1, 2. а) Кезик башкарулар Кудайдыҥ ишчилерине удура нени эткилейт? А олор канайдат? б) Истежӱлер де болзо, канайып ырысту јӱрер? (Кадарындагы фотојуруктарды кӧрӱгер.)

 БӰГӰНГИ кӱнде 30-таҥ ажыра ороондордо ло јерлерде бистиҥ ижиске токтодулар тургузылган эмезе ижисти чек токтодып салган. Кезик ороондордо ака-эјелерди тӱрмелеп те јат. Бу улус нени јаман эткен? Иегованыҥ кӧрӱмиле болзо, олор бир де јаман керектер этпеген. Карын бу улус Агару Бичикти кычырып јат, оны ӱренет, билип алганын улуска куучындайт, бойлорыныҥ туштажуларына јӱргӱлейт. Анайда ок олор политиканыҥ сурактарына бир де киришпейдилер. Андый да болзо, бистиҥ ака-эјелерис мындый истежӱлер де болуп турарда, Иегованыҥ кӧзине јек јок артып, Кудайына чындык артат. Олор бого сӱреен тыҥ сӱӱнип јат.

² Слер јӧрмӧлдиҥ кадарындагы фотолорды алдында кӧргӧн лӧ болороор. Ајардаар ба, бу јалтанбас Керечилердиҥ сӱӱнчилӱ чырайларын? Олор нениҥ учун сӱӱнчилӱ? Нениҥ учун дезе Иегова олорды јек јок артып турганы учун јарадып јат деп билер (Сар. 15:1, 2). Иисус бойы айткан: «Чындык учун улуска кыстадып јӱргендер кежиктӱ... [...] Сӱӱнигер, јыргагар: кайралыгар улу!» (Матф. 5:10—12).

3. Апостолдордыҥ ижи 4:19, 20-ле болзо, истежӱлердиҥ ӧйинде апостолдор нени этти? Нениҥ учун?

³ Бӱгӱнги кӱнде бистиҥ ака-эјелерди истежип турганына бис кайкабай јадыс. Баштапкы чакта апостолдор Христос керегинде јарлап турала, истежӱлерге база табарткан. Олорды иудейлердиҥ Ӱстӱги јаргызы  Иисустыҥ адынаҥ неме айтпагар деп канча катап токтоткон (Ап. ижи 4:18; 5:27, 28, 40). Је апостолдор јарлабай токтоп калды ба? (Апостолдордыҥ ижи 4:19, 20 кычырыгар.) Јок, олор эҥ бийик јаҥду Иегованыҥ, Христос керегинде «улуска јарлыктазын ла керелезин» деген јакарузын бӱдӱрген (Ап. ижи 10:42). Оныҥ учун Пётр ла Иоанн јалтанбай, ончо апостолдордыҥ адынаҥ јаргычыларга эмес, је Иеговага багынып, Христос керегинде оноҥ ло ары јарлаарыс деп айдышкан. Ӧскӧртӧ айтса, олор јаргычыларга: «Слер бойоордыҥ јаҥаарды Иегованыҥ јаҥынаҥ бийик деп бодоп турганаар ба?» — деген.

4. Апостолдор чындык христиандарга кандый тем кӧргӱскен? Бис олордоҥ неге ӱренер аргалу? (Апостолдордыҥ ижи 5:27—29).

⁴ Апостолдор јамылу улуска: «Бис Кудайга улустаҥ артык багар учурлу» — деп айтканыла, чындык христиандарга сӱреен јакшы тем кӧргӱскен. (Апостолдордыҥ ижи 5:27—29, ЈТ кычырыгар.) Олорды мынаҥ улам камчылап саларда, олор «Иисус Кайраканныҥ ады учун базындырдыс деп, сӱӱнгилеп, оток-кӱреедеҥ чыгып», оноҥ ло ары јарлап јӱрдилер (Ап. ижи 5:40—42).

5. Биске кандый сурактардыҥ каруузын билер керек?

⁵ Апостолдордыҥ бу мындый кӧрӱминеҥ улам мындый сурактар чыгат. Темдектезе, апостолдордыҥ «Кудайга улустаҥ артык багар учурлу» деген санаазы «кажы ла кижи бийик јаҥдарга баксын» деген библиялык јакаруга келижип турган ба? (Рим. 13:1, ЈТ). Анайда ок бис «јамылуларга ла јаҥдарга баксын» деген јакаруны бӱдӱрип, бу ла ок ӧйдӧ бистиҥ Эҥ Бийик Башкараачыга, Кудайга, канайып чындык артар аргалу? (Тит. 3:1).

6. а) Римдегилерге 13:1-де айдылган «бийик јаҥдар» олор кемдер? Бис олорго канайып баштанар учурлу? б) Улустыҥ башкаруларында нези тӱҥей?

⁶ Римдегилерге 13:1 (ЈТ) кычырыгар. Бу ӱлгерде «бийик јаҥдар» деген  сӧс улустыҥ башкаруларын темдектейт. Христиандар олорго багынар учурлу. Нениҥ учун дезе јаҥдар ороондо кандый бир чур-чуманак эш кӧдӱрилбезин деп ле улус јасактар буспазын деп кӧргӱлейт. Кезикте керек дезе, Иегованыҥ ишчилерин де корулайт (Ачыл. 12:16). Оныҥ да учун бис олорго налогтор ло пошлиналар тӧлӧп, тоомјылу баштанар учурлу (Рим. 13:7). Је олордо андый јаҥ, Иегова бербеген болзо, болбос эди. Бу принципти Иисус Христос Римниҥ башкараачызында, Понтий Пилатта, шылуда болордо, јарт айдып берген. Пилаттыҥ айтканыла болзо, бастыра јаҥ оныҥ колында. Ол Иисусты јаргылап салар аргалу, ол эмезе божодып ийер аргалу. Иисус ого айткан: «Сеге ӧрӧртинеҥ берилбеген болзо, Мениҥ бажымды билер јаҥыҥ јок болор эди» (Иоанн 19:11). Анайып ла ок бӱгӱнги кӱнниҥ башкараачыларына јаҥды ӧрӧ турган Кудай берет. Оныҥ учун ончо јаҥ тӱҥей ле олордыҥ колында эмес.

7. Бис кандый учуралдарда башкараачыларга багынбай јадыс? Олор нени ундыбас учурлу?

⁷ Христиандар башчыларга, олордыҥ јасактары Кудайдыҥ јасактарына удура эмес болзо, багынып јат. Је качан Иеговага јарабай турган немени этсин дезе ол эмезе Иегованыҥ этсин деп јакарганын бӱдӱрерге токтодып турза, бис олорго багынбай јадыс. Темдектезе, јиит уулдарды черