Слер бу јылдыҥ «Каруулчы шибеениҥ» чыгармаларын јазап кычырганаар ба? Бу сурактарга каруу берип кӧрӱгер.

Санааны јаҥыртары ол не дегени? (Рим. 12:2).

Јӱк ле јакшы керектер эдери ас. Бистиҥ ич јаныс кандый болгонын јазап кӧрӱп турар керек ле Иегованыҥ бийик нормаларыла јӱрерге солынар керек (w23.01 8—9 бӱктер).

Телекейдиҥ айалгазын кӧрӱп, канайда керсӱ болуп артар?

Биске телекейдиҥ ӱстинде не болуп турганын кӧрӧргӧ јилбилӱ болот. Нениҥ учун дезе анайып, Агару Бичиктиҥ судурларыныҥ бӱткенин кӧрӧдис. Је бодоп ло неме сананып таппас керек. Оноҥ ӧскӧ јуунныҥ бирлиги бузулардаҥ айабас. Оныҥ учун ака-эјелерле куучындажып јаткан тушта, бис Иегованыҥ организациязыныҥ чыгарган јетирӱлерин куучындажадыс (1 Кор. 1:10) (w23.02 16 бӱк).

Иисустыҥ ла оныҥ ӱренчиктериниҥ сууга чӧҥӱрилгенинде нези башка?

Биске кӧрӧ, Иисус Кудайга учурлалган албатыда чыккан, оныҥ учун Иисустаҥ Кудайга учурланары некелбеген. Ол кинчек јок, толо кемдӱ кижи болгон, оныҥ учун кинчектерин алынары некелбеген (w23.03 5 бӱк).

Јуунда ака-эјелерди каруулар берип турзын деп, бис нени эдер аргалу?

Јуунда ака-эјелерди каруулар берип турзын деп турган болзоос, карууларды кыскарта берер аргалу. Кӧп шӱӱлтелер айтпазаас, ӧскӧ дӧ ака-эјелерге айдар арга берерис (w23.04 23 бӱк).

Исайя 35:8-те кандый «Агару јол» керегинде айдылат?

Бу сӱрлеп айдылган јол. Оныла еврейлер Вавилонноҥ тӧрӧл јерине јанган. Је 1919 јылда эмдиги ӧйдиҥ «Агару јолы» ачылган. Канча чактардыҥ туркунына бу јолды белетеерге, иштер эдилген. Темдектезе, Агару Бичикти кӧчӱрери ле оны кепке базары. Бӱгӱнги кӱнде Кудайдыҥ албатызы кӧгӱс райда ла Каандыктыҥ алкыштарына апарып јаткан «Агару јолло» барып јат (w23.05 15—19 бӱктер).

Укаа сӧстӧрдиҥ 9-чы бажалыгында сӱрлеп айдылган кандый ӱй улус керегинде айдылат?

Укаа сӧстӧрдӧ «тенек ӱй кижи» керегинде айдылат. Оныҥ кычыртузын алынган улус «сӧӧк салар јерде» болуп калат. База бир ӱй кижи — «чын ойгор». Бу ӱй кижи јӱрӱмге апарып јаткан «ойгор болорыныҥ јолыла» барарга кычырат (Укаа 9:1, 6, 13, 18) (w23.06 22—24 бӱктер).

Лотко берген каруунаҥ Кудайдыҥ јобожы ла керсӱзи канайып кӧрӱнген?

Иегова Лотты Содомноҥ кырлардӧӧн качсын деп јакарган. Је Лот Цоар деп каладӧӧн качайын деп, Иегованы јайнай берерде, Кудай оныҥ сурагына јӧпсинген (w23.07 21 бӱк).

Ӧбӧӧни порнография кӧрӱп турган болзо, ӱйи нени эдер аргалу?

Ого бойын бурулабас керек. Иеговала колбуларын ла Кудайдаҥ токунал алган Агару Бичиктеги ӱй улустыҥ темдерин шӱӱп сананза торт болор. Ӱйи ӧбӧӧнине порнографияны ойто кӧрӧргӧ кӱӱнзедип ийгедий айалгалардаҥ кыйарга болужар аргалу (w23.08 14—17 бӱктер).

Бӱдӱмјибисти алаҥзыткадый сурактар берип турган улуска карууны јымжак берерге ӧткӱн болоры канайып болужар?

Кижиниҥ сурагын слерди јамандаарга турган эмезе каршу јетирерге турган деп кӧрбӧгӧр, карын ол кижини не санааркадып турганын билип алатан арга деп кӧрӱгер. Бу дезе карууны јымжак эдип берерге болужар (w23.09 17 бӱк).

Марияныҥ ийде-кӱчти кайдаҥ алганы бисти неге ӱредет?

Мария Мессияныҥ энези болор деп билип ийген. Бу јеҥил эмес јакылтаны бӱдӱрерге, ол болушты улустаҥ бедиреген. Ангел Гавриил ле Елизавета оныҥ бӱдӱмјизин тыҥыткан. Бис те болушты ака-эјелердеҥ бедиреер аргалу (w23.10 15 бӱк).

Иегова мӱргӱӱлдериске карууны канайып берип јат?

Кудай мӱргӱӱлдеристи угар деп сӧзин берет ле сураганыс оныҥ амадузыла кандый колбулу болгонын ајаруга алат (Иер. 29:12). Ол тӱҥей сурактарга карууны башка-башка эдип берер аргалу да болзо, бисти болужы јок качан да артыргыспас (w23.11 21—22 бӱктер).

Римдегилерге 5:2-де айдылганыла, христиандарда ижемји бар. Нениҥ учун Павел Римдегилерге 5:4-тӧ бу керегинде такып айдат?

Кижи сӱӱнчилӱ јарды укса, јердеги райда јажын-чакка јӱрерге иженип баштайт. Је кӱчтер болуп турза, оны ӧдӱп, Кудайдыҥ јарадузын сезип турза, ижемјизи там тыҥып турган болор, анайда ок ол бу ижемјини алдындагызына кӧрӧ, оноҥ тыҥ баалап баштайт (w23.12 12—13 бӱктер).