1, 2. Улусты аскыртып саларга, Дьявол нени эткен?

ТЕЛЕФОН, лампочка, машина, холодильник — јӱрӱмисти јеҥилтип турган эдимдердиҥ кезиги. Кезик эдимдер — таары (порох), таҥкы, пехотный миналар, атомный бомба ла оноҥ до ӧскӧ кӧп немелер улустыҥ јӱрӱмине каршу јетирет. Је тӧгӱн улустыҥ јӱрӱмине мынаҥ јаан каршу јетирет ле туку озодо табылган. Тӧгӱнчи кижи улусты аскыртып саларга, ӧнӧтийин тӧгӱндеп јат. Эҥ баштапкы тӧгӱнди кем айткан? Дьявол. Иисус оны «тӧгӱнниҥ адазы» деп адаган. (Иоанн 8:44 кычырыгар.) Баштапкы тӧгӱн качан айдылган?

² Бу тӧгӱн канча муҥ јылдар кайра Эдем садта айдылган. Кудай баштапкы улусты, Адам ла Еваны, сӱрекей јараш райда јатыргызып, «јакшыны ла јаманды билип алар агаштыҥ» јиилегин јибезин деп јакару берген. Оноҥ ӧскӧ, олор Кудайдыҥ сӧзин укпаза, ӧлӱп калар эди. Је Сатана Евага јылан ажыра: «Ӧлбӧзигер» — деген. (Јердиҥ ӱстинде бу эҥ баштапкы тӧгӱн болгон.) Анайда ок ол мынайып айткан:  «Слер олорды јизегер, кӧстӧригер ачылып, јакшыны ла јаманды билер кудайлардый боло береригер» (Баш. 2:15—17; 3:1—5).

3. Сатана Еваны ӧнӧтийин тӧгӱндеген деп, нениҥ учун айдарга јараар ла оныҥ тӧгӱни неге экелген?

³ Сатана Еваны ӧнӧтийин тӧгӱндеген. Нениҥ учун дезе Ева Сатананыҥ сӧзине киреле, агаштыҥ јиилегин јип ийзе, ӧлӱп калар деп, ол билер болгон. Анайып, Ева ла Адам Иегованыҥ сӧзин укпаганынаҥ улам учы-учында божоп калган (Баш. 3:6; 5:5). Анайда ок «кинчек ажыра ӧлӱм келген. Анайып ончо улус ӧлӱмдӱ боло берген». Агару Бичикте айдылганыла: «Ӧлӱм... Кудайдыҥ јакылтазын бускан Адам чылап кинчек этпеген улусты да бийлеген» (Рим. 5:12, 14). Кудайдыҥ амадузыла болзо, улус толо кемдӱ болор учурлу болгон. Је улустыҥ јӱрӱми «јаан ла болзо, јетен-сегизен јылга улалып, кыйын-шырала толо» болот деп, сарнаачыныҥ айтканына келижип јат (Сар. 90:10). Мындый јӱрӱм Сатананыҥ тӧгӱнинеҥ улам болот.

4. а) Бис кандый сурактар шӱӱп кӧрӧрис? б) Сарын 15:1, 2-ле болзо, кандый кижи Иегованыҥ најызы болор аргалу?

⁴ Иисус Сатананы: «Чындыкка јайылбаган [чындык артпаган, ЈТ]. Оныҥ бойында чындык јок» — деп айткан. Сатана эмди де бастыра јерди бойыныҥ тӧгӱниле мекелеп јат (Ачыл. 12:9). Бис Дьяволдыҥ тӧгӱнине кирерге кӱӱнзебей јадыс. Оныҥ учун мындый ӱч сурак кӧрӱп ийектер: бӱгӱнги кӱнде Сатана улусты канайып аскыртып јат? Улус нениҥ учун тӧгӱндеп јат? Качан да тӧгӱндебей јӱрӱп, Иеговала колбуларысты Адам ла Ева чылап јылыйтпаска, биске не болужар? (Сарын 15:1, 2 кычырыгар *.)

5. Бӱгӱнги кӱнде Сатана улусты канайып аскыртат?

