1. Иисус јанындагы божоорго јаткан кижиге нени айткан? (Лука 23:39—43).

 ИИСУС шыралгалу ӧлӱмле божоорго јат. Оныҥ јанында каршулу керектер эткен эки кижини кадап салган (Лука 23:32, 33). Олор экӱлези ле Иисусты јамандагылап турды. Айдарда, бу эки кижи Иисустыҥ ӱренчиктери болбогон (Матф. 27:44; Марк 15:32). Је учында олордыҥ бирӱзи санаазын солып, Иисуска: «Каандыгыҥа келзеҥ, мени эске ал» — деп айдарда, Иисус ого: «Мен сеге бӱгӱн айдадым: мениле кожо райда болорыҥ» — деп айтты. (Лука 23:39—43 кычырыгар.) Бу кижи теҥеридеги Каандык керегинде уккан болор, је Иисустыҥ ӱренчиги болбогон (Матф. 4:17). Анайда ок Иисус оны теҥеридеги Каандыкка барар деп айтпаган. Айдарда, ол бу кижиге јерде болор рай керегинде айткан. Нениҥ учун мынайда айдарга јараар?

2. Кинчегин алынган кижини еврей болгон деп нениҥ учун айдарга јараар?

² Кинчегин алынган, каршулу керек эткен кижини еврей укту болгон деп айдарга јараар. Нениҥ учун дезе ол каршулу керек эткен база бир кижинеҥ: «Кудайдаҥ коркыбайдыҥ ба?» — деп сураган (Лука 23:40). Ол ӧйлӧрдӧ еврей албаты јаҥыс Кудайга бажыратан. А ӧскӧ албатылар кӧп кудайларга бӱткен (Чыг. 20:2, 3; 1 Кор. 8:5, 6). Айдарда, бу эки кижи еврей укту эмес болгон болзо, сурак мындый болор эди: «Кудайлардаҥ коркыбайдыҥ ба?» Анайда ок Иисус ӧскӧ укту албатыларга эмес, је «јӱк Израильдиҥ азып јӱрген койлорына»  ийилген болгон (Матф. 15:24). Бого коштой израильтяндар Иегова божогон улусты тиргизерин билетен. Оныҥ учун кинчегин алынган каршулу керек эткен кижи бу керегинде билген болордоҥ айабас. Оныҥ сӧстӧринеҥ Иегова Иисусты оныҥ Каандыгында башкарарга тиргизер деп бӱткени кӧрӱнет. Айдарда, бу кижи Иегова оны да тиргизер деп бӱткен болор.

3. Кинчегин алынган кижиге Иисус рай керегинде айдарда, оныҥ санаазында не јуралган болор? (Башталганы 2:15).

³ Кинчегин алынган кижи еврей болгон болордо, ол Адам ла Ева керегинде ле Кудай олорды райда јатыргыскан деп билетен болгон. Оныҥ учун Иисус ого рай керегинде айдарда, оныҥ санаазында јердеги сӱреен јараш рай јуралган болор. (Башталганы 2:15 кычырыгар.)

4. Иисустыҥ каршучыл кижиге айткан сӧстӧри бисти нени сананарга кӱӱнзедет?

⁴ Иисустыҥ каршучыл кижиге айткан сӧстӧри бисти райдагы јӱрӱм кандый болорын сананарга кӱӱнзедет. Райдагы јӱрӱм кандый болорын билип аларга, Соломон каанныҥ башкарган ӧйин кычырза јакшы болор эди. Агару Бичикте айдылганыла, Иисустыҥ јаҥы Соломон каанныҥ јаҥына кӧрӧ, канча катапка артык (Матф. 12:42). Оныҥ учун Иисус майлаткандарла кожо башкарып баштаза, райдагы јӱрӱм сӱреен јараш болор деп иженип јадыс. Айдарда, «ӧскӧ койлор» ӱргӱлји јӱрӱм јӱрерге нени эдер керек деп билер учурлу (Иоанн 10:16).

5. Слердиҥ санаагарла болзо, рай кандый болор?

