1. Иегованыҥ сыйы керегинде шӱӱп сананганы кандый туза берет?

 ИЕГОВА сӧсуккур улуска ӱргӱлји јӱрӱм сыйлаар деп сӧзин берет (Рим. 6:23). Бис бу сый керегинде шӱӱп сананып турзаас, Иегова Кудайыска сӱӱжис там тыҥыйт. Теҥеридеги Адабыс бисти сӱреен тыҥ сӱӱп јат. Ол бисле кожо јажын-чакка болорго турган деп сананып ийзеес, кандый јакшы!

2. Ӱргӱлји јӱрӱм керегинде Иегованыҥ берген сӧзи биске канайып болужат?

² Иегова Кудайдыҥ биске ӱргӱлји јӱрӱм берер деп айткан сӧзин сананып турзаас, биске кандый ла кӱчтерди ӧдӧргӧ јеҥил болор. Бисти ӧштӱлерис ӧлӱмле де коркыдып турза, Иегова Кудайыска чындык артарыс (Иоанн 5:28, 29; 1 Кор. 15:55—58; Евр. 2:15). Бис нениҥ учун јалтанбас болуп турганыс? Нениҥ учун дезе Иегова Кудайыска чындык артып, ӧлӱп те калзаас, Кудайыс бисти тирилтип алар. Оныҥ кийнинде бис качан да ӧлбӧзис. Ӱргӱлји јӱрӱм чыннаҥ ла болор бо? Бу керегинде кезик керелер кӧрӱп ийектер.

3. Иегова биске ӱргӱлји јӱрӱм сыйлаар деп, бис кайдаҥ билерис? (Сарын 102:12, 24, 27).

³ Иегова — Јӱрӱм Береечи Кудай. Ол мыныҥ да учун биске ӱргӱлји јӱрӱм сыйлаар аргалу (Сар. 36:9). Агару Бичиктеҥ Иегова јаантайын бар болгон ло јажын-чакка болор деп кӧргӱзип турган кезик ӱлгерлерди кӧрӱп ийектер. Сарын 90:2-ле болзо, Иегова — «чактаҥ-чакка Кудай» деп айдылып јат. Мындый шӱӱлте 102-чи Сарында бар. (Сарын 102:12, 24, 27 кычырыгар.) Анайда ок Аввакум теҥеридеги Адабыс керегинде мындый сӧстӧр бичиген: «О-о Иегова, сен јебрен ӧйлӧрдӧҥ бери болгоҥ.  О-о мениҥ агару Кудайым, сен качан да јоголбозыҥ» (Авв. 1:12).

4. Иегова јаантайын болгон ло јаантайын болор деп оҥдобой до турзаас, санааркаарыс па? Јартап беригер.

⁴ Иегова јаантайын болгон деп бӱдерге кӱч болуп турган болзо, слер јаҥыскан эмезигер (Иса. 40:28). Елиуй Кудай керегинде: «Оныҥ канча јаш јажаганын кем де тоолоп болбос» — деп айткан (Иов 36:26). Је бис та нени де оҥдобой турган болзоос, оны капшай ла тӧгӱн деп айдып болбозыс дезеер? Темдектезе, јаркын — ол не деп јетире оҥдобой до турган болзоос, оны јок деп айдып болбозыс не? Анайып ла Иегованыҥ канайып јаантайын бар болгонын ла јаантайын болорын бис, улус, јетире оҥдобос болорыс. Је мыны оҥдобой турганы́с Иегованы јажын-чакка јӱрбеген деп кӧргӱспей јат (Рим. 11:33—36). Иегова Јер-Телекей де, Кӱн де, јылдыстар да јок болордо болгон. Кудай «јерди бойыныҥ ийде-кӱчиле јайаган» деп айдат. Айдарда, ол «теҥерини јайаардаҥ» озо болгон (Иер. 51:15; Ап. ижи 17:24). Бис ӱргӱлјиге јӱрерис деп, база кандый керелер бар?

5. Баштапкы эки кижиде кандый јакшы арга болгон?

