1. Ӱренип турган улуска сууга чӧҥӱрилерге болужатаны — Кудайдыҥ јаан сыйы деп, 2 Коринфтегилерге 3:1—3 канайып кӧргӱзет? (Кадарындагы јурукты кӧрӱгер.)

АГАРУ БИЧИКТИ ӱренген кижи сууга чӧҥӱрилип јатса, слер нени сезедигер? Слер тыҥ сӱӱнип турган болороор (Матф. 28:19). А бу кижиге слер ӱредӱ ӧткӱрген болзоор, оноҥ тыҥ сӱӱнип јадаар! (1 Фес. 2:19, 20). Кижи сууга чӧҥӱрилзе, слердиҥ де, бастыра јуунныҥ да јаан иш эткени кӧрӱнет. Бу јаҥы ӱренчиктер слерди де, бӱдӱн јуунды да мактап турган «самаралар» болуп јат. (2 Коринфтегилерге 3:1—3 кычырыгар.)

2. а) Бистерге кандый јаан суракты шӱӱп кӧрӧр керек, нениҥ учун? б) Агару Бичикле ӱредӱ ӧткӱрилет деп, качаннаҥ ала чотолот? (Сносканы кӧрӱгер.)

² Калганчы тӧрт јылдыҥ туркунына кажы ла ай 10 000 000 кире улус Агару Бичик ӱренет *. Андый да болзо, бир јылдыҥ туркунына 280 000 кире улус сууга чӧҥӱрилген. Бу канча миллион улуска чӧҥӱрилзин деп канайып болужар керек? Иегова бу улусты эмдигенче сакып турган болордо, биске де олорго бастыра ийде-кӱчистеҥ болужар керек. Нениҥ учун дезе ӧй ас! (1 Кор. 7:29а; 1 Пет. 4:7).

3. Бу јӧрмӧлдӧ бис нени шӱӱжерис?

 ³ Бӱгӱнги кӱнде ӱренчиктер белетеери эҥ јаан сурак болот. Оныҥ учун Башкару јӧп бу сӱреен кӧп улуска канайып болужарга јараар деп билерге, Бет-Элдерле јӧптӧшкӧн. Бу да, келер де јӧрмӧлдӧҥ бис ченемелдӱ пионерлердеҥ, миссионерлердеҥ, анайда ок аймак кӧрӧӧчилердеҥ неге ӱренер аргалу деп кӧрӧрис (Укаа 11:14; 15:22) *. Олордыҥ теминеҥ бис те, ӱренип турган кижи де кӧп немеге ӱренерис. Бу јӧрмӧлдӧ берилген беш јӧптиҥ болужыла бис ӱренип турган кижиге кӧгӱс јанынаҥ ӧзӧргӧ лӧ чӧҥӱрилерге болужарыс.

4. Ӱредӱлерди эжиктиҥ јанында ӧткӱрип турган болзоос, нени ундыбас керек?

⁴ Кӧп ака-эјелер ӱредӱни эжиктиҥ јанында ӧткӱредилер. Је андый ӱредӱлер кыска ӧйгӧ ӧткӱрилет ле кажы ла неделе ӧткӱрилбей јат. Оныҥ учун ака-эјелер кижиниҥ јилбӱзин тыҥыдарга, оныҥ номерин * сурап алат. Оноҥ Агару Бичиктиҥ кандый бир шӱӱлтезин телефон ажыра эмезе СМС ажыра кыскарта айдып берет. Андый ӱредӱлер канча айларга улалардаҥ айабас. Је анайып кижи јакшы билгирлер алып болбос. Андый болордо, кижи кӧгӱс алтамдар эдип, сууга чӧҥӱрилип болор бо? Јок эмей.

5. Лука 14:27—33-теги сӧстӧр ӱредӱ ӧткӱрерге канайып болужат?

