1, 2. а) Удабас албатылар кандый јар айдар? б) Кандый сурактардыҥ карууларын билип алар керек?

САНАНЫП ийзеер де, албатылар: «Амыр, кайдаҥ да јеткер јок» — деп, јар айдып турган болзын. Олор телекейдеги айалга качан да мындый амыр болбогоныла мактанып турган болор. Политикалык башчылар бисти телекейлик уур-кӱчтердиҥ аайына чыгып ийер аргалу деп бӱдӱмјилеерге албаданат. Је чынынча болзо, «амыр, кайдаҥ да јеткер јок» деп айдышканыныҥ кийнинеҥ, кенетийин болотон улу тӱбектиҥ аайы-бажына олор бир де чыгып болбос! Нениҥ учун дезе Агару Бичикте айдылган судурла болзо, «олорго сакыбаган јанынаҥ јайраду табарар». Анайып, «олор мынаҥ бир де кыйыжып болбос» (1 Фес. 5:3).

² Мыныла колбой биске јаан учурлу тоолу сурактардыҥ карууларын билип алар керек: «улу тӱбектиҥ» (ЈТ) ӧйинде не болор? Иегова бистеҥ нени сакыыр? «Улу тӱбектиҥ» ӧйинде Кудайга чындык артарга, бӱгӱнги ле кӱннеҥ ала нени эдер керек? (Матф. 24:21).

3. Ачылта 17:5, 15—18-ле болзо, Кудай «Улу Вавилонды» канайып јоголтор?

³ Ачылта 17:5, 15—18 кычырыгар. «Улу Вавилон» јоголтылып калар! Ӧрӧги айдылганыла, албатылар ол ӧйдӧ болотон айалганыҥ бажына чыгып болбос. Нениҥ учун дезе «олордыҥ јӱрегине Кудай Бойыныҥ табын бӱдӱрер кӱӱн [«санаа», ЈТ] сал[ар]». Бу кандый санаа? Тӧгӱн кудай јаҥныҥ телекейлик империязын, ол тоодо христиан кудай  јаҥдарды јоголтып салатан санаа *. Кудай мындый санааны «кызыл аҥныҥ» «он мӱӱзиниҥ» јӱректерине берер. Он мӱӱс ончо политикалык башкараачыларды темдектеп јат. Олор «аҥга» — Организация Объединенных Нацийге јӧмӧжӧт (Ачыл. 17:3, 11—13; 18:8). Он мӱӱстӱ аҥныҥ тӧгӱн кудай јаҥга табару эткенинеҥ ала улу тӱбек башталар. Бу коркышту кӱч айалга кажы ла кижини табарар.

4. а) Албатылар тӧгӱн кудай јаҥга недеҥ улам табару эдердеҥ айабас? б) Кудай јаҥдардыҥ турчылары нени эдер болор?

⁴ Албатылар недеҥ улам Улу Вавилонго табару эдерин бис билбезис. Је олор мыны, телекейлик кудай јаҥдар албатыларга амыр-энчӱ јадарга чаптык эдип турганынаҥ ла јаантайын политикага кирижип турганынаҥ улам эдердеҥ айабас. Эмезе олор, кудай-јаҥдарды ал-камык акча-јӧӧжӧ јууп алган деп сананып, олорго табару эдер (Ачыл. 18:3, 7). Бу табару кудай јаҥдардыҥ улузын јоголторын темдектебей јат. Мында албатылар кудай јаҥдардыҥ организацияларын јоголторы керегинде айдылат. Бу организациялар јоголып калза, олордыҥ турчылары (члены) кудай јаҥдардыҥ башчыларына тӧгӱндедип салганын оҥдоп ийер. Оноҥ улам олор бу кудай јаҥдарга качан да кирбеген деп тӧгӱнденер болор.

5. Иегова улу тӱбектиҥ ӧйинде нени эдер, нениҥ учун?