⁵ Сатана бисти тӧгӱндеп болбозын деп, биске оныҥ умзаныштарын билер керек (2 Кор. 2:11). Бастыра телекей — тӧгӱн кудай јаҥныҥ башчылары, садынчак политиктер ле ач коммерсанттар Сатананыҥ колында (1 Иоанн 5:19). Оныҥ учун Сатана ла оныҥ кӧрмӧстӧриниҥ јамылу улус ажыра улусты тӧгӱндеп турганы бисти кайткатпай јат (1 Тим. 4:1, 2). Темдектезе, кезик арга-чакту бизнесмендер тӧгӱн рекламаныҥ болужыла су-кадыкка каршу јетирип турган товарлар садат ла улусты тӧгӱндеп, акчазын кактап алат.

6, 7. а) Нениҥ учун анчада ла кудай јаҥныҥ башчыларыныҥ тӧгӱни каршулу болот? б) Слер кудай јаҥныҥ башчыларынаҥ кандый тӧгӱн укканыгар?

⁶ Улусты анчада ла кудай јаҥныҥ башчылары тӧгӱндеп турза, каршулу болот. Нениҥ учун дезе улус олордыҥ тӧгӱн ӱредӱлерине бӱдӱп, Кудайга јарабай турган керектер эдип, ӱргӱлји јӱрӱмнеҥ астыгып јат (Ос. 4:9). Иисус кудай јаҥныҥ башчыларыныҥ тӧгӱнин билер болгон. Оныҥ  учун: «Бичикчилер ле фарисейлер, слерге ачу-корон! Эки јӱстӱлер! Бир де кижини болзо, јаҥыбыска баштандыралы деп, талай кечип, јер ӧдӧдигер. Баштандырала, оны бойыгардаҥ эки катап јаман таамыныҥ [гееннаныҥ, ЈТ ӧскӧртӧ айтса, ӱргӱлјиге јоголтыларыныҥ], уулы эдип аладыгар» — деп, чике айткан (Матф. 23:15). Иисус андый башчыларды јаргылап, олордыҥ адазы — кижи ӧлтӱреечи Дьявол деген (Иоанн 8:44).

⁷ Кудай јаҥныҥ башчылары бӱгӱнги де кӱнде коркышту кӧп. Олорды канайып адагылабайт дееригер: пастор, абыс, раввин. Олор баштапкы чактыҥ фарисейлери чилеп Кудайдыҥ Сӧзиндеги «чындыкты јаба базып», меке-тӧгӱнге солып јадылар (Рим. 1:18, 25). Темдектезе: отту таамы (огненный ад), реинкарнация, анайда ок Кудай гомосексуализмди ле ӱй кижи ӱй кижиле, эр кижи эр кижиле алыжып турганын токтотпой турган деп, неге де јарабас тӧгӱн ӱредӱлер таркадат.

8. Удабас улус кандый тӧгӱн угар ла биске бу јанынаҥ нени ундыбас керек?

⁸ Анайда ок улусты политикалык башчылар тӧгӱндеп јат. Удабас «амыр, кайдаҥ да јеткер јок» деген јар угулар. Бу дезе, тӱӱкидеги эҥ јаан тӧгӱн болор. Нениҥ учун дезе ол тушта Сатананыҥ телекейин «сакыбаган јанынаҥ јайраду табарар». Бӱгӱнги телекей јоголтылбас деген тӧгӱнге кирбегер. Иегованыҥ кӱни «тӱнде уурчы чылап келерин» бис јакшы билерис (1 Фес. 5:1—4).

9, 10. а) Улус нениҥ учун тӧгӱндейт ле тӧгӱн неге экелет? б) Иегова керегинде нени ундыбас керек?

⁹ Кандый бир јаҥы товар эмезе эдим јарлу боло берзе, олор кӧптӧдӧ чыгарылып баштайт. Тӧгӱн база анайып ла таркап калган. Тӧгӱнниҥ таркадылып турганы јаҥжыгып калган, оны јамылу да улус таркадып јат. Юдхиджит Бхаттачарджи «Бис нениҥ учун тӧгӱндеп турганыс?» деген статьязында мындый сӧстӧр бичиген: «Тӧгӱн — кижиниҥ эди-канына шиҥген кылык-јаҥ болуп калган». Улус кӧп сабада бойын корулаарга эмезе јаман кӧрӱнбеске тӧгӱндеп јат. Андый улус бойыныҥ јастыразын, јаман керегин эмезе та нени де аларга болуп, темдектезе акча аларга, тӧгӱндеп јат. Ол статьяда мынайып айдылат: «Бис таныш эмес улуска, кожо иштеп турган улуска, најыларыска ла сӱӱген улузыска јеп-јеҥил тӧгӱндеп ийедис».

