1. Иегова ишчилериниҥ мӱргӱӱлдерине карууны канай берет?

 ИЕГОВА јайнап болуш сурап турган ака-эјелерге слер ажыра болужар аргалу деп билереер бе? Ол бойыныҥ ишчилерине болужарга, аксагалды да, болушчы ишчини де, пионерди де, тегин јарчыны да тузаланар аргалу. Анайда ок аканы ба, эјени бе ол эмезе јажы јаан да кижини, кичинек те баланы тузаланар аргалу. Айдарда, Иегова бойыныҥ улузыныҥ мӱргӱӱлдериниҥ карууларын аксагалдар ла чындык ишчилери ажыра берип јат. Ол слер де ажыра болужып ийер аргалу деп алаҥзыбагар (Кол. 4:11). Бис Иеговага иштеп турганыстаҥ ла ака-эјелериске мынайып болужып турганыстаҥ јаан сӱӱнчи аладыс! Мындый болуш эпидемиялардыҥ, кандый бир тӱбектиҥ эмезе истежӱлердиҥ ӧйинде сӱреен керектӱ болуп јат.

2. Эпидемияныҥ ӧйинде ака-эјелерге болужарга недеҥ улам кӱч болордоҥ айабас?

² Эпидемиялардаҥ улам ака-эјелерге болужарга кӱч болордоҥ айабас. Темдектезе, слер најылараарга барып келерге сананадаар. Је оорып калбаска, эмезе олорды оорыдып койбоско барбай јадаар. Эмезе немеге јединбей турган аканы эмезе эјени айылыгарга кычырарга кӱӱнзейдигер. Је эпидемиянаҥ улам, мынайда да болужар арга јок болот. Ол эмезе болужар кӱӱнис бар да болзо, је бистиҥ билегистеҥ кемибис-кемибис ооруп турган болот. Андый да болзо, канча кире аргагар бар болужып турзаар, Иегованы сӱӱндирип јадыгар (Укаа 3:27; 19:17). Бисте ака-эјелерге болужатан кандый аргалар бар?

3. Дейзиниҥ јууныныҥ аксагалдарынаҥ бис неге ӱренедис? (Иеремия 23:4).

 ³ Аксагалдар нени эдер аргалу? Сен аксагал болзоҥ, бойыҥныҥ койлорыҥды јакшы билип ал. (Иеремия 23:4 кычырыгар.) Ӧткӧн јӧрмӧлдӧ айдылган Дейзи b эје мынайда куучындаган: «Бистиҥ јарлаар иштиҥ бӧлӱгиниҥ аксагалдары мен ле де, ӧскӧ дӧ ака-эјелерле кожо јарлап-эштеп туратан». Мынайып, аксагалдарга бу эјеге COVID-19-тыҥ ӧйинде болужарга ла јууктарын јылыйткан ӧйдӧ токунадарга јеҥил болгон.

4. Аксагалдар Дейзиге недеҥ улам болужар аргалу болгон? Аксагалдарга мынаҥ кандый ӱредӱ бар?

⁴ Дейзи айдат: «Аксагалдар меге најылар болгон. Оныҥ учун олорго сезимдеримди ле санааркаштарымды куучындаарга эпјоксынбай туратам». Мынаҥ аксагалдар неге ӱренер аргалу? Тӱбек болголоктоҥ озо ака-эјелерге кӱдӱчилер болугар. Олорло најылажып туругар. Эпидемиянаҥ улам олорло кӧстӧҥ кӧскӧ јолыгатан арга јок боло берзе, ӧскӧ аргалар бедирегер. Дейзи оноҥ ары куучындайт: «Кезикте меге бир ле кӱнде канча аксагал телефон согуп, сообщениелер аткарып туратан. Агару Бичиктеҥ олордыҥ аткарган ӱлгерлерин кычырзам, олорды јакшы билген де болзом, кӧзим јаштала беретен».

5. Ака-эјелерге кандый болуш керек болуп турганын аксагалдар канайып билип алар аргалу? Олор ака-эјелерге канайып болужар?

