1, 2. а) Иисустыҥ ӱч апостолына кандый јакару берилген? Олор бу јакаруны канайып бӱдӱргиледи? б) Бу јӧрмӧлдӧ нени кӧрӧрис?

 ИИСУС б. э. 32-чи јылында, Пасханыҥ кийнинде, бойыныҥ апостолдорыла кожо Пётр, Иоанн, Иаковло бийик кыр баргылаган. Олор Ермон деп кырдыҥ кажы бир сынында болгон болор. Бу кырда, Иисус олордыҥ алдына кубулган! «Чырайы кӱндий јаркындалды, кийими дезе, јарыктый ак болды» (Матф. 17:1—4). Кӧрӱлтениҥ учы јаар Иегованыҥ ӱни угулган: «Бу Мениҥ сӱӱген Уулым, Оныҥ Бойында Мениҥ јакшылыкту табым. Оны угугар!» (Матф. 17:5). Кийнинде, Пётр, Иаков ло Иоанныҥ јӱрӱминеҥ олор чын ла Иисустыҥ сӧзин угуп јӱрген деп кӧрӱнет. Бис олордоҥ тем аларга кӱӱнзейдис.

² Ӧткӧн јӧрмӧлдӧ Иисуска сӧсуккур болорго нени этпес керек деп кӧргӧнис, а бу јӧрмӧлдӧ нени эдер керек деп кӧрӧрис.

3. Матфей 7:13, 14-лӧ болзо, биске нени эдер керек?

³ Матфей 7:13, 14 кычырыгар. Ајардаар ба, Иисустыҥ айтканыла болзо, эки эжик бар. Баштапкы эжик — тапчы. Экинчизи — кеҥ. Тапчы эжиктеҥ кирзеҥ, јӱрӱмге апарып јаткан чичке јолдо болорыҥ. Кеҥ эжиктеҥ кирзеҥ, ӧлӱмге апарып јаткан јалбак јолдо  болорыҥ. Ӱчинчи јол јок. Оныҥ учун биске талдап алар керек, кажы јолло баратанын. Мынаҥ бистиҥ јӱрӱмис камаанду.

4. Элбек јол кандый?

⁴ Биске бу эки јолдыҥ башказын билип алар керек. Элбек јолды кӧп улус талдап јат. Нениҥ учун дезе бу јолло барарга јеҥил. Бу јолды кӧп улус талдап турганын кӧрӧргӧ карамду. Нениҥ учун дезе олор бу јолды Сатана берген ле бу јол ӧлӱмге апарат деп, билбей де јат (1 Кор. 6:9, 10; 1 Иоанн 5:19).

5. Чичке јолды табып алала, оныла барарга кезик улуска нени эдерге келишкен?

⁵ Элбек јолдоҥ башка чичке јол бар. Бу јолды табарга јеҥил эмес. Нениҥ учун дезе Иисустыҥ айтканыла, кӧп тӧгӱн јарлыкчылар чыгар (Матф. 7:15). Бӱгӱнги кӱнде ал-камык кудай јаҥдар бар. Олор ончозы ла: «Чындык бисте» — деп айдыжат. Мынаҥ улам чындыктыҥ јолын бедиреп турган улус та тӧгӱн ӱредӱлерге булгалып калат. Тӧгӱн ӱредӱлер улустыҥ кӧзин сокортып салат. Је чындыктыҥ јолын табып алар арга тӱҥей ле бар. Иисустыҥ айтканыла: «Мениҥ сӧзимнеҥ чыкпай јӱрзегер, чын Мениҥ ӱренчиктерим болгоныгар ол. Чындыкты билип аларыгар, чындык бойы слерди јайымдаар» (Иоанн 8:31, 32). Слер кӧп саба улустыҥ кийнинеҥ барбай, чындыкты бедирегенеер учун слерди мактап јадыс. Слер Кудайдыҥ Сӧзин тереҥжиде ӱренгенеер, анайып Кудайдыҥ нормаларын ла Иисустыҥ ӱредӱлерин билип алганыгар. Анайда ок язычниктердеҥ келген байрамдардаҥ ла чӱм-јаҥдардаҥ айрылып калганаар. Мынайып солынарга слерге кӱч ле келишкен болор (Матф. 10:34—36). Је слер теҥеридеги Иегова Адагарды сӱӱп јадаар ла оны сӱӱндирерге кӱӱнзейдеер. Ол слерле оморкоп јат! (Укаа 27:11).