⁵ Бир катап Иисус оныҥ ӱренчиги болорго нени эдер керек деп кӧргӱзерге, эки кижи керегинде куучындаган. Бирӱзи шибее тударга турган кижи, база бирӱзи јуу-согушка белетенип турган каан кижи. Баштапкы кижиге шибеени учына јетире тудуп болор бо деп сананар керек. А экинчи кижиге бойыныҥ улузыла јӧптӧжип, јуулажып болор бо деп, шӱӱп сананар керек. (Лука 14:27—33 кычырыгар.) Анайып ла Агару Бичикти ӱренип турган кижиге, ол Иисустыҥ ӱренчиги болуп болор бо, јок по деп билип аларга, јазап шӱӱп сананар керек. А кижиге мынайып сананзын деп болужарга, Агару Бичикти оныла кажы ла неделе ӱренер керек.

6. Кижи кӧгӱс јанынаҥ ӧссин деп, нени эдип кӧрӧр керек?

⁶ Озо баштап, эжиктиҥ јанында ӧткӱрилип турган ӱредӱлердиҥ ӧйин кӧптӧдӧргӧ албаданыгар. Темдектезе, бир ӱлгер эмес,  эки ӱлгер шӱӱжип кӧрӧӧр. Анайып кижи эмеш кӧптӧдӧ шӱӱжерге ӱрениже берзе: «Кайда-кайда отурала ӱрензеес кайдар?» — деп сурагар. Бу сурактаҥ кижи чын ла ӱренерге турган ба, јок по деп јартала берер. Бир эмеш ӧйдӧҥ ӱредӱни неделеге эки катап ӧткӱрерге куучындажып кӧрӧр. Је кижиге кӧгӱс јанынаҥ ӧзӱп, сууга чӧҥӱрилзин деп болужарга, база да ӧскӧ немелер эдер керек.

7. Кажы ла ӱредӱге канайып белетенер керек?

⁷ Слер Агару Бичикле ӱредӱ ӧткӱрип турган болзогор, кажы ла ӱредӱге јакшы белетенип туругар. Озо ло баштап теманы ла бастыра ӱлгерлерди кычырып алыгар. Оноҥ тӧс шӱӱлтелерин оҥдоп алыгар. Мыныҥ кийнинде тӧс шӱӱлтелерде теманыҥ адыла, бӧлӱктердиҥ адыла, абзацтардыҥ сурактарыла, анайда ок «кычырыгар» деп ӱлгерлерле, јуруктарла, видеолорло кандый колбу барын шӱӱп сананыгар. А оноҥ дезе, ӱренип турган кижи теманы оҥдоп, тузаланарга кӱӱнзей берзин деп, оны канайып јартап беретенин сананып ийер керек (Неем. 8:8; Укаа 15:28а).

8. Павелдиҥ Колоссыдагыларга 1:9, 10-до бичилген сӧстӧриле болзо, ӱренип турган кижи керегинде канайып мӱргӱӱр керек?

⁸ Ӱредӱге белетенип јаткан ӧйдӧ кижи керегинде мӱргӱӱр керек. Мӱргӱӱлде Иегованы Агару Бичиктиҥ болужыла кижиниҥ јӱрегин томултарга болушсын деп сурагар. (Колоссыдагыларга 1:9, 10 кычырыгар.) Анайда ок кижиге нени оҥдоорго, неле јӧпсинерге кӱч болордоҥ айабас деп, озодоҥ сананып кӧрӱгер. Слер кижиге сууга чӧҥӱрилерге болужарга турган амадугарды ундыбагар.

9. Ӱренип турган кижиге кажы ла ӱредӱге белетенип турзын деп канайып болужар?

⁹ Кижи Агару Бичикти кажы ла неделе ӱренип турза, Иегованыҥ ла Иисустыҥ эткенин баалап, оноҥ кӧп билгирлер аларга албадана берер деп кӱӱнзейдис (Матф. 5:3, 6). Анайып, ӱренип турган кижиге туза аларга, кажы ла ӱредӱге белетенер керек. А кижиге белетенип турзын деп канайып болужарыс? Абзацтыҥ сурагыныҥ каруузын канайып табып алатанын кӧргӱзип береер *. Ол эҥ керектӱ  сӧстӧрин тартып алзын. Бу ого каруузын эске алынып ийерге болужар. Оноҥ бу сӧстӧрдиҥ болужыла карууны бойыныҥ сӧстӧриле берзин деп сурагар. Анайып кижи материалды оҥдогон бо, јок по деп кӧрӱне берер. Је кижини белетензин деп кӱӱнзедерге ӧскӧ дӧ аргалар бар.

10. Агару Бичикти нениҥ учун кажы ла кӱн кычырар керек? Кычырыш тузалу болзын деп, нени эдер керек?

¹⁰ Ӱредӱлер кажы ла неделе ӧткӱрилип турган да болзо, је кижиге кажы ла кӱн Иеговала куучындажар керек. А кажы ла кӱн куучындажарга, ого Агару Бичик кычырар керек. Кычырганы ажыра ол Иегованы угуп, оныла куучындажып јат (Иис. Н. 1:8; Сар. 1:1—3). Кижиге jw.org сайттагы «Агару Бичикти кычыратан графикти» * кӧргӱзип беригер. Је Агару Бичикти јӱк ле кычырар керек эмес, оны шӱӱп сананар керек. Оныҥ учун кижини кычырганын шӱӱп сананып турзын деп кӱӱнзедип туругар. Кижи Агару Бичик Иегова керегинде нени айдып турганын, анайда ок билип алганын јӱрӱминде канайып тузаланатанын сананып турза, кычырганынаҥ јаан туза алар (Ап. ижи 17:11; Иак. 1:25).

11. Кижи мӱргӱӱрге канайып ӱренип алар? Нениҥ учун кажы ла кӱн мӱргӱӱр керек?

¹¹ Анайда ок ӱренип турган кижини кажы ла кӱн мӱргӱӱрге кӱӱнзедигер. Кажы ла ӱредӱни мӱргӱӱлле баштап, мӱргӱӱлле божодып туругар. Мӱргӱп јатсаар, кижи керегинде база мӱргӱӱгер. Слер акту јӱректеҥ Иеговага Иисус Христос ажыра мӱргӱп турзаар, кижи слердеҥ ӱренип јат (Матф. 6:9; Иоанн 15:16). Кижи кажы ла кӱн Агару Бичикти кычырып, Иегованы угуп турза, кажы ла кӱн мӱргӱп Иеговала куучындажып турза, кандый јакшы дезеер?! (Иак. 4:8). Мынаҥ улам кижи Иеговага јууктап, ого јӱрӱмин учурлап, сууга чӧҥӱрилерге кӱӱнзей берер.

12. Кижи Иегованы сӱӱзин деп, биске нени эдер керек?

¹² Ӱренип турган кижиге јӱк ле билгирлер берер керек эмес, је јӱрегин де томултарга албаданар керек. Нениҥ учун дезе алган билгирлерди тузаланарга, кижини јӱреги кӱӱнзедип јат. Бу јанынаҥ сӱреен јакшы темди Иисус кӧргӱскен. Иисус чындыктарды улустыҥ јӱрегине тийер эдип јартаган.  Мынаҥ улам олор сууга чӧҥӱрилип, оныҥ ӱренчиктери болуп калатан (Лука 24:15, 27, 32). Агару Бичикте Кудайды бастыра јӱректеҥ сӱӱр керек деп айдылат (Матф. 22:37, 38). Оныҥ учун кижини Кудайды сӱӱзин деп, оныла јууктада таныштырарга албаданар керек. Ӱредӱниҥ ӧйинде Кудайдыҥ сӱрекей јакшы кылык-јаҥдарына ајару эдип туругар (Чыг. 34:5, 6; 1 Петр 5:6, 7). Оныҥ сӱӱжине, јалакайына ла килемкейине. Ол тушта Иегова кижиниҥ Кудайы, Адазы ла Најызы болуп калар (Сар. 25:4, 5). Анайып кижи Иегованы бастыра јӱрегинеҥ сӱӱр.

13. Кижиге Иегованыҥ кылык-јаҥын кӧрӱп турзын деп, канайып болужар керек?

¹³ Анайда ок ӱредӱ ӧткӱрип јатсаас, нениҥ учун Иегованы сӱӱп турганысты куучындап турар керек. Темдектезе ӱренип јаткан материалда эмезе ӱлгерде кандый бир шӱӱлте слердиҥ јӱрегерди томултып, Иегованыҥ сӱӱжин, ойгорын ла ийде-кӱчин кӧрӧргӧ канайып болушканын куучындаарга јараар. Мыны кӧрӱп, ӱренип турган кижи Иеговала бойы да колбуларлу болорго кӱӱнзей берер (Сар. 73:28). Је ӱренип турган кижиге сууга чӧҥӱрилерге база нени эдер керек?

14. Кижини јуунныҥ туштажуларына јӱрзин деп кӱӱнзедерге, Еврейлерге 10:24, 25 канайып болужат?

¹⁴ Бис кажыбыс ла ӱренип турган улусты сууга чӧҥӱрилзин деп кӱӱнзеп јадыс. Је сууга чӧҥӱрилерге, јуунныҥ туштажуларына јӱрер керек. Ченемелдӱ ака-эјелердиҥ кӧрӱмиле болзо, јуундарга јӱрген улус кӧгӱс јанынаҥ јакшы ӧзӱп јат (Сар. 111:1). Оныҥ учун ӱренип турган кижиге ол јуунныҥ туштажуларына јӱрзе, оноҥ кӧпти билип алар деп јартап беригер. Еврейлерге 10:24, 25-ти (кычырыгар) кычырып ийеле, туштажулардыҥ тузазын шӱӱжип ийигер. Анайда ок «Каандыктыҥ Туразында не болуп турган?» * деген видеоны кӧргӱзигер. Айдарда биске ӱренип турган кижиге јуунныҥ туштажуларын нениҥ учун божотпос керек деп оҥдоп аларга болужар керек.

15. Ӱренип турган кижини јуунныҥ туштажуларына јаантайын јӱрзин деп канайып кӱӱнзедер?

¹⁵ Ӱренип турган кижи јуунныҥ туштажуларына бир де јӱрбеген эмезе јӱк каа-јаада јӱрӱп турган болзо, нени эдерге јараар?  Калганчы болгон туштажуда нени укканаарды кӧдӱриҥилӱ куучындап беригер. Анайда ок кижиге «Каруулчы шибеени» эмезе «Јӱрӱмис ле ижибис» деген иштиҥ тетрадин берип, келер неделеде кандый тема шӱӱжилерин кӧргӱзип беригер. Оноҥ теманыҥ кажы бӧлӱги јарап туру деп сурап ийигер. Мынайып кижи јуунныҥ туштажузына барарга кӱӱнзей берердеҥ айабас. Кижи туштажуга баштапкы катап келип, андагы кӧргӧн-укканы ӧскӧ кудай јаҥдардаҥ чек башка эмтир деп оҥдоп ийер (1 Кор. 14:24, 25). Анайда ок јуунда кижи бойына јуук кандый бир ака-эјеле таныжып алар болор. Бу ака эмезе эје андый кижиге кӧгӱс јанынаҥ ӧзӱп, сууга чӧҥӱрилетен тем болор.

16. Ӱренип турган кижиге сууга чӧҥӱрилзин деп болужарга биске нени эдер керек? Келер јӧрмӧлдӧ не шӱӱжилер?

¹⁶ Айдарда, ӱренип турган кижиге сууга чӧҥӱрилзин деп болужарга биске нени эдер керек? Агару Бичикти кажы ла неделе ӱренерге кӱӱнзедигер. Кажы ла ӱредӱге белетенерге кӱӱнзедигер. Анайда ок Иеговала кажы ла кӱн куучындажып, ого најы болуп калзын деп ӱредигер. Бого ло коштой кижиге јуунныҥ туштажуларына јӱрзин деп болужар керек. (« Ӱренип турган кижиге сууга чӧҥӱрилерге нени эдер керек?» деген рамканы кӧрӱгер.) Је кижиге сууга чӧҥӱрилерге болужатан база да беш арга бар. Бу аргалар келер јӧрмӧлдӧ кӧрӱлер.