СЛЕР бойыгарды быйанду кижи деп сананадыгар ба? Бу суракты јазап шӱӱп сананар керек. Нениҥ учун дезе Агару Бичикте бистиҥ ӧйдӧ кӧп улус быйаны јок болор деп айдылып калган (2 Тим. 3:2). Слер, улустыҥ ижи учун бир де быйанду болбой турган улусты кӧргӧн болбойыгар. Андый улусла куучындажарга јеҥил эмес деп јӧпсинер болорыгар.

Иегованыҥ ишчилерине мындый јакару берилген: «Алкыш-быйанду болыгар», «Ончозы учун алкыш јетиригер [быйанду болыгар]» (Кол. 3:15; 1 Фес. 5:18). Быйанду болорго ӱрензеес, бойыска ла тузалу болот. Је бу кылык-јаҥга нениҥ учун ӱренер керек? Кезик шылтактар кӧрӱп ийектер.

Шылтактардыҥ бирӱзи — быйанду болоры бойысты баалап турарга болужат. Быйанду болоры эки јанынаҥ тузалу болот: быйанысты кӧргӱскен де кижиге, биске бойыска да. Сананып ийзеер де: кижи биске болуп, нени-нени эткен болзо, ол кижи бисти баалап ла кичееп турган деп кӧрӱнет. Слер мыны сезип турзагар, бойыгарды баалап баштайдыгар. Анайып ла Руфьтыҥ учуралында болгон. Руфь Воозтыҥ ого кысканбай баштанып, кичееп турганын кӧрӱп, тыҥ сӱӱнген болор (Руфь 2:10—13).

Биске анчада ла Кудайга быйанду болор керек. Кудай бистиҥ ончобыска сӱрекей кӧп јакшы неме эткенин јаҥыс катап сананбаган болорыгар (Јаҥ. т. 8:17, 18; Ап. ижи 14:17). Биске Кудайдыҥ јалакайы керегинде, ол тоодо Иегова бисти ле бистиҥ јууктарысты канайып кичееп турганын, тереҥ шӱӱп сананып турар керек. Јайаачыныҥ кысканбазын шӱӱп сананганы, ого быйанысты тыҥыдар, анайда ок ол бисти сӱӱп ле баалап турган деп, оноҥ тыҥ бӱдӱмјилеер (1 Иоанн 4:9).

Је биске јӱк ле Иегованыҥ кысканбазын ла алкыштарын шӱӱп сананар керек эмес, је оныҥ јалакай керектери учун быйанысты кӧргӱзер керек (Сар. 100:4, 5). Наукалык бир бичикте мынайып айдылат: «Улуска быйанысты кӧргӱзип турзаас, бис олорды ырысту эдедис».

Быйанду болгоныныҥ база бир тузазы — улусты бой-бойына јуукташтырып турганы. Кажы ла кижи оны баалап турзын деп кӱӱнзейт. Слер кемге-кемге јакшы кереги учун акту јӱрегердеҥ быйан айдып турзагар, слер бой-бойыгарга јууктап јадыгар (Рим. 16:3, 4). Анайда ок быйанзак улус, улуска болужарга кӧп сабада белен болот. Олор улустыҥ јалакайын кӧрӱп, улуска база быйанзак болорго кӱӱнзедилет. Анайып, улуска болужып, бис ырысту болуп каладыс. Иисус та тегин јерге мынайып айтпаган: «Алып турганы эмес, берип турганы оноҥ артык кежиктӱ [ырысту]» (Ап. ижи 20:35).

Калифорнияныҥ университединиҥ профессоры ла быйанду болоры јанынаҥ шиҥжӱ ӧткӱрип турган проекттиҥ башкараачыларыныҥ бирӱзи, Роберт Эммонс, мынайып айдат: «Быйанду болорго, бис бой-бойыстаҥ камаанду деп, оҥдоп турар керек. Кезикте бис улуска нени-нени бередис, кезикте олор биске берип јат». Эйе, бистиҥ јӱрӱмис ле ырызыс кӧп сабада улустаҥ камаанду болот. Темдектезе, олор јогынаҥ бисте курсак-тамак та, эмденер арга да болбос эди (1 Кор. 12:21). Быйанзак  кижи улустыҥ ого эдип турганын баалап јат. Слер улуска быйаныгарды айдып турганаар ба?

