1. Сууга чӧҥӱрилип калган христиандарга оноҥ ло ары нени эдер керек?

СЛЕР сууга чӧҥӱрилип калганаар ба? Эйе болзо, слер Иеговага бӱдӱп турганаар ла оныҥ албатызыла кожо иштеп јадыгар. Је андый да болзо, Кудайга ла ол организациязыла * башкарып турган деп бӱдӱмјибисти оноҥ ло ары тыҥыдар керек.

2, 3. Иегова бойыныҥ организациязыла канайып башкарат? Темдер куучындап беригер.

² Иегованыҥ ончо керектеринеҥ бис Кудайдыҥ бойын, амадузын ла нормаларын билип аладыс. Оныҥ учун Иегова организациязыла канайып башкарып турганынаҥ јакшы кӧрӱнип турган кылык-јаҥдарыныҥ ӱчӱзин кӧрӱп ийектер.

³ Баштапкызында, Иегова — улусты чырай-бӱдӱжиле ылгабай турган Кудай (Ап. ижи 10:34). Кудай сӱӱжинеҥ улам, «ончо улус учун толынты эдип», бойыныҥ Уулын берген (1 Тим. 2:6; Иоанн 3:16). Иегова бойыныҥ ишчилерине сӱӱнчилӱ јарды угарга турган ончо улуска јарлазын деп јакарган. Анайып ол толынтыга бӱткен кажы ла кижиге аргаданатан арга берет. Экинчизинде, Иегова — аайлу-баштуныҥ ла амырдыҥ Кудайы (1 Кор. 14:33, 40). Оныҥ учун оныҥ ишчилериниҥ ортозында ӱзе неме амыр ла аайлу-башту болор керек. Ӱчинчизинде, Иегова — «Улу Ӱредӱчи» (Иса. 30:20, 21). Оныҥ да учун Иегованыҥ организациязы бисти библиялык чындыктарга ӱредип, бу чындыктарга улусты ӱретсин деп, биске база болужып јат. Баштапкы чактыҥ ла бӱгӱнги кӱнде христиан јуундардыҥ ижинеҥ Иегованыҥ бу ӱч кылык-јаҥы канайып кӧрӱнет? Слерге агару тын Иегованыҥ организациязыла кожо иштеерге канайып болужат?

4. Апостолдордыҥ ижи 1:8-ле болзо, Иисус ӱренчиктерине нени јакарган ла олорго кандый болуш берер болгон?

⁴ Баштапкы чак. Иисустыҥ јары ончо улуска ижемји берген (Лука 4:43). Ол ӱренчиктерине оныҥ баштап салган ижин оноҥ ары улалтып, «јердиҥ јаказына да јетире» јарлазын деп јакарган. (Апостолдордыҥ ижи 1:8 кычырыгар.) Олор бу ишти бойыныҥ ийде-кӱчиле эдип болбос эди. Олорго Иисустыҥ айткан «болушчызы», агару тын, керек болгон (Иоанн 14:26; Зах. 4:6).

5, 6. Агару тын Иисустыҥ ӱренчиктерине канайып болушкан?

⁵ Иисустыҥ ӱренчиктери агару тынды б. э. 33-чи јылыныҥ Беженинчи кӱнинде алган. Бу тынныҥ болужыла олор јарлап баштаган ла кыска ӧйдиҥ туркунына сӱӱнчилӱ јарды муҥдар тоолу улус алынган (Ап. ижи 2:41; 4:4). Христиандарды истежип баштаарда, олор коркыбай, Кудайдаҥ болуш сураган. Иеговага мӱргӱӱлинде: «Бойыҥныҥ кулдарыҥа сӧзиҥди јалтанбай айдарга бер» — деп айткан. Мыныҥ кийнинде олордыҥ «ончозы Агару Тынла толуп, Кудайдыҥ сӧзин јалтанбай айдып турдылар» (Ап. ижи 4:18—20, 29, 31).

⁶ Иисустыҥ ӱренчиктеринде ӧскӧ дӧ кӱчтер болгон. Темдектезе, ол ӧйдӧ Агару Бичимелдиҥ тӱрбектери ас болгон. Анайда ок олордо бисте ошкош ӱредӱ ӧткӱретен бичиктер болбогон. Бого коштой олорго башка-башка тилдерге куучындап турган улуска јарлаар керек болгон. Бу тегин эмес айалгага да кӧрбӧй, бу албаданчак ишчилер эдип болбос немени эдип салган. 30 јыл кире ӧткӧн кийнинде бу сӱӱнчилӱ јар «теҥери алдында јӱргендерге ончозына јарлалган» (Кол. 1:6, 23).

7. Кӧп јылдар кайра Иегованыҥ ишчилери Кудайдыҥ табын канайып оҥдогон ло мыны оҥдоп, олор канайып иштенген?

