1. Ӱренчиктер белетеерин кижиниҥ јӱрӱмин аргадап турган иш деп нениҥ учун айдарга јараар?

ӰРЕНЧИКТЕР белетеери — кижиниҥ јӱрӱмин аргадайтан иш болуп јат. Нениҥ учун мынайып айдарга јараар? Иисус бойыныҥ ӱренчиктерине мындый јакару берген: «Барыгар, ончо калыктарды ӱредигер. Олорды крестегер [сууга чӧҥӱригер]» (Матф. 28:19, 20). Бис билерис, аргаданарга турган кижи сууга чӧҥӱрилип калган болор керек. А сууга чӧҥӱрилерге турган кижи Иисус ол учун јӱрӱмин берген ле тирилген деп бӱдер учурлу. Оныҥ да учун апостол Пётр мындый сӧстӧр айткан: «Анайып, слерди де эмди креске тӱжери [сууга чӧҥӱрилери]... Христостыҥ тирилгени ажыра аргадайт» (1 Петр 3:21). Айдарда, јаҥы ӱренчик сууга чӧҥӱрилип јатса, аргаданыштыҥ јолына туруп јат.

2. 2 Тимофейге 4:1, 2 бистерди неге кӱӱнзедет?

² Биске ӱренчиктер белетеерге, улусты ӱредетен темигӱлеристи тыҥыдар керек. (2 Тимофейге 4:1, 2 кычырыгар.) Нениҥ учун дезе Иисус бистерге: «Барыгар, ончо калыктарды ӱредигер» — деп, јакару берген. Анайда ок Павел Тимофейге (ол тоодо бистерге де) бу ишти оноҥ ло ары эдип: «Ӱредӱге ајарыҥкай бол» — деп айткан. Оныҥ да учун: «Анайда эдип, бойыҥды да, сени угуп турган улусты да аргадап аларыҥ» — деп, Павелдиҥ оноҥ ары айткан сӧстӧрин јакшы оҥдоп јадыс (1 Тим. 4:16). Айдарда, бис Христостыҥ ӱренчиктерин белетеерге турган болзоос, ӱредетен темигӱлеристи тыҥыдып турарыс.

3. Бис бу јӧрмӧлдӧ нени шӱӱжерис?

 ³ Бастыра јердиҥ ӱстинде Агару Бичикти миллиондор тоолу улус ӱренип јат. Ӧткӧн јӧрмӧлдӧ айдылганыла, андый улуска Христостыҥ ӱренчиктери болзын деп, канайып болужарын билип аларга кӱӱнзейдис. Оныҥ учун бу јӧрмӧлдӧ ӱренип турган улузысты сууга чӧҥӱрилзин деп белетеерге болужатан беш јӧп шӱӱжилер.

4. Ӱредӱ ӧткӱрип турала, бойысты нениҥ учун кӧрӱп турар керек? (Сносканы база кӧрӱгер.)

⁴ Биске Кудайдыҥ Сӧзиндеги чындыктар тыҥ јарап јат. А тыҥ јарап турган неме керегинде бис кӧп куучындап јадыс. Је «Каруулчы шибеени» ӱренип јаткан тушта, јуунда Агару Бичикти шӱӱжип јаткан ӧйдӧ эмезе ӱредӱ ӧткӱрип јаткан ӧйдӧ кӧп неме куучындабаза, јакшы болор эди. Карын ӱредӱ тушта бистер Агару Бичикти тузаланып, кандый бир ӱлгер аайынча эмезе тема аайынча нени билеристи ӱзе јартабай јадыс (Иоанн 16:12) *. Слер сууга чӧҥӱрилип јадараарда канча кире билгенеер, эмди канча кире билереер деп, сананып ийзеер де. Сууга чӧҥӱрилереерде слер Агару Бичиктиҥ јӱк тӧс ӱредӱлерин билген болороор (Евр. 6:1). Кӧпти билерге канча јылдар керек болуп јат. Оныҥ учун ӱренип турган кижиге бир уунда кӧп билгирлер берерге албаданбас керек.

5. а) 1 Фессалоникадагыларга 2:13-ле болзо, ӱренип турган кижиге нени оҥдоп турар керек? б) Бис ӱренип турган кижини билип алганын куучындап турзын деп, канайып кӱӱнзедерис?