¹⁰ Тӧгӱннеҥ улам улус бой-бойына бӱтпей барат ла колбуларын ӱрейт. Темдектезе, ӧбӧӧни ӱйиниҥ ӧскӧ кижиле конгонын ла андый кылыгын јажырарга албаданганын билип ийзе, ого кандый ачу болот. Эмезе ӧбӧӧни айылында ӱйин ле балдарын согуп ла базынып турат, је улус кӧзинче јакшы ада болот. Андый тӧгӱнчилер Иегованыҥ кӧзинеҥ нени де јажырып болбос, не дезе, «Оныҥ кӧзи алдында ончозы јылаҥаш ла ачык» (Евр. 4:13).

11. Анания ла Сапфираныҥ учуралынаҥ неге ӱренип јадыс? (Јӧрмӧлдиҥ бажындагы јурукты кӧрӱгер.)

 ¹¹ Агару Бичиктеҥ бир учурал кӧрӱп ийектер. Сатана баштапкы чакта јаткан бир христиан билеге Кудайды тӧгӱндеп ийетен санаа берген. Анания ла Сапфира јерин садып ийеле, элчилерди тӧгӱндеп, саткан бааныҥ јӱк кезигин экелип берген. Анайып олор јуунныҥ улузын бойыныҥ кысканбазыла кайкадарга сананган. Је Иегова мыны кӧрӱп, олорды каруузына тургускан (Ап. ижи 5:1—10).

12. Ӧнӧтийин тӧгӱндеп, кинчегин алынбай турган улусты не сакып јат? Нениҥ учун?

¹² Тӧгӱнчи улуска Иегованыҥ кӧрӱми кандый? Сатананы ла ӧнӧтийин тӧгӱндеп, кинчегин алынбай турган улусты сӱрлеп айдылган отту кӧл сакыйт (Ачыл. 20:10; 21:8; Сар. 5:6). Нениҥ учун дезе, андый тӧгӱнчилер Иегованыҥ кӧзинде јескинчилӱ керектер эдип турган улустый болот (Ачыл. 22:15).

13. Иегова керегинде бис нени билерис ле бу бисти неге кӱӱнзедет?

¹³ «Кудай кижи эмес, Ол тӧгӱндебей јат» (Тоол. 23:19). Агару Бичикте мынайып айдылат: «Кудайдыҥ тӧгӱндеер аргазы јок» (Евр. 6:18). Иегова «тӧгӱнчи тилди» бир де јаратпай јат (Укаа 6:16, 17). Бис Кудайды сӱӱндирерге турган болзоос, биске бир де тӧгӱндебес керек. Оныҥ учун бис бой-бойысты тӧгӱндебей јадыс (Кол. 3:9).

14. а) Бис тӧгӱн кудай јаҥдардыҥ улузынаҥ неле аҥыланадыс? б) Лука 6:45-теги принципти јартап беригер.

¹⁴ Чындык христиандар тӧгӱн кудай јаҥдардыҥ улузынаҥ база незиле  аҥыланат? Бис чынды айдадыс. (Захария 8:16, 17 кычырыгар *.) Элчи Павелдиҥ айтканыла, бис чындык сӧстӧрисле «бойыбысты Кудайдыҥ јалчылары деп кӧргӱзедис» (2 Кор. 6:4, 7). Иисус дезе: «Кижиниҥ јӱреги неле толо, оозынаҥ ол ло чыгар» — деген (Лука 6:45). Ӧскӧртӧ айтса, ак санаалу кижи таныш эмес улусты, кожо иштеп тургандарды, најыларын ла јуук улузын качан да тӧгӱндебей јат. Эмди, чынды айдып турганыс ченелип турган учуралдар кӧрӱп ийектер.

15. а) Эки јӱстениш нениҥ учун ойгор эмес? б) Јииттерге јажыт балдардыҥ салтарына кирбеске нени эдер керек? (Сносканы кӧрӱгер.)

¹⁵ Кезик јиит христиандар балдардаҥ башка болбоско, эки јӱстенип баштайт. Айылда ла јуунда олор јакшы улус болуп јат, је школдо ло социальный сетьтерде чек ӧскӧ кижи болуп јат. Олордыҥ куучыны да кирлӱ, кийген кийими ле уккан кӱӱзи де бу телекейдиҥ улузындый болот. Анайда ок олор тыҥ эзиргенче ичинип алат, наркотиктер тузаланат ла кемле-кемле туйказынаҥ туштажып, оноҥ до ӧскӧ немелер эдет. Анайып олор ада-энезин, јуунныҥ ака-эјелерин ле Кудайды тӧгӱндеп јат (Сар. 26:4, 5). Иегова: «Бу улус Мени тилиле тооп јат, јӱректери дезе Менеҥ ыраак» — деп айдат (Марк 7:6). Оныҥ учун: «Јӱрегиҥ кинчектӱ улуска кӱйӱнбезин, је кере тӱжине Иегованаҥ айап турзын» — деп айдылган сӧстӧрлӧ јӱрзе, канча киреге артык * (Укаа 23:17).

16. Ӧйин толо берип турган аҥылу ишти эдерге, нениҥ учун анкетада нени де јажырбай бичиир керек?

¹⁶ Слер пионер болорго эмезе Бет-Элде ӧйин толо берип турган аҥылу ишти эдерге турган болорыгар. Мындый иштерге туружарга анкета бичиген тушта, су-кадык, соот-јыргал ла ак-чек болоры јанынаҥ сурактарга нени де јажырбай бичиир керек (Евр. 13:18). Слердиҥ уйадыгар јаман керек эткенеердеҥ улам, амыр бербей турган болзо, нени эдер? Слер аксагалдарга баштанганаар ба? Јок болзо, олорло куучындажыгар, не дезе, олор слерге кӧгӱс јанынаҥ болужып берзе, слер Кудайга ару уйатту иштеереер (Рим. 9:1; Гал. 6:1).

17. Шылуда акалар керегинде сурактар берзе, нени ундыбас керек?

¹⁷ Слердиҥ јадып турган орооныгарда Иегованыҥ Керечилериниҥ ижи токтодылып калган болзын. Слерди шылуга кычырып, јуундагы акалар керегинде сурактар берип баштаган болзо, нени эдереер? Ончо билер немегерди куучындап береригер бе? Иисусты римниҥ  башчызы шылап турарда, ол нени эткен? Ол «унчукпай јӱретен ӧй бар, айдатан ӧй бар» деп билген, оныҥ учун кезик сурактарга каруу бербеген (Јарл. 3:1, 7; Матф. 27:11—14). Мындый айалгада акалар керегинде каршу јетиргедий неме айдып ийбеске, ајарыҥкай болор керек (Укаа 10:19; 11:12).

18. Бис аксагалдарга јуундагы кижиниҥ эткен кинчегин куучындап јатсаас, нени ундыбас учурлу?

¹⁸ Анайда ок слер јуунда кемниҥ-кемниҥ уур кинчек эткенин угуп ийген болзоор, нени эдереер? Аксагалдар јуунды ак-чек јанынаҥ ару болзын деп кичееп јат, оныҥ учун олор бу кижиниҥ кинчеги керегинде слердеҥ нени билеригерди сураар болор. Бу кижи слердиҥ јуук најыгар эмезе тӧрӧӧнигер болзо, канайдараар? Агару Бичикте: «Ак санаалу кижиниҥ айтканы да чын» — деп айдылат (Укаа 12:17; 21:28). Бис аксагалдарга, нени де јажырбай эмезе кошпой, чынды айдып берер учурлу. Не дезе, кинчек эткен кижиге Иеговала колбуларын орныктырарга болужып берерге, олорго чынды билер керек (Иак. 5:14, 15).

19. Келер јӧрмӧлдӧ нени шӱӱжерис?

¹⁹ Сарнаачы Давид Иеговага: «Сен јӱректеги чындыкка сӱӱнип јадыҥ» — деп мӱргӱген (Сар. 51:6). Нениҥ учун дезе Давид качан да тӧгӱндебей турган кижиниҥ јӱреги де ару деп билген. Христиандар бой-бойын качан да тӧгӱндебей јат. Је Кудайдыҥ ишчилери база неле аҥыланат? Олор улусты Кудайдыҥ чындыгына ӱредет. Бу керегинде келер јӧрмӧлдӧ шӱӱжилер.