1. Иегова бойыныҥ амадузын бӱдӱрерге нени эдер аргалу?

ИЕГОВА бойыныҥ амадузын бӱдӱрерге, кем ле болуп ийер аргалу. Темдектезе, ол Ӱредӱчи, Токунадаачы эмезе Јарлаачы болуп ийер аргалу, је бу оныҥ аргаларыныҥ јӱк кезиги (Иса. 48:17; 2 Кор. 7:6; Гал. 3:8). Андый да болзо, ол бойыныҥ амадузын бӱдӱрерге улусты тузаланат (Матф. 24:14; 28:19, 20; 2 Кор. 1:3, 4). Иегова бистиҥ кажыбыска ла тургуза ӧйдӧ кем болор керек, ол ло болорго болужатан ойгор ло ийде-кӱч берер аргалу. Бу ончо неме, кезик библиялык шиҥдеечилердиҥ јартаганыла болзо, Иегованыҥ адыныҥ учурына келижип јат.

2. а) Кудайга бистеҥ туза јок деп, бис кезикте нениҥ учун алаҥзып јадыс? б) Бу јӧрмӧлдӧ бис нени шӱӱжерис?

² Бис ончобыс Иеговага тузалу болорго кӱӱнзейдис, је кезигис јажыстаҥ, айалгаларыстаҥ эмезе кандый бир немени эдип билбезистеҥ улам, Кудайдыҥ ижин эдип болбозыс деп алаҥзып јадыс. Кезигис дезе, Иеговага эдип турган ижиле болорзынып, оноҥ кӧпти эдерге албаданбай јат. Бу јӧрмӧлдӧҥ Иегова бойыныҥ амадузын бӱдӱрерге, бистиҥ кажыбысты ла канайып белетеер аргалу деп билип аларыс. Оноҥ Иегова бойыныҥ ишчилерине — эр ле ӱй улуска — кӱӱн ле ийде-кӱч бергениниҥ библиялык темдерин кӧрӱп ийерис. Анайда ок Иегованыҥ колында јакшы јепсел болорго нени эдер керек деп шӱӱжип ийерис.

3. Иегова Филиппыдагыларга 2:13-те айдылганы аайынча, биске оныҥ табын бӱдӱретен кӱӱнди канайып берер аргалу?

³ Филиппыдагыларга 2:13 * кычырыгар. Иегова бистерге  оныҥ табын бӱдӱретен кӱӱн берер аргалу. Канайып? Темдектезе, бис јууныста болуш керек болгонын билип ийдис. Эмезе аксагалдар Бэт-Элдеҥ келген самарадаҥ база ӧскӧ јерлерде болуш керек болгонын кычырган болзын. Мынаҥ улам слер: «Мен неле болужар эдим?» — деп, сананып турган болорыгар. Ол эмезе, биске кӱч јакылта берилерге турган болзын, је бис оны бӱдӱрерге ийде-кӱчис јетпес деп, санааркап турган болорыс. Эмезе Агару Бичиктиҥ кандый бир ӱзӱгин кычырып: «Бу ӱлгерлерди улуска болужарга канайып тузаланар?» — деп, сананып турган болорыс. Је качан бис улуска канайып болужарын сананып турзаас, ол биске санаабыска јединетен кӱӱн берер. Иегова бисти качан да албадабай јат.

4. Иегова биске оныҥ табын бӱдӱретен ийде-кӱчти канайып берер аргалу?

⁴ Анайда ок Иегова биске оныҥ табын бӱдӱретен ийде-кӱч берер аргалу (Иса. 40:29). Ол бойыныҥ агару тыныла бистиҥ нени-нени эдер аргаларысты тыҥыдып ийерге белен (Чыг. 35:30—35). Иегова бисти бойыныҥ организациязы ажыра кандый бир иштер эдерге ӱредет. Кӱчигер јетпес деп, алаҥзып турган болзогор, болуш сурагар. Анайда ок «артыкташкан кӱч» берип турган теҥеридеги јалакай Адабыстаҥ ийде-кӱч сурагар (2 Кор. 4:7; Лука 11:13). Агару Бичикте Иегова эр ле ӱй улуска оныҥ табын бӱдӱрерге, кӱӱн ле ийде-кӱч бергенин кӧргӱскен кӧп темдер бар. Олордыҥ кезигин кӧрӱп ийеле, Иегованыҥ колында тузалу јепсел болорго, биске нени эдер керек деп сананып ийектер.

5. Иегова бойыныҥ албатызын јайымдаарга, Моисейди качан ла канайып тузаланганын кычырып, бис неге ӱренип јадыс?

⁵ Иегова Моисейди Израиль албатыга аргадаачы болзын деп кӱӱнзеткен. Је Кудай бу јакаруны ого качан берген? Качан Моисей «Египеттиҥ калыгыныҥ ончо ойгорлыгына ӱреди[лип]», бойына бӱдӱмјилӱ болуп каларда ба? (Ап. ижи 7:22—25). Јок, Иегова оны јӱк ле јобош ло јымжак эдип ӱредип алган кийнинде тузаланган (Ап. ижи 7:30, 34—36). Ол Моисейге Египеттиҥ эҥ улу башчызыныҥ алдына јалтанбай турарга болушкан (Чыг. 9:13—19). Иегова Моисейди качан ла канайып тузаланганынаҥ бис неге ӱренедис? Иегова оныҥ кылык-јаҥына ӱренип турган ла оноҥ ийде-кӱч сурап турган улусты талдап алат (2 Кор. 4:7).

6. Иегованыҥ Давидке Верзеллий ажыра болушканынаҥ бис неге ӱренедис?

⁶ Эмди, канча јӱс јылдар ӧдӧ берерде не болгонын кӧрӱп ийектер. Давид каан ла оныҥ улузы Авессаломноҥ, Давидтиҥ уулынаҥ, качып јӱреле, «аштап-суузап, арып-чылап калган». Ол ӧйдӧ Иегова ого Верзеллий ажыра болужып јат. Бу јажы јаан кижи ӧскӧ дӧ улус чылап, Давид ле оныҥ улузын јеткилдеерге болуп, јӱрӱмин кысканбай болушкан. Верзеллий бойын карып калган ла Иеговага туза јок деп сананбаган, карын Кудайдыҥ ишчилерине бары-јогыла ӱлешкен (2 Сам. 17:27—29). Бис мынаҥ неге ӱренедис? Канча да јашту болзоос, Иегова бис ажыра, бистиҥ ороондогы эмезе ӧскӧ ороондордогы немеге јединбей турган ака-эјелерге болужар аргалу (Укаа 3:27, 28; 19:17). Бистер олорго таҥынаҥ болужып болбой турган да болзоос, Кудайдыҥ организациязы ака-эјелерге керектӱ ӧйдӧ лӧ керектӱ јерде болужар аргалу болзын деп, бастыра телекейлик ишке акча-манатла јӧмӧжӧр аргалу (2 Кор. 8:14, 15; 9:11).

7. Иегова Симеонды неде тузаланган, бу нениҥ учун бистиҥ кӱӱнисти кӧдӱрет?

⁷ Иегова Иерусалимде јаткан, Кудайдаҥ айап јӱрген Симеон деп јажы јаанаган  кижиге, Мессияны кӧрбӧгӧнчӧ ӧлӱм кӧрбӧс деп, сӧзин берген. Мынаҥ улам кӧп јылдардыҥ туркунына Мессияныҥ келерин сакыган Симеонныҥ кӱӱни сӱреен тыҥ кӧдӱрилген. Бир катап, «Агару Тын Симеонды байзыҥга экелди», анда ол јаш Иисусты кӧргӧн. Иегова Симеон ажыра Христос болуп калатан бу бала керегинде судур айткан. Мынайып ол Кудайга бӱткени ле турумкайы учун кайрал алган (Лука 2:25—35). Симеон Иисустыҥ ижи башталган ӧйгӧ јетире јӱрбеген болор. Је ол Кудай ого андый јаан кӱндӱ эткени учун быйанду болгон. Эҥ јаан кайрал оны келер ӧйдӧ сакып јат! Јаҥы телекейде Иегованыҥ чындык ишчизи, Иисустыҥ башкарузы бастыра јердеги билелерге кандый алкыштар экелерин кӧрӧр (Баш. 12:3). Бистерге де Иегованыҥ агару ижин бӱдӱреринде ачылып турган кандый ла арганы баалаар керек.

8. Иегова бисти, Варнаваны чылап, канайып тузаланар аргалу?

⁸ Баштапкы чакта јаткан кысканбас Иосиф деген кижи Иегова оны тузаланзын деп кӱӱнзеген (Ап. ижи 4:36, 37, ЈК 2003). Элчилер оны Варнава деп адаган, нениҥ учун дезе Иосиф улусты сӱрекей јакшы токунадып билер болгон. Бу аттыҥ учуры «коот уулы» дегени. Кӧп акалар Савлдаҥ, калју истежеечи болгон, је христиан болуп калган кижидеҥ, коркып, оныла куучындашпас болгон. Је бу ӧйдӧ ого јалакай ла болушчаҥ Варнава келген. Савл ого јаан быйанду болгон (Ап. ижи 9:21, 26—28). Соондо Иерусалимниҥ аксагалдары Сириядагы Антиохияныҥ ака-эјелерин оморкодорго, база ла Варнаваны аткарган. Варнаваныҥ барганы јаан тузалу болды. Ол улусты «Кайраканга акту јӱрегинеҥ чындык болзын деп, ончозын сергидип турды» (Ап. ижи 11:22—24). Анайып ла бӱгӱнги кӱнде Иегова бистиҥ кажыбыска ла ака-эјелерге «коот уулы» болорго болужар аргалу. Темдектезе, Кудай бис ажыра јуугын јылыйткан улусты токунадар аргалу. Ол эмезе ооруп эмезе кунугып калган улуска барып эмезе телефон согуп, јылу сӧстӧр айдып берзин деп кӱӱнзедер аргалу. Иеговага слерди де, Варнаваны чылап, јакшы керек эдерине тузаланзын деп, арга беререер бе? (1 Фес. 5:14).

9. Иегованыҥ Василий акага јуунда јакшы кӱдӱчи болорго болушканы бисти неге ӱредет?

⁹ Анайда ок Иегова Василий деп акага христиан јуунда јакшы кӱдӱчи болорго болушкан. Оны аксагал эдип кӧстӧп турарда, ол 26 јашту болгон. Оныҥ учун ол ака-эјелерге, анчада ла јаан кӱчтерге туштап тургандарга, кӧгӱс јанынаҥ болужып болбос деп коркып туратан. Је Василий ченемелдӱ аксагалдарла кожо иштенип, Агару иштиҥ сургалына ӱренип, кӧп немеге ӱренген. Анайып ол бойыныҥ кылык-јаҥын солыырга албаданган. Темдектезе, ол јаан эмес амадулар тургузып алала, бу амадуларына ээчий-деечий јединип, коркыбас болорго ӱрене берген. Эмди ол мынайып айдат: «Алдындагы коркыган немедеҥ эмди јаан сӱӱнчи аладым. Иегова меге Агару Бичиктеҥ аканы эмезе эјени токунадатан ӱлгер табып аларга болужып берзе, јӱрегим сӱӱнчиле толот». Акалар, слер бойыгарды, Василий чилеп, Иеговага тузаланарына берип турзаар, ол слерге јуунда кӧп молјулар бӱдӱрерге болужар.

10. Авигея нени эткен, бис оныҥ теминеҥ неге ӱренедис?

¹⁰ Саул каанныҥ истежӱзинеҥ улам, Давидке ле оныҥ черӱчилдерине болуш керек болгон. Мынаҥ улам Давидтиҥ улузы израиль укту Навал деген бай кижинеҥ бир эмеш курсак сураган. Нениҥ учун дезе олор алдында Навалдыҥ чӧл јерде јӱрген мал-ажын  корулаган. Је јаҥыс бойын сӱӱген Навал олорго болужарга кӱӱнзебей турарда, Давид чугулданып, Навалды ла оныҥ айылыныҥ ончо эр улузын ӧлтӱрип койорго сананган (1 Сам. 25:3—13, 22). Навалдыҥ ӱйи Авигея јӱк јараш болгон эмес, је ойгор ӱй кижи болгон. Айалганы кӧрӱп, Авигея јалтанбай, Давидке барала, оныҥ алдына тизеленип, Давидти ӧч алып, кан тӧгӧринде бурулу болуп калбазын деп, јайнай берген. Ол бойын јобош тудунып, Давидке чугулын Иеговага артыргызып салзын деп јӧп берген. Авигеяныҥ јымжак ла ойгор сӧстӧри Давидтиҥ јӱрегин јымжадып ийерде, ол Авигеяны Иегова ийген деп оҥдоп ийген (1 Сам. 25:23—28, 32—34). Анайып, Авигея јакшы кылык-јаҥду болгонынаҥ улам, Иегованыҥ колында јакшы јепсел болгон. Айдарда, Иегова бӱгӱнги кӱнде черчеҥ ле ойгор болорго албаданып турган христиан эје-сыйындар ажыра билелердиҥ курчуларын тыҥыдып, јуундардагы ака-эјелерди тыҥыдар аргалу (Укаа 24:3; Тит. 2:3—5).

11. Шаллумныҥ кыстары кандый иште турушкан, бӱгӱнги кӱнде кемдер олорго тӱҥей?

¹¹ Иегова канча чактар ӧткӧн кийнинеҥ бойыныҥ албатызын Иерусалимниҥ стенелерин орныктырарга кӱӱнзеткен. Ол бу иште Шаллумныҥ кыстарын тузаланган (Неем. 2:20; 3:12). Олордыҥ адазы Шаллум јайзаҥ да болгон болзо, оныҥ кыстары кӱч ле јеткерлӱ ишти коркыбай бӱдӱрген (Неем. 4:15—18). Олорго кӧрӧ, Фекоя каланыҥ јайзаҥдары бу ишке туружарга бир де кӱӱнзебеген (Неем. 3:5). Иерусалимниҥ стенелери 52-ле кӱннеҥ орныктырыла берерде, Шаллумныҥ кыстарыныҥ сӱӱнчизин сананып ийзеер де! (Неем. 6:15). Бистиҥ ӧйдӧ бойын кысканбас эје-сыйындар агару иштиҥ аҥылу бӱдӱминде — Иеговага бажырарына туралар тударында ла олорды јазаарында сӱӱнип туружадылар. Бу иштиҥ једими, кӧп сабада олордыҥ ченемелинеҥ, албаданганынаҥ ла Кудайга чындык болгонынаҥ камаанду.

12. Иегова бисти, Тавифаны чылап, канайып тузаланар аргалу?

¹² Эмди Тавифаныҥ темин кӧрӱп ийектер. Иегова оны «кӧп јакшынак керектер» эдерине, анчада ла тул ӱй улуска быйанын јетирерине ол эмезе болужарына кӱӱнзеткен (Ап. ижи 9:36). Тавифа сӱрекей јалакай ла ачык-јарык ӱй кижи болгон, оныҥ учун ол божоп каларда, кӧп улус ого карыгып, кунуккан. Је элчи Петр оны тиргизип ийерде, улус тыҥ сӱӱнген! (Ап. ижи 9:39—41). Тавифаныҥ теминеҥ бис неге ӱренедис? Бис ончобыс — јааныс та јажыс та, эр де ӱй де улус — ака-эјелериске јакшы керектер эдер аргалу (Евр. 13:16).

13. Иегова Руфь деген уйалчаҥ эјени канайып тузаланган, мынаҥ улам ол кандый тӱп-шӱӱлтеге келген?

¹³ Руфь деген кемзинчек эје миссионер болорго кӱӱнзеген. Кичинек тужында ол бир турадаҥ ӧскӧ турага коркышту тӱрген јӱгӱрип, буклеттер ӱлеер болгон. Ол айдат: «Меге анайып јарлаганыс сӱреен јарап туратан». Је ого айылдар сайын јарлаган ӧйдӧ улусла куучындажарга ла Кудайдыҥ Каандыгы керегинде куучындаарга коркышту кӱч болгон. Је кемзинчек те болзо, Руфь 18 јаштуда пионер болуп калган. 1946 јылда ол Каруулчы шибеениҥ Библиялык Галаад сургалында ӱренген, соондо Гавайи ле Япония јерлерде иштенген. Бу јерлерде Иегова ол ажыра сӱӱнчилӱ јарды јарлаарында улу керектер эткен. Мынайып ол 80 кире јыл иштеп, мындый тӱп-шӱӱлтеге келген: «Иегова јаантайын мениҥ болушчым ла ийде-кӱчим болгон. Ол меге кемзинбеске болушкан. Оныҥ учун Иегова ого иженип турган кандый ла кижиге болужар аргалу деп, бир де алаҥзыбай јадым».

14. Колоссыдагыларга 1:29-ла болзо, Иегова бисти тузаланзын деп, биске нени эдер керек?

¹⁴ Иегова канча јылдардыҥ туркунына бойыныҥ ишчилерине башка-башка јепселдер болорго болушкан. Слерге ол кем болорго болужар? Кӧп неме слердиҥ белен болгоныгардаҥ камаанду. (Колоссыдагыларга 1:29 кычырыгар.) Слер болужарга белен болзогор, Иегова слерди оныҥ табын бӱдӱрерге кем болор керек, ол ло болорго болужар. Темдектезе, эрчимдӱ јарчылар, јакшы ӱредӱчилер, килеҥкей токунадаачылар, ченемелдӱ ишчилер ле бӱдӱмјилӱ најылар эдип салар.

15. 1 Тимофейге 4:12, 15-ле болзо, јиит акаларга Иегованаҥ нени јайнап сураар керек?

¹⁵ Эр кемине јеткен јиит акалар, слер нени сананадыгар? Эм тургуза кӧп молјулар алып, болушчы ишчилер болотон ийде-кӱчтӱ, омок эр улус сӱреен керектӱ болот. Кезик јуундарда, аксагалдардыҥ тоозы болушчы ишчилердеҥ кӧп. Оныҥ учун слер, јиит акалар, јуунга кӧп болужатан кӱӱн ӧскӱрип болорыгар ба? Кезик акалар мынайып айдат: «Меге тегин ле јарчы болорго јарап јат». Сен база анайып ла сананып турган болзоҥ, Иегованаҥ болушчы ишчиниҥ некелтелерине келижетен кӱӱндӱ болорго ло ого акту јӱрегиҥнеҥ иштеерге ийде-кӱч берзин деп, јайнап сура (Јарл. 12:1). Биске сениҥ болужыҥ керек! (1 Тимофейге 4:12, 15 кычырыгар.)

16. Биске Иегованаҥ нени сураар керек, нениҥ учун?

¹⁶ Иегова слерди оныҥ табын бӱдӱрерге кем болор керек, ол ло болорго кӱӱнзедер аргалу. Оныҥ учун Иегова Кудайдаҥ оныҥ табын бӱдӱретен кӱӱн ле ийде-кӱч сурагар. Слер јиит болзогор эмезе јажаар јаанай берген болзо, Иегованы мактаарга ӧйигерди, ийде-кӱчигерди ле акча-манадыгарды кысканбагар (Јарл. 9:10). Бойыгардыҥ коркынчагардаҥ ла алаҥзып турганаардаҥ улам, агару иште Иегованыҥ ачып турган сӱрекей јакшы аргаларын бир де ычкынбагар. Ундыбагар, Иегованыҥ ижине бир кичинек те эдип турган ижис бистиҥ ончобыска јаан кӱндӱ, нениҥ учун дезе анайып бис сӱӱштӱ Адабысты мактап јадыс, а ол макты аларга јарамык!