1. Авраамныҥ ижемјизи калас болбогон деп недеҥ кӧрӱнет?

 ИЕГОВА бойыныҥ најызына, Авраамга, оныҥ балазы ажыра јердеги ончо албатылар алкыш алар деп сӧзин берген (Баш. 15:5; 22:18). Авраам бек бӱдӱмјизинеҥ улам Кудай берген сӧзин кыйалтазы јок бӱдӱрер деп алаҥзыбаган. Је јылдар ӧдӱп, Авраамга 100 јаш, оныҥ ӱйине, Саррага 90 јаш болуп калган да болзо, бала анайып ла чыкпаган (Баш. 21:1—7). Андый да болзо, Агару Бичикте айдылганыла, «ол... кӧп калыктардыҥ адазы боло[рына]» иженип ле бӱдӱп јӱрген (Рим. 4:18). Слер билереер, Авраамныҥ ижемјизи бӱдӱп калган. Узак ӧйгӧ сакыган уулы, Исаак, чыккан. Авраамныҥ ижемјизи неге тӧзӧлӧнгӧн?

2. Иегова берген сӧзин бӱдӱрер деп, Авраам нениҥ учун бӱткен?

² Авраам Иегованы сӱреен јакшы билетен, оныҥ учун ол Кудай берген сӧзин бӱдӱрер деп, алаҥзу јогынаҥ бӱткен (Рим. 4:21). Анайып, ол бӱдӱмјизи учун Кудайдаҥ јараду алып, акту кижи деп адаткан (Иак. 2:23). Римдегилерге 4:18-те айдылганыла, Авраамда бӱдӱмји де, ижемји де болгон. Апостол Павел ижемји керегинде Римдегилерге 5-чи бажалыгында нени айтканын шӱӱжип ийектер.

3. Павел ижемји керегинде нени айдат?

³ Павел ондо нениҥ учун «ижемји дезе калас болбос» деп јартап койгон (Рим. 5:5, ЈТ). Анайда ок оныҥ јартаганыла, ижемји бир јерге турар неме эмес, је јаантайын тыҥып турар аргалу. Бу керегинде Римдегилерге 5:1—5-те айдылган. Ол ӱлгерлерди шӱӱжип јатсаас, бойоордыҥ христиан јолоорды сананып, ижемјигер канайып тыҥыганын эске алыныгар. Анайып, слер ижемјигерди оноҥ до  бек эдип алар аргалу деп кӧрӱп ийереер. Је озо баштап, Павел кандый ижемји керегинде айтканын шӱӱжип ийектер.

4. Римдегилерге 5:1, 2-де не керегинде айдылат?

⁴ Римдегилерге 5:1, 2, ЈТ кычырыгар. Павел бу сӧстӧрди Римдеги ака-эјелерге бичиген. Олор бойыныҥ ӧйинде Иегова ла Иисус керегинде билип алала, олорго бӱдӱп, христиандар болуп калгандар. Оныҥ учун Кудай олорды бӱдӱмјизи учун акту улус деп кӧрӱп, агару тынла майлаган. Анайып, олордыҥ Кудайдаҥ кайрал алар деп бӱдӱмјизи тыҥыган.

5. Майлаткандар неге иженет?

⁵ Павел Эфестеги майлаткан христиандарга Кудайдыҥ берген ижемјизин, агаруларга белетелген энчини, алар деп бичиген (Эф. 1:18). А Колоссыдагы майлаткандарга олор энчинизин теҥериде алар деп айткан (Кол. 1:4, 5). Айдарда, майлаткан христиандар неге иженет? Олор теҥеридеги ӱргӱлји јӱрӱмге тирилип, Иисус Христосло кожо башкарар (1 Фес. 4:13—17; Ачыл. 20:6).

6. Бир майлаткан ака ижемјизи керегинде нени айткан?

⁶ Майлаткан христиандар бойыныҥ ижемјизин сӱреен тыҥ баалап јат. Бу керегинде майлаткан Фредерик Френц ака мындый сӧстӧр айткан: «Бистиҥ ижемји калас эмес. Ас ӱӱрге кирип турган 144 000 майлатканныҥ кажызыныҥ ла ижемјизи бӱдӱп калар, ол бистиҥ сакыганыстаҥ да артык болор». Бу сӧстӧрди ака 1991 јылда айткан. Ол ӧйдӧ бу ака Иеговага канча јылдардыҥ туркунына иштеп койгон кижи болгон. Ака оноҥ ары айдат: «Мен... ижемјимди оноҥ ло ары баалап јадым. [...] Канча ла кире узак сакызам, ончо ло кире тыҥ баалап јадым. Миллион до јыл сакыыр керек болзо, сакыганыс калас болбос. Эмди алдындагызына кӧрӧ, ижемјимди оноҥ тыҥ баалайдым».