⁵ Ака-эјелерге кандый болуш керек болуп турганын билип аларга нени эдер керек? Андый аргалардыҥ бирӱзи — олорго сурактар берери, је мында ајарыҥкай болугар (Укаа 20:5). Олордыҥ курсак-тамагы, эм-тузы ла кийим-тудумы јеткил бе? Эмезе олорго иштеер иш, јадатан тура керек болуп турган болор. Бого ло коштой, государственный пособиени аларга болуш керек болуп турган болор. Дейзи эјеге ака-эјелер акча-манатла болушкан. Је эјениҥ јӱрегин анчада ла аксагалдардыҥ эмоциональный ла кӧгӱс јанынаҥ болушканы томулткан. Эје эске алынат: «Аксагалдар мениле кожо мӱргӱп туратан. Олордыҥ меге кандый сӧстӧр айтканы санаама артпаган да болзо, је менде кандый сезимдер болгоны артып калган. Иегова бойы меге: „Сен јаҥыскан эмезиҥ“ — деп айдып тургандый билдирген» (Иса. 41:10, 13).

6. Ака-эјелер бой-бойына канайып болужар аргалу? (Јурукты кӧрӱгер.)

⁶ Ака-эјелер нени эдер аргалу? Бистиҥ  аксагалдар ака-эјелерге эрчимдӱ болужар эмей. Је Иегова бистиҥ кажыбысты ла бой-бойыска болушсын деп кӱӱнзеп турган (Гал. 6:10). Темдектезе, ооруп турган кижиге бир де кичинек ајару этсе, оныҥ кӱӱни кӧдӱриле берер. Кичинек те бала ого јурук јурайла ол эмезе открытка бичийле сыйлаар аргалу. Јииттер дезе айылын арутап берер ле магазиннеҥ керектӱ немени экелип берер аргалу. Ол эмезе кезигис курсак азала, апарып берер аргалу. Је эпидемияныҥ ӧйинде болуп турган некелтелерди ундыбас керек. Андый ӧйдӧ кажы ла кижиниҥ кӱӱнин кӧдӱрзе јакшы эмей. Бис јуунныҥ кийнинеҥ ака-эјелерле куучындажып аларга, олорло јолыгыжып ол эмезе видеосвязьла куучындажып болорыс па? Аксагалдарга да ајару эдер керек. Кезик ака-эјелер олорго быйанын айдып, открыткалар бичиген. Нениҥ учун дезе эпидемияныҥ ӧйинде олорго коркышту кӧп иштенерге келижет. Бистиҥ кажыбыста ла бой-бойыстыҥ кӱӱнисти кӧдӱретен арга бары кандый јакшы! (1 Фес. 5:11).

7. Тӱбек кижиниҥ јӱрӱмин канайып солыырдаҥ айабас?

⁷ Тӱбек кижиниҥ јӱрӱмин бир ле уунда коркышту тыҥ солып салардаҥ айабас. Тӱбектеҥ улам улус јӧӧжӧзин, туразын керек дезе јуук улузын да јылыйтат. Андый учуралдар бистиҥ ака-эјелерде де болордоҥ маат јок. Олорго канайып болужар?

8. Аксагалдарга ла билениҥ бажына тӱбектеҥ озо нени эдип салар керек?

⁸ Аксагалдар нени эдер аргалу? Аксагалдар, ака-эјелерге тӱбекке озо белетенип аларга болужып беригер. Јуунныҥ кажы ла кижизи бойын канайып корулайтанын ла аксагалдарла канайып колбожотонын билер бе деп, бӱдӱмјиленип алыгар. Ӧткӧн јӧрмӧлдӧ айдылган Маргрет эје айдат: «Аксагалдар „Јербойыныҥ керексиништери“ деген пунктта тӱбек болотон ӧй божоголок деп айткан. Оныҥ учун ороонныҥ јаҥдары эвакуация эдип баштаза ол эмезе айалга коркышту јеткерлӱ деп кӧрӱнип баштаза, биске јаткан јерлеристеҥ тӱрген ле јӱрер керек деп айдып салган». Аксагалдардыҥ айтканы чек ле ӧйинде болгон. Нениҥ учун дезе бӱдӱм јарым ла айдаҥ коркышту јаан ӧрт башталган. Билениҥ бажына билелик бажырыштыҥ ӧйинде билезиниҥ кажы ла кижизиле јеткерлӱ айалгада нени эдер керек деп куучындажып алар керек. Слер бойоор до, балдараар да белен болзоор, тӱбектиҥ ӧйинде тыҥ санааркабаска јеҥил болор.