⁵ Агару Бичикте Улу Вавилон канча кире ӧйдиҥ туркунына јоголтылары айдылбай јат, је бу ӧй ӧткӱре узак болбос деп, јарт билерис (Ачыл. 18:10, 21). Нениҥ учун дезе Иегова бойыныҥ талдап алган улузына болуп ол кӱндерди кыскартар деп, сӧзин берген (Марк 13:19, 20). Је бу ӧйдӧ, улу тӱбектиҥ башталганынаҥ ала Армагеддон јуу-согушка јетире, Иегова бистеҥ нени сакыыр?

6. Нениҥ учун тӧгӱн кудай јаҥнаҥ јӱк ле чыгып каларыла болорзынбас керек?

⁶ Ӧткӧн јӧрмӧлдӧ айдылганыла, Иегова бойыныҥ ишчилерин Улу Вавилонло  кандый да колбу тутпазын деп кӱӱнзейт. Је биске јӱк ле тӧгӱн кудай јаҥнаҥ чыгып калар керек эмес, је чындык кудай јаҥнаҥ, Иегованаҥ, бек тудунып алар керек. Мыны кандый эки арганыҥ болужыла эдерин шӱӱжип ийектер.

7. а) Ак-чек болоры јанынаҥ Иегованыҥ бийик нормаларынаҥ бек тудунары нени темдектейт? б) Анчада ла бистиҥ ӧйдӧ туштажуларга јуулыжары јаан учурлу деп, Еврейлерге 10:24, 25 нени айдат?

⁷ Баштапкызында, ак-чек болоры јанынаҥ Иегованыҥ бийик нормаларынаҥ бек тудунар керек. Бистерге бу телекейдиҥ баалап турган немелерин ле кӧрӱмин качан да алынбас керек. Темдектезе, балыр јӱрӱмниҥ кандый ла бӱдӱмин, ол тоодо эр улус эр улусла, ӱй улус ӱй улусла биле тӧзӧгӧнин эмезе гомосексуализмди бир де јаратпай јадыс (Матф. 19:4, 5; Рим. 1:26, 27). Экинчизинде, христиан туштажулар кайда да ӧдӧтӧн болзо, ака-эјелерле кожо Иеговага оноҥ ло ары бажырар керек. Темдектезе, туштажуларды Каандыктыҥ Туразында ӧткӱрер арга јок болзо, јуундарды айылдар сайын, керек дезе јажытту јерлерде де ӧткӱрип јадыс. Айалга кандый да болуп турза, бис Иегова Кудайыска кожо бажырарына тӱҥей ле јуулыжарыс. Је «Кайраканныҥ кӱни јууктап келеткенин кӧрӱп», бу туштажуларды оноҥ тыҥ баалайдыс. (Еврейлерге 10:24, 25 кычырыгар.)

8. Келер ӧйдӧ бис кандый јар айдарыс?

⁸ Улу тӱбектиҥ ӧйинде чек ӧскӧ јар јарлалар. Бӱгӱнги кӱнде бис Каандык керегинде јар јарлап, ӱренчиктер бедирейдис. Је ол ӧйдӧ, бис коркышту јаан мӧндӱрдий јар айдарыс (Ачыл. 16:21). Бис дезе, Сатананыҥ телекейи кыйалта јогынаҥ јоголып калар деп айдардаҥ айабазыс. Је кандый јар айдылатаны ла оны канайып айдатаны бойыныҥ ӧйинде јартала берер. Јарлаар ишке јӱс јылдаҥ ажыра тузаланып келген эп-аргаларла јарлаарыс па? Ол эмезе ӧскӧ эп-аргалар тузаланарыс па? База эмеш сакып ийектер, оноҥ јартала берер. Јарды канайып та айдатан болзоос, бис Иегованыҥ јаргызын бир де јалтанбай јарлаарыс! (Иез. 2:3—5).

9. Албатылар бистиҥ јарды канайып угар болор, је бис неде алаҥзыбай јадыс?