⁵ Ӱренип турган кижи оныҥ алып турган билгирлери Агару Бичиктеҥ деп, оҥдоп турзын. (1 Фессалоникадагыларга 2:13 кычырыгар.) Бу јанынаҥ бис ого канайып болужарыс? Кижини бойыныҥ санаа-шӱӱлтезин куучындап берзин деп кӱӱнзедеер. Агару Бичиктиҥ ӱлгерлерин јаантайын бойоор јартабай, ӱренип турган кижини јартап берзин, деп сурагар. Оноҥ ӱренип турган кижиниҥ кӧрӱмин оҥдоп алатан сурактар берерге јараар (Лука 10:25—28). Темдектезе: «Сен бу ӱлгердеҥ Иегованыҥ кандый кылык-јаҥын билип алдыҥ? Бу библиялык чындык сеге кандый туза берер? Бу библиялык чындык керегинде сен нени сананадыҥ?» (Укаа 20:5). Анайып, слер ӱренип турган кижиге Агару Бичик ого кандый туза берип турганын кӧрӧргӧ болужараар. Нениҥ учун дезе кижи алган билгирлерин оҥдоп, оны тузаланып турза јакшы.

6. Ӱредӱге ченемелдӱ јарчыны кычырза, нениҥ учун јакшы болор эди?

⁶ Ӱредӱге ченемелдӱ јарчыны кычырыгар.  Бу јарчынаҥ слер ӱредӱни канайып ӧткӱрип турганаарды ла јаан ајаруны Агару Бичикке эдип турганаар ба, јок по деп, сурап ийер аргалу. Бойыгардыҥ ӱредип турган темигӱлереерди тыҥыдарга турган болзоор, слерге јобош болор керек. (Апостолдордыҥ ижи 18:24—26 тӱҥдештиригер.) Анайда ок ченемелдӱ јарчынаҥ, ӱренип турган кижи чындыкты јакшы оҥдоп турган ба деп, сурап ийерге јараар. А слер бир неделеге эмезе оноҥ до кӧп ӧйгӧ кайдӧӧн дӧ јӱрӱп јаткан болзогор, ол ло јарчыны ӱредӱ ӧткӱрип ийзин деп сурагар. Мынайып ӱредӱ ӱзӱлбес ле ӱренип турган кижи ӱредӱниҥ керектӱзин оҥдоор. Бу јӱк слердиҥ ӱредӱгер ле оны јӱк ле слер ӧткӱрер учурлу деп сананбагар. Бис ӱренип турган кижини Кудайдыҥ Сӧзиндеги чындыктарды оноҥ ло ары билзин деп, кандый ла аргаларды тузаланарыс.

7. Ӱренип турган кижи библиялык чындыктарды недеҥ улам сӱӱп баштаар аргалу?

⁷ Кижини кӧдӱриҥилӱ ле бӱдӱмјилӱ ӱредигер (1 Фес. 1:5). Кижи мыны кӧрӱп, Агару Бичиктеги ӱредӱлерди сӱӱп баштаар. Анайда ок Агару Бичиктиҥ принциптери слерге бойыгарга канай болушканын куучындап беригер. Мынайып ӱренип турган кижи ого до Агару Бичиктиҥ јӧптӧри јакшы јанына солынарга болужар деп оҥдоп ийер.

8. Ӱренип турган кижиге база канайып болужарга јараар?

⁸ Ӱредӱниҥ ӧйинде ӱренип турган кижиниҥ кӱчтериндий ошкош кӱчтерлӱ болгон христиандардыҥ темдерин куучындап тур. База бир арга — андый кӱчтерлӱ болгон аканы эмезе эјени ӱредӱҥе кычыр. Анайда ок jw.org сайтта «Библия меняет жизнь» * деген рубрикадагы јӧрмӧлдӧрди ле видеолорды тузаланыгар. Бу ончо немени кӧрӱп, ӱренип турган кижи Агару Бичиктиҥ принциптериле јӱрери ойгор деп оҥдоп ийер.

9. Ӱренип турган кижини билип алганын тӧрӧӧндӧрине ле најыларына куучындап турзын деп канайып кӱӱнзедер?