6. Чичке јолдоҥ чыга конбоско биске не болужар? (Сарын 119:9, 10, 133).

⁶ Ӱргӱлји јолго апаратан чичке јолдоҥ чыга бербеске биске не болужар? Мындый тем кӧрӱп ийектер. Кезик јолдордыҥ кырында, анчада ла кайыр јолдордо, машина јолдоҥ чыга конбозын деп, отбойниктер тургузып салат. Бу отбойниктерди бого бодоп ло не тургузып салган деп, кем де комыдабай јат. Нениҥ учун дезе олор кижиниҥ јӱрӱмин корулап јат. Кудайдыҥ Агару Сӧзиндеги нормалар бистердиҥ јӱрӱмисти база отбойниктер чилеп корулаар аргалу. Бу нормалар чичке јолдоҥ чыга конбоско болужар. (Сарын 119:9, 10, 133 кычырыгар.)

7. Јииттерге чичке јолго кандый кӧрӱмдӱ болор керек?

⁷ Јииттер, слерде Иегованыҥ нормалары јайым јӱрерге бербей турган деп санаалар болуп турган ба? Мындый санааны слерге Сатана берип турган. Ол элбек јолло барып јаткан улустыҥ јӱрӱми сӱӱнчилӱ, јайым деп кӧргӱзип јат. Интернетти, школдо балдарды кӧрзӧӧр, олор бойыныҥ санаазыла јӱрӱп турган, олорго ӱзе јараар деп билдирип турган болор. Оныҥ учун слер Иегованыҥ нормаларынаҥ улам кара-боро јӱрӱм јӱрӱп турганаар деп,  сананып турган болороор *. Је ундыбагар, Сатана элбек јолло барып јаткан улусла учы-тӱбинде не болорын кӧргӱспей јат. А Иегова дезе, чичке јолло барып јаткан улуска кандый алкыштар берилер деп, ӱзе јарт айдып салган (Сар. 37:29; Иса. 35:5, 6; 65:21—23).

8. Олафтыҥ теминеҥ јииттер неге ӱренер аргалу?

⁸ Бистиҥ Олаф * деп јиит карындаштыҥ темин кӧрӱп ийектер. Оныҥ клазыныҥ кыстары оныла кожо конорго албадангылап туратан. Је Олаф Иегованыҥ Керечилери бийик нормаларла јӱрӱп турган деп јартап берерде, кезик кыстар ого оноҥ тыҥ јыжынып баштаган. Андый да болзо, бистиҥ карындаш олордыҥ сӧзине бир де кирбеген.  Олафта ӧскӧ дӧ ченелтелер болгон. Ол куучындайт: «Школдо ӱредӱчилер мени бийик ӱредӱ алзын деп кӱӱнзеткен. Олордыҥ айтканыла болзо, мен бийик ӱредӱ албазам, бу јӱрӱмде неге де јединбезим. Бу ӧйдӧ мен ака-эјелерле јуук таныжып баштагам. Олор мениҥ билем болуп калган. Анайда ок Агару Бичикти оноҥ тереҥжиде шиҥдегем. Канча ла кире тереҥ шиҥдезем, ончо ло кире бӱдӱмјим тыҥыган, Иегованыҥ јолы чындык јол деп». Учы-учында бистиҥ карындаш Иегованыҥ Керечизи болорго, сууга чӧҥӱрилген.

9. Чичке јолго артарга нени эдер керек?