⁹ Бистиҥ айткан јардаҥ улам албатылар чугулданар болор, ол тушта олор бистиҥ оозысты јабып саларга албаданар. Је бӱгӱнги кӱнде бис канайып Иегованыҥ болужы јогынаҥ агару ижисти бӱдӱрип болбой јадыс, анайып ла келер ӧйдӧ оныҥ болужы јогынаҥ нени де эдип болбозыс. Оныҥ учун Кудай биске оныҥ табын бӱдӱрерге болужар деп, алаҥзыбай јадыс (Мих. 3:8).

10. Лука 21:25—28-ле болзо, улу тӱбектиҥ ӧйинде болотон айалганы кӧрӱп, кӧп саба улус канайдар?

¹⁰ Лука 21:25—28 кычырыгар. Улу тӱбектиҥ ӧйинде улус, качан да бузулбайтан ла јоголбойтон не-немениҥ аҥтарылып баштаганын кӧрӱп, сандырап-чаксырап баштаар. Олор бойыныҥ јӱрӱмин коруп аларга, тыҥ кыйналар, нениҥ учун дезе ол ӧйдӧ коркышту кызалаҥду ӧй башталар. Андый ӧй кижиликтиҥ тӱӱкизинде качан да болбогон (Соф. 1:14, 15). Бу ӧйдӧ Иегованыҥ ишчилерине де кӱч болордоҥ айабас. Бис бу телекейдеҥ эмес болгоныстаҥ улам, башка-башка кӱчтерге табартар болорыс. Керек дезе эҥ керектӱ немеге де јединбей барар болорыс.

11. а) Нениҥ учун албатылардыҥ бастыра ајарузы Иегованыҥ Керечилерине боло берер? б) Биске улу тӱбектеҥ нениҥ учун коркыбас керек?

¹¹ Улус Иегованыҥ Керечилериниҥ бойыныҥ Кудайына оноҥ ло ары бажырып турганын кӧрӱп, атыйланып баштаар, не дезе,  олордыҥ кудай јаҥы јоголтылып калган болор. Мынаҥ улам улус канайып тӱймеже берерин сананып ийзеер де. Андый тӱймеен социальный сетьтерде де кӧдӱрилердеҥ айабас. Албатылар ла олордыҥ башчызы Сатана, бистерди оноҥ ары Иеговага бажырып турганыс учун чек кӧрӧр кӱӱндери јок боло берер. Ол тушта олор бастыра кудай јаҥдарды јоголтотон амадузыныҥ бӱтпегенин оҥдоп ийер. Оныҥ учун олордыҥ бастыра ајарузы јаҥыс ла бистерге болор. Бу ӧйдӧҥ ала албатылар Магог јериниҥ Гогы болуп калар *. Олор Иегованыҥ албатызына коркышту калапту табару эдерге биригер (Иез. 38:2, 14—16). Мыны сананып, санааркай берердеҥ айабазыс, нениҥ учун дезе ол ӧйдӧ не болорын јетире билбей јадыс. Је бир немени бис јарт билерис: улу тӱбектеҥ коркыбас керек. Ол ӧйдӧ Иегова биске аргаданатан башкартулар берер (Сар. 34:19). Је бис јайымыстыҥ јууктап келеткенин кӧрӱп, сыныбысты тӱзедип, бажысты кӧдӱрип, тӱс турарыс *.

12. «Бӱдӱмјилӱ ле керсӱ кул» бисти улу тӱбекке канайып белетейт?

¹² Бӱгӱнги кӱнде «бӱдӱмјилӱ ле керсӱ кул» кӧп аргалардыҥ болужыла бисти улу тӱбектиҥ ӧйинде Кудайга чындык артсын деп белетеп јат (Матф. 24:45). Темдектезе, 2016—2018 јылдарда, бойыныҥ ӧйинде кӧргӱзилген региональный курултайлардыҥ программаларын кӧрӱп ийектер. Бу курултайлардыҥ куучын-эрмектери ле кӧрӱлмелери бисти Иегованыҥ келетен кӱниниҥ алдына керектӱ болотон кылык-јаҥдарга јакшы ӱренип аларга кӱӱнзеткен. Бу кылык-јаҥдарды кыскарта шӱӱжип ийектер.