7, 8. Бистиҥ кӧп сабагыста кандый ижемји? (Римдегилерге 8:20, 21).

⁷ Иегованыҥ кӧп саба ишчилеринде  ӧскӧ ижемји. Андый ла ижемји Авраамда болгон — Кудайдыҥ Каандыгыныҥ башкарузында јерде ӱргӱлјиге јӱрери. (Евр. 11:8—10, 13). Павел де бу сӱреен јакшы ижемји керегинде бичиген. (Римдегилерге 8:20, 21, ЈТ кычырыгар.) Слер келер ӧй керегинде баштапкы ла катап угуп ийереерде, слерге эҥ ле тыҥ не јараган? Темдектезе, слер толо кеминде болуп калараар, бир де јаман керектерге тартылбазаар, эмезе тирилген јуук улузыгарга јердеги райда јолугараар деп ижемји јӱрегерге сӱреен тыҥ тийген болор. Кудай слерге сӱреен јакшы јӱрӱм белетеп салган деп билип алала, мындый јӱрӱмди не сакыбас деп оҥдогон болороор.

⁸ Бис јерде де, теҥериде де јадатан болзоос, ончобыс ла келер ӧйди тыҥ сакып јадыс. Сакып јатканчабыс, бӱдӱмјибис оноҥ бек болуп калар аргалу. Павел ижемјибис недеҥ улам тыҥыырын јартап салган. Оны кӧрӱп ийектер. Бу дезе биске Кудайдыҥ айтканын алаҥзыбай сакыырга болужар.

9, 10. Павелдиҥ јӱрӱмин кӧрзӧӧс, кажы ла христиан кижиниҥ јӱрӱминде не болор? (Римдегилерге 5:3). (Јурукты база кӧрӱгер.)

⁹ Римдегилерге 5:3, ЈТ кычырыгар. Павелдиҥ айтканыла, шыралап турзаас, бистиҥ ижемјибис бек болуп калар аргалу. Баштап сананза, мындый сӧстӧр саҥ башка деп угулар. Је чынынча болзо, кажы ла христиан кижиниҥ јӱрӱминде кыйын-шыра болор. Павелдиҥ бойыныҥ темин кӧрӱп ийектер. Ол Фессалоникадагы акаларга мындый сӧстӧр бичиген: «Слерде болорыста, шыралаарыс деп, слерге озолондыра айтканыс. Андый ла болуп калды, оны билеригер» (1 Фес. 3:4). А Коринфтеги христиандарга мындый сӧстӧр бичиген: «Карындаштар... бисле болгон уур-кӱчтеристи билигер дейдис... Тирӱ артарыска иженбегенис» (2 Кор. 1:8; 11:23—27).

¹⁰ Христиан кижиниҥ јолында коркышту кӧп кӱчтер болот (2 Тим. 3:12). Слерде  андый кӱчтер болгон бо? Иисустыҥ кийнинеҥ барарга шӱӱп алганаардаҥ улам слерге кандый кӱчтерди ӧдӧргӧ келишти? Слерге најылараар, тӧрӧӧндӧрӧӧр каткырышкан болор. Керек дезе кату да баштанган болор. Эмезе иште тӧгӱндебей турараарда, кӱчтер башталган болор (Евр. 13:18). Ол эмезе ижемјигерди куучындап турараарда, ороонныҥ јаҥдары слерди истежип турган болор. Павелдиҥ айтканыла, кандый да кӱчтер болуп турган болзо, биске сӱӱнер керек. Је канайып сӱӱнип јӱретен?

11. Ченелтелердиҥ ӧйинде биске нениҥ учун колысты бош салбас керек?