Анайда ок быйанду болорына ӱренип алганыс, јӱрӱмге чын кӧрӱмдӱ болорго болужат. Бистиҥ меегисти фильтрге тӱҥдештирерге јараар: бис кӧп сабада јакшыга ајару эдип, јаман немени ајаруга албай турар аргалу. Быйанзак кижи јаантайын јакшыны кӧрӱп, кӱчтерге јаан ајару этпей јат. Оныҥ учун улуска быйанысты канча ла кире кӧп айдып турзаас, јакшыны ончо ло кире кӧп кӧрӧдис, мынаҥ улам оноҥ тыҥ быйанду болорго кӱӱнзедиледис. Быйанысты кӧргӱзетен аргалар бедиреп турзаас, биске элчи Павелдиҥ айтканын бӱдӱрерге јеҥил болор: «Кайраканныҥ Бойында јаантайын сӱӱнигер» (Флп. 4:4).

Быйанзак улуска јаман санааларла тартыжарга јеҥил болот, нениҥ учун дезе быйанзак улус кӧп сабада кӱйӱнбей јат, ачынбай јат ла кунукпай јат. Бого коштой олор акча-манат јанынаҥ тыҥ санааркабай јадылар. Олор бар-немезин баалап, албан кӱчле оноҥ кӧпти аларга албаданбай јат (Флп. 4:12).

Сатана бисти бу калганчы кӱндерде болуп турган кӱчтердеҥ улам кунугып калзын деп кӱӱнзеп турганын оҥдоп јадыс. Бис ӱзе ле немениҥ јаманын кӧрӱп, јаантайын ла комыдап турзаас, ол тыҥ сӱӱнер эди. Андый кӧрӱм-санаа Иеговага иштеп турганыска јаман салтарын јетирер. Је быйанду болоры агару тынныҥ тӱжӱмиле, ол тоодо сӱӱнчиле, бӱдӱмјиле, колбулу болот: Кудайдыҥ биске берген алкыштарын кӧрӱп турзаас, бис сӱӱнип јадыс, мынаҥ улам оныҥ берген сӧзине бӱдӱмјибис тыҥыйт (Гал. 5:22, 23).

Слер, Иегованыҥ Керечилери, бу јӧрмӧлдӧ быйанду болоры керегинде айдылганыла јӧпсинер болорыгар. Је быйанду болорго ло јакшы кӧрӱм-санаалу артарга ӱренер керек. Слер андый эмес болзогор, санааркабагар, нениҥ учун дезе бого ӱренип аларга јараар. Канайып? Кажы ла кӱн неге быйанду болгоноорды шӱӱп сананып турарга ӧй табыгар. Канча ла кире кӧп сананып турзагар, быйанду болгоноорды кӧргӱзерге ончо ло кире јеҥил болор. Слер јӱрӱмде јӱк ле кӱчтер кӧрӱп турган улустаҥ канча киреге ырысту болуп каларыгар. Оныҥ учун Кудайдыҥ ла улустыҥ слерге эткен јакшыны шӱӱп сананып туругар. Керек дезе кажы ла кӱн неге быйанду болгоноорды бичип турарга јараар.

Кезик шиҥжӱчилердиҥ айтканыла болзо, «јаантайын быйанду болоры меегистиҥ нейронный колбуларын солыыр аргалу, анайып меегис автоматически јакшыны кӧрӱп турар». Быйанду улус ырысту болот. Слерге берилген алкыштарды шӱӱп сананып туругар. Јӱрӱмигерде болуп турган кажы ла јакшы немени баалагар. Јаантайын быйанду болыгар. Слерде бар ончо јакшы неме, слерге берилер учурлу болгон деп сананбай, карын «Иеговага јалакайы учун быйанду болыгар». Айдарда, «ончозы учун алкыш јетиригер [быйанду болыгар]» (1 Лет. 16:34; 1 Фес. 5:18).