13. Иеговага чындык артарына јакшы ӱренип аларга нени эдер керек?

¹³ Чындык болоры. 2016 јылдыҥ курултайы «Будьте преданы Иегове!» деп адалган. Бу курултайдаҥ, Иеговага чындык артарга, оныла јуук ла бек колбулар тудар керек деп билип алганыс. Анайда ок Иеговага јууктаарга, акту јӱректеҥ мӱргӱӱрин ле оныҥ Сӧзин лаптап ӱренерин эске алынганыс. Бу ончо неме биске коркышту уур-кӱчтерди ӧдӧтӧн ийде-кӱч берет. Сатананыҥ телекейиниҥ учы јууктап келет, оныҥ учун биске Кудайга ла оныҥ Каандыгына чындык артарга там ла там кӱч болуп барар. Улус бистерге оноҥ ло ары каткырыжар болор (2 Петр 3:3, 4). Бис телекейдиҥ политикалык сурактарына јӧмӧшпӧй турзаас, айалга там ла катуланып барардаҥ айабас. Айдарда, улу тӱбектиҥ ӧйинде чындык артарга, биске эмдештеҥ ле ала бу кылык-јаҥга јакшы ӱренип алар керек.

14. а) Кудайдыҥ албатызын башкарып турган акаларла кандый солынталар болор? б) Ол ӧйдӧ биске нениҥ учун чындык болор керек?

¹⁴ Улу тӱбектиҥ ӧйинде, Кудайдыҥ албатызын башкарып турган акаларла сӱрекей јаан солынталар болор. Јерде арткан майлаткандар, кандый да ӧйдӧ Армагеддон јуу-согушка туружарга, теҥериге алылар (Матф. 24:31; Ачыл. 2:26, 27). Айдарда, Башкару јӧп бисле кожо јерде база болбос. Је андый да болзо, кара-бајырт албаты башкару јок артпас. Нениҥ учун дезе ол  ӧйдӧ башкартуны кара-бајырт албатыныҥ тоозына кирип турган ченемелдӱ акалар берер. Бистиҥ чындык болгоныс, Кудайдаҥ башкарту алган акаларга сӧсуккур болгоныстаҥ кӧрӱнер. Мынаҥ бистиҥ јӱрӱмис камаанду болор.

15. Турумкай болорына јакшы ӱренип аларга нени эдер керек? Бу кылык-јаҥга нениҥ учун эмдештеҥ ала ӱренер керек?

¹⁵ Турумкай болоры. 2017 јылдыҥ курултайы «Не сдавайтесь!» деп адалган. Бу курултайдаҥ ченелтелерде бек турарына ӱренип алганыс. Анайда ок јӱк ле јакшы амыр айалгаларда турумкай болор керек эмес деп билип алганыс. Турумкай болорына јакшы ӱренип аларга, биске Иеговага иженер керек (Рим. 12:12). Оныҥ учун Иисустыҥ: «Учына јетире чыдашканы дезе, аргадалар» — деп, берген сӧзин ундыбай јӱректер (Матф. 24:13). Бу сӧстӧрдӧҥ, кандый да уур-кӱчтер болуп турза, биске Кудайга чындык артар керек деп кӧрӱнет. Эмдештеҥ ле ала кажы ла ченелтелерде турумкай артып турзаас, бойысты улу тӱбектиҥ ӧйине белетеп јадыс.

16. Јалтанбас болоры недеҥ камаанду? Бу кылык-јаҥга эмдештеҥ ала јакшы ӱренип аларга нени эдер керек?

