ИЕГОВА биске јӱзӱн-јӱӱр сыйлар эткен. Бу сыйларды канайып тузаланарын бойыс кӧрӧр аргалу болгоныс учун, јаан быйанду болодыс. Андый сыйлардыҥ бирӱзи — кызыл аракы. Агару Бичикте: «Курсак ла кызыл аракы јӱрӱмди сӱӱнчилӱ эдет» — деп айдылат (Эккл. 10:19; Сар. 104:15). Је сен аракы ичери јанынаҥ кӱчтер болуп турган улуска туштаган ла болорыҥ. Анайда ок бастыра јердиҥ ӱстинде улустыҥ кӧрӱми аракыга башка-башка. Андый болзо, христианга аракы ичери јанынаҥ ойгор јӧптӧр чыгарарга не болужар?

Бис јӧп чыгарарга турзаас, улустыҥ кӧрӱмиле эмес, је Кудайдыҥ кӧрӱмиле башкарынарга кӱӱнзейдис. Кудай биске јаман јӧп бербес деп бис билерис.

Бу телекейде улус кӧп лӧ улам ла сайын ичип турганы кемге де јажыт эмес. Та кемге де аракы ичери амырайтан арга болот. Ӧскӧ улус бойыныҥ кӱчтерин ундып саларга ичет. А кезик ороондордо јараш јӱрӱм јӱрерге эмезе чын ла эр кижи болгоныҥды кӧргӱзерге турган болзоҥ, кӧп ичер керек деп айдыжат.

Је христиандар бойыныҥ сӱӱштӱ Јайаачызыныҥ јӧптӧрин угат. Темдектезе, аракыны ӧйинеҥ ӧткӱре кӧп ичери неге экелип турганын ол озолондыра айдып салган. Бу керегинде Укаа сӧстӧрдӧ 23:29—35-те чике айдылып калган a. Европада јадып турган Дэ́ниел деп аксагал чындыкты уккалакта оныҥ јӱрӱми кандый болгонын эске алат: «Алдында мен коркышту кӧп аракы ичкем. Мынаҥ улам кӧп јастыралар эдип, тыҥ шыралагам. Кезик эткен јастыра керектеримди сананып, эмдигенче ле санааркап јадым».

Христиандарга аракыны ӧйинеҥ ӧткӱре кӧп ичер чакпыга тӱшпеске нени эдер керек? Јӧп чыгарардаҥ озо Кудайдыҥ Сӧзинде бичилгенин ајаруга алар керек.

А эмди Агару Бичикте аракы керегинде не айдылып турганын ла кезик улус оны кандый шылтактардаҥ улам ичип турганын шӱӱжип ийектер.

Кудайдыҥ Сӧзи аракыны ӧйи-кеминде ичерин јарадып јат. Агару Бичикте кызыл аракы сӱӱнчи экелер аргалу деп айдылат. Бис кычырадыс: «Калашты сӱӱнип ји, кызыл аракыны сӱӱнчилӱ јӱректӱ ич» (Эккл. 9:7). Иисус ла Иегованыҥ чындык ишчилери кезикте кызыл аракыны ичкен (Матф. 26:27—29; Лука 7:34; 1 Тим. 5:23).

Је Кудайдыҥ Сӧзи бир эмеш ичип ийери ле ичинип алары чек эки башка неме деп кӧргӱзет. Ондо јарт айдылып калган: «Кызыл аракыны эзиргенче ичпегер» (Эф. 5:18 ЈТ). Анайда ок ондо: «Аракызактар... Кудайдыҥ Каандыгынаҥ јер албас» — деп айдылат (1 Кор. 6:10). Эйе, Иегова аракыны ӧйинеҥ ӧткӱре ле јаантайын ичерин јаратпай јат. Оныҥ учун биске ӧскӧ улусты кӧрӱп, анайып ла этпес керек. Бистиҥ јӱрӱмисте эҥ учурлузы — чыгарган јӧптӧрисле Иегованы сӱӱндирери болот.