⁵ Ончо тынар-тынду јайаандар јердиҥ ӱстинде бир канча ӧй јӱрӱп ийеле, ӧлӱп калат. Јӱк ле кижиге Кудай ӱргӱлјиге јӱрер арга берген. Је баштапкы кижиге, Адамга, Иегова: «Јакшыны ла јаманды билип алар агаштыйын јибе. Јизеҥ, ол ло кӱн ӧлӱп каларыҥ» — деп, озодоҥ айдып салган (Баш. 2:17). Адам ла Ева Иегованыҥ сӧзин уккан болзо, ӧлбӧс эди. Айдарда, Иегова олорго бир канча ӧйдиҥ кийнинеҥ јӱрӱмниҥ агажыныҥ јиилегин јиирге јарадар эди (Баш. 3:22) b. Анайып, Иегова олорго ӱргӱлјиге јӱрерге јарадып салганын кӧргӱзер эди.

6, 7. а) Улус јажын-чакка јӱрер кӱӱндӱ эдип јайалган деп, база кандый керелер бар? б) Јуруктарды кӧрӱгер. Слер нени эдерге кӱӱнзеп јадыгар?

⁶ Бу јуукта шиҥдеечилердиҥ кӧргӧниле болзо, кижиниҥ меези бастыра јӱрӱмине јуулган јетирӱнеҥ канча катапка кӧп јетирӱ кичеер аргалу. 2010 јылдыҥ «Сайентифик америкэн майнд» деген журналында бистиҥ меегиске 2,5 миллион гигабайт јетирӱ кирер аргалу деп бичилген. Бу кире јетирӱни телевизорды ӱч миллион сааттыҥ туркунына  (300 јылдаҥ ажыра) токтобозынаҥ кӧрзӧӧс аларыс. Је кижиниҥ меези мынаҥ да кӧп јетирӱ кичеер аргалу. Айдарда, Иегова бистиҥ меегисти 70—80 јылга јуулган јетирӱнеҥ канча катапка кӧп јетирӱ кичеер аргалу эдип јайаган (Сар. 90:10).

⁷ Иегова Кудай бисти јӱрӱм јӱрер кӱӱндӱ эдип јайаган. Агару Бичикте айдылганыла, Кудай «улустыҥ јӱрегине јажын-чакка јӱрер кӱӱнди» салып койгон (Эккл. 3:11). Оныҥ да учун бис ӧлӱмди — ӧштӱбис деп бодоп јадыс (1 Кор. 15:26). Сананып ийзеер де, слер тыҥ ооруп калган болзоор, нени де этпей, ӧлӱм сакып отурбазыгар не? Карын, врачтар сайын јӱгӱрип, эмдер ичип баштараар. Јӱрӱм учун учына јетире тартыжар болороор. Ол эмезе јуук улузыгардаҥ та кем де, канча да јашка једеле, божоп калган болзо, слер, оныҥ кийнинде, узак јылдардыҥ туркунына карыгып јӱредеер (Иоанн 11:32, 33). Айдарда, Јайаачы Кудай бистерди ӱргӱлјиге јӱрзин эдип јайабаган болзо, бисте ӱргӱлјиге јӱретен кӱӱн де, сӱреен кайкамчылу иштеп турган эт-кан да болбос эди. Је бис ӱргӱлјиге јӱрер кӱӱндӱ эдип јайалганысты кӧргӱзип турган ӧскӧ дӧ керелер бар. Иегованыҥ баштапкы амадузы солынбаган деп, оныҥ ӧткӧн ӧйдӧ эткен ле бӱгӱнги кӱнде эдип турган кандый керектеринеҥ кӧрӱнет?

8. Иегованыҥ улус аайынча амадузы керегинде Исайя 55:11-де не айдылат?

⁸ Адам ла Еваныҥ кинчегинеҥ улам бала-барказы ӧлӱп баштаган да болзо, Иегова бойыныҥ амадузын солыбаган.  (Исайя 55:11 кычырыгар.) Ол чындык улуска ӱргӱлји јӱрӱм сыйлаарга кӱӱнзейт. Бис оны кайдаҥ билерис? Иегова бойыныҥ амадузын бӱдӱрерге нени айтканын ла нени эткенин кӧрӱп ийектер.

9. Кудай не деп сӧзин берген? (Даниил 12:2, 13).

