1. Јуунда кажы ла карындаш нени эдер учурлу?

 АПОСТОЛ Павел Коринфтеги эр улуска мынайда айткан: «Карындаштар! Санаагарла балдар болбогор. ...Санаагарла — эр кемине јеткен улус болыгар» (1 Кор. 14:20). Бу сӧстӧр христиан јуундардагы эр улуска ончозына айдылган. Кӧгӱзи тереҥ христиандар Кудайдыҥ јасагыла јӱрет, анайда ок ӱзе ле немеде Агару Бичиктиҥ принциптериле башкарынат (Лука 2:52). Карындаштар нениҥ учун андый кижи болорго албаданар учурлу?

2, 3. Карындашка нениҥ учун тереҥ кӧгӱстӱ болорго албаданар керек?

² Эр кижиге биледе ле јуунда јаан молјулар берилген. Сен, карындаш, келер ӧйдӧ алатан молјуларыҥды сананып турган болорыҥ. Сен байла пионер, болушчы ишчи, кийнинде аксагал болорго амадап тургаҥ. Ол эмезе биле тӧзӧп, ада болорго кӱӱнзеер болорыҥ (Эф. 6:4; 1 Тим. 3:1). Бу амадуларга јединерге, сеге кӧгӱзи тереҥ кижи болор керек b.

³ Кӧгӱзи тереҥ христиан кижи болорго нени эдер керек? Јакшы кылык-јаҥдарды тыҥыдар керек ле јӱрӱмге керектӱ немелерге ӱренип алар керек. А эмди ол керегинде кӧптӧдӧ куучындажып ийектер.

4. Сен кемдердеҥ тем алар аргалу? (Јурукты база кӧрӱгер.)

⁴ Јакшы темдердеҥ ӱрен. Агару Бичикте Иегованы сӱӱген ле оныҥ албатызына болушкан кӧп эр улус керегинде  айдылат. Олор сӱреен јакшы тем кӧргӱскен. Анайда ок сен билеҥдеги ле јуундагы тереҥ кӧгӱстӱ улустаҥ тем алар аргалу (Евр. 13:7). А эҥ ле јакшы темди — Иисус Христос кӧргӱскен (1 Пётр 2:21). Сеге бу эр улустыҥ кандый кылык-јаҥы јарап јат деп сананып кӧр, олорго тӱҥейлежерге албадан (Евр. 12:1, 2).

5. Сеге Иегова чылап сананарга не болужар ла нениҥ учун мынайып эдер керек? (Сарын 119:9).

⁵ Керсӱ болорго ӱрен (Укаа 3:21). Керсӱ кижи мендей-шиҥдей неме этпей јат. Ол ӱзе немени јазап шӱӱп сананып, јаантайын Кудайдыҥ кӧрӱмин ајаруга алат. Мындый кӧрӱм телекейдеги јииттердиҥ кӧрӱминеҥ чек башка. Олор нени кӱӱнзеп турганын, нени чын деп сананып турганын оныла эткилейт (Укаа 7:7; 29:11). Анайда ок олорго каршузын интернет ле соцсетьтер јетирет. Оныҥ учун бу телекейдиҥ керектерине јайылба. Јӧптӧр чыгарып јадала, озо баштап Иегованыҥ кӧрӱмин билип ал. Оноҥ Иегованыҥ принциптери нениҥ учун эҥ артык деп оҥдоп аларга албадан. Алган билгирлериҥди тузалан. Ол тушта эткен керектериҥ Иегованы сӱӱндирер. (Сарын 119:9 кычырыгар.) Иегова ла чылап сананып ӱренип алзаҥ, тереҥ кӧгӱстӱ болуп каларыҥ (Укаа 2:11, 12; Евр. 5:14). Бу эје-сыйындарга баштанганыҥнаҥ, тыш бӱдӱмиҥнеҥ ле кийимди талдаганыҥнаҥ канайып кӧрӱнер?

6. Карындаш эје-сыйындарды тооп турганын канайып кӧргӱзер?

⁶ Иегованыҥ кӧрӱмине ӱренип алган карындаш ӱй улуска тоомјылу баштанат. Темдектезе, карындаш кандый бир сыйынла јууктада таныжып аларга кӱӱнзейт. Мында јастыра неме јок. Иегова чылап сананып турган карындаш, ол сыйынды албаска турган болзо, сыйынныҥ сезимдерин ойгоскодый сӧстӧр айтпай јат, бичибей јат, эмезе ӧскӧ та нени де этпей јат. Оноҥ башка, сыйын карындаш оны јарадып туру деп сананардаҥ айабас (1 Тим. 5:1, 2). Је качан карындаш сыйынла туштажып турган болзо, ол оныҥ јакшы адын ӱребеске албаданар. Темдектезе, сыйынла  экӱдеҥ экӱ артпас, анайда ок тушташкан тушта тереҥ кӧгӱстӱ улустыҥ ортозында болорго албаданар (1 Кор. 6:18).

