Оныҥ учун бӱдӱмјиҥди тыҥыдарга албадан. Бек бӱдӱмји јӱрӱмиҥде чын јӧптӧр чыгарарга ла теҥеридеги Адабыс сеге эҥ артыгын кӱӱнзеп турган деп алаҥзыбаска болужар. (Сарын 32:8 кычырыгар *.)

16. Јайымды нениҥ учун баалаар ла ойгор тузаланар керек?

¹⁶ «Кайраканныҥ Тыны јӱрген јерде — јайым» (2 Кор. 3:17). Эйе, Иегова јайымды сӱӱп турган Кудай, ол сениҥ де јӱрегиҥе андый сезимди салып койгон. Је јайымды Кудай ойгор тузаланзын деп кӱӱнзеп јат, не дезе, бу сеге кору болор. Таныштарыҥныҥ кемизи де порнография кӧрӧт, балыр јӱрӱм јӱрет, спорттыҥ јеткерлӱ бӱдӱмдеринде туружат, наркотиктер тузаланат ла аракыдап јат деп билип турган болорыҥ. Олорго бу керектер бир ле эмеш ӧйгӧ сӱӱнчи экелет, је учы-тӱбинде јаан тӱбекке экелет. Темдектезе, кӧбизи јаман кылыгынаҥ айрылып болбойт эмезе јеткерлӱ ооруларга табартып, керек дезе божоп то јат (Гал. 6:7, 8). Мындый «јайым» ол чын јайым эмес, бойын тӧгӱндеери болуп јат (Тит. 3:3).

17, 18. а) Кудайдыҥ сӧзин укканы нениҥ учун јайым берет? б) Адам ла Евада болгон јайым, бӱгӱнги кӱнде улуста бар јайымнаҥ незиле аҥыланган?

¹⁷ Је эмди сананып ийзеҥ: библиялык нормаларла јӱргенинеҥ улам ооруп калган улустаҥ кемди-кемди билериҥ бе? Иеговага сӧсуккур болоры  су-кадык болорго ло јайымысты јылыйтпаска болужат (Сар. 19:7—11). Анайда ок сен јайымыҥла ойгор тузаланып турган болзоҥ, ӧскӧртӧ айтса, Кудайдыҥ јасактарын, принциптерин буспай турган болзоҥ, Иегова ла ада-энеҥ сеге оноҥ јаан јайымды берерге јараар деп кӧрӱп јат. Келер ӧйдӧ Кудай бойыныҥ чындык ишчилерине толо кемдӱ јайымды берер. Агару Бичикте мындый јайым — «Кудайдыҥ балдарыныҥ јайымы» деп адалат (Рим. 8:21).

¹⁸ Бистиҥ ада-ӧбӧкӧлӧрис мындый јайымду болгон. Иегова Эдем садта сок јаҥыс јакару берген: Адам ла Евага јӱк ле бир агаштыҥ јиилегин јиирге јарабас болгон (Баш. 2:9, 17). Бу јакаруны бӱдӱрерге кӱч болгон бо? Јок, эмей! Бӱгӱнги кӱнде улуска коркышту кӧп јасактар берилген, је Адам ла Евага Кудай јӱк ле бир јасак берген.

19. Иегова бисти јайым болорына канайып ӱредет?

¹⁹ Иегова бойыныҥ ишчилерине ойгор баштанат. Ол биске кӧп јасактар берип, јӱрӱмисти уурлатпай јат, карын сӱӱштиҥ јасагыла јӱрзин деп чыдамкай ӱредип јат. Кудай бисти оныҥ принциптериле јӱрзин ле јаманды кӧрӧр кӱӱни јок болзын деп кӱӱнзейт (Рим. 12:9). Иисус Христостыҥ Кырдагы куучыны — мындый ӱредӱниҥ сӱреен јакшы теми болот, не дезе, бу куучында кинчек недеҥ улам болор аргалу деп јарталат (Матф. 5:27, 28). Иисус Христос, Кудайдыҥ Каандыгыныҥ Кааны, бисти јаҥы телекейде де ӱредер, соондо бистиҥ кӧрӱмис чындыкка ла јасак јогына Иисустыҥ кӧрӱминдий болуп калар (Евр. 1:9). Анайда ок бистиҥ сагыжыс, эди каныбыс толо кемдӱ болор. Удабас бисти кинчек бийлебес ле бис оныҥ ончо каршузын ундып саларыс. Ол тушта Иегованыҥ берер јайымыла толо кеминде јакшызынарыс.

20. а) Иегова бойыныҥ јайымыла канайып тузаланат? б) Бис Иегованаҥ кандый тем алар аргалу?

²⁰ Јаҥы телекейде бистиҥ јайымыста тӱҥей ле токтодулар болор. Иегованы ла јууктарысты сӱӱп турганыстаҥ улам, мындый токтодуларды качан да ажыра алтабазыс. Анайып бис Иегованаҥ тем аларыс. Иегованыҥ јайымында токтодулар јок то болзо, ол ончо немеде, анайда ок улуска да, сӱӱштӱ баштанар деп шӱӱп алган (1 Иоанн 4:7, 8). Айдарда, јӱк ле Кудайдаҥ тем алып турган кижини чыннаҥ јайым деп айдарга јараар.

21. а) Давидте Иеговага кандый сезимдер болгон? б) Келер јӧрмӧлдӧ нени шӱӱжерис?

²¹ Иегованыҥ берген јакшы сыйларын, темдектезе кӧгӱс курсакты, јакшы најыларды, туза јетиргедий амадуларды ла чыннаҥ јайым болотон арганы аларын сен баалап јадыҥ ба? (Сар. 103:5). Эйе болзо, сеге Давидтиҥ мынайып айткан сӧстӧри јуук болор: «Сен мени јӱрӱмниҥ јолын оҥдоорго ӱредериҥ. Сениҥ кӧзиҥ алдында јӱрери, оҥ колыҥ јанында болоры — ӱргӱлјиге јаан сӱӱнчи» (Сар. 16:11). Келер јӧрмӧлдӧ 16-чы Сарынныҥ јаан учурлу ӧскӧ дӧ шӱӱлтелерин шӱӱжерис. Бу биске чыннаҥ ла ырысту болорго нени эдер керек деп оҥдоп аларга болужар.