⁷ Эмдиги ӧй. Иегова бойыныҥ ишчилериле оноҥ ло ары башкарып, табын бӱдӱрерге, олорго ийде-кӱч берет. Ол бисле озо ло баштап тыныла бичилген Сӧзиле, Агару Бичикле, башкарат. Агару Бичиктеҥ Иисустыҥ ижи керегинде ле оныҥ ижин улалтсын деп, ӱренчиктерине јакарганын кычырарга јараар. 1881 јылдыҥ јаан изӱ айыныҥ «Каруулчы шибеезинде» бичилген: «Бис мак аларга ла акча-јӧӧжӧ јуурга эмес, сӱӱнчилӱ јар јарлап, Кудайдыҥ агару табын бӱдӱрерге, бис бойысты ла бисте не барын ончозын берерге кычырылганыс эмезе майлатканыс». А 1919 јылда «Кому доверена работа» деп брошюра чыккан. Бу брошюрада јарчыларга канайып јарлаары јанынаҥ башкартулар берилген. Ондо айдылган: «Биске сӱреен јаан иш берилген, је бу Кайраканныҥ ижи. Оныҥ ийде-кӱчиле бис оны эдип саларыс». Баштапкы чактыҥ христиандары чылап, бу акалар јалтанбай, агару тын олорго кандый ла укту улуска јарлаарга болужар деп, бир де алаҥзыбай албаданып иштенген. Бис олор ло чылап алаҥзыбай јадыс.

8, 9. Сӱӱнчилӱ јар јарлалзын деп, Иегованыҥ организациязы кандый эп-арга тузаланган?

⁸ Иегованыҥ организациязы сӱӱнчилӱ јарды јетирерге, јаантайын эҥ јакшы јепселдерле тузаланат. Олордыҥ ортозында кепке базылган ла электронный бичиктер. Ӧткӧн ӧйдӧ јарлаар иште «Фотодрама творенияны», патефонды, радионы ла громкоговорительдерлӱ машиналарды тузалангандар. Анайда ок Кудайдыҥ организациязы кӧчӱрер иш бӱдӱрет. Тӱӱкиде бого тӱҥей иш качан да болбогон! Мындый иштеҥ улам улус сӱӱнчилӱ јарды бойыныҥ тӧрӧл тилине угуп јат. Иегова улусты ылгабай јат. Ол сӱӱнчилӱ јар «кандый ла укка, ӱйеге, тилге ле калыкка» јарлалар деп, судурлап салган (Ачыл. 14:6, 7). Кудай бу јарды ончо улусты уксын деп кӱӱнзеп јат.

 ⁹ Је кезикте улусла айылдарында куучындажарга келишпей јат. Нениҥ учун дезе кезик улус јакшы корулалып турган тураларда јадып јат. Андый улуска Кудай керегинде уксын деп болужарга, Кудайдыҥ организациязы кӧп улусту јерлерде јарлаарыныҥ эп-аргаларын тузаланып баштаган. Анайып 2001 јылда Башкару јӧп Франциядагы акаларга бичиктерлӱ стендти тузаланар јараду берген. Оныҥ кийнинде бу эп-арга ӧскӧ дӧ калаларда тузаланылган. Бу эп-арга јаан једим экелген. А 2011 јылда Бириктирилген Штаттарда, Нью-Йорк калазыныҥ эҥ ле кӧп улус јуулып турган јеринде јаҥы программа иштеп баштаган. Баштапкы јылда 102 129 бичик ле 68 911 журнал таркадылган. Анайда ок 4 701 кижи Агару Бичикле ӱредӱ сураган. Мынаҥ Иегованыҥ агару тыны иштеп турган деп, јарт кӧрӱнген. Оныҥ учун Башкару јӧп бастыра телекейдеги ака-эјелерге бичиктерлӱ стендти тузаланар јараду берген.

10. Јакшы јарлаарга ла улусты чындыкка ӱредерге нени эдерге јараар?

¹⁰ Слер нени эдер аргалу? Иегова бисти христиан туштажуларда јарлаарга ӱредип јат. Бу алган билгирлерди тузаланып туругар. Анайда ок бойыгардыҥ јарлап турган бӧлӱгердиҥ ака-эјелериле јаантайын иштенигер. Темдектезе, олор слерге јарлаарга ла улусты ӱредерге болужар. Анайып, слер олордыҥ теминеҥ оморкоду алараар. Кандый да кӱчтер болуп турза, оноҥ ло ары јарлагар. Нениҥ учун дезе бу јӧрмӧлдиҥ тӧс ӱлгериле болзо, бис Кудайдыҥ табын бойыстыҥ ийде-кӱчисле эмес, је Кудайдыҥ агару тыныныҥ болужынаҥ улам бӱдӱредис. Айдарда, Кудай биске керектӱ ийде-кӱчти берер деп, алаҥзыбай јадыс (Зах. 4:6). Нениҥ учун дезе бис оныҥ јакылтазын бӱдӱредис.

11. Баштапкы чакта Башкару јӧптӧги акалар Кудайдыҥ албатызында амыр ла бирлик болзын деп нени эткендер?

¹¹ Баштапкы чак. Иерусалимде Башкару јӧпкӧ кирген аксагалдар ла апостолдор јуундарда амыр ла бирлик болзын деп, ӧмӧ-јӧмӧ иштегендер (Ап. ижи 2:42). Б. э. 49-чы јылында, кестирӱ јанынаҥ блааш-тартышту сурак кӧдӱрилген. Апостолдор ло аксагалдар бу сурактыҥ  аайына чыкпаган болзо, јарлаар ишке буудак болор эди. Олор бойлоры еврейлер де болгон болзо, јӧп чыгарган тушта, иудей чӱм-јаҥдарла башкарынбаган ла кестирӱни некеген улустыҥ сӧзине кирбеген. Карын Агару Бичикти шиҥдеп, агару тынла башкарынган (Ап. ижи 15:1, 2, 5—20, 28). Бу чыгарган јӧп неге экелген? Иегова Башкару јӧптиҥ чыгарган јӧбине алкыжын јетирген. Мынаҥ улам јуундарда амыр ла бирлик боло берген ле ака-эјелер оноҥ ло ары эрчимдӱ јарлаган (Ап. ижи 15:30, 31; 16:4, 5).

12. Иегованыҥ организациязы аайлу-башту ла амыр деп недеҥ кӧрӱнет?

¹² Эмдиги ӧй. Иегованыҥ организациязы Кудайдыҥ албатызында аайлу-башту ла амыр болзын деп, јаантайын болушкан. Темдектезе, 1895 јылдыҥ кӱчӱрген айыныҥ 15-чи кӱниниҥ «Каруулчы шибеезинде» 1 Коринфтегилерге 14:40-гӧ тӧзӧлӧнгӧн «Благопристойно и чинно» деп јӧрмӧл чыккан. Ондо мынайып айдылган: «Апостолдор I-кы чактыҥ христиандарына јакшы башкарылган агарулардыҥ јуундары керегинде кӧп катап айдып туратан... Оныҥ учун биске алдында „бисти ӱредерге бичилгенине“ оноҥ ло ары сӧсуккур болор керек» (Рим. 15:4). Бӱгӱнги кӱнде Иегованыҥ организациязы баштапкы чактагы христиандар ла чылап, јуундарда аайлу-башту ла амыр болзын деп, бастыра ийде-кӱчин салат. Сананып ийзеер де, слер ӧскӧ ороондо, ӧскӧ јуунда «Каруулчы шибеени» шӱӱжер ӧйдӧ болуп калганаар. Је андый да болзо, слер кандый јӧрмӧл шӱӱжилерин, шӱӱжери канайып ӧткӱрилерин билип јадаар. Ӱзе немени оҥдоп, бойыгардыҥ ла јууныгарда отурганаар деп сананарыгар. Мындый бирлик јӱк ле агару тынныҥ болужыла болот (Соф. 3:9).

13. Иаков 3:17-деги сӧстӧрди ајаруга алып, бойыска кандый сурактар берер керек?

¹³ Слер нени эдер аргалу? Иегова ишчилерин «амырды чеберлеп, Тынныҥ бирлигин корул[азын]» деп кӱӱнзейт (Еф. 4:1—3). Оныҥ учун бойыгардаҥ сурагар: «Мен јуунныҥ амырына ла бирлигине јӧмӧжӧдим бе? Башкарар јаҥ алган улуска сӧсуккур болодым ба? Улус мени, анчада ла јуунда каруулу молјуларлу болзом, бӱдӱмјилӱ кижи деп кӧрӧт пӧ? Мен ӱзе немени ӧйи-ӧйинде эдедим бе? Улуска акту кӱӱнимнеҥ болужадым ба?»  (Иаков 3:17 кычырыгар.) Слерге кажы бир суракта тӱзединер керек деп, кӧрӱп турган болзоор, Кудайдаҥ агару тын сурагар. Агару тын слерге канча ла кире кӧп берилип, тӱзединерге болужып турза, ака-эјелер слерди ончо ло кире тыҥ сӱӱр ле баалап турар.

14. Колоссыдагыларга 1:9, 10 аайынча Иегова баштапкы чакта бойыныҥ ишчилерин канайып ӱреткен?

¹⁴ Баштапкы чак. Иегова бойыныҥ ишчилерин сӱӱнип ӱредет (Сар. 32:8). Кудай бисти оны билип, сӱӱп турзын ла ӱргӱлјиге јӱрзин деп кӱӱнзеп јат. Оныҥ учун биске билгирлер алып турар керек (Иоанн 17:3). Баштапкы чакта Иегова улусты ӱредерге, христиан јуундар тузаланган. (Колоссыдагыларга 1:9, 10 кычырыгар.) Анайда ок ӱредеринде јаан учурлу ишти Иисустыҥ айдып салган «болушчызы», агару тын, эткен (Иоанн 14:16). Агару тын Кудайдыҥ ишчилерине оныҥ Сӧзин оҥдоорго болушкан, анайда ок Иисустыҥ айткан сӧстӧрин ле эткен керектерин эске алындырган (кийнинде Иисустыҥ јӱрӱми керегинде тӧрт Сӱӱнчилӱ Јарда бичилген). Бу билгирлер баштапкы чактыҥ христиандарыныҥ бӱдӱмјизин тыҥыткан. Анайда ок Кудайды, Иисусты ла бой-бойын сӱӱрге болушкан.

15. Исаия 2:2, 3-теги сӧстӧрди Иегова канайып бӱдӱрет?

¹⁵ Эмдиги ӧй. Иегова «калганчы кӱндерде» кандый ла укту албатылар оныҥ «туузына» келер деп, озолондыра айдып салган. Ӧскӧртӧ айтса, оныҥ чындык ишчилерине кожулып, оныҥ јолдорына ӱренер. (Исаия 2:2, 3 кычырыгар *.) Бу судурдыҥ бӱдӱп турганын бис бойыстыҥ кӧзисле кӧрӱп јадыс. Иеговага бажырары туу чылап, тӧгӱн  кудайларга бажырарынаҥ бийик турат. Иегова биске чыннаҥ ла кӧгӱс байрам белетеген (Иса. 25:6). Ол «бӱдӱмјилӱ ле керсӱ кул» ажыра кандый ла кӧгӱс курсакты артыгынча берет (Матф. 24:45). Темдектезе: јӧрмӧлдӧр, библиялык куучын-эрмектер, видеолор ло мультфильмдер. Иовтыҥ Елиуй деп најызында болгон сезимдер бисте де болот. Ол Иегова керегинде мынайып айткан: «[Иеговадый] ӱредӱчи бар эмеш пе?» (Иов 36:22).

16. Кӧгӱс јанынаҥ ӧзӧргӧ слер нени эдер аргалу?

¹⁶ Слер нени эдер аргалу? Агару тын слерге Кудайдыҥ сӧзин кычырып, билип алганаарды тузаланарга болужар. Сарнаачы чылап мӱргӱгер: «О-о Иегова, мени јолыҥа ӱредип сал. Мен сениҥ чындыгыҥда јӱрерим. Бастыра јӱрегимле сениҥ адыҥнаҥ айап јӱрерге болуш» (Сар. 86:11). Оныҥ учун Иегованыҥ организациязы берип турган кӧгӱс курсакты, Агару Бичикти кычырып, ого тӧзӧлӧнгӧн материалдарды оноҥ ло ары шиҥдегер. Је бис јӱк ле билгирлер аларга турган эмезис, је Агару Бичиктеги билгирлерге бастыра јӱрегисле бӱдӱп, бу алган билгирлеристи јӱрӱмде тузаланарга кӱӱнзейдис. Кудайдыҥ агару тыны биске мыны эдерге болужар. Анайда ок бис ака-эјелердиҥ кӱӱнин кӧдӱрерге кӱӱнзейдис (Евр. 10:24, 25). Нениҥ учун? Нениҥ учун дезе олор бистиҥ кӧгӱс билегис. Христиан туштажуларда акту јӱректеҥ јартамалдар берерге ле слерге берилген јакылталарды јакшы белетеерге, агару тын болушсын деп мӱргӱгер. Анайып слер Иегованыҥ ла Иисустыҥ баалу «койлорын» сӱӱп турганаар деп кӧргӱзереер (Иоанн 21:15—17).

17. Иегованыҥ организациязына јӧмӧжип турганаар деп, слер канайып кӧргӱзереер?

¹⁷ Удабас јердиҥ ӱстинде јӱк ле Кудайдыҥ организациязы артар. Оныҥ учун бу организацияла кожо эрчимдӱ иштегер. Ончо улусты Иегова чылап сӱӱгер. А мындый сӱӱшти улусты ылгабай јарлап турзаар кӧргӱзереер. Аайлу-баштуны ла амырды сӱӱп турган Кудай чылап, јуунныҥ бирлигине јӧмӧжигер. Улу Ӱредӱчиниҥ сӧзин угуп, оныҥ берип турган ончо кӧгӱс курсагыла јакшы ажаныгар. Анайып, Сатананыҥ телекейи јоголып јаткан деп кӧрӱп коркыбазыгар. Анайда ок Иегованыҥ организациязында чындык иштеп турган улусла кожо болорыгар.