⁹ Иегова божогон улус тирилер ле олор јажын-чакка јӱрер деп сӧзин берген (Ап. ижи 24:15; Тит. 1:1, 2). Чындык Иов божогон улустыҥ ончозын Иегова Кудай тиргизерге тыҥ кӱӱнзеп турган деп, бир де алаҥзыбаган (Иов 14:14, 15). Анайда ок судурчы Даниил божогон улус тирилер ле олор база качан да божобос деп бӱткен (Сар. 37:29; Даниил 12:2, 13 кычырыгар). А Иисустыҥ ӧйинде јаткан еврейлер, чындык улуска Иегова Кудай ӱргӱлји јӱрӱм сыйлаар аргалу деп, билер болгон. Бу керегинде Иисус кӧп катап айдып туратан (Лука 10:25; 18:18). Иисустыҥ бойын да Адазы тиргискен (Матф. 19:29; 22:31, 32; Лука 18:30; Иоанн 11:25).

10. Тирилиш болгон учуралдар нени керелейт? (Јурукты кӧрӱгер.)

¹⁰ Иегова ӱзе немеге јӱрӱм берет. Керек дезе божоп то калган улусты ол тиргизип ийер аргалу. Эске алынып ийзеер де: Кудайдыҥ болужыла судурчы Илья Сарептада јадып турган тул ӱй кижиниҥ уулын тиргизип ийген (1 Каан. 17:21—23). Кийнинде судурчы Елисей база ла Кудайдыҥ ийде-кӱчиле шунамит кижиниҥ уулын тиргискен (2 Каан. 4:18—20, 34—37). Тирилиш болгон бу да, ӧскӧ дӧ учуралдардаҥ Иегова божогон улусты тиргизип ийер аргалу деп, јарт кӧрӱнип јат (Иоанн 11:23—25, 43, 44). Иисус јерде болордо, Кудай ого улусты тиргизетен ийде-кӱч берген. А эмди Иисус теҥериде. Ого «теҥери ле јерде ончо јаҥ... берилген». Оныҥ учун ол «сӧӧк салар јерде јаткандардыҥ ончозы... тирилер» деп айткан сӧзин бӱдӱрип ийер аргалу (Матф. 28:18; Иоанн 5:25—29). Ол улус качан да божобос аргалу болор.

11. Ӱргӱлјиге јӱретен арга толынты ажыра канайып ачылган?

¹¹ Нениҥ учун Иегова сӱӱген уулын шыралгалу ӧлӱмге ийген? Иисус мынайып јартаган: «Кудай телекейди тыҥ сӱӱгенинеҥ улам, бойы јайаган Уулын берген, ого бӱткен кажы ла кижи ӧлбӧй, ӱргӱлји јӱрӱмдӱ болзын деп» (Иоанн 3:16, ЈТ). Иегова бистиҥ кинчектерис учун Иисусты толынты тайылга эдип бергениле ӱргӱлји јӱрӱм јӱретен арга ачкан (Матф. 20:28). Апостол Павел Кудайдыҥ амадузыныҥ бу јаан учурлу бӧлӱгин мынайып јартаган: «Ӧлӱм кижи ажыра келгени чилеп, кижи ажыра ӧлгӧндӧр дӧ тирилер. Ончо улус баштапкы кижидеҥ, Адамнаҥ, улам ӧлӱп турганы чылап, ончозы Христос ажыра тынданар» (ЈТ) (1 Кор. 15:21, 22).

12. Кудайдыҥ Каандыгы Иегованыҥ улус аайынча амадузын канайып бӱдӱрер?

¹² Иисус ӱренчиктерин Кудайдыҥ Каандыгы келзин ле јердиҥ ӱстинде Иегованыҥ кӱӱн-табы бӱтсин деп мӱргӱӱрге ӱреткен (Матф. 6:9, 10). Кудай дезе улусты јердиҥ ӱстинде ӱргӱлјиге јӱрзин деп кӱӱнзеп јат. Ол бу амадузын бӱдӱрерге, Иисусты — Мессиан Каандыктыҥ Кааны эдип тургускан. Иисуста јердеҥ алынган 144 000 болушчы болор. Олор теҥериде Иисусла кожо Кудайдыҥ табын бӱдӱргилеер (Ачыл. 5:9, 10).

13. Иегова бӱгӱнги ӧйдӧ нени эдип турган? Ол бистеҥ нени сакыйт?

