1. Биске нениҥ учун јӱк ле Иеговага чындык болор керек?

БИС јӱк ле Иеговага чындык болор учурлу, нениҥ учун дезе ол бистиҥ Јайаачы ла Јӱрӱм Береечи (Ачыл. 4:11). Кудайга чындык болорго кӱч ле неме јок ошкош, је мында бойыныҥ буудактары бар. Бис Иегованы сӱӱп, тооп турган да болзоос, је бистиҥ сӱӱжисти ӧчӱрип салатан ла јӱк ого чындык артарга чаптыгын јетиретен кӧп немелер бар. Мындый неме канайып болуп турганын биске јакшы оҥдоп турар керек. Је озо баштап, јӱк ле Иеговага чындык болоры дегени нени темдектеп турганын шӱӱжип ийектер.

2. Бис јӱк ле Иеговага чындык болзоос, Чыгыш 34:14-лӧ болзо нени этпезис?

² Агару Бичикле болзо, Кудайга чындык болоры дегени оны тыҥ сӱӱрин кӧргӱзет. Анайда ок јӱк ле Иеговага чындык болоры дегени јаҥыс ла ого бажырарын темдектейт. Бис Кудайдаҥ артык кемди де, нени де сӱӱбес учурлу. (Чыгыш 34:14 кычырыгар *.)

3. Бистерди Иеговага бодоп ло бажырып турган деп, нениҥ учун айдып болбозыҥ?

³ Бис Иеговага бодоп ло бажырып турган эмезис. Нениҥ учун дезе Кудайга чындык болгоныс чике билгирлерге тӧзӧлӧнӧт. Анайда ок биске Кудайдыҥ сӱрекей јакшы кылык-јаҥы јарап јат. Кудайга не јарап, не јарабай турганын билип алганыс ла оныҥ бу кӧрӱмин јарадып јадыс. Бого коштой Иегованыҥ бисти ого ӱргӱлјиге сӱӱнчилӱ иштезин деп кӱӱнзеп  турганын оҥдоп јадыс. Оныҥ учун бис оныҥ нормалары аайынча јӱредис. Анайда ок Иегованыҥ биске оныҥ најылары болотон арга бергенин тыҥ баалап јадыс (Сар. 25:14). Анайып, Јайаачыбыс керегинде кажы ла катап јаҥы билгирлер алып турзаас, ого ончо ло кире јуук болуп каладыс (Иак. 4:8).

4. а) Иеговага чындык болгонысты Дьявол канайып уйададарга умзанат? б) Бу јӧрмӧлдӧ не кӧрӱлер?

⁴ Бу телекей Сатананыҥ колында. Оныҥ учун ол бойыныҥ телекейи ажыра улустыҥ эди-каныныҥ кӱӱнин ле кычазын тузаланат (Еф. 2:1—3; 1 Иоанн 5:19). Сатана бисти јӱк ле Иегованы эмес, је база да ӧскӧ немени сӱӱзин деп албаданып јат. Анайып бис јӱк ле Иеговага чындык артпай калардаҥ айабазыс. Сатана јӱрӱмистиҥ кандый эки јанында бойыныҥ амадузына јединердеҥ айабас деп, кӧрӱп ийектер. Баштапкызында, ол бисти бай болорына кӱӱнзедет, экинчизинде, бисти каршулу соот-јыргалдар талдаарына кӱӱнзедет.

5. Биске акча-јӧӧжӧни нениҥ учун сӱӱбес керек?

⁵ Кажы ла кижи амтанду курсак јиирге, јакшы кийим кийерге ле јараш турада јадарга кӱӱнзеп јат эмей. Је биске акча-јӧӧжӧни сӱӱй бербеске ајарыҥкай болор керек. Бӱгӱн Сатананыҥ телекейинде кӧп улус «акчага ӱстӱге[т]» ле акчага садып алатан не-немени сӱӱп јат (2 Тим. 3:2). Иисус оныҥ да ишчилери акча-јӧӧжӧни сӱӱп баштаардаҥ айабас деп билер болгон. Оныҥ учун мынайып айткан: «Кем де эки бийге јаҥыс уунда јалчы болуп албас: эмезе бирӱзин јаман кӧрӧр, экинчизине дезе карузыыр; эмезе бирӱзине кичеенер, экинчизин дезе керектебес. Кудайга ла акча-јӧӧжӧгӧ теҥ јалчы болуп албазыгар» (Матф. 6:24). Иеговага бажырып турган, је ӧйинеҥ ӧткӱре кӧп ӧйин ле ийде-кӱчин байыырга берип турган кижини эки  бийге бажырып јат деп айдарга јараар. Андый кижини јӱк ле Иеговага чындык артат деп айдып болбозыс.

6. Иисустыҥ Лаодикиядагы јуунга айткан сӧстӧри бисти неге ӱредет?

⁶ Бистиҥ эраныҥ баштапкы чагыныҥ учында Лаодикия каладагы јуунныҥ улузы мынайып мактанган: «„Мен бай, байыгам, немедеҥ тутабай јадым“». Је Кудайдыҥ ла Иисустыҥ кӧзинде олор чучурап калган, тӱреҥи, сокор ло јылаҥаш болгон. Иисус олорго бай болгоны учун эмес, је акча-јӧӧжӧни сӱӱп, Иеговала колбуларын бузып турганы учун јӧп берген (Ачыл. 3:14—17). Байыырга кӱӱнзеп турган болзоос, биске тургуза ла бойыстыҥ кӧрӱм-санаабысты солыыр керек (1 Тим. 6:7, 8). Оноҥ башка бистиҥ јӱрегис экилене берзе, Иегова бистиҥ бажыруны јаратпас. Нениҥ учун дезе ол «јӱк ле ого чындык болорын» некеп јат (Јаҥ. т. 4:24). Акча недеҥ улам бистиҥ јӱрӱмисте баштапкы јерге тура берердеҥ айабас?

7—9. Дэвид аксагалдыҥ теми бисти неге ӱредет?

⁷ Бириктирилген Штаттарда јадып турган, иштеҥкей Дэвид аксагалдыҥ темин кӧрӱп ийектер. Ол иштеген фирмазында сӱрекей јакшы ишчи болгон. Иште оныҥ јамызы бийиктедилген, керек дезе ороонында ол эҥ јакшы специалисттердиҥ тоозына кирген. Дэвид айдат: «Ол ӧйдӧ, бу ончо немени Иегова сыйлап туру деп бодогом». Је бу сыйлар чыннаҥ ла Иегованаҥ болгон бо?

⁸ Дэвид Иеговала колбуларына ижи каршузын јетирип турган деп кӧрӱп баштаган. Ол мынайып куучындайт: «Јуунныҥ туштажуларында да, керек дезе јарлаар иште де ижим керегинде сананып турганымга ајарып ийгем. Мениҥ иш-јалым кӧп болгон до болзо, је иштеҥ улам стресстиҥ кӧптӧгӧни сайын, билемде кӱчтер башталган».

 ⁹ Бу ӧйдӧ Дэвид баштапкы јерге нени тургузарын талдап алар керек деп оҥдоп ийген. Дэвид куучындайт: «Меге та нени де солыыр керек деп, бек шӱӱп алгам». Ол ижиниҥ графигин канайып солыырын шӱӱп сананала, иштиҥ јааныла куучындашкан. Бу неге экелди? Дэвид иш јок артып калган! Је ол нени этти? «Мен эртезинде ле јаантайынга подсобный пионер болотон заявление бичип ийгем» — деп, Дэвид айдат. Соондо ол пионердиҥ ижин баштаган, канча да ӧйдиҥ бажынаҥ оныҥ ӱйи база пионер болуп калган. Ол ӱйиле кожо јаан туралар арутап иштеген. Олор акчазы ас ишке иштеген де болзо, бир де санааркабаган. Иш-јалы алдындагызына кӧрӧ, он катапка астай да берерде, ай сайынгы чыгымдарына тӱҥей ле једип туратан. Олор баштапкы јерге Иегованы тургузарга кӱӱнзеген. Анайып, Дэвид ӱйиле кожо, Каандыкты баштапкы јерге тургускан улусты Кудай кичееп јат деп, бӱдӱмјиленип алган (Матф. 6:31—33).

10. Јӱрегисти чеберлеерге нени эдер керек?

¹⁰ Бис бай да болзоос, јокту да болзоос, кажыбыска ла јӱрегисти чеберлеер керек. Мыны канайып эдер? Акча-јӧӧжӧни сӱӱй бербеске, ајарыҥкай болугар. Ижигер Иеговага иштееринеҥ артык болбос учурлу деп ундыбагар. Мен ишке тартылбайдым ба деп билип аларга, бойыгарга мындый сурактар беригер: «Јуунныҥ туштажуларында ла јарлаар иште мен јаантайын ла иш керегинде сананадым ба? Келер ӧйдӧ бойымды канайып јеткилдеерим деп, јаантайын ла санааркайдым ба? Акча-јӧӧжӧнӧҥ улам билемде кӱчтер болот по? Мен иш-јалы ас та болзо, је Иеговага иштеерине чаптык этпейтен ишке кирерге белен бе?» (1 Тим. 6:9—12). Бу сурактарды шӱӱп сананып тура, Иегова бисти сӱӱп турган деп ле ол чындык улузына ончозына: «Сени артырбазым, сени таштабазым» — деп, берген сӧзин ундыбай јӱректер. Оныҥ учун элчи Павел мынайып бичиген: «Акчага ӱстӱкпегер» (Евр. 13:5, 6).

11. Кижиге соот-јыргалдар кандый тузазын эмезе каршузын јетирет?

¹¹ Иегова бисти јӱрӱмге сӱӱнип јӱрзин деп кӱӱнзейт. Темдектезе, ас эмес сӱӱнчини соот-јыргалдардаҥ аладыс. Кудайдыҥ Сӧзинде мынайып айдылат: «Кижиге ажанып турарынаҥ ла эткен ижине сӱӱнип јӱреринеҥ артык неме јок» (Јарл. 2:24). Је бу телекейдиҥ кӧп соот-јыргалдары биске каршузын јетирердеҥ айабас. Бу соот-јыргалдар улусты Кудайдыҥ Сӧзи јаратпай турган керектерди јарадып турарына, керек дезе  сӱӱрине кӱӱнзедет. Мынаҥ улам улустыҥ ак-чеги чек ӱрелип калат.

12. 1 Коринфтегилерге 10:21, 22-ле болзо, биске нениҥ учун соот-јыргалдарды јазап талдаар керек?

¹² Бис јӱк ле Иеговага чындык болорго кӱӱнзеп јадыс, оныҥ учун «Кайраканныҥ [Иегованыҥ] курсагын ла шилемирлердиҥ курсагын» бир уунда јип болбозыс. (1 Коринфтегилерге 10:21, 22 кычырыгар.) Темдектезе, улустыҥ кожо ажанып јатканы, олордыҥ бой-бойы ортодо јуук колбуларын кӧргӱзет. Бис базынышка, спиритизмге, балыр јӱрӱмге, анайда ок эди-каныстыҥ кычазын бӱдӱрерине кӱӱнзедип турган соот-јыргалдар талдап турган болзоос, Кудайдыҥ ӧштӱлериле кожо, олордыҥ белетеген курсагын јип јадыс. Анайып, јӱк ле бойыска каршу јетирип турган эмезис, је Иеговала колбуларысты бузып јадыс.

13, 14. Иаков 1:14, 15-ле болзо, соот-јыргалдар талдаарында нениҥ учун ајарыҥкай болор керек? Тем куучындап беригер.

¹³ Соот-јыргалдар курсак јиирине незиле тӱҥей? Бис ажанып јатсаас, оозыска нени саларын талдап јадыс. Је курсакты ажырып ийзеес, эди-каныста бистиҥ кирижип болбойтон процесстер башталып јат. Бир канча ӧйдӧҥ курсактыҥ элементтери бистиҥ эди-канысла таркап калат. Јакшы курсак су-кадыкка тузалу болот, јаман курсак дезе, каршу јетирет. Јиген курсагыс эди-каныска кандый болгонын озо баштап билбей турган да болзоос, је соондо курсактыҥ тузазы эмезе каршузы тӱҥей ле билдирип келет.

¹⁴ Анайып ла соот-јыргалдар талдап турзаас, бажыска нени саларын талдап јадыс. Је бажыска нени-нени салган ла кийнинде, бистиҥ талдап алган соот-јыргалыс санаабыска ла сезимдериске тузазын эмезе каршузын јетирет. Јакшы соот-јыргалдар биске ийде-кӱч берет, јаман соот-јыргалдар јаантайын каршулу болот. (Иаков 1:14, 15 кычырыгар.) Јаман соот-јыргалдардыҥ каршузы озо баштап кӧрӱнбейтен де болзо, је соондо тӱҥей ле јарт кӧрӱне берер. Оныҥ учун Агару Бичик мынайып айдат: «Аспагар! Кудайды электеер арга јок. Кижи нени ӱрендеер, оны јууп алар. Эт-канына болуп ӱрендеечи, эт-каннаҥ чирип турганды јууп алар» (Гал. 6:7, 8). Оныҥ учун Иегованыҥ кӧрӧр кӱӱни јок немеге кӱӱнзедип турган соот-јыргалды бир де талдабас керек! (Сар. 97:10).

15. Иегова бистиҥ кӱӱнисти кӧдӱрерге, кандый сый эткен?