⁵ Слердиҥ санаагарла болзо, райда јӱрӱм кандый болор? Слердиҥ кӧзӧӧргӧ Эдем садка тӱҥей јараш парк јуралып турган болор (Баш. 2:7—9). Ол эмезе Кудайдыҥ кажы ла ишчизи «бойыныҥ виноградыныҥ ла инжир агажыныҥ алдында отурар» деп, Михейдиҥ айткан судуры сагыжарга кирип турган болор (Мих. 4:3, 4). Анайда ок библиялык ӱлгерлерде курсак артыгынча болор деп айдылат (Сар. 72:16; Иса. 65:21, 22). Оныҥ учур слердиҥ санаарда слер јараш паркта отурганаар, алдыгарда толтыра амтанду курсакту стол турган деп јуралып турган болор. Айландыра кандый ла чечектердиҥ јараш јыды јытанат. Анайда ок слерге јуук улузыгардыҥ ла најылараардыҥ, тирилген де улузыгардыҥ, сӱӱнчилӱ каткызы угулып турган болор. Бу јӱрӱм куру санаа эмес. Бу мындый јараш јӱрӱм бастыра јердиҥ ӱстинде болор. Анда кажы ла кижи јарап турган ижин эдер.

6. Бис райда нени эдерис? (Јурукты кӧрӱгер.)

⁶ Иегова бисти бойыстыҥ ижистеҥ  сӱӱнчи алар этире јайаган (Эккл. 2:24). Иисустыҥ бир муҥ јыл башкарар ӧйинде бисти кӧп иш сакып јат. Сананып ийзеер де, улу тӱбекти ӧткӧн улуска ла канча миллион тирилген улуска кийим-тудум, јадатан јер ле курсак-тамак керек болор. Оныҥ учун бу ончо неме болзын деп, бис кӧп иштенерис. Је бис бу иштеҥ јаан сӱӱнчи аларыс. Канайып Адам ла Евага Эдем садты јазап кичеер керек болгон, анайып ла бис бастыра јердиҥ ӱстин рай этире јазаарыс. Анайда ок Иегова ла оныҥ амадузы керегинде нени де укпаган канча миллион тирилип келген улусты ӱредери кандый јилбилӱ иш болор! Бого ло коштой Христостоҥ озо јаткан Кудайдыҥ чындык ишчилери тирилип келзе, бис олорго олордыҥ божоп калган кийнинеҥ јӱрӱм кандый болгонын куучындаарыс.

7. Бис неге иженер аргалу? Нениҥ учун?

⁷ Удабас јердиҥ ӱстинде рай болзо, бастыра неме јеткил, амыр-энчӱ ле аайлу-башту болор. Мыны бис кайдаҥ билерис? Иегова оныҥ уулы Иисус Христос башкарза, јӱрӱм кандый болорын биске айдып салган. Эмди дезе, Соломон каанныҥ башкарган ӧйи керегинде куучындажып ийектер.

8. Сарын 37:10, 11, 29-тагы сӧстӧр алдында ӧйдӧ канайып бӱткен? (Бу чыгармада «Кычыраачылардыҥ сурактарын» кӧрӱгер.)

⁸ Давид каан Иегованыҥ агару тыны ажыра ширееге Кудайга чындык ла ойгор каан отурза, јӱрӱм кандый болор деп бичип салган. (Сарын 37:10, 11, 29 кычырыгар.) Бис јарлаар иште улуска рай керегинде куучындазаас, Сарын 37:11-деги ӱлгерди ачып кычырадыс. Бу сӧстӧрди Иисус та Кырдагы куучынында тузаланган. Анайып, бу судур келер ӧйдӧ бӱдер деп кӧргӱскен (Матф. 5:5). Је Давидтиҥ сӧстӧри Соломонныҥ башкарар ӧйинде јӱрӱм кандый болор деп база кӧргӱскен. Соломон каан башкарган тушта, Израиль албаты амыр-энчӱ јӱрген ле ӱзе јанынаҥ јеткил болгон. Олорды «сӱт ле мӧт агып турган»  јерде јаткан деп айдарга јараар. Иегова Кудай мынайып айткан: «Мениҥ јасактарымды... бӱдӱрип турзагар... Мен бу јерге амыр-энчӱ берерим. Уйуктап јатсаар, кемнеҥ де коркыбазыгар» (Лев. 20:24; 26:3, 6). Бу сӧстӧр Соломон каан башкарган ӧйдӧ бӱткен (1 Лет. 22:9; 29:26—28). Анайда ок Иегова «јаман керектер эдип турган улус јоголып калар» деп сӧзин берген (Сар. 37:10). Айдарда, Сарын 37:10, 11, 29-тагы сӧстӧр алдында да ӧйдӧ бӱдӱп калган, келер де ӧйдӧ бӱдер.

9. Шева јериниҥ каан ӱй кижизи Соломонныҥ каандыгы керегинде нени айткан?

