Јок, бу керегинде айтпаган болор. Дьявол Еваны јиирге јарабас јиилекти јип ийзе божоп калар, је сӱнези дезе, кӧскӧ кӧрӱнбес тын болуп, анаҥ ары јӱрер деп айтпаган. Сатана јылан ажыра, Ева јиилекти јип ийзе, ӧлбӧс деп айткан. Оныҥ айтканыла Евала јаман не де болбос, карын ол Кудай да јогынаҥ јерде оноҥ јакшы јӱрер (Баш. 2:17; 3:3—5).

Сӱне керегинде тӧгӱн ӱредӱ Эдемде айдылбаган болордо, качан табылган болор? Бу сурактыҥ јарты јок то болзо, је тӧгӱн бажырыш Нойдыҥ ӧйинде, Чайык болгон тушта јоголып калган деп билерис. Нениҥ учун дезе Чайыктыҥ кийнинеҥ јердиҥ ӱстинде јӱк ле Кудайдыҥ чындык ишчилери — Ной ло оныҥ билези арткан. Айдарда, кудайлык тӧгӱн ӱредӱлер Чайыкла кожо јоголып калган.

Оныҥ учун эмдиги ӧйдиҥ сӱне керегинде ӱредӱзи Чайыктыҥ кийнинеҥ табылган болор. Качан Кудай Вавилондо улустыҥ тилдерин булгап ийерде, албатылар «јер сайын» таркай берген. Мынайып, сӱне бар деп ӱредӱ јердиҥ ӱстине јайыла берген (Баш. 11:8, 9). Бу ӱредӱ качан да табылган болзо, оныҥ кийнинде «тӧгӱнниҥ адазы» — Сатана Дьявол турган деп билип јадыс. Ол мындый тӧгӱнниҥ текши таркап калганынаҥ сӱӱнчи алган (Иоанн 8:44).