1, 2. Ангелитоныҥ теми бистерди неге кӱӱнзедет?

КУДАЙЛА јуук колбулар энчи эдип берилет пе? Јок. Бис Иегованыҥ Керечилериниҥ билезинде ӧскӧн дӧ болзоос, Иегованыҥ најызы болорго, кажы ла кижи бойы албаданар учурлу.

² Ангелито деп аканыҥ темин кӧрӱп ийектер. Оныҥ билези, ӱзези Иегованыҥ Керечилери болот. Је јаш тужында ондо Кудайла јуук колбулар болбогон. «Мен Иеговага јӱк билемге ле болуп иштегем» — деп, ол айдат. Је кандый да ӧйдӧ Ангелито Агару Бичикти кычырарына, кычырганын шӱӱп сананарына ла мӱргӱӱрине кӧп ӧй берип баштаган. Мынаҥ ол кандый туза алган? Ол айдат: «Кару Иегова Адамла јуук колбуларлу болорго, меге оны бойымга јакшы билип алар керек болгон». Ангелитоныҥ теми бисти јаан учурлу сурактарды шӱӱп сананарга кӱӱнзедет: Иегова керегинде бир эмеш билериниҥ ле Иегованы јакшы билериниҥ башказы неде? Иеговага јууктаарга нени эдер керек?

3. Иегова керегинде бир эмеш билериниҥ ле Иегованы јакшы билериниҥ башказы неде?

³ Кижи Кудайдыҥ адын эмезе оныҥ кандый бир јасактарын ла нени-нени эткенин билер болзо, бу кижи Иегова керегинде билер эмтир деп, бис сананар болорыс. Је бу, Иегованы јакшы билерин кӧргӱспей јат. Иеговала јууктада таныжып аларга ла оныҥ јакшы кылык-јаҥдарын билип аларга, ӧй табып турар керек. Јӱк ол тушта бис Кудайдыҥ кандый бир  айалгада нениҥ учун анайып айтканын эмезе эткенин оҥдоп баштаарыс. Бу, бистиҥ санаабысты, чыгарган јӧбисти ле керектеристи Кудай јарадып турган ба деп, оҥдоорго болужар. Иегова бистеҥ нени кӱӱнзеп турганын билип алала, анайып ла эдер керек.

4. Агару Бичиктеги толо кемдӱ эмес улустыҥ темдери бисти неде бӱдӱмјилейт?

⁴ Кезик улус Иеговага иштеерге турганыска шоодып каткырардаҥ айабас. Бис јуунныҥ туштажуларына јӱрӱп баштазаас, олор оноҥ тыҥ удурлажар болор. Је бис Иеговага иженип турзаас, ол бисти качан да артыргыспас. Иеговага иженип турары — Иеговала бастыра јӱрӱмге најылажатан јакшы тӧзӧлгӧ болуп јат. Је толо кемдӱ эмес улус Иегованыҥ јуук најызы болор аргалу ба? Эйе! Болор аргалу деп, кӧп керелер бар. Моисей ле Давидтиҥ темдерин кӧрӱп, мындый эки суракты шӱӱжип ийектер: олор Иегованы канайып јакшы билип алган? Бис олордыҥ теминеҥ неге ӱренип алар аргалу?

5. Моисей нени талдап алган?

⁵ Моисей Кудайга иштеерин талдаган. Моисей 40 јашту киреде «фараонныҥ кызыныҥ уулы деп ададарынаҥ мойно[п]», Кудайдыҥ албатызына, еврейлерге, кожуларын талдап алган (Евр. 11:24). Ол јамылу болор аргазын артыргызып, кулданышта болгон еврей албатыга кожулып, Египетте кудай деп бодолып турган улу башкараачыныҥ, фараонныҥ, чугулынаҥ коркыбай, јӱрӱмин јеткердиҥ алдына тургускан. Мынаҥ Моисейдиҥ Иеговага тыҥ бӱткени кӧрӱнет. Андый бӱдӱмјизи Моисейге Иеговала бастыра јӱрӱмине јуук колбуларлу болорго болушкан (Укаа 3:5).

6. Моисейдиҥ теми бистерди неге ӱредет?

⁶ Бу тем бистерди неге ӱредет? Биске Моисей чылап, Иеговага иштеерин ле оныҥ албатызына кожуларын талдаарыс па деп, шӱӱп сананар керек. Мындый талдаш этсеес, биске та нени де артыргызарга келижер болор эмезе бис Иегованы билбес улуска јаман кӧрдӱрердеҥ айабазыс. Је теҥеридеги Адабыска, Иеговага бӱтсеес, оныҥ болужы јокко артып калбазыс.