⁹ Соломонныҥ башкарган ӧйинде албаты амыр-энчӱ ле сӱреен байлык јатканы керегинде туку Шевадагы каан ӱй кижиге де угула берген. Ол ӱй кижи Соломонныҥ байлык јадынын бойыныҥ кӧзиле кӧрӧргӧ, Иерусалимге једип барган (1 Каан. 10:1). Ол Соломонныҥ каандыгын кӧрӧлӧ, коркышту тыҥ кайкап, мынайда айткан: «Кӧрӧр болзо, јарымын да куучындагылабаган эмтир! [...] Јаантайын сениҥ алдыҥда туруп, ойгорыҥды угуп турган албатыҥ ла јалчыларыҥ ырысту!» (1 Каан. 10:6—8). Је Иисустыҥ башкаратан ӧйдӧги јӱрӱм Соломонныҥ башкарган тужындагы јӱрӱминеҥ канча катапка артык болор.

10. Иисус Соломонноҥ незиле артык?

¹⁰ Иисус Соломонго кӧрӧ бастыра јанынаҥ артык. Соломон толо кеминде эмес кижи, анайда ок ол кӧп јастыралар эткен. Оноҥ улам кудайдыҥ албатызы шыралаган. Иисус — толо кеминде башкараачы, ол бир де јастырбай турган (Лука 1:32; Евр. 4:14, 15). Оны Сатана коркышту тыҥ ченеген де болзо, ол Кудайга чындык арткан. Анайып, Иисус качан да јастырбас ла бойыныҥ чындык улузына каршузын јетирбес деп керелеген. Бисте андый јакшы башкараачы барына сӱӱнип јадыс!

11. Иисусла кожо кемдер башкарар?

¹¹ Иисусла кожо јердеҥ барган 144 000 майлаткандар башкарар. Олор јердеги улусты кичеер ле Иегованыҥ јер аайынча амадузын бӱдӱрер (Ачыл. 14:1—3). 144 000 јерде јадарда, кӧп кыйын-шыра ӧткӧн. Оныҥ учун олор јердеги улустыҥ айалгазын сӱреен јакшы оҥдоор. Је майлаткандар кандый иштер бӱдӱрер?

12. Иегова 144 000-га кандый иш берер?

¹² Иисустыҥ ла оныла кожо башкаратан майлаткандардыҥ бӱдӱретен ижи Соломонныҥ бӱдӱрген ижинеҥ канча катапка кӧп болор. Соломон каан јӱк ле бир ороондо миллиондор тоолу улусла башкарган. Је Иисусла кожо башкаратан майлаткандар бастыра јердиҥ ӱстинде миллиардтар тоолу улусла башкарар. Чыннаҥ ла, Иегова 144 000-га андый јаан иш берер!

13. Майлаткандар кандый иш бӱдӱрер?

¹³ 144 000 Иисус ла чылап каандар ла абыстар болор (Ачыл. 5:10). Моисейдиҥ јасагыла болзо, абыстар Кудайдыҥ албатызыныҥ озо ло баштап, су-кадыгын ла ич-кӧгӱс јанын кичеер учурлу болгон. Ол ӧйдӧ јасак албатыга «келер ӧйдӧ болотон јакшыныҥ јӱк ле кӧлӧткӧзи» болгон. Айдарда, майлаткандар Иисуска Кудайдыҥ албатызыныҥ су-кадыгын ла кӧгӱс јанын кичеерге болужар (Евр. 10:1). Је олордыҥ биске канайып болужарын эм тура бис билбезис. Кандый да болотон болзо, јердеги улуска керектӱ башкартулар берилип турар (Ачыл. 21:3, 4).

14. «Ас ӱӱрди» ле «ӧскӧ койлорды» не бириктирет?

¹⁴ Иисус оныла кожо теҥериде башкаратан майлаткандарды «ас ӱӱр» деп адаган (Лука 12:32). Анайда ок ол экинчи бӧлӱк улус керегинде — «ӧскӧ койлор» (ЈТ) керегинде айткан. Бу эки бӧлӱк улус јаҥыс ӱӱр болуп јат (Иоанн 10:16). Олор бӱгӱнги кӱнде ӧмӧ-јӧмӧ иштегилейт. А јердиҥ ӱсти рай болуп калза, олор оноҥ до ары кожо иштенер. Ол ӧй једип келзе, майлаткандар теҥериде болор, «ӧскӧ койлор» јерде ӱргӱлјиге јӱрер. Је райда јӱрерге, «ӧскӧ койлорго» Кудайдыҥ берген некелтелерин эмди ле бӱдӱрер керек.

15. а) «Ӧскӧ койлор» Иисустыҥ карындаштарына канайып јӧмӧжӧт? б) Јурукты кӧрӱгер. Аптекадагы аканаҥ кандый тем алараар?