7. Карындашка тыш бӱдӱми ле кийими јанынаҥ нени ундыбас керек?

⁷ Карындаштыҥ Иегова чылап сананарга ӱренип алганы тыш бӱдӱминеҥ ле кийиминеҥ кӧрӱнип јат. Модельерлердиҥ кӧп сабазы Иегованы керекке албай јат ла балыр јӱрӱм јӱргӱлейт. Олордыҥ чыгарып турган кийими ӧйинеҥ ӧткӱре тыгыш ла эр улусты ӱй улуска тӱҥей эдет. Карындаш кийимди талдап тура, нени ајаруга алар? Ол тереҥ ич-кӧгӱстӱ болорго турган болзо, библиялык принциптерле башкарынар ла јуундагы кӧгӱзи тереҥ ака-эјелердеҥ тем алар. Андый карындаш бойынаҥ мынайда сураар аргалу: «Мындый кийимди христиан кижи кийер беди? Бу кийимимнеҥ улусты тооп турганым кӧрӱнер бе? Кудайдыҥ ишчизи болуп турганымды кӧргӱзет пе?» (1 Кор. 10:31—33; Титке 2:6). Иегованыҥ сезимдерин ле санаазын ајаруга алып турган карындашты ака-эјелер тоор ло ол Иегованыҥ јарадузын алар.

8. Карындаш канайып бӱдӱмјилӱ кижи болор аргалу?

⁸ Бӱдӱмјилӱ бол. Бӱдӱмјилӱ карындаш ончо молјуларын јакшы бӱдӱрерге албаданат (Лука 16:10). Иисустыҥ толо кеминде темин кӧрӱп ийектер. Иисус ижин чала-была эмес, јазап бӱдӱрген. Ол Иегованыҥ ончо јакылталарын, кӱч те болзо, бӱдӱрген. Ол улусты сӱӱген — анчада ла ӱренчиктерин — олор учун јӱрӱмин берген (Иоанн 13:1). Иисустаҥ тем ал. Сеге берилген јакылтаны акту кӱӱниҥнеҥ бӱдӱрерге албадан. Берилген јакылтаны канайып бӱдӱрерин билбес болзоҥ, јобош болуп, ченемелдӱ акалардаҥ болуш сура. Кезик улус јалкуурып, артык иш эдерин сананбай да јат, је сен андый болбо! (Рим. 12:11). Кажы ла јакылтаны бӱдӱрип јатсаҥ, «улуска чылап эмес, Кайраканга [Иеговага] чылап эт». Баштап алган ижиҥди учына јетирип сал (Кол. 3:23). Је сен толо кеминде эмезиҥ, оныҥ учун бойыҥныҥ кемиҥди билип, јастыраларыҥды алынып тур (Укаа 11:2).

9. Карындашка нениҥ учун јӱрӱмге керектӱ немелерге ӱренер керек?

⁹ Кӧгӱзи тереҥ болорго, сеге јӱрӱмге керектӱ немелерге ӱренип алар керек. Олор сеге јуунда берилген јакылталарды бӱдӱрерге ле бойыҥды ла билеҥди јеткилдейтен иш табып аларга, анайда ок улусла јакшы колбуларлу болорго болужар. Је эмди јӱрӱмге керектӱ ӱренип алатан немелердиҥ кезигин кӧрӱп ийектер.

10, 11. Карындашка нениҥ учун јакшы бичиирге ле кычырарга ӱренип алар керек? (Сарын 1:1—3). (Јурукты база кӧрӱгер.)

¹⁰ Јакшы кычырып ла бичип ӱрен. Агару Бичикте Кудайдыҥ Сӧзин кажы ла кӱн кычырып, шӱӱп сананып турган кижи ырысту  ла једимдӱ болор деп айдылат. (Сарын 1:1—3 кычырыгар.) Агару Бичикти кажы ла кӱн кычырып турганыҥ сеге Иегованыҥ кӧрӱмин алынарга болужар. Анайып сен кандый бир јӧп чыгарар тушта бойыҥныҥ кӧрӱмиҥле эмес, је Агару Бичиктиҥ принциптериле башкарынарыҥ (Укаа 1:3, 4). Андый карындаштар јуунга сӱреен керектӱ болуп јат. Нениҥ учун?