¹⁵ Иегованыҥ ишчилерине бистиҥ ич-кӧгӱзисти тыҥыдып турган интернет-телеберилтени — JW Broadcasting^®, кӧрӧргӧ јарап јат. Мэрилин деп эје мындый сӧстӧр айткан: «Бистиҥ телеберилте кӱӱнисти кӧдӱрип јат. Ондо ончо кӧрӱлмелерди бастыразын коркыбай ла кӧрӱп јадыҥ, нениҥ учун дезе анда бир де јаман неме кӧргӱзилбей јат. Качан мен јаҥысканзырап эмезе кунугып турзам, кӱӱн кӧдӱретен кандый бир куучын-эрмекти эмезе эртен турагы бажырышты иштедип јадым. Мынаҥ улам Иеговага ла оныҥ организациязына јуук болгоным сезилет. JW Broadcasting чыкканынаҥ ала мен јаҥы јӱрӱм баштагам». Слер Иегованыҥ бу сыйын баалайдыгар ба? Бистиҥ интернет-телеберилтеде кажы ла ай чыгып турган программалардаҥ башка, ӧскӧ дӧ сӱрекей кӧп аудио- ло видеоматериалдар бар, ол тоодо оноҥ кӱӱн кӧдӱрип турган кожоҥдор табып аларга јараар.

16, 17. Соот-јыргалдарга канча кире ӧй барып турганын нениҥ учун лаптап кӧрӱп турар керек, мыны эдерге биске не болужар?

¹⁶ Биске јӱк ле кандый соот-јаргалдар талдап турганысты эмес, је олорго канча кире ӧй берип турганысты лаптап кӧрӱп турар керек. Оноҥ башка бистиҥ кӧп ӧйис Иеговага иштеерине эмес, је соот-јыргалдарга барар. Кӧп улуска соот-јыргалдарга барып  турган ӧйин астадарга кӱч болот. Темдектезе, 18 јашту Абигейл сыйын айдат: «Телевизор меге уур кӱнниҥ кийнинеҥ эмеш амырап аларга болужат. Је кезикте билбей ле калала, экранныҥ алдына канча саатка отурып каладым». Самьюэл деп јиит карындаш дезе мынайып айдат: «Мен кезикте интернетте кыска кӧрӱлмелерди учы-кыйузы јок кӧрӱп јадым. Бир ле кӧрӱлме кӧрӱп ийерим деп сананадым, је билбес аразынаҥ ӱч-тӧрт сааттыҥ туркунына отурып каладым».

¹⁷ Соот-јыргалдарга канча кире ӧй барып турганын кӧрӱп турарга, нени эдер керек? Озо баштап, соот-јыргалдарга чыннаҥ ла канча кире ӧй берип турганаарды билип алыгар. Бир неделениҥ туркунына канча кире ӧй барып турганын темдектеп турарга јараар. Темдектезе, телевизорды канча саат кӧргӧнӧӧрди, интернетте отурганаарды эмезе мобильный эдимдеги ойындарды ойногон ӧйӧӧрди календарьда бичип турыгар. Бу немелерге ӧйинеҥ ӧткӱре кӧп ӧй барып турган болзо, график тургузыгар. Озо баштап, эҥ керектӱзин бичип алыгар, оноҥ дезе соот-јыргалды бичип аларга јараар. Бу графикти буспаска, Иегованаҥ болуш сурагар. Анайып, слерде Агару Бичикти таҥынаҥ ӱренерге, билелик бажырышка, јуунныҥ туштажуларына ла јарлаар ишке туружарга, анайда ок ӱренчиктер белетеерге ӧй дӧ, ийде-кӱч те болор. Бого коштой, слер ӧйди калас ӧткӱргенеер деп, бойыгарды јинбезигер.

18, 19. Бис јӱк ле Иеговага чындык болгонысты канайып кӧргӱзерис?

¹⁸ Элчи Петр Сатананыҥ телекейиниҥ учы керегинде ле келер јаҥы јӱрӱм керегинде мынайып айткан: «Кару улузым, мыны сакып, Оныҥ алдына быјарзыбаган, јек јок ло амыр-энчӱде келерге кичеени[гер]» (2 Петр 3:14). Бу јакаруны бӱдӱрип, ак-чек ле кӧгӱс јанынаҥ ару артарга тыҥ албаданзаас, јӱк ле Иеговага чындык болгонысты кӧргӱзерис.

¹⁹ Сатана ла оныҥ телекейи бисти эҥ керектӱзин ундып салзын деп, оноҥ ло ары албаданар (Лука 4:13). Је бис Иегованаҥ артык кемди де, нени де сӱӱбезис. Бис јӱк ле Иеговага чындык болорыс деп шӱӱп алганыс, нениҥ учун дезе ол биске јӱрӱм берген!