СИНОПТИК болуп турган кижи метеорадардыҥ болужыла кӱнниҥ аайын лаптап кӧрӱп јат. Мынайып ол кӧп улус јадып турган јерге коркышту тӱрген јоткон јууктап келеткенин кӧрӱп ийет. Улустыҥ јӱрӱми јеткердиҥ алдында болгонынаҥ улам, ол, орой болголокто, бу јоткон керегинде ӱзе улуска айдып саларга албаданып јат.

Иегова анайып ла Јерде јаткан улуска јууктап келеткен «јоткон» керегинде озодоҥ айдып јат. Бу јоткон синоптиктердиҥ јетирӱзинде айдылып турган јоткондордоҥ, канча киреге јеткерлӱ «јоткон» болот. Иегова јаргызы керегинде озодоҥ канайып айдып јат? Ол керектӱ алтамдар эдетен ӧйди јеткилинче берип јат деп, нениҥ учун алаҥзыбай јадыс? Бу сурактардыҥ карууларын билерге, Иегова озогы ӧйдӧ бойыныҥ јаргыларын канайып озодоҥ айтканын кӧрӱп ийектер.

Библиялык ӧйлӧрдӧ Иегова «јоткондор» керегинде, ӧскӧртӧ айтса Кудайдыҥ јакаруларын биле тура угарга кӱӱнзебей турган улуска чыгарган јаргызын бӱдӱрери керегинде, озодоҥ айдып туратан (Укаа 10:25; Иер. 30:23). Ол бойыныҥ јаргызын јаргыладып јаткан улуска озодоҥ айдып, оныҥ табы аайынча јӱрерге нени солыыр керек деп, јартап беретен (2 Каан. 17:12—15; Неем. 9:29, 30). Улус оныҥ јакаруларын уксын деп, Кудай бойыныҥ јердеги чындык ишчилерине оныҥ јаргыларын јарлазын ла ӧйди чӧйбӧстӧҥ керектӱ алтамдар эдерин јартап берзин деп јакарган (Ам. 3:7).

Кудайдыҥ андый ишчилериниҥ бирӱзи Ной болгон. Ол кӧп јылдардыҥ туркунына айландыра јаткан балыр, калју улуска Бастыра телекейлик чайык болор деп, јалтанбай озодоҥ айткан (Баш. 6:9—13, 17). Анайда ок аргаданарга нени эдер керек деп јартап туратан. Ной бу керегинде сӱрекей кӧп айтканынаҥ улам, «чынныҥ јарлыктаачызы» деп адалган (2 Петр 2:5).

Улус Нойдыҥ албаданганын ајаруга албай, Кудайдыҥ айдарга турганын укпаган. Мынайып олордыҥ Кудайга бир де бӱтпей турганы кӧрӱнген. Учы-учында «чайык чыгып, ончозын» јоголтып салган (Матф. 24:39; Евр. 11:7). Олордыҥ кемизи де, Кудайдыҥ јаргызын укпаган деп актанып болбогон.

Ӧскӧ учуралдарда Иегова бойыныҥ јаргызын бӱдӱрерине јетире бир ле эмеш ӧй артып калза айдар болгон. Је ол бу да ӧйдӧ улуста оныҥ јаргызын угатан ӧй јеткилинче бе деп бӱдӱмјиленип туратан. Темдектезе, Иегова јебрен Египетке он кыйын-шыра эткен тушта бӱдӱмјиленген. Јетинчи кыйын-шыранаҥ озо, Иегова Моисейди ле Ааронды фараонго ло оныҥ јалчыларына эртезинде болотон коркышту тыҥ мӧндӱр керегинде айтсын деп ийген. Олорго коруланып аларга ӧй јеткен бе? Агару Бичикте мынайып айдылган: «Фараонныҥ кезик јалчылары Иегованыҥ сӧзинеҥ коркыган бойынча, бойыныҥ јалчыларын ла мал-ажын айылдарына сугуп алган, је Иегованыҥ сӧзин угарга кӱӱнзебеген улус бойыныҥ јалчыларын ла малын јалаҥда артыргызып койгон» (Чыг. 9:18—21). Айдарда, Иегова улуска бу јетинчи кыйын-шыраныҥ коркышту јеткеринеҥ коруланатан ӧйди јеткилинче берген. Јаргыны угуп, капшай керектӱ алтамдар эткен улус аргаданып алган.