9. Аксагалдар тӱбектеҥ озо ло тӱбектиҥ кийнинде кандый болуш эдет?

⁹ Кару ака, сен јарлаар иштиҥ бӧлӱгиниҥ кӧрӧӧчизи болуп турган болзоҥ, ӧйди чӧйбӧй лӧ кажы ла јарчыныҥ телефоныныҥ номерин ле јадып турган јериниҥ адрезин сурап ал. Список тургузып алала, оны јаантайын јаҥыртып тур. Анайып, тӱбектиҥ ӧйинде ака-эјелерле канайып колбожор ло олорго кандый болуш керек болуп турганын билер болорыҥ. Мыны билип алган кийнинде јетирӱни капшай ла аксагалдардыҥ јӧбиниҥ координаторына айдып ий. Ол дезе оны аймак кӧрӧӧчиге јетирип салар. Акалардыҥ мынайып ӧмӧ-јӧмӧ иштегенинеҥ сӱреен кӧп иш эдилер! Темдектезе, Маргреттиҥ аймак кӧрӧӧчизи ӧрттиҥ кийнинде 36 саат уйуктабай, јербойыныҥ аксагалдарыла кожо телефонло колбожып, айылдарын артыргызарга келишкен 450 кире ака-эјеге јадатан јер табып аларга болушкан (2 Кор. 11:27).

10. Аксагалдар кӱдӱчиниҥ ижин нениҥ учун јаан учурлу иш деп сананат? (Иоанн 21:15).

¹⁰ Аксагалдардыҥ молјуларына ака-эјелерди кӧгӱс ле эмоциональный јанынаҥ кичеери база кирет (1 Пётр 5:2). Андый акалар тӱбектиҥ кийнинеҥ јуунныҥ бастыра улузы коруда ба, јок по, анайда ок  олордыҥ кажызында ла курсак-тамагы, кийим-тудумы, јадар туразы бар ба, јок по, деп бӱдӱмјиленип јат. Је тӱбектиҥ кийнинеҥ кӧп айлар ӧткӧн дӧ болзо, кезик ака-эјелерге кӧгӱс ле эмоциональный болуш тӱҥей ле керек болот. (Иоанн 21:15 кычырыгар.) Филиалдыҥ комитединде иштеп турган Харолд ака кандый бир тӱбек ӧткӧн ака-эјелерле куучындашкан. Ол олор керегинде мындый сӧстӧр айдат: «Андый ака-эјелерге ӧй керек. Олор бир эмештеҥ токунай берет, је јылыйткан јуук кижизи керегинде, ол эмезе јӱрегине јуук кандый бир неме керегинде, анайда ок бойы да арайдаҥ калганы керегинде сананза, јӱрегине ойто ло ачу сезимдер келет. Олордыҥ шырказы јазылып та баратса, андый сезимдер ойто ло ойгонып келет. Је андый ака-эјелерди кӧгӱс јанынаҥ уйадап калган деп, бир де сананбас керек. Не дезе јуук кижизин јылыйткан кижиде андый санаалар ла сезимдер канай болбойтон?!»

11. Тӱбекке табарткан билелерге кандый болуш керек болор?

¹¹ Аксагалдар ыйлап јӱргендерле кожо ыйлап јадылар (Рим. 12:15). Олор тӱбекке тӱшкен ака-эјелерди Иегова ла бастыра ака-эјелер тыҥ сӱӱп турган деп бӱдӱмјилеер аргалу. Анайда ок тӱбекке табарткан билелерге Кудайга мӱргӱӱрин, таҥынаҥ ӱренерин, јуундарга јӱрерин ле јарлап турарын оноҥ ло ары улалтсын деп болужып јат. Ол эмезе аксагалдар ада-энелерди бойыныҥ балдарын кандый да тӱбек айрып болбойтон немени ундыбай јӱрзин деп болужарына кӱӱнзедер аргалу. Ада-энелер, слер балдараарга Иегова олордыҥ најызы ла олорды качан да артыргыспас деп айдып туругар. Анайда ок бастыра јердиҥ ӱстинде ака-эјелер бар, олор до јаантайын болужарга белен деп јартап беригер (1 Пётр 2:17).