⁹ Ӱренип турган кижигер эш-нӧкӧрлӱ болзо, оныҥ эш-нӧкӧрин ӱредӱге кычырып кӧрӱгер. Кижини билип алганын тӧрӧндӧӧрине эмезе најыларына куучындазын деп кӱӱнзедигер (Иоанн 1:40—45). Канайып? Ого мындый сурактар бер: «Сен бу чындыкты тӧрӧӧндӧриҥе канайып јартаар эдиҥ?» эмезе «Бу чындыкты најыҥа јартаарга, кандый ӱлгер тузаланар эдиҥ?» Анайып, ӱренип турган кижи Агару Бичиктиҥ чындыктарын улуска куучындаарга ӱренип јат. А качан кижи ӱзе  некелтелерге келижип турза, ол јуунла кожо јарлаарга белен болуп јат. Анайда ок ӱренип турган кижинеҥ оныҥ таныштарыныҥ ортозында Агару Бичик ӱренип турган улус бар ба деп, сурап угарга јараар. Андый улус бар болзо, олорго «Агару Бичикти ӱренери канайып ӧдӧт?» * деген видеоны кӧргӱзерге, ӱренип турган кижи слерди олорло јолыгыштырып болор бо деп сурагар.

10. 1 Фессалоникадагыларга 2:7, 8-ле болзо, бис Павелдеҥ кандый тем алар аргалу?

¹⁰ Ӱренип турган кижиге акту јӱрегистеҥ ајару эдип турактар. Олорды бистиҥ ака-эјелер болотон улус деп кӧрӧр керек. (1 Фессалоникадагыларга 2:7, 8 кычырыгар.) Олорго бойлорыныҥ јӱрӱмин солып, Иеговага иштеерге јеҥил эмес. Оныҥ учун олорго јууннаҥ чын најылар таап аларга болужыгар. Бойоор до ого најы болугар. Јӱк ле ӱредӱ ӧткӱрип турган ӧйдӧ эмес, је ӧскӧ дӧ кӱнде ого телефон согуп, СМС-тар бичип, кыска да ӧйгӧ ого кирип турзаар, ол бойын керектӱ деп сезер.

11. Ӱренип турган кижиге нениҥ учун јуундагы улусла најылажар керек?

¹¹ Африкада, «Баланы бастыра деремне чыдадат» деп, кеп сӧс бар. А бу кеп сӧсти бис мынайып айдарыс: «Ӱренип турган кижини бастыра јуун ӧскӱрет». Оныҥ учун ӱренип турган кижини ака-эјелерле таныштырар керек. Ака-эјелерле куучындашканы ого јакшы тузазын јетирер, анайда ок ого кӧгӱс ле эмоциональный јанынаҥ болуш болор. Бис оны јуунга ла бистиҥ кӧгӱс билеге кожулып, бистиҥ јалакай ла сӱӱштӱ ака-эјелердиҥ ортозында ого јарап турзын деп кӱӱнзеп јадыс. Ол тушта ого Иеговага сӱӱжин ӧскӱрерге чаптыгын јетирип турган алдындагы нӧкӧрлӧринеҥ айрыларга јеҥил болор (Укаа 13:20). Је алдындагы нӧкӧрлӧри оныла куучындашпай барза, оны Иегованыҥ организациязында чын најылар сакып јат деп, ол билер болор (Марк 10:29, 30; 1 Петр 4:4).

12. Ӱренип турган кижиге учурланары ла чӧҥӱрилери керегинде нениҥ учун айдар керек?

¹² Ӱренип турган кижиге бойыныҥ јӱрӱмин Иеговага учурлап, сууга чӧҥӱрилзин деп ачыгынча ла айдар керек. Не дезе бис оны Христостыҥ ӱренчиги болзын деп кӱӱнзеп јадыс. Ӱредӱ канча да айдыҥ туркунына ӧткӱрилип, анчада ла ол јуунныҥ туштажуларына јӱрӱп баштаган болзо, бистиҥ ӱредӱбистиҥ амадузы — оны Иегованыҥ Керечили болзын деп белетеп турганысты ол оҥдоп турзын.

13. Чӧҥӱрилерге турган кажы ла кижи кандый кӧгӱс алтамдар эдет?

 ¹³ Чӧҥӱрилерге турган кажы ла кижи кандый кӧгӱс алтамдар эдет? Озо баштап ол Иегованы билип алат. Оны сӱӱп, ого бӱдӱмјизин тыҥыдат (Иоанн 3:16; 17:3). Оноҥ ол Иеговала, јуундагы ака-эјелерле најылажып баштайт (Евр. 10:24, 25; Иак. 4:8). Канча да ӧй ӧткӧн кийнинде ол бойыныҥ јаман кылык-јаҥдарынаҥ айрылып, кинчегин алынат (Ап. ижи 3:19). Бӱдӱмјизи тыҥыганынаҥ улам, ол чындыкты ӧскӧ улуска куучындайт (2 Кор. 4:13). Учында ол бойыныҥ јӱрӱмин Иеговага учурлап, сууга чӧҥӱрилет (1 Петр 3:21; 4:2). Бу бистиҥ ончобыска сӱреен сӱӱнчилӱ кӱн болот! Ӱренип турган кижини кажы ла эткен кӧгӱс алтамы учун акту јӱректеҥ мактап, оноҥ ары кӧгӱс алтамдар этсин деп кӱӱнзедигер.