¹¹ Јуундагы ака-эјелерди ӱредер ле Агару Бичикле таскадар керек болуп јат (Титке 1:9). Сен јакшы кычырып ла бичип билер болзоҥ, кӧдӱриҥилӱ куучын-эрмектериҥ ле јартамалдарыҥ олордыҥ бӱдӱмјизин тыҥыдар аргалу. Анайда ок сен таҥынаҥ ӱренген тушта, јуунда, курултайларда шӱӱлтелерди кыскарта бичип алар аргалу. Бу бойыҥныҥ бӱдӱмјиҥди тыҥыдар ла улуска болужарга керектӱ болор.

12. Улусла куучындажарга канайып ӱренип алар?

¹² Куучындажарга ӱрен. Христиан кижиге улусла куучындажып билер керек. Андый кижи улусты лаптап угат, олордыҥ сезимдерине ле санааларына ајару эдет (Укаа 20:5). Је мыны эдерге, улустыҥ ӱнине, чырайына, кыймыгына ајару эдерге ӱренип алар керек. Айдарда, улусла ӧй ӧткӱрип турзаҥ, јакшы болор. Нениҥ учун дезе сен јӱк ле СМС ла мессенджер ажыра куучындажып турзаҥ, кижиниҥ бойыла јолугып, кӧстӧҥ кӧскӧ куучындажарга кӱч болот. Оныҥ учун улусла јӱк ле электронный эдимдер ажыра куучындашпай, олордыҥ бойыла куучындажатан аргалар бедире (2 Иоанн 12).

13. Јиит кижиге база неге ӱренип алар керек? (1 Тимофейге 5:8). (Јурукты база кӧрӱгер.)

¹³ Бойыҥды јеткилдеерге ӱрен. Кӧгӱзи тереҥ христиан кижи бойын ла билезин јеткилдеер учурлу. (1 Тимофейге 5:8 кычырыгар.) Кезик ороондордо карындаштар адазынаҥ эмезе тӧрӧӧнинеҥ нени-нени эдерге ӱренип алар аргалу. А кезик ороондордо школдо ло ӱренип тура, кандый бир профессияга ӱренип аларга јараар. Јиит тужыҥда неге-неге ӱренип алзаҥ, керектӱ иш табарга јеҥил болор (Ап. ижи 18:2, 3; 20:34; Эф. 4:28). Оныҥ учун иштеҥкей бол ло баштап алган немеҥди учына јетире эдерге ӱренип ал. Ол тушта сени улус бӱдӱмјилӱ кижи деп кӧрӧр. А андый кижи качан да иш јок артпас! Бистиҥ шӱӱшкен кылык-јаҥдарга ла јӱрӱмге керектӱ немелерге ӱренип алары сеге келер ӧйдӧ алатан молјуларга белетенип аларга болужар.

14. Ӧйин толо берип иштеерине карындаш канайып белетенип алар аргалу?

¹⁴ Ӧйин толо берип турган ишчи. Ич-кӧгӱзи тереҥ христиандардыҥ кӧп сабазы јиит тужынаҥ ла ала ӧйин толо берип иштеп баштаган. Пионердиҥ ижи карындашты башка-башка улусла куучындажарга ӱредет. Анайда ок акча-манатла ойгор тузаланарга болужат (Флп. 4:11—13). Текши пионердиҥ ижин баштаарга озо подсобный пионер болгоны болужат. Кӧп јииттер шак ла мынай эткен. А текши пионер болгон кийнинде јииттердиҥ алдында јаҥы аргалар ачылат, темдектезе, теократиялык туралар тударында туружары эмезе Бет-Элде иштеери.

15, 16. Карындашка болушчы ишчи эмезе аксагал болорго не болужар?

¹⁵ Болушчы ишчи эмезе аксагал. Ончо карындаштарга аксагал болорго јӱткӱӱр керек. Олор аксагалдар болорго, библиялык некелтелерге келижип турар учурлу. Мындый амаду тургузып турган ака-карындаштарды Агару Бичик јакшы айдат (1 Тим. 3:1). Карындашка аксагал болордоҥ озо бир канча ӧйгӧ болушчы ишчи болуп иштеер керек. Болушчы ишчи јуунда кандый ла сурактарда јаан болужын јетирет. Аксагалдар да, болушчы ишчилер де — јобош карындаштар ла акалар. Олор Иегованыҥ койлорын кичеейт ле јарлаар иште эрчимдӱ туружат. Карындаш 17-де јаштуда болушчы ишчиниҥ ижин эдер аргалу. А молјузын јакшы бӱдӱрип турза, 20-де јаштуда аксагал болуп кӧстӧлип калат.