¹³ Анайып, Иегова «кара-бајырт» албатыны јууп, олорды Каандыктыҥ башкаратан  ӧйине јадарга белетейт (Ачыл. 7:9, 10; Иак. 2:8). Бӱгӱнги телекей бой-бойын јаман кӧрӱп, јуулажып та турган болзо, кара-бајырт албаты бойыныҥ јӱрегине улусты јаман кӧрӧтӧн санаа бир де јуутпай јат. Олор кылыштарды салдага солып јат деп айдарга јараар (Мих. 4:3). Олор јуу-согуштарга бир де киришпей јат. Карын, улуска чындыктыҥ јолына туруп аларга болужат, ӧскӧртӧ айтса, Иегова керегинде ле оныҥ амадузы керегинде куучындайт (1 Тим. 6:19). Бу улус Кудайдыҥ Каандыгына јӧмӧжип турганынаҥ улам, тӧрӧӧндӧрине јаман кӧрдӱртет. Ол эмезе олордо акча-манат јанынаҥ кӱчтер болордоҥ айабас. Је Иегова бойыныҥ чындык улузына керектӱ немени ӱзе берип јат (Матф. 6:25, 30—33; Лука 18:29, 30). Бу ончо немедеҥ Кудайдыҥ Каандыгы чын ла бар, бу Каандык Иегованыҥ амадузын бӱдӱрип салар деп, јарт кӧрӱп јадыс.

14, 15. Иегованыҥ ӧлӱмди јажын-чакка јоголтып салар деп берген сӧзи канайып бӱдер?

¹⁴ Бӱгӱнги кӱнде Иисус Христос — башкарып турган Каан. Ол удабас Иегованыҥ амадузын бӱдӱрип салар (2 Кор. 1:20). 1914 јылдаҥ ала Иисус ӧштӱлерин бийлеп јат (Сар. 110:1, 2). Удабас ол бойыныҥ болушчыларыла кожо калју улусты јоголтып салар (Ачыл. 6:2).

 ¹⁵ Иисус бир муҥ јылдыҥ туркунына башкарза, божогон улусты тирилтер ле Иеговага сӧсуккур улусты толо кемдӱ эдип салар. Је калганчы ченелтениҥ кийнинде, Иеговага чындык улус «јерди энчиленип, анда јажын-чакка јадар» (Сар. 37:10, 11, 29). Анайда ок «калганчы ӧштӱ — ӧлӱм» јоголтылып калза, сӱреен јаан сӱӱнчи болор (1 Кор. 15:26).

16. Иеговага иштеерге бисти озо ло баштап не кӱӱнзедер учурлу?

¹⁶ Бу јӧрмӧлдӧ кӧргӧнисле, бистиҥ ижемји Кудайдыҥ Сӧзине тӧзӧлӧнӧт. Бу ижемји калганчы кӱч ӧйлӧрдӧ биске чындыктыҥ јолынаҥ туура јӱре бербеске ле Иеговага ла Иисуска чындык артарга болужат. Је чындык артарга турганыстыҥ шылтагы, јӱк ле јажын-чакка јӱретен јӱрӱмге кирерге турганыс эмес, је озо ло баштап, Иегова ла Иисусты тыҥ сӱӱп турганыс болор керек (2 Кор. 5:14, 15). Нениҥ учун дезе шак ла сӱӱш Иегова ла Иисустаҥ тем аларга ла ижемјибисти улуска куучындаарга кӱӱнзедет (Рим. 10:13—15). Бис кемнеҥ де, нени де сакыбаска ла бары-јогысла ӱлежип турарга ӱренип турзаас, Иегова бисле јажын-чакка најылажар (Евр. 13:16).

17. Бистиҥ кажыбыстаҥ ла не камаанду? (Матфей 7:13, 14).

¹⁷ Ӱргӱлјиге јӱретен улустыҥ ортозында бис болорыс па? Иегова биске ӱргӱлјиге јӱретен арганы ачып салган. Эмди јӱрӱмниҥ јолыла јӱрерис пе, јок по, бистиҥ бойыстаҥ камаанду. (Матфей 7:13, 14 кычырыгар.) Бис ӱргӱлјиге јӱрзеес, јӱрӱм кандый болор? Бу сурактыҥ каруузын келер јӧрмӧлдӧ шӱӱжерис.