⁹ Сатана бисти јӱрӱмге апарып јаткан чичке јолдоҥ чыга берзин деп кӱӱнзеп јат (Матф. 7:13). Је бис бу јолдоҥ чыга берзеес, кӧндӱрезинеҥ ле ӧлӱмге апарып јаткан јолдогы улустыҥ тоозына кирип каларыс. Оныҥ учун биске Иисустыҥ сӧзин угуп турар керек ле чичке јол бисти канайып корулап турганын ундыбай турар керек. Је эмди дезе Иисус бистерди база нени этсин деп айтканын кӧрӱп ийектер.

10. Матфей 5:23, 24-лӧ болзо, тайылга экелердеҥ озо биске нени эдер керек?

¹⁰ Матфей 5:23, 24 кычырыгар. Иисус мында бир учурал куучындаган. Оны иудейлер јакшы билетен. Еврей кижи Иеговага тайылга эдерге ӧргӧӧгӧ келди. Абыстыҥ јанына јууктап ла келерде, ого карындажы ачынып калган деп сагыжына кирип келген. Эмди ого тайылгазын артыргызала, оны барып бедиреер керек. Нениҥ учун дезе Иеговага тайылга берердеҥ озо ого Иисустыҥ: «Барып, озо карындажыҥла јаражып ал» — деген јакарузын бӱдӱрер керек болгон.

11. Иаков аказыла јаражарга нени эткен?

¹¹ Бис улусла јаражары јанынаҥ патриарх Иаковтыҥ теминеҥ кӧп немеге ӱренер аргалу. Оныҥ јӱрӱминде болгон учуралды эске алып ийектер. Айылынаҥ јӱре бергенинеҥ бери јирме јыл кире ӧдӧ берерде, Иегова ангел ажыра Иаковты кайра јанзын деп јат (Баш. 31:11, 13, 38). Је оныҥ аказы Исав Иаковты ӧлтӱрерге турган болгон (Баш. 27:41). Оныҥ учун Иаков Кудайдыҥ мындый јакарузын угала, коркышту тыҥ коркый берген (Баш. 32:7). Ол нени эткен? Озо ло баштап Иеговага мӱргӱген. Оноҥ аказына баалу сыйлар эткен (Баш. 32:9—15). Бир эмеш ӧйдӧҥ, туштажар ӧй једип келерде, Иаков аказыныҥ алдына бир катап эмес, эки катап эмес, јети катап кӧҥкӧрӧ тӱжӱп бажырган. Мынайып, Иаков јобожыдынып, аказына тоомјызын кӧргӱскенинеҥ улам оныла јаражып алган (Баш. 33:3, 4).

12. Бис Иаковтыҥ учуралынаҥ неге ӱренедис?

¹² Иаков аказыла туштажардаҥ озо ого нени айдарын, нени этсе јакшы болорын сананып алган. Ол бойын јобош тудунып, Иеговага мӱргӱп јат. Оноҥ дезе Исавтыҥ јӱрегин јымжадарга, ого сыйлар аткарган. А качан Иаков аказыла туштажа берерде, кем бурулу, кем бурулу эмес деп тартышпай, карын јаражаларга албаданган.

13, 14. Бис кемди-кемди ачындырып ийген болзоос, нени эдерис?

¹³ Јӱрӱмге апарып јаткан чичке јолдоҥ чыга бербеске, бис ака-эјелерле  урушпай, ачынышпай јӱрерге кӱӱнзеп јадыс (Рим. 12:18). Је кезикте кемди-кемди тӱҥей ле ачындырып ийедис. Мындый айалгада нени эдерис?

¹⁴ Иаков чылап, озо ло баштап Иеговага мӱргӱп, ачынышкан акала эмезе эјеле јаражып аларга болушсын деп сураарыс. Анайда ок бойыска мындый сурактар берерге јараар: «Мен бойымды јобожыдынып, ол кижиниҥ јаманын таштап, јаражарга белен бе? Јаражарга, ол кижини сакыбай, алтамды бойым этсем, Иегова ла Иисуста кандый сезимдер болор?» Бу сурактардыҥ каруулары Иисустыҥ айтканы аайынча эдип, ака-эјеле јаражып аларга кӱӱнзедер. Бу јанынаҥ сӱрекей јакшы темди Иаков кӧргӱскен.

15. Эфестегилерге 4:2, 3-теги принцип ачынышкан кижиле јаражып аларга канайып болужар?

¹⁵ Иаков јобожыдынбай, аказын бурулап баштаган болзо, не болор эди? Јаражардыҥ ордына там ары ачыныжып салар эмес пе? Анайып ла бис ачынышкан кижиле јаражып аларга турган болзоос, биске јобош болор керек. (Эфестегилерге 4:2, 3 кычырыгар.) Укаа сӧстӧр 18:19-та мындый сӧстӧр бичилет: «Ачынып калган кижи бек стенелерлӱ кала ошкош, кезик ачыныштар шибеениҥ эжиктериниҥ јылдырмаларындый болот». Оныҥ учун ачынышкан кижиле јаражып аларга: «Јаманымды ташта!» — деп айтсаас, бу шибеениҥ эжиктери ачыла берер, ӧскӧртӧ айтса, бис оныла јаражып аларыс.

16. Јаражардаҥ озо нени сананып кӧрӧр керек? Нениҥ учун?

¹⁶ Анайда ок кижиле јаражып аларга, озодоҥ ло сананып салар керек: нени айдарым, канай айдарым деп. Бу ачынып калган кижиниҥ јӱрегин јымжадарга болужар. Ачынган кижи биске јарабагадый сӧстӧр айдардаҥ айабас. Мындый ӧйдӧ бис удурлажа берерис эмезе актанып баштаар болорыс. Мынайып бис јаражып болорыс па? Јок эмей. Айдарда, бой-бойысты бурулаардыҥ ордына јаражып алар керек (1 Кор. 6:7).

17. Жильбер аканаҥ бис неге ӱренедис?

¹⁷ Эмди Жильбер аканыҥ темин кӧрӱп ийектер. Ол мынайып куучындаган:  «Бис кызымла кожо чек јарашпайтаныс. Мен оныла јымжак куучындажарга, эки јылдаҥ ажыра албадангам». Жильбер ака кызыла јаражарга нени эткен? «Мен куучындажардаҥ озо Иеговага мӱргӱп алатам. Анайда ок оныҥ ачу сӧстӧрине ачынбаска, бойымды белетеп алатам. Бого коштой јӱк ле мениҥ сӧзим чын деп тартышпай, карын кызымды оҥдоорго албаданып туратам. Нениҥ учун дезе оныла амырды орныктырары эҥ керектӱ болгон. Је эмди мениҥ јӱрегимде амыр. Нениҥ учун дезе билемниҥ ончо улузыла колбуларым јакшы болуп калган» — деп, Жильбер ака айткан.

18, 19. Бис кемди-кемди ачындырып ийген болзоос, биске нени эдер керек? Нениҥ учун?

¹⁸ Бу јӧрмӧлдӧҥ неге ӱренип алдыс? Биске ака эмезе эје ачынып калган болзо, нени эдерис? Иисустыҥ айткан јӧбин бӱдӱрер керек. Иеговага мӱргӱп, оныҥ агару тыны слерге акала јаражып аларга болужар деп алаҥзыбас керек. Мынайып этсеер, сӱӱнчи алараар. Ол тушта слерди Иисустыҥ сӧзин угуп турган деп айдарга јараар (Матф. 5:9).

¹⁹ Иегова бисти христиан јуунныҥ «бажы» ажыра, Иисус Христос ажыра, ӱредип турганы кандый јакшы! (Эф. 5:23). Оныҥ учун апостол Пётр, Иаков ло Иоанн чылап, Иисуска сӧсуккур болуп јӱректер (Матф. 17:5). Биске ачынып калган кижиле јаражарга, мен нени эдип тургам деп сананып турактар. Јӱрӱмге апарып јаткан чичке јолдоҥ чыкпай, ака-эјелерле эптӱ-јӧптӱ јӱрӱп турзаас, бӱгӱнги де кӱнде, келер де ӧйдӧ тӱгенбес алкыштар аларыс!