¹⁶ Болушчы ишчи эмезе аксагал болорго нени эдер керек? Мында кандый да јажыт јок. Ончо некелтелер Агару Бичикте берилип калган. Бу некелтелер Иегованы, билени ле јуунды сӱӱрине тӧзӧлӧнгӧн (1 Тим. 3:1—13; Титке 1:6—9; 1 Пётр 5:2, 3). Кандый некелтелер бар деп билип аларга, бу абзацта берилген ончо ӱлгерлерди кычырып кӧр. Оноҥ Иегованы керектӱ кылык-јаҥдарга ӱренип аларга болушсын деп сура c.

17. Карындаш ӧбӧӧни ле билениҥ бажы болорго канайып белетенип алар аргалу? (Јурукты база кӧрӱгер.)

¹⁷ Ӧбӧӧни ле билениҥ бажы. Иисустыҥ айтканыла, кӧгӱзи тереҥ христиандардыҥ кезиги кижи албай јӱрет (Матф. 19:12). Је сен биле тӧзӧӧр деп сананзаҥ, база да ӧскӧ молјуларлу болуп каларын: ӧбӧӧни ле билениҥ бажы болорыҥ (1 Кор. 11:3). Иегова  ӧбӧӧнинеҥ ӱйин сӱӱр ле оны јеткилдеер деп сакыйт. Анайда ок ӧбӧӧни ӱйине јуук најы болор ло ого Иеговала колбуларын тыҥыдарга болужар учурлу (Эф. 5:28, 29). Бу јӧрмӧлдӧҥ карындаштарга Иегова чылап сананар, ӱй улусты тоор ло бӱдӱмјилӱ кижи болор керек деп кӧрдис. Бу ончо неме олорго ӱйлерине јакшы эш-нӧкӧрлӧр болорго ло билезин јакшы башкарарга болужар.

18. Карындаш ада кижи болорго канайып белетенип алар аргалу?

¹⁸ Ада кижи. Сен кижи алган кийнинде балдарлу болуп калар болорыҥ. Эҥ јакшы ада — Иегова. Сен оноҥ кӧп немеге ӱренип алар аргалу (Эф. 6:4). Иегова бойыныҥ Уулын сӱӱп ле јарадып турганын чыгара айдып туратан (Матф. 3:17). Сен ада болуп калзаҥ, балдарыҥа сен олорды сӱӱп тургаҥ деп айдып тур. Анайда ок олорды јаантайын, кичинек те эткен јакшы керектери учун, мактап тур. Иегованаҥ тем алып турган адалар балдарына тереҥ кӧгӱстӱ улус болуп каларга болужып јат. Сен ада болотон молјуга эмдигештеҥ ала белетенип баштаар аргалу. Темдектезе, јуундагы ака-эјелерди ле бойыҥныҥ билеҥди кичееп тур. Олорды сӱӱп турганыҥды ла нениҥ учун баалап турганыҥды айдып тур (Иоанн 15:9). Анайып сен адазы ла ӧбӧӧни болорго белетенип аларыҥ, анайда ок Иегованы ла айландыра улусты сӱӱндирериҥ.

19, 20. Карындаштарга тереҥ кӧгӱстӱ христиандар болорго не болужар? (Кадарындагы јурукты кӧрӱгер.)

¹⁹ Тереҥ кӧгӱстӱ кижи болорго албаданар керек. Карындаштарга јакшы темдердеҥ ӱренер, Иегова чылап сананар ла бӱдӱмјилӱ кижи болор керек, анайда ок јӱрӱмге керектӱ немелерге ӱренер керек ле алатан молјуларга белетенер керек.

²⁰ Сеге кӧп иштенер керек деп сананып ийзеҥ, сен коркый берердеҥ айабазыҥ. Је сенде ӱзе келиже берер! Иегова сеге болужар деп сӧзин берет (Иса. 41:10, 13). Анайда ок јуундагы ака-эјелер сениҥ јаныҥда болор, сен олордыҥ болужына иженер аргалу. Иегова сени тереҥ кӧгӱстӱ болзын деп кӱӱнзеп јат. Нениҥ учун дезе тереҥ кӧгӱстӱ болзоҥ, сениҥ јӱрӱмиҥ канча катапка сӱӱнчилӱ ле јилбилӱ болуп калар деп, ол билер. Кару карындаштар, бис слерди сӱреен тыҥ сӱӱп јадыс! Тереҥ кӧгӱстӱ болорго тыҥ албаданыгар, ол тушта Иегова слерди кайрал јок артыргыспас (Укаа 22:4).