14. Ӱренип турган кижи кӧгӱс јанынаҥ ӧзӱп турган ба деп, канайып билип аларга јараар?

¹⁴ Кижини учурланарга ла чӧҥӱрилерге белетеп тура, биске чыдамкай болор керек. Је биске ол Иеговага иштеерге кӱӱнзеп турган ба деп, билип алар керек. Ол Иисустыҥ јасактарын бӱдӱрерге албаданып турган ба? Эмезе ого Агару Бичиктеҥ јӱк ле јаҥы неме билип аларга јарап турган ба?

15. Ӱренип турган кижи кӧгӱс јанынаҥ ӧзӱп турган ба деп билип аларга, кандый сурактар болужар?

¹⁵ Ӱренип турган кижи кӧгӱс јанынаҥ ӧзӱп турган ба деп оҥдоп аларга, бойоорго кезикте мындый сурактар беригер. Темдектезе: Иеговага сезимдерин куучындап турган ба? Ол Иеговага мӱргӱйт пе? (Сар. 116:1, 2). Агару Бичикти кычырарга ого јарап јат па? (Сар. 119:97). Ол јуунныҥ туштажуларына јаантайын келип турган ба? (Сар. 22:22). Јӱрӱминде кандый бир солынталар эткен бе? (Сар. 119:112). Агару Бичиктеги чындыктарды ол бойыныҥ тӧрӧӧн-тугаандарына ла најыларына куучындап турган ба? (Сар. 9:1). Је эҥ јаан учурлузы — ол Иегованыҥ Керечили болорго кӱӱнзейт пе? (Сар. 40:8). Бу сурактардыҥ карууларынаҥ кижи кӧгӱс јанынаҥ ӧспӧй турган деп билип алзагар, шылтагын неде болгонын билип, оныла ачык-јарык, јалакай куучындажыгар *.

16. Ӱредӱни токтодор керек деп канайып оҥдоор?

¹⁶ Кезикте кижиле ӱредӱни оноҥ ары ӧткӱрер  бе, јок по деп сурап туругар: «Ол ӱредӱлерге белетенип турган ба? Јуунныҥ туштажуларына јӱрерге кӱӱнзейт пе? Јаман кылык-јаҥнаҥ айрылган ба? Тӧгӱн кудай јаҥдарды артыргызып салган ба?» Бу бастыра сурактардыҥ каруузы «јок» болзо, оноҥ ары ӱредӱни ӧткӱретени — ӱлӱштелерге коркып турган кижини эжинерге ӱредип турганына тӱҥей! Оныҥ учун ӱренип турган кижи нени билип алганын баалабай, јӱрӱминде солынталар эдерге кӱӱнзебей турган болзо, андый кижиле оноҥ ары ӱредӱни ӧткӱрер бе?

17. 1 Тимофей 4:16-ла болзо, ӱредӱ ӧткӱрип турган кижиге нени эдер керек?

¹⁷ Бис ӱренчиктер белетеер ишти албаданып эдедис ле ӱренип турган улузыска кӧгӱс јанынаҥ ӧзӧргӧ лӧ чӧҥӱрилерге болужып јадыс. Оныҥ учун ӱредӱ ӧткӱрип јаткан ӧйдӧ Кудайдыҥ Сӧзин тузаланып, бӱдӱмјилӱ ле кӧдӱриҥилӱ ӱредедис. Анайда ок бис ӱредип турган кижини најыларды јууннаҥ таап алзын деп кӱӱнзедедис. Бис учурланарыныҥ ла чӧҥӱрилериниҥ јаан учурлузын кӧргӱзип, ӱредип турган улузыстыҥ кӧгӱс ӧзӱми керегинде сананып јадыс. (« Кижини сууга чӧҥӱрилерине белетеерге, нени эдер керек?» деген рамканы кӧрӱгер.) Улустыҥ јӱрӱмин аргадаар иште туружып турганыска бис тыҥ сӱӱнип јадыс! Оныҥ учун Агару Бичикти ӱренип турган кижиге сууга чӧҥӱрилерге болужарга бастыра ийде-кӱчистеҥ албаданактар!