¹¹ Ченелтелер биске јакшы кылык-јаҥга ӱренип аларга болужат. Римдегилерге 5:3-те айдылган: «Кыйын-шыра бисти турумкай эдип турган» (ЈТ). Кажы ла христианда кӱчтер болор, оныҥ учун биске кажыбыска ла турумкай болор керек. Јӱк ле бу кылык-јаҥ ӱзе кӱчтерди чыдажып, ижемјибистиҥ бӱткенин кӧрӧргӧ болужар. Бис Иисустыҥ айткан, ташту јерге тӱшкен ӱрендер ошкош улуска тӱҥей болорго кӱӱнзебей јадыс. Не дезе андый улус Кудайдыҥ сӧзин јакшы угат, је кӱчтер ол эмезе истежӱлер боло берзе, олор бӱдӱмјизин тӱрген јылыйтып ийет (Матф. 13:5, 6, 20, 21). Кӱчтер ле истежӱлер сӱӱнчи экелбей де турган болзо, је олорды чыдажып ӧтсӧӧс, биске бойыска ла тузалу болот. Кандый туза?

12. Ченелтелердеҥ кандый туза бар?

¹² Иаков ченелтелерде кандый туза барын кӧргӱскен. Ол мынайда бичиген: «Турумкай болоры бойыныҥ ижин учына јетире этсин. Ол тушта слер ончо јанынаҥ толо кеминде ле кандый да једикпес јок болорыгар» (Иак. 1:2—4, ЈТ). Турумкай болоры јакылта алганына тӱҥей. Ого кандый јакылта берилген? Чыдамкай болорысты, бӱдӱмјибисти ле Кудайга иженетенисти тыҥыдар керек. Је база да ӧскӧ неме бар.

13, 14. Турумкай болзоос, ижемјигис канайып тыҥыйт? (Римдегилерге 5:4).

¹³ Римдегилерге 5:4, ЈТ кычырыгар. Павел айткан: «Турумкай болзоос, Кудайдыҥ јарадузын аларыс». Айса бисте кӱчтер болуп турза, Иеговага јарап турган ба? Јок эмей. Је ченелтерде чындык артканыска ол сӱӱнип јат. Мынаҥ улам бис Кудайдыҥ јарадузын аладыс. Бистиҥ турумкай болгонысты кӧрӱп, Иегова бисле оморкойт! (Сар. 5:12).

¹⁴ Авраамныҥ темин сананып ийзеер де. Ондо коркышту кӱч ченелтелер болгон. Је ол олордыҥ кажызын ла турумкай ӧдӱп чыккан. Оныҥ учун Иегова оны најым деп адап, чындык кижи деп кӧргӧн (Баш. 15:6; Рим. 4:13, 22). Ол слер де керегинде анайып ла айтсын деп кӱӱнзейдеер эмей. Кудай биске јарадузын јӱк ле кӧп јакылталарлу, кӧп молјуларлу болзоос, берип турган эмес, је кӱч ӧйлӧрдӧ ого чындык артсаас берет. Кажы ла кижи турумкай болор аргалу. Турумкай болоры кижиниҥ јажынаҥ, айалгаларынаҥ ла аргаларынаҥ камаанду эмес. Слер эм тургуза кандый бир ченелте ӧдӱп турганаар ба? Эйе болзо, ундыбагар: Иегова слердиҥ ого чындык артып турганаарды кӧрӱп јат. Кудайдыҥ кӧзинде јаман неме этпей турганыс деп билип турзаас, Иегова бисти јарадып турган деп алаҥзыбай јадыс. Јарадып турганында алаҥзыбай турзаас, бис кайрал јок артпазыс. Бот мынайып бистиҥ ижемјибис тыҥыйт.

15. Римдегилерге 5:4, 5-те Павел нени айдат? Бого нениҥ учун кем-кем кайкаар болор?

¹⁵ Павелдиҥ айтканыла, бис ченелтелердиҥ ӧйинде чындык артсаас, Иегованыҥ јарадузын аларыс. Павелдиҥ оноҥ ары нени айтканын ајарып кӧрзӧӧр дӧ: «Кудайдыҥ јарадузы ижемји берет. Ижемји дезе калас болбос» (Рим. 5:4, 5). Бу сӧстӧрди кычырган кижи кайкаар болор. Нениҥ учун? Нениҥ учун дезе Римдегилерге 5:2-де Павел Римдеги христиандарда «Кудай... [олорды] макка чыгарар» (ЈТ) деп ижемји тегин де бар болгон деп бичиген. Андый болзо, Павел оны не ойто катап айткан?