¹⁵ Ӧрӧги айдылган, тӧҥӧшкӧ кере тартырган кижиде Иисуска быйанын кӧргӱзер арга болбогон. Је бисте, «ӧскӧ койлордо», ол кижиге кӧрӧ, андый аргалар кӧп. Темдектезе, бис майлаткандарга јӧмӧжӧр аргалу. Иисус койлордоҥ эчкилерди айрып јатса, јаргыны шак ла бого тайанып эдер (Матф. 25:31—40). Бис јарлаар ишке ле ӱренчиктер белетеер ишке акту кӱӱнистеҥ туружып турзаас, майлаткандарга јӧмӧжип јадыс (Матф. 28:18—20). Оныҥ да учун олордыҥ чыгарып турган материалдарын, темдектезе, «Јажын-чакка ырысту јӱригер!» деген бичикти јакшы тузаланарга албаданадыс. Эм тургуза слер кемле де Агару Бичик ӱренбей турган болзоор, ӱредӱлер таап аларга албаданыгар.

16. Бис Кудайдыҥ Каандыгы башкарар ӧйгӧ белетенип аларга нени эдер аргалу?

¹⁶ Кудайдыҥ нормаларыла јӱрерге ӱренип аларга, биске райды сакып отурбас керек. Бис эмди ле тӧгӱндебей јӱрер ле ӱзе немени аайлу-башту эдер аргалу. Анайда ок Кудайга, эш-нӧкӧриске ле ака-эјелериске чындык артар аргалу. Кудайдыҥ нормаларыла јӱрерге эмди ӱренип алзаас, биске райда бу нормаларла јӱрерге јеҥил болор. Бого коштой бис јаҥы јӱрӱмде керектӱ болотон немеге  ле кылык-јаҥга ӱренип јадыс. Бу керегинде бу чыгарманыҥ «Слер јерди энчиленерге белен бе?» деген статьязында айдылат.

17. Алдындагы эткен кинчектерис учун бойысты бурулаарыс па? Јартап беригер.

¹⁷ Анайда ок алдында ӧйдӧ уур кинчек эткен болзоос, бойысты бурулабас керек. Је бир јанынаҥ Иисус бистиҥ кинчектерис учун јӱрӱмин берип салган ла дейле, биле тура кинчек этпей јадыс (Евр. 10:26—31). Нениҥ учун дезе бис кинчегисти алынып, Иегованаҥ болуш сурап тӱзединзеес, јаманыс ташталар деп алаҥзыбайдыс (Иса. 55:7; Ап. ижи 3:19). Иисус фарисейлерге мынайда айткан: «Мен актуларды эмес, кинчектӱлерди кычырарга келген инем» (Матф. 9:13). Оныҥ толынты тайылгазы бистиҥ ӱзе кинчектеристи бӧктӧп салар аргалу.

18. Иисустыҥ јанында божогон эр кижидеҥ слер нени сурап угар эдигер?

¹⁸ Сананып ийзеер, слер Иисустыҥ јанында тӧҥӧшкӧ керий тартырып божогон кижиле куучындажып јадыгар. Слер де, ол до кижи Иисус бойыныҥ јӱрӱмин тайылгага берген учун Иеговага быйанаарды айдып јадаар. Ол кижидеҥ слер: «Иисусла божоор алдында не болгонын кӧптӧдӧ куучындап берзеер» — деп, сурап угар болороор. Ол эмезе Иисус ого: «Мениле кожо райда болорыҥ» — деп айдарда, ондо кандый сезимдер келгенин сурап угараар. Эмезе карын ол кижи слердеҥ: «Сатананыҥ калганчы кӱндеринде јӱрӱм кандый болгон?» — деп сураардаҥ айабас. Мындый улусла Агару Бичик ӱренерге кандый јакшы болор дезеер! (Эф. 4:22—24).

19. Нениҥ учун райда јӱрӱм јаантайын јилбилӱ болор? (Кадарындагы јурукты кӧрӱгер.)

¹⁹ Райдагы јӱрӱм сӱреен јилбилӱ болор. Бис ондо јаантайын башка-башка улусла таныжып куучындажарыс ла јилбилӱ иш эдерис. Је эҥ јакшы неме — бис кажы ла кӱн Иегова Кудайысты оноҥ јакшы билип, оныҥ берген сыйларына сӱӱнерис! Бис Иегова ла оныҥ јайаандары керегинде јаантайын ла јаҥы неме билип турарыс. Райда канча ла кире узак јӱрзеес, Иегова Кудайыска сӱӱжис ончо ло кире тыҥыыр. Бис Иеговага ла Иисуска мындый сӱреен јакшы ижемји — райда ӱргӱлјиге јӱретен арга — сыйлаганына сӱреен быйанду болодыс.