Кезик улус кӧп ичеле эзирбей јат, је бу јеткерлӱ айалга болот. Агару Бичик аракыны ӧйинеҥ ӧткӱре кӧп ичкен кижи нравственный нормаларды бузып, Иеговала најылыгын јылыйтып салардаҥ айабас деп айдат (Титке 2:3; Укаа 20:1). Иисус та: «Аракызак болоры... слерди олјолобозын» (ЈТ) — деп айткан. Андый болзоос, Кудайдыҥ јаҥы јӱрӱмине кирип болбозыс (Лука 21:34—36). Бистиҥ кӧргӧнисле аракы  кӱчтерге экелер аргалу. Је кӱчтер болбозын деп нени эдер керек?

Кажы ла культурада аракы ичери јанынаҥ бойыныҥ чӱм-јаҥдары бар. Је христиандар нени ичерин эмезе нени јиирин талдап турза, Иегованыҥ сезимдерин ајаруга алат. Агару Бичик биске эске алындырат: «Јип пе, ичип пе, нени де эдип турган болзогор, Кудай макталзын деп эдигер» (1 Кор. 10:31). А эмди шӱӱп сананатан тоолу сурактарды ла библиялык принциптерди кӧрӱп ийектер.

Мен улуска јараарга болуп ичип тургам ба? Чыгыш 23:2-де айдылат: «Кӧп сабазыныҥ кийнинеҥ барба». Иегова израильтяндарды ого јарабай турган улустыҥ кылык-јаҥынаҥ тем албазын деп кӱӱнзеген. Иегованыҥ кӧрӱм-санаазы солынбаган. Бу јӧп биске де эмдиги ӧйдӧ тузалу болот. Бис аракы јанынаҥ ӧскӧ улустыҥ кӧрӱмин алынып турзаас, Иегованаҥ араайынаҥ тууралап баштаарыс ла оныҥ нормаларыла јӱрбей барарыс (Рим. 12:2).

Мен ийде-кӱчтӱ болгонымды кӧргӱзерге ичип тургам ба? Кезик культураларда кӧп лӧ улам сайын ичеринде јаман неме јок, карын андый болор јаҥду деп айдыжат (1 Пётр 4:3). Је 1 Коринфтегилерге 16:13-те мынайда айдылат: «Сергек болугар, бӱдӱмјигер бек болзын, јалтанбас ла кӱчтӱ болугар» (ЈТ). Аракы кижини чыннаҥ ла ийде-кӱчтӱ эдип болор бо? Јок. Аракы кижиниҥ сезимдерин уйададып, јарт сананарга бербей јат. Андый болордо, кӧп ичип турган кижи ийде-кӱчтӱ эмес, је каткымчылу ла тенек кӧрӱнет. Исайя 28:7-де андый улус јолынаҥ азып калган ла јазап сананар аргазы јок деп айдылат.

Чын ийде-кӱчти Иегова берет. Бу дезе кижи сергек ле бӱдӱмјизи бек болгонынаҥ кӧрӱнет (Сар. 18:32). Сергек болуп, Иеговала колбуларысты ӱрейтен ончо немелердеҥ бойысты корулазаас, бис те кӱчтӱ болорыс. Иисус чыннаҥ ла кӱчтӱ кижи болгон, нениҥ учун дезе ол принциптердеҥ бек тудунган ла чын немени эдерге бир де коркыбаган.

Мен уур-кӱчтеримди ундып саларга ичип тургам ба? Сарнаачы агару тынга баштадып, мындый сӧстӧр бичиген: «Кунукчылду санаалар  амыр бербей турарда, Сениҥ токунадууҥ мени јылыткан» (Сар. 94:19). Сениҥ јӱрӱмиҥде кӱч ӧйлӧр болуп турган болзо, аргаданышты аракынаҥ эмес, је Иегованаҥ бедире. Јӱрегиҥде амыр болзын деп турган болзоҥ, кӧптӧдӧ мӱргӱп тур, анайда ок санааркаштарыҥды кӧгӱзи тереҥ христианга куучындап берерге јараар. Ол тушта ол сеге јакшы јӧптӧр айдып берер болор. Кижи кӱчтерин ундып саларга, кӧп аракы ичип турза, ондо чын керектер эдер кӱӱни ӧчӧ берер ле кинчекке јеҥил јайыла берердеҥ айабас (Ос. 4:11). Ӧрӧги айдылган Дэниел мынайып куучындайт: «Мен јаантайын стрессте болгом ло бойымды бурулагам. Мынаҥ улам кӧп ичип туратам. Је кӱчтер астаардыҥ ордына там ла кӧптӧгӧн. Мен најыларымды јылыйтып салгам ла бойымды тообой баргам». Дэниел нени эткен? «Меге кӱчтеримнеҥ чыгарга аракы эмес, је Иегова керек деп оҥдоп ийгем. Тӱрген эмес те болзо, је Иегованыҥ болужыла мен ончо уур-кӱчтерди ӧдӱп чыккам». Кӱчтердиҥ аайына чыгар арга јок деп билдирип те турза, Иегова болужарга јаантайын белен деп бис билерис (Флп. 4:6, 7; 1 Пётр 5:7).

