КӦП ака-эјелер бойлорыныҥ јокту ороонынаҥ бай ороондорго кӧчкӱлеген. Је олор Иегованы ла улусты сӱӱгенинеҥ улам, јарчылар јетпей турган бойыныҥ ороондорына кайра јангылаган (Матф. 22:37—39). Олордо кӱчтер де болгон болзо, је алкыштары ас эмес болгон. Бу јӧрмӧлдӧ Африканыҥ кӱнбадыш јанында турган Камерун деген ороондогы ака-эјелердиҥ темин кӧрӱп ийектер.

1998 јылда Онесим деген ака Камеруннаҥ јӱре берген. Је 14 јылдаҥ јерине кайра јанган. Не дезе бир катап јуунныҥ туштажузында јарлаар иш керегинде бир тем уккан. Эки најы балыктап барган болзын. Баштапкызында кӧп балыктар тудулып јат, экинчизинде дезе неме јок. Мыны кӧрӱп, экинчизи кӧп балыкту јердӧӧн јууктаар эмес пе?

Бу темниҥ кийнинеҥ Онесим Камерундагы ака-эјелерге болужарга кӧчӧр керек деп сананган. Нениҥ учун дезе анда кӧп улус Агару Бичик ӱренерге кӱӱнзеп јат. Је ол кӧп јылдардыҥ туркунына бай ороондо јаткан кийнинеҥ бойыныҥ јокту ороонына барза канайып јадар деп санааркай берген. Оныҥ учун Камерунда 6 ай јадып кӧргӧн. Је оноҥ 2012 јылда ары кӧчӧ берген.

Онесим кӱлӱмзиренип куучындайт: «Меге Камерунныҥ кӱч јӱрӱмине ойто ӱренижерге келишкен. Темдектезе, ондо коркышту изӱ болгон. Анайда ок Каандыктыҥ Туразында јымжак креслолорго эмес, је чичке, кату скамейкаларга отурар керек болгон. Андый да болзо, мен программаны јазап угарга албадангам. Анайып, араайынаҥ кату скамейкаларга отурарга ӱрениже бергем».

2013 јылда Онесим Жеральдина деп сыйынла биле тӧзӧгӧн. Бу сыйын дезе Францияда тогус јыл јадала, Камерундӧӧн кайра јанып келген. Олор кӧгӱс керектерди баштапкы јерге тургусканынаҥ кандый алкыштар алган? Онесим куучындайт: «Бис Каандыктыҥ јарчыларыныҥ сургалында ӱренгенис. А эмди бис Бет-Элде иштейдис. Бистиҥ јуунда, калганчы јылда, 20 кижи сууга чӧҥӱрилген. Мен чыннаҥ ла балыгы кӧп јерде јададым» (Марк 1:17, 18). А Жеральдина эјениҥ айтканыла: «Мындый кӧп алкыштар аларым деп сананбагам да!»

Эмди Жюдит эјениҥ теми. Ол США-дӧӧн кӧчӧ берген болгон, је ол кӧп јарлаарга кӱӱнзеген. Эје куучындайт: «Ада-энемге келген сайын улусла кӧп ӱредӱлер баштап ийетем. Бу улусты артыргызарга карамду  болгон. Је бир јанынаҥ США-да акчалу ижимди артыргызып салзам, ооруп турган адамга болужып болбос эдим». Је ол Иеговага иженип, Камерундӧӧн тӱҥей ле кӧчӱп келген. Баштап тарый ого США-дагы ӱзе јанынаҥ јеткил јӱрӱми јетпей туратан. Бу эје Иеговага кӧп мӱргӱп турала, Камерундагы јӱрӱмге ӱрениже берген. Анайда ок аймак кӧрӧӧчи ӱйиле кожо оныҥ кӱӱнин кӧдӱрип болушкан.

Жюдит эје ӧткӧн ӧйлӧрин эске алынат: «Ӱч јылдыҥ туркунына ӱреткен улузымнаҥ тӧрт кижи чӧҥӱрилген». Эје специальный пионер де болуп иштеп ийген. А эмди ол ӧбӧӧнине, Сам-Кастель деп акага, јорыкчы кӧрӧӧчиниҥ ижин бӱдӱрерге јӧмӧжӧт. Адазын эмдеерге дезе, эје тӧрӧӧндӧриле кожо ӧскӧ ороонноҥ јакшы клиника табып алган. Бу клиника адазына операцияны акча тӧлӧбӧзинеҥ јакшы эдип салган.

А эмди Виктор аканыҥ теми. Ол Канададӧӧн кӧчкӧн болгон. Анда ол «Каруулчы шибеенеҥ» бийик ӱредӱ керегинде јӧрмӧл кычырала, кандый бир курстарга ла ӱренип алза, торт болор деп сананган. Ол айдат: «Мынайып мен тӱрген иштеп баштайла, пионер болуп баштагам. Бу мениҥ алдынаҥ ла бери сананган санаам болгон». Кийнинде Виктор Каролина деп сыйынды алган. Олор экӱ Камерун барып јӱреле, Бет-Элде болгон. Бет-Элдеги акалар олорго Камерунда јаан болуш керек деп куучындаган. «А бис дезе, Камерундӧӧн кӧчӧргӧ белен болгоныс, не дезе, бис тегин де чӱм јок јӱрӱм јӱргенис. Бисти не де тутпаган. Јаҥыс Каролинаныҥ су-кадыгы эмеш уйан болгон» — деп, Виктор куучындайт.