16. Ижемји канайып тыҥып турганын айдып беригер. (Јурукты база кӧрӱгер.)

¹⁶ Айдарда, ижемји тыҥыыр аргалу деп шӱӱштис. Мыны билгенис Павелдиҥ сӧстӧрин оҥдоорго болужат. Јер рай болуп калар, анда слер ӱргӱлјиге јӱрер аргалу деп, баштапкы ла катап укканаарды сананып ийзеер де. Слер андый јӱрӱм капшай ла келзин деп кӱӱнзеген болороор. Је бу ла ок ӧйдӧ бого бӱдерге кӱч болгон болор. Оноҥ Иеговала јууктада таныжып, бистиҥ ижемјиде тӧзӧлгӧ бар деп бӱдӱмјиленип алганаар.

17. Сууга чӧҥӱрилген кийнинеҥ слердиҥ ижемјигер недеҥ улам тыҥып калган?

¹⁷ Слер Иеговага јӱрӱмеерди учурлап, сууга чӧҥӱрилген де болзоор, Иеговага сӱӱжигерди ле ол керегинде билгирлереерди оноҥ ло ары тыҥытканаар. Анайып, слердиҥ ижемји келер ӧйдӧ бӱдер деп бӱдӱмјигер оноҥ тыҥ тыҥыган (Евр. 5:13—6:1). Римдегилерге 5:2—4-тӧ бичилген сӧстӧрди бойоордыҥ јӱрӱмеерде кӧргӧн болороор. Темдектезе, слерде башка-башка кӱчтер болгон, је слер олорды ӧдӱп чыгараарда, Иегованыҥ јарадузын алганаарды сескенеер. Оноҥ Иегова слерди сӱӱп турган деп билип алганаар, оныҥ учун ол слерге берген сӧзин бӱдӱрип салар деп, бир де алаҥзыбай јадаар. Эмди  слерде ижемјигер келер ӧйдӧ бӱдер деп, оноҥ кӧп тӧзӧлгӧлӧр бар. Слер оны алдындагызына кӧрӧ, канча катапка тыҥ баалап јадаар. Керек дезе ижемјигер бӱдӱп те калгандый деп билдирип турган болор. Оныҥ учун мындый бӱдӱмјигер јӱрӱмигердеҥ кӧрӱнип турат. Темдектезе, јууктараарга канайып баштанып турганаардаҥ, канайып јӱрӱп турганаардаҥ, анайда ок ӧйӧӧрди канайып тузаланып турганаардаҥ.

18. Иегова нени эдерге сӧзин берет?

¹⁸ Кудайдыҥ јарадузы бек ижемји берип турган деп билип алдыс. Ижемјигис кыйалта јогынаҥ бӱдер деп, Павел бисти оноҥ ары бӱдӱмјилеп јат. Бу керегинде ол мындый сӧстӧр айдат: «Ижемји дезе калас болбос, нениҥ учун дезе Кудай биске берген агару тыны ажыра јӱректериске бойыныҥ сӱӱжин берген» (Рим. 5:5, ЈТ). Бу сӧстӧрлӧ Иегова бисти качан да артыргыспас деп айдат, бис оноҥ качан да чӧкӧбӧзис. Неге иженип турганаардыҥ ончозы бӱдӱп калар.

19. Ижемјигис бек болзо, кандый кайрал аларыс?

¹⁹ Авраам керегинде сананып кӧрӱгер. Ол Кудайдыҥ сӧзиниҥ бӱдерин сакыган. Иегованыҥ јарадузын алып, оныҥ најызы деп адаткан. Авраамныҥ сакыганы калас болбоды. Агару Бичик мынайда айдат: «Анайып Авраам узак чыдажып, Кудайдыҥ берер болгонын алган» (Евр. 6:15; 11:9, 18; Рим. 4:20—22). Кудай Авраамды тӧгӱндебеди. Иеговага чындык артсаар, слер де кайрал аларыгар. Слердиҥ ижемјигер куру санаа эмес. Ол удабас ла бӱдӱп калар. Слерди јаан сӱӱнчи сакыйт! (Рим. 12:12). Павелдиҥ айтканыла: «Агару Тынныҥ кӱчиле ижемјигер там кӧптӧзин деп, ижемји берип турган Кудай Ого бӱткенигер ажыра слерди кандый ла сӱӱнчиле, амырла толтырзын» (Рим. 15:13).