¹⁶ Јалтанбас болоры. 2018 јылдыҥ курултайы «Будьте мужественны!» деп адалган. Бу курултай јалтанбас болоры бистиҥ јайалталарыстаҥ камаанду эмес деп эске алындырган. Чыннаҥ ла јалтанбас болоры турумкай болоры чылап, Иеговага иженгенистеҥ камаанду. Иеговага оноҥ тыҥ иженип турарга биске не болужар? Кажы ла кӱн Кудайдыҥ Сӧзин кычырганы ла Иегова бойыныҥ албатызын алдындагы ӧйдӧ канайып аргадаганын шӱӱп сананганы болужар (Сар. 68:20; 2 Петр 2:9). Улу тӱбектиҥ ӧйинде албатылар бистерге табару этсе, Иеговага иженери ле јалтанбас болоры сӱреен керектӱ болор (Сар. 112:7, 8; Евр. 13:6). Бис эмдештеҥ ле ала Иеговага иженип турган болзоос, Гогтыҥ табарузын јалтанбай ӧдӱп чыгарыс *.

17. Бис нениҥ учун Армагеддонноҥ коркыбай јадыс? (Кадарындагы јурукты кӧрӱгер.)

¹⁷ Ӧткӧн јӧрмӧлдӧ айдылганыла, Иегованыҥ ишчилериниҥ кӧбизи калганчы кӱндердиҥ ӧйинде јадат. Је бисте улу тӱбекти  ӧдӱп, ӱргӱлјиге јӱретен арга бар. Бу телекей Армагеддон деген јуу-согушла коркышту эдип тӱгенер. Је биске недеҥ де коркыбас керек, нениҥ учун дезе бу Иегованыҥ јуу-согужы болор (Укаа 1:33; Иез. 38:18—20; Зах. 14:3). Иегова айдып ла ийзе, Иисус теҥеридеги черӱлерди јуу-согушка апарар. Бу јуу-согушка тирилген майлаткандар ла мириадтар тоолу ангелдер Иисусла кожо барар. Олор ончозы кожо Сатана ла оныҥ кӧрмӧстӧриле, анайда ок олордыҥ јердеги черӱлериле јуулажар (Дан. 12:1; Ачыл. 6:2; 17:14).

18. а) Иегова биске кандый сӧзин берет? б) Ачылта 7:9, 13—17 келер ӧйгӧ ижемјилӱ кӧрӧргӧ канайып болужат?

¹⁸ Иегова биске: «Сеге удура эдилген кандый да мылтык-јепсел, бир де једимдӱ болбос» — деп, сӧзин берет (Иса. 54:17). «Кара-бајырт улус» «улу тӱбекти» ӧдӱп чыгар. Иегованыҥ чындык ишчилери агару ижин оноҥ ло ары бӱдӱрер. (Ачылта 7:9, 13—17 кычырыгар.) Агару Бичик келер ӧйгӧ ижемјилӱ кӧрӧргӧ болужып јат! Иегова «чындык улусты корулап јат» деп, билип јадыс (Сар. 31:23). Оныҥ учун Иегованы сӱӱп ле мактап тургандар, Кудай бойыныҥ адын јабардаҥ арутап јатканын кӧрӱп, сӱӱнип чыгар (Иез. 38:23).

19. Удабас кандый ижемјибис бӱдер?

¹⁹ 2 Тимофейге 3:2—5-теги сӧстӧр, Сатананыҥ каршузынаҥ јайымдалган јаҥы телекейде јадатан улус керегинде айдып турган болзо, канайып кычырылар эди деп, сананып ийзегер. (« Улус кандый болуп калар?» деген рамканы кӧрӱгер.) Башкару јӧптӧ иштеген Джордж Гангас * ака бу сӧстӧр керегинде мынайып айткан: «Бастыра улус бой-бойына ака-эјелер болуп калза, јӱрӱм кандый јакшы болор! Удабас слер јаҥы телекейде јадараар. Слер Иегова ла кире узак јӱрӱм јӱреригер. Бис ӱргӱлјиге јӱрерис». Бу кандый јакшы ижемји, дезеер?!