Јаҥды такыганы 22:25—27-де бичилген јакарулардыҥ тӧс амадузы, эр кижини бурулап саларга эмес (нениҥ учун дезе оныҥ бурузы тегин де керелелип калган болот), је кыстыҥ бурулу болбогонын кӧргӱзери болгон. Мыны оҥдоорго, контекстти кӧрӱп ийектер.

Ӧрӧги ӱлгерлерде калада болгон учурал бичилет. Бу учуралда эр кижи кол алыжып койгон кысла конгон, је кыс дезе кыйгырбаган. Анайып, эр кижи чайдам кылык эткенинде бурулу болгон, не дезе, кол алыжып койгон кыс кижиге барып калган деп бодолотон. Је кыс кыйгырган болзо, айландыра улус оны аргадап алар эди. Је кыйгырбаган болордо, олор экӱлези чайдам кылык эткенинде бурулу болот (Јаҥ. т. 22:23, 24).

Јасакта анаҥ ары ӧскӧ учурал бичилет: «Јалаҥ јерде эр кижи кол алыжып койгон кыска туштап, оны тудуп, албадап салган болзо, ол эр кижини ӧлтӱрип салар керек. Је кыс ӧлӱмге јаргыладатан кинчек этпеген, оныҥ учун кысты тийбе. Бу учурал кижи ӧлтӱргенге тӱҥей. Нениҥ учун дезе эр кижи кол алыштырып койгон кыска јалаҥда туштаган. Је кыс кыйгырган да болзо, оны аргадайтан кижи болбогон» (Јаҥ. т. 22:25—27).

Бу учуралда јаргычылар кысты бурулу деп кӧрбӧгӧн. Нениҥ учун? Нениҥ учун дезе «кыс кыйгырган да болзо, оны аргадайтан кижи болбогон». Анайып кыс чайдам кылык этпеген болот. Је эр кижи дезе, кол алышкан кысты албадап салганында ла чайдам кылык эткенинде бурулу болот.

Айдарда, бу јасактыҥ тӧс амадузы, эр кижиниҥ кол алышкан кысты албадап салганын ла чайдам кылык эткенин кӧргӱзери эмес, је кыстыҥ бурулу болбогонын кӧргӱзери болот. Јаргычылар «керектиҥ аайын јакшы шиҥдеп», јаргыны Кудайдыҥ канча катап јарт айдылган принциптериле чыгарган деп, алаҥзыбай јадыс (Јаҥ. т. 13:14; 17:4; Чыг. 20:14).