Иегованыҥ јерди толтырып, јарандырыгар деген јакарузыла болзо, јердиҥ ӱсти рай болуп калар эди (Баш. 1:28, сноска). Је эмди бу јакылтаны јерди энчиленер улус бӱдӱрер. Олорго бу ишти бӱдӱрерге баштап тарый кӱч болор. Нениҥ учун дезе Эдем сад узак ла болбой јоголып калган. Оныҥ учун Армагеддонныҥ кийнинде коркышту кӧп немени орныктырарга келижер. Айдарда, иш толтыра болор!

Вавилонноҥ јанып барган израильтяндарга јеҥил эмес иш эдерге келишкен. Нениҥ учун дезе олордыҥ јери 70 јылдыҥ туркунына куру турган. Исайя олорды Иегованыҥ болужыла јерин орныктырар деп судурлаган. Судурда айдылганыла: «[Иегова] оныҥ чӧл јерин Эдем садтый эдип салар, оныҥ какшап калган јерлери Иегованыҥ сады ошкош болуп калар» (Иса. 51:3). Бу судур бӱдӱп калды. Анайып ла райда јадатан улус Иегованыҥ  болужыла јерди рай эдип орныктырып салар. Бу ишке туружарга слер эмди ле нени эдер аргалу?

Темдектезе, слер айылдыҥ ичин эмезе тыштын ару тудар аргалу. Мыны айылдаштараар этпей де турза, эдип туругар. Анайда ок Каандыктыҥ ла Курултайлардыҥ Тураларын арутаар ла јазаар иште туружыгар. Бого коштой ар-бӱткенниҥ тӱбеги болгон јерлерге барып болужарга, заявление бичип ийерге јараар. Мынаҥ тӱбекке тӱжӱп калган ака-эјелерге болужарга турганаар кӧрӱнер. Бойоордоҥ мынайып сурагар: «Јаҥы јӱрӱмге керектӱ кандый немеге ӱренип алар эдим?»

Иисус Иаирдиҥ кызычагын тиргизип ийеле, ого курсак берзин деп айткан (Марк 5:42, 43). 12 јашту кызычакты азырап саларга кӱч неме јок болгон эмей. Је Иисустыҥ айткан «сӧӧк салар јерде јаткандардыҥ ончозы Кудайдыҥ Уулыныҥ ӱнин уг[уп]... тирилер» деген судуры бӱдӱп јатса, кандый кӧп иш эдилерин сананып ийзеер (Иоанн 5:28, 29). Агару Бичикте бу керегинде оок-теек јетирӱлер айдылбаган да болзо, тирилген улуска курсак-тамак, кийер кийим, јадар јер керек болор деп оҥдоп јадыс. Олорго болужарга слер эмди ле нени эдер аргалу? Кезик аргаларды кӧрӱп ийектер.

Темдектезе, слердиҥ јуунга аймак кӧрӧӧчи келген болзо, слер оны айлыгардӧӧн тӱште ажанарга кычырараар ба? Эмезе Бет-Элде иштеген јарчыга, эмезе аймак кӧрӧӧчиниҥ ижин артыргызарга келишкен акага јадатан јер табарга болужып болороор бо? Анайда ок слердиҥ јерде регионныҥ курултайы эмезе аҥылу курултай болотон болзо, бу курултайлар ӧткӱрериле колбулу иштерге туружадаар ба? Эмезе ого келген улусты уткыйдаар ба?

Апостолдордыҥ ижи 24:15-ти кычырып тура, миллиардтар тоолу улус тирилер деп оҥдоп јадыс. Бу улустыҥ кӧп сабазында Иегова керегинде угар арга болбогон. Олорго мындый арга тирилген кийнинде ачылар a. Бу улусты ченемелдӱ улус ӱредер (Иса. 11:9). Европада, тӱштӱк Америкада ла Африкада јарлаган Шарлотта эје бу ишке туружарга тыҥ кӱӱнзеп јат. Ол сӱӱнип мынайда айдат: «Алдындагы ӧйдӧ јаткан улустыҥ кемизи-кемизи керегинде кычырзам: „Ол Иегованы билген болзо, оныҥ јӱрӱми чек башка болор эди“ — деп сананадым. Оныҥ учун тирилген улуска Иегова керегинде ле олор Иегованыҥ ишчизи болзо, јӱрӱми сӱреен јакшы болор деп куучындаарын энчикпей сакып јадым».

Иисустаҥ озо јӱрген Иегованыҥ чындык ишчилери де кӧп неме билип алар. Сананып ийзеер де, бис Даниилге оныҥ бичип салган судурлары канайып бӱткенин јартаарыс! Нениҥ учун дезе ол бу судурларды бичип турарда, оныҥ учурын билбес болгон (Дан. 12:8). Ол эмезе Руфь ла Ноеминьге олордыҥ билезинеҥ Мессияныҥ угы барган деп куучындаарыс. Бу телекейдиҥ каршузы ла буудактап турган немелери јоголып калза, телекейлик ӱредӱ программада сӱӱнип туружарыс!

Је слер бу программада туружарга эмди ле нени эдер аргалу? Озо ло баштап, улуска ӱредӱ ӧткӱретен ле јарлайтан темигӱлеристи тыҥыдар керек (Матф. 24:14). Је слер јажаар јаандап калганынаҥ ол эмезе кандый бир ӧскӧ айалганаҥ улам кӧп јарлап болбой турган болзоор, јарлаар ишке кӱчеер јеткенче ле туружып туругар.

Слер јерди энчиленерге кӱӱнзейдеер бе? Јерди јарандырып, јазап, анайда ок тирилген улуска болужатан ла олорды ӱредетен ӧйди энчикпей сакыйдаар ба? Слер тыҥыда «эйе» деп айдар болороор. Андый болзо, райда эдетен иштерди эмди ле кӱчсинбей эдип туругар!