Онынчы кыйын-шыра эдерге турганын Иегова фараонго ло оныҥ јалчыларына база озодоҥ айдып салган. Је олор тенексип, Кудайдыҥ сӧзин укпаган (Чыг. 4:22, 23). Уккан болзо, олордыҥ бастыра баштапкы балдары божобос эди (Чыг. 11:4—10; 12:29). Олордо керектӱ алтамдар эдетен ӧй болгон бо? Болгон эмей! Нениҥ учун дезе Моисей  Иегованыҥ онынчы кыйын-шыра эдерге турганын израильтяндарга капшай ла айдып береле, јууктарын аргадап аларга нени эдерин јартап берген (Чыг. 12:21—28). Оныҥ сӧзин кӧп улус уккан ба? Кезик јетирӱлерле болзо, ӱч миллион кижи Кудайдыҥ јаргызын ӧдӱп, Египеттеҥ чыккан. Израильтяндарла кожо «башка-башка албатылардыҥ кӧп улузы», ол тоодо Египеттиҥ де улузы, чыгып јӱрген (Чыг. 12:38).

Бу темдерди кӧрзӧ, Иегова улуска керектӱ алтамдар эдетен ӧйди јаантайын јеткилинче берип јат (Јаҥ. т. 32:4). Нениҥ учун? Элчи Петр мынайда јартаган: Иегова «кем де ӧлӱп калбазын, карын, ончо улус кинчегин алынып, Кудайга баштанзын деп кӱӱнзейт» (2 Петр 3:9). Айдарда, Иегова улусты сӱӱп јат. Кудай бойыныҥ јаргызын бӱдӱрип баштагалакта, улус кинчегин алынып, оныҥ сӧзин уксын деп кӱӱнзеген (Ис. 48:17, 18; Рим. 2:4).

Бӱгӱнги кӱнде улуска бастыра јердиҥ ӱстинде угулып турган јаан учурлу јарды база угар керек. Иисус бу телекейди улу тӱбектиҥ ӧйинде јоголып калар деп, озодоҥ айдып салган (Матф. 24:21). Темдектезе, ол ӱренчиктерине улу тӱбектиҥ алдында не болорын ла јаргыныҥ алдында олор кандый кӱчтерге табартарын чокумдап айдып берген. Эмди бис Иисустыҥ ончо судурларыныҥ бӱдӱп турганын бойыстыҥ кӧзисле кӧрӱп јадыс (Матф. 24:3—12; Лука 21:10—13).

Оныҥ учун Иегова кажы ла кижини ого багынарына кычырат. Ол сӧсуккур улусты бӱгӱнги де кӱнде, келер де ӧйдӧ, бойыныҥ чындык башкарузын тургускан ӧйдӧ, јакшы јӱрзин деп кӱӱнзейт (2 Петр 3:13). Иегова улусты бу сӧстӧргӧ бӱтсин деп, аргаданыш берип турган јар айдат. Бу «Каандык керегинде Сӱӱнчилӱ Јар», Иисустыҥ судурлаганыла, «ончо калыктарга кере болзын деп... јер-ӱстине јарлалар» (Матф. 24:14). Иегова бу јарды јетиретен ишти бойыныҥ ишчилерине берген. Анайып олор 240 кире ороондордо ло јерлерде јарлайт. Нениҥ учун дезе Иегова канча ла кире кӧп улус бу јарды угуп, јууктап келеткен «јотконноҥ» ол эмезе оныҥ чындык јаргызынаҥ, аргаданып алзын деп кӱӱнзеп јат (Соф. 1:14, 15; 2:2, 3).

Бу јӧрмӧлдӧ айдылганыла тӱӱкини кӧрзӧ, Иегова улуска керектӱ алтамдар эдетен ӧйди јаантайын јеткилинче берип јат. Оныҥ учун эмдиги ӧйдӧ јаан учурлу мындый сурак чыгат: улус керектӱ алтамдар эдерге берилген ӧйди тузаланар ба? Айдарда, бисти јарлазын деп Кудай кӧстӧгӧн болордо, бис унчукпай јӱрбезис. Карын канча ла кире кӧп улус бу телекейле кожо јоголтылып калбазын деп, бойыстыҥ јаныстаҥ бастыра ийде-кӱчисти саларыс