12. Ака-эјелер тӱбектиҥ ӧйинде канай болужар аргалу? (Јурукты кӧрӱгер.)

¹² Ака-эјелер нени эдер аргалу? Слер тӱбек болгон јерге јуук јадып турган болзоор, аксагалдардаҥ кандый болуш керек деп сурап ийеер. Слер байла, туразы јок артып калган ла болужып келген ака-эјелерди канча да ӧйгӧ айылыгарга јатыргызар болороор (2 Кор. 1:8—11). Ол эмезе тӱбекке тӱшкен улусты курсак-тамакла, эҥ ле керектӱ не-немеле јеткилдереер (2 Кор. 8:2—5). Је тӱбек јадып турган јереердеҥ ыраак болгон болзо, канай болужараар? Слер андагы ака-эјелер учун мӱргӱӱр аргалу эмезе телекейлик ишке акчала болужар аргалу. Анайда ок ол тӱбек болгон јерге барып болужарга турган болзоор, ол керегинде аксагалдарга айдып  ийигер. Слерди кычырып ийзе, озо баштап ӱредер болор. Ол тушта тӱбек болгон јерге барзаар, слердеҥ јаан туза болор.

13. Бистиҥ ижис токтодылган јерде јадып турган ака-эјелерде кандый кӱчтер болот?

¹³ Истежӱлер јӱрӱмисти там уурладып јат. Бистиҥ ижибисти токтодып салган ороондо јадып турган ака-эјелерде, бастыра јердиҥ ӱстинде јадып турган ака-эјелерде ле чилеп, акча-манатла кӱчтер болот, олор ооруп та јат, јууктарын да јылыйтат. Је токтодунаҥ улам аксагалдар мындый кӱч айалгада болуп калган ака-эјелерле јайым јолыгыжып, куучындажып болбой јат. Шак ла мындый айалга ӧткӧн јӧрмӧлдӧ айдылган Андрей акада болгон. Оныҥ јарлаар ижиниҥ бӧлӱгиндеги эје акча-манатка јединбей јӱрген. Анайда ок ол аварияга кирген. Бу эјеге бир канча операция эдерге келишкен, оныҥ учун ондо ишке барар арга болбогон. Је ака-эјелер, пандемия да, токтоду да болгон болзо, ого канча кире аргазы бар болужын јетиргендер. Иегова да бу айалганы кӧргӧн.

14. Аксагалдар биске кандый тем кӧргӱзет?

¹⁴ Аксагалдар нени эдер аргалу? Андрей ака канча кире кӱчи бар ака-эјелерге болужып, Иеговага мӱргӱген. Иегова ого кандый каруу берди? Иегова дезе ака-эјелерди байагы эјеге болушсын деп кӱӱнзедип ийген. Олордыҥ кемизи де эјени бойыныҥ машиназыла врачка апарган, та кемизи де акча берген. Бу ака-эјелер Иегованыҥ алкыжыла канча кире кӱчи бар эјеге болушкылады (Евр. 13:16). Аксагалдар, слер бистиҥ ижисти токтодып турган ороондо јадып турган болзоор, ӱзе ле немени бойоор эдерге албаданбагар. Оныҥ ордына кезик ишти ака-эјелерге берип туругар (Иер. 36:5, 6). Анайда ок эҥ керектӱзин — Иеговага иженерин бир де ундыбагар. Иегова Кудайыс слерге ака-эјелерди кичеерге јаантайын болужар.

15. Истежӱлердиҥ ӧйинде канай бирликти кичееп алар?