Сен аракы ичип турган болзоҥ, улам сайын кӧп ичип тургаҥ ба деп шиҥжӱ ӧткӱрерге јараар. Бого мындый сурактар болужар. Сеге биледеги улузыҥ эмезе јуук најыларыҥ канча кире эмезе улам сайын ичип турганыҥ јарабай турган деп айдат па? Сен бойыҥ билбей турган болорыҥ. Је бу јеткерлӱ айалга деп ле сеге токтодынар керек деп кӧргӱзет. Мен алдындагызына кӧрӧ кӧп ичедим бе? Бу сени аракынаҥ камаанду болуп баратканыҥды кӧргӱзет. Меге аракы јогынаҥ тоолу ла кӱнге (эмезе эмеш кӧп ӧйгӧ) тудунып јӱрерге кӱч пе? Эйе болзо, аракынаҥ чек камаанду болуп калганыҥды кӧргӱзет. Бу учуралда сеге профессиональный болуш керек болордоҥ айабас.

Бу ӧрӧги айдылган ончо немелерди ајаруга алып, кезик христиандар аракыны чек ичпес деп шӱӱп алган. А кезиктерине аракыныҥ амтамы јарабай јат, оныҥ учун олор оны ичпей јат. Сениҥ најыларыҥныҥ та кемизи де мындый  јӧп чыгарган болзо канайдар? Ого тоомјылу ла јалакай баштанып, оныҥ эткен талдажын јамандаба.

Сен бойыҥа канча кире ичериҥди ле канча катап ичериҥди шӱӱп алар аргалу. Кезик улус бир неделеге бир катап ичет. А кезик улус дезе ажанган сайын бир эмештеҥ ичет, а кезиги кандый аракыны ичерим, кандыйын чек ичпезим деп сананып алат. Темдектезе, кызыл аракыны ла пивоны бир эмештеҥ ичип јадылар, је градузы јаан аракыны, керек дезе коктейльдерди де бир де ичпей јадылар. Кижи бойына мындый ээжилер тургузып алза, ого бойына ла тургузып алган ээжилеринеҥ тудунарга јеҥил болот. Кӧгӱзи тереҥ христиан кижи улус оныҥ тургузып алган ээжилери керегинде нени айдыжарына бир де санааркабай јат.

База нени ајаруга алар керек? Улустыҥ сезимдерин. Римдегилерге 14:21-де айдылат: «Карындажыҥды бӱдӱрилтип турган болзо, эт јибезеҥ, аракы ичпезеҥ, ӧскӧзин де этпезеҥ — торт» (ЈТ). Бу јӧпти сен канайып тузаланар аргалу? Ака-карындаштарыҥды сӱӱп јӱр. Та кемге де аракы тузак болордоҥ айабас, сен мыны билип турзаҥ, олордыҥ кӧзинче ичпезиҥ. Анайып сен јӱк ле бойыҥды сананбай турганыҥды кӧргӱзедиҥ (1 Кор. 10:24).

Анайда ок христиандар јадып турган орооныныҥ јасактарына багынар учурлу. Кӧп саба ороондор аракыны канча јаштаҥ ала ичерге јараар деп, јасак тургузып салат. Анайда ок аракы ичкен кижиге рульга отурарга јарабас, ол эмезе кандый бир техникала тузаланарга јарабас болот (Рим. 13:1—5).

Иегова биске сӱреен кӧп сыйлар берген. Бис олорды канайып тузаланарын бойыс кӧрӧр аргалу. Оныҥ да учун нени јиирин ле нени ичерин бис бойыс талдап јадыс. Је мындый јайымысты теҥеридеги Иегова Адабысты ачындырбаска тузаланактар.