Олор экӱ Камерунда оноҥ ло ары пионердиҥ ижин бӱдӱргиледи. Бир канча ӧйгӧ олор јууп алган акчазына јаткан. Је акча божоп барадарда, олор Канададӧӧн кайра барган. Тоолу ла айга иштеп алган акчазы Камерунда оноҥ ло ары пионерлер болорго јеткен. Кийнинде олорды Каандыктыҥ јарчыларыныҥ сургалына кычырган. Сургалдыҥ кийнинеҥ олорды специальный пионерлер эдип кӧстӧгӧн. А эмди дезе, олор теократиялык стройкаларда иштенет. Виктор ака айдат: «Ӱзе јанынаҥ јеткил јӱрӱмди артыргызып саларыста, Иегова бисти бир де артыргыспаган».

2002 јылда Ален деп карындаш Германияда университетте ӱренген. Ол ӧйдӧ «Молодежь, чему вы посвятите свою жизнь?» деген буклет кычырган. Бу буклетти кычырала, Ален јаҥы амадулар тургузып баштаган. Анайып 2006 јылда ШУС-та ӱренген кийнинеҥ оны Камерундӧӧн, бойыныҥ тӧрӧл јерине, кӧстӧгӧн.

Ол Камерунга келеле, озо баштап бӱдӱн кӱн иштебейтен ишке иштеген. А оноҥ ол акчазы кӧп иш таап алган. Је бу иштеҥ улам јарлаар ишке кӧптӧдӧ туружып болбой барар деп санааркай берген. Бу ӧйдӧ оны специальный пионер эдип кӧстӧӧргӧ јадарда, ол сӱӱнгенине ижин тӱрген ле таштап ийген. Је иштиҥ јааны: «Акчаны кӧптӧдип ийек те» — деерде, ол бир де болбоды. Кийнинде Ален Стефани деп сыйынды алган. Бу сыйын мынаҥ озо Францияда канча јыл јаткан. Камерунга кӧчкӧн кийнинде Стефаниде кандый кӱчтер болды?

 Стефани куучындайт: «Мениҥ су-кадыгым ӱрелип, аллергия башталган. Је мен јаантайын ла эмденип турала, кем јок боло бергем». Бир катап Стефани Аленле кожо Кате деп ыраак деремнедӧӧн јарлап барган. Анда олор јакшы ӱредӱлер табыла берерде, олорды телефон ажыра ӧткӱргилеп туратан. Бу ӱренген улустыҥ экӱзи сууга чӧҥӱрилген. Анайда ок ол деремнеде группа тӧзӧлгӧн. Стефани куучындайт: «Мынайып улуска Иеговага јӱрӱмин учурлаарга болушканыстаҥ јаан сӱӱнчи јок». Эмди олор экӱ јорыкчы ишчилер болот.

Жизель деп сыйын Италияда медицинский школдо ӱренип турала, сууга чӧҥӱрилген. Ол дезе пионер эш-нӧкӧрлӧрдиҥ темин кӧрӱп, Кудайга база кӧптӧдӧ иштеерге кӱӱнзеген. Бу эш-нӧкӧр чӱм јок јӱрӱм јӱрген. Оныҥ учун Жизель калганчы курста ӱренип турала, текши пионер болуп баштаган.

Жизель сыйын кӧптӧдӧ јарлаарга, Камерундӧӧн кайра кӧчӧргӧ сананган. Ол айдат: «Камерундӧӧн кӧчӧ берзем, Италияда јадатан аргам јылыйып калар ла најыларымла, тӧрӧӧндӧримле де база кӧрӱшпезим деп санааркагам». Је андый да болзо, 2016 јылда, кӱӱк айда Камерундӧӧн кӧчӧ берген. Канча да кире ӧйдӧҥ Леонс деп акага кижиге барган. Оноҥ олорды Камерундагы Бет-Эл јарчылар јетпей турган Айос деп калага кӧстӧгӧн.

Айостогы јӱрӱм кандый болгон? Жизель айдат: «Бистерде кӧп сабада свет те болбогон, телефондорыс та иштебейтен. Сууны караҥуй тӱнде, улус ас тушта, фонарикти кӱйдӱреле, тачкалу экелетенис. Анайда ок отко курсак азып ӱренип алганыс. Бу ӧйдӧ биске Иегованыҥ агару тыны јаан болуш болгон. Эш-нӧкӧримле бой-бойыска јӧмӧжип туратаныс. Анайда ок најыларыс ла тӧрӧӧндӧрис кӱнисти кӧдӱретен ле акча-манатла да болужып туратан».

Жизель кайра јанып келгенине сӱреен тыҥ сӱӱнген. Ол айдат: «Кӱчтер ле санааркаштар јогынаҥ канайып болзын. Је бис эҥ керектӱ иш эдип турганыс деп бӱдӱмјилӱ болгоныс. Анайып Иеговага оноҥ тыҥ бӱдӱп, ого оноҥ јуук болуп калганыс». Оноҥ бу эш-нӧкӧрлӧр Каандыктыҥ јарчыларыныҥ сургалын божоткон. А эмди дезе, бир эмеш ӧйгӧ специальный пионерлер болуп иштейдилер.

Балыкчылар јут-јулакай да болзо, ачык талайга чыгып јат. Анайып ла ака-эјелер улуска Каандык керегинде куучындаарга, кӱч те болотон болзо, јерине кайра јанып келет. Иегова олордыҥ эткен ижин ле сӱӱжин качан да ундыбас (Неем. 5:19; Евр. 6:10). Оныҥ учун слер де тӧрӧл јеригерге, јарчылар јетпей турган болзо, кӧчӧр бедигер? Эйе болзо, Иегова слерди кайрал јок артыргыспас! (Укаа 10:22).