¹⁵ Ака-эјелер нени эдер аргалу? Токтодуныҥ ӧйинде бис кичинек бӧлӱктерле јуулыжар болорыс. Мындый ӧйдӧ ака-эјелерле амыр-энчӱни кичеер керек. Бис ака-эјелерле эмес, је Сатанала тартыжып јадыс. Оныҥ учун ака-эјелердиҥ бир кичинек јастыраларына ајару этпес керек. Ол эмезе оҥдошпостор боло берзе, оныҥ аайына тӱрген ле чыгып турар керек (Укаа 19:11; Эф. 4:26). Слерди болуш керек деп сураарын сакыбай, бойлороор акту кӱӱнеердеҥ болужып туругар (Тит. 3:14). Ака-эјелер  аварияга кирген эјеге болужып турала, бой-бойына оноҥ јуук болуп калган. Олор чыннаҥ ла бир биледий (Сар. 133:1).

16. Истежӱлер ӧдӱп турган ака-эјелерге бис канайып болужар аргалу? (Колоссыдагыларга 4:3, 18).

¹⁶ Башкарулар кандый бир токтодулар да тургузып турза, канча муҥ ака-эјелер Иеговага оноҥ ло ары иштеп јат. Олордыҥ кезиги бӱдӱмјизи учун тӱрмеде отурат. Бу ака-эјелер ле олордыҥ билелери учун мӱргӱп туругар. Анайда ок олорго јалтанбай, кӧгӱс јанынаҥ ла юридический јанынаҥ, эмезе ӧскӧ дӧ јанынаҥ болужып тургаҥ ака-эјелер учун мӱргӱгер c. (Колоссыдагыларга 4:3, 18 кычырыгар.) Мӱргӱӱлдиҥ ийдези сӱреен јаан! Оныҥ учун истежӱлер ӧдӱп турган ака-эјелер учун мӱргӱгенеер болужар аргалу деп, бир де алаҥзыбагар (2 Фес. 3:1, 2; 1 Тим. 2:1, 2).

17. Бис истежӱлерге белен болорго эмди ле нени эдер аргалу?

¹⁷ Бойоорды ла билегерди истежӱлерге эмди ле белетегер (Ап. ижи 14:22). Истежӱлер кандый болор деп коркып, санааркап отурардыҥ ордына, бойоордыҥ да, балдарыгардыҥ да Иеговала колбуларын тыҥыдыгар. Је тыҥ санааркай берзегер, «јӱрегерде не барын Иеговага чыгара айдыныгар» (Сар. 62:7, 8). Анайда ок Иеговага нениҥ учун бӱдӱп турганыгарды билегерле кожо шӱӱп кӧрӱгер d. Тӱбекке белетенгенеер чилеп, балдараар Иеговага тыҥ бӱдӱп турзын деп болужарга айткан сӧзӧӧрлӧ, эткен керектереерле кӧргӱзип туругар. Ол тушта олор коркыбай барар, јӱректеринде амыр болор.

18. Бисти кандый ӧй сакып јат?

¹⁸ Иегованыҥ амыры биске кору берет (Флп. 4:6, 7). Ӧскӧртӧ айтса, Иегова Кудайыс бистиҥ јӱрегисти эпидемиялардыҥ, истежӱлердиҥ, кандый ла тӱбектиҥ ӧйинде токунадат. Анайда ок Иегова биске иштеҥкей кӱдӱчилер ажыра болужат. Бого коштой Иегова бистерди кӱчтердиҥ ӧйинде бой-бойыска болужып турзын деп кӱӱнзедет. Кудайдыҥ амыры келер ӧйдӧ болотон коркышту јаан ченелтелерди де ӧдӧргӧ, керек дезе «улу тӱбекти» де ӧдӧргӧ болужар (Матф. 24:21). Ол ӧйдӧ бойыска да амыр артар керек болор, ӧскӧ дӧ улуска амыр артарга болужарыс. Је мыныҥ кийнинде бистиҥ јӱрегисте база качан да санааркаштар болбос. Ол тушта Иегова бойыныҥ айткан сӧзиле качан да «тӱгенбейтен амыр-энчӱ» берер (Иса. 26:3, 4).