Иегова Израиль албатыны агару болзын деп кӱӱнзеген. Оныҥ учун олорго мындый јасак берген: «Бой-бойыгарды јабарлабагар. Јуугардыҥ јӱрӱмине кол салбагар. Мен Иегова» (Лев. 19:2, 16).

«Јуугардыҥ јӱрӱмине кол салбагар» дегенин ӧскӧртӧ мынайда айдарга јараар: «кан тӧкпӧгӧр». Бу еврей идиоманыҥ учурын оҥдоорго јеҥил эмес.

Кезик учёныйлар бу сӧстӧрди Левит 19:15-теги сӧстӧрлӧ колбоп јат. Ондо мынайып айдылган: «Јаргыда справедливый эмес јаргы чыгарба. Бай кижини јакшы кӧрӱп, јокту кижини јаман кӧрбӧ. Јаргыҥ справедливый болзын». Олордыҥ јартаганыла болзо, «кол салбагар» деген сӧстӧрди бӱдӱрип турган Кудайдыҥ улузы јаргыда, биледе, акча-манатла колбулу сурактарда бойына ла та нени де келиштирип ийерге болуп, тӧгӱндебес учурлу. Бистиҥ кемибис те мынайып этпей турган эмей. Је бу сӧстӧр мынаҥ да тереҥ јарталат.

16-чы ӱлгердиҥ баштапкы бӧлӱгин кӧрӱп ийектер. Иегова мында бойыныҥ албатызына: «Бой-бойыгарды јабарлабагар» — деп јакарат. Јабарлаш коптоҥ канча киреге јаман. Нениҥ учун дезе јабарлаштаҥ улам кижиниҥ јӱрӱмине јаан каршу јетирилердеҥ айабас (Укаа 10:19; Эккл. 10:12—14; 1 Тим. 5:13—15; Иак. 3:6). Јабарлаары — ол кижиниҥ јакшы адын ӱреерге, ӧнӧтийин кӧпчидип, тӧгӱн неме айдары. Кезикте јаргы кандый бир кижини ӧлтӱрер керек деп јаргы чыгарат. Мынайып тӧгӱнчи керечилердеҥ улам буру јок кижиниҥ јӱрӱми кыйылып јат. Андый учурал Агару Бичикте Навод деген кижиле болгон. Оны тӧгӱнчи керечилердеҥ улам ташла шыбалап, ӧлтӱрип салгылаган (1 Каан. 21:8—13). Айдарда, кемди-кемди јабарлап турган кижини Левит 19:16-да айдылганыла, бойыныҥ јуугыныҥ јӱрӱмине кол саларга турган деп айдарга јараар.

Јабарлаш недеҥ улам башталат? Кижи кемди-кемди кӧрӧр кӱӱни јок болзо, оны ӧнӧтийин ле јабарлаарга албаданат. 1 Иоанн 3:15-те мындый сӧстӧр бичилген: «Бойыныҥ карындажын јаман кӧрӧӧчи кандый ла кижи, — кижи ӧлтӱреечи. Кандый да ӧлтӱреечиде ондо јӱретен ӱргӱлји јӱрӱм јок деп, слер билеригер». Оныҥ да учун Левит 19:16-да айдылган јакылтаныҥ кийнинеҥ ле база бир јакылта бичилген: «Јуугарды јаман кӧрбӧгӧр» (Лев. 19:17).

Анайдарда, «Јуугардыҥ јӱрӱмине кол салбагар» деген јасак христиандарга да айдылган. Бу јасакла болзо, биске кижини јабарлаардаҥ болгой, ол керегинде јаман сананарга да јарабас. Кижиге кӱйӱнип турзаас эмезе оны кӧрӧр кӱӱнис јок болуп турза, бис оны јабарлап баштаарыс. А јабарлап баштазаас, бис оныҥ јӱрӱмине кол саларга турган болорыс. Је христиандарга мынайып эдерге чек јарабас (Матф. 12:36, 37).