7, 8. Моисей оноҥ ло ары не керегинде билерге албаданган?

⁷ Моисей Иегованыҥ кылык-јаҥын јакшы билип аларга албаданган ла оныҥ табын бӱдӱрген. Иегова Моисейге израильтяндарды кулданыштаҥ чыгарзын деп јакарарда не болгонын эске алып ийектер. Моисей бойыныҥ ийде-кӱчине алаҥзып, бу ишти бӱдӱрип болбозым деп, Иеговага канча катап айткан. Иегова оныҥ сезимдерин оҥдоп, оны килеп, болужын јетирген (Чыг. 4:10—16). Мынаҥ улам Моисей фараонго Кудайдыҥ јаргызын јарлаган. Оныҥ кийнинде, Иегова израильтяндарды аргадаарга ла фараонды ла оныҥ черӱзин Кызыл Талайда јоголторго, бойыныҥ ийде-кӱчин канайып тузаланганын Моисей кӧргӧн (Чыг. 14:26—31; Сар. 136:15).

⁸ Израильтяндар Египеттиҥ кулданыжынаҥ јайымдалган кийнинде јаантайын ла ӱзе немеге комудаар болгон. Је бу да учуралда Иегова бойыныҥ албатызына узакка чыдамкай болгонын Моисей кӧргӧн (Сар. 78:40—43). Анайда ок Иегова бойыныҥ чыгарган јӧбин Моисейдиҥ сураганыла солыырда, Моисей Кудайдыҥ улу јобожын кӧргӧн (Чыг. 32:9—14).

9. Еврейлерге 11:27-ле болзо, Иегова ла Моисейдиҥ колбулары канча киреге јуук болгон?

⁹ Моисейдиҥ Иеговала најылыгы, израильтяндардыҥ Египеттеҥ чыкканыныҥ кийнинде сӱреен бек болуп калган, керек дезе ого теҥеридеги Адазы чыннаҥ ла кӧрӱнип турган деп билдирген. (Еврейлерге 11:27 кычырыгар.) Агару Бичик олордыҥ  колбулары керегинде мынайып бичийт: «Иегова Моисейле кӧстӧҥ кӧскӧ, кижи кижиле канайып куучындажып турганы чылап, куучындашкан» (Чыг. 33:11).

10. Иегованы јакшы билерге, биске нени эдер керек?

¹⁰ Мынаҥ бис неге ӱренедис? Иегованы јакшы билерге, биске јӱк ле оныҥ кылык-јаҥдарын билер керек эмес, је оныҥ кӱӱн-табын бӱдӱрер керек. Бӱгӱнги кӱнде Кудай «ончо улус аргадалып, чындыкты билип алзын деп» кӱӱнзеп јат (1 Тим. 2:3, 4). Кудайдыҥ табын бӱдӱретен аргалардыҥ бирӱзи, улусты Иегова керегинде ӱредери.

11. Улусты ӱредип тура, Иегованы канайып јакшы билип аларга јараар?

¹¹ Улусты улам сайын ӱредип, бис Иегованы анаҥ јакшы билип аладыс. Анайып, Кудай бисти оныҥ најызы болорго кӱӱнзеп турган улуска ийип турганынаҥ Иегованыҥ килеҥкейин јарт кӧрӧдис (Иоанн 6:44; Ап. ижи 13:48, ЈТ). Агару Бичикти ӱренип турган улус јаман кылыктарын таштап, «јаҥы кижи» болуп солынып турза, Агару Бичиктиҥ јаан ийдезин кӧрӱп јадыс (Кол. 3:9, 10). Анайда ок бистиҥ јуунныҥ јарлап турган јериниҥ улузына Кудай керегинде билгирлер алатан ла аргаданатан кӧп аргалар берилип турганынаҥ Кудайдыҥ узакка чыдамкай болгонын кӧрӱп јадыс (Рим. 10:13—15).

12. Чыгыш 33:13-ле болзо, Моисей нени сураган ла нениҥ учун?

¹² Моисей Иеговала најылыгын баалаган. Иегова Моисейге кӧп улу керектер эдерге болушкан. Је мыныҥ да кийнинде Моисей Иегованы оноҥ јакшы билетен арга берзин деп тоомјылу сураган. (Чыгыш 33:13 кычырыгар *.) Моисей Кудайга бу сурагыла баштанарда, 80 јаштаҥ ажа берген де болзо, сӱӱштӱ Адазы керегинде оноҥ кӧпти билер керек деп оҥдогон.

13. Иеговала најылыгысты баалап турганысты канайып кӧргӱзерис?

¹³ Мынаҥ бис неге ӱренедис? Иеговага иштеп турганыс удап та калган болзо, оныла најылыгысты баалап јӱрер керек. Баалап турганысты кӧргӱзетен аргалардыҥ бирӱзи — Кудайла мӱргӱӱл ажыра куучындажары.

14. Нениҥ учун мӱргӱӱл Иегованы јакшы билетен арга болот?

¹⁴ Јакшы куучын јогынаҥ бек најылык болбой јат. Оныҥ учун Кудайга јаантайын мӱргӱп, ого ичигердеги санаалараарды айдарга качан да коркыбагар (Еф. 6:18). Турцияда јадып турган Криста айдат: «Иеговага улам сайын мӱргӱп, бойымныҥ санааркаштарымды куучындап, оныҥ меге болужып турганын кӧрӱп турзам, ого сӱӱжим ле бӱдӱмјим тыҥыйт. Мӱргӱӱлдеримге каруу алып, Иегова чыннаҥ ла мениҥ Адам ла Најым деп сезип јадым».

15. Иегова Давид керегинде нени айткан?

¹⁵ Давид Иегова Кудайга учурлалып калган албатынаҥ болгон до болзо, кудай јаҥныҥ чӱм-јаҥдарын јӱк ле билезине болуп эткен эмес, је Кудайла јуук колбуларлу болорго бойы албаданган. Оныҥ учун Иегова оны тыҥ сӱӱген. Иегова Давидти «јӱрегиме јараган эр» деп айткан (Ап. ижи 13:22). Давид Иегованыҥ јуук најызы болорго, нени эткен?

16. Давид јайаандар ажыра Иегова керегинде нени билип алган?

¹⁶ Давид Иеговала јайаандар ажыра јууктада танышкан. Давид јиит тужында адазыныҥ койлорын кичееп, ар-бӱткенде кӧп  ӧй ӧткӱрген. Анайып, ол шак ла бу ӧйдӧ Иегованыҥ јайаандары керегинде шӱӱп сананып баштаган болор. Темдектезе, тӱнде теҥерини ајыктап, ол јӱк ле муҥдар тоолу јылдыстарды эмес, је бу јылдыстардыҥ Јайаачызыныҥ улу болгонын кайкап кӧргӧн. Оныҥ да учун ол мындый сӧстӧр бичиген: «Јылдыстар Кудайдыҥ магын јарлап јат, теҥери оныҥ колдорыныҥ эткен ижин керелейт» (Сар. 19:1, 2). Давид кижиниҥ канайып јайалганын шӱӱп сананып тура, Кудайдыҥ сӱрекей јаан ойгорын кӧргӧн (Сар. 139:14). Анайып, Давид Кудайдыҥ керектерин шӱӱп сананып, Иегова оноҥ канча киреге улу деп оҥдоп алган (Сар. 139:6).

17. Иегованыҥ јайаандары бисти неге ӱредер аргалу?

¹⁷ Мынаҥ бис неге ӱренедис? Јайалган јайаандарды кӧрӱп турактар. Иеговага, оныҥ јайаган сӱрекей јараш телекейи учун быйанду болуп, оны баалап јӱригер. Айландыра јайаандар — ӧзӱмдер, тындулар ла улус Иегова керегинде неге ӱредип турганын кажы ла кӱн шӱӱп сананарга албаданыгар. Анайып, слер бистиҥ сӱӱштӱ Адабыс керегинде кажы ла кӱн јаҥы нени-нени билип турарыгар (Рим. 1:20). Анайда ок Кудайга сӱӱжигер кажы ла кӱн тыҥып турганын сезеригер.

18. 18-чи Сарынла болзо, Давид нени оҥдогон?

¹⁸ Давид Иегованыҥ болужын кӧргӧн. Темдектезе, Давид адазыныҥ койлорын айудаҥ ла карагуланаҥ корулап турарда, бу казыр тындуларды ол јӱк ле Иегованыҥ болужыла јеҥген деп оҥдогон. Јаан оборлу Голиафты јеҥип аларда, Кудайдыҥ болужын јарт кӧргӧн (1 Сам. 17:37). Кӱйӱнчек Саул кааннаҥ аргаданарда, оны Иегова корулап алган деп алаҥзыбаган (18 Сар., бажындагы сӧстӧр). Улуркак кижи ӱзе макты бойына алар эди. Је Давид андый кижи болбогон. Ол јобош болгонынаҥ улам ончо немени Иегованыҥ болужыла ӧдӱп чыккан деп оҥдогон (Сар. 138:6).

19. Давидтиҥ теми бисти неге ӱредет?

¹⁹ Мынаҥ бис неге ӱренедис? Биске Иегованаҥ јӱк ле болуш сураар керек эмес, је оныҥ канайып ла качан болушканын кӧрӱп турарга албаданар керек. Бис јобош болуп, ончоны эдип болбозысты оҥдоп турзаас, Иегова биске артыкташкан ийде-кӱч берип турганын јарт кӧрӱп турарыс. Иегованыҥ болужын јаантайын кӧрӱп турзаас, Кудайла најылыгыс тыҥып јат. Бу сӧстӧр чын деп, Фиджи ортолыкта јаткан Исак ака бӱдӱмјиленген. Ол кӧп јылдардыҥ туркунына Иеговага иштеп, мынайып айдат: «Ӧткӧн јӱрӱмимди кӧрзӧм, Иегова меге Агару Бичикти ӱренип баштаганымнаҥ ала, бӱгӱнги кӱнге јетире болужып јат деп кӧрӱп јадым. Оныҥ учун Иегова чын ла бар тирӱ Кудай деп алаҥзыбай јадым».

20. Давид недеҥ улам Иеговала јакшы колбуларлу болгон, бу бисти неге ӱредет?

²⁰ Давид Иегованыҥ кылык-јаҥдарынаҥ тем алган. Иегова бисти оныҥ кылык-јаҥдарын кӧргӱзер аргалу эдип јайаган (Баш. 1:26). Бис Иегованыҥ кылык-јаҥдарын канча ла кире јакшы билип алзаас, ончо ло кире оныҥ кылык-јаҥдарын јакшы кӧргӱзерис. Давид бойыныҥ теҥеридеги Адазын јакшы билип алган, оныҥ учун улуска канайып баштанарында темди Кудайдаҥ алар аргалу болгон. Оныҥ јӱрӱминде болгон бир учуралды эске алып ийектер. Давид Вирсавияла чайдам кылык эткен кийнинде, оныҥ ӧбӧӧниниҥ ӧлӱмин келиштирип, Иеговага удура кинчек эткен, је Иегова ого килемјизин кӧргӱскен (2 Сам. 11:1—4, 15). Нениҥ учун дезе Давид Кудайдаҥ тем алып, бойы да улусты килеп јӱретен. Оныҥ башкарузында болгон албаты Давид каанды сӱреен сӱӱген, не дезе, ол Иеговала сӱрекей  јакшы колбуларлу болгон. Иегова оны, керек дезе Израильдиҥ ӧскӧ каандарына да тем эдип тургузатан (1 Каан. 15:11; 2 Каан. 14:1—3).

21. Ефестегилерге 4:24; 5:1-ле болзо, Кудайдаҥ тем алып турганыстаҥ кандый туза болор?

²¹ Мынаҥ бис неге ӱренедис? Биске Иегованаҥ тем алар керек. Ол тушта, биске бойыска да туза болор, Иегованы да јакшы билип аларыс. Бис Кудайдыҥ кылык-јаҥдарынаҥ тем алып, солынзаас, бойысты оныҥ балдары деп кӧргӱзип јадыс. (Ефестегилерге 4:24; 5:1 кычырыгар.)

22, 23. Иегованы јакшы билип, оноҥ тем алып турзаас, кандый туза аларыс?

²² Јайалган јайаандарды кӧрӱп, Агару Бичикти шиҥдеп, Иегованы јакшы билип алатан арга бар деп кӧрдис. Бу кайкамчылу бичикте Кудайдыҥ чындык ишчилериниҥ сӱрекей кӧп темдери бар, ол тоодо Моисейдиҥ ле Давидтиҥ темдери. Иегова бисти оны јакшы билзин деп, бойыныҥ јанынаҥ кӧпти эдип салган. Оныҥ учун бойыстыҥ јаныстаҥ, јайалган јайаандарды кӧрӱп, Агару Бичикти шиҥдеп, јӱрегисти ого ачар керек.

²³ Айдарда, Иегова керегинде оноҥ ло ары јаҥы билгирлер алып турактар (Јарл. 3:11). Је ол керегинде кӧп билгирлер алганыс эмес, је бу билгирлерди канайып тузаланып турганыс јаан учурлу болот. Билип алганысты тузаланып, сӱӱштӱ Адабыстаҥ тем алып турзаас, бистиҥ оныла најылыгыс оноҥ ары тыҥыыр (Иак. 4:8). Иегова бойыныҥ Сӧзи ажыра оныҥ јуук најылары болорго турган улусты качан да артыргыспас деп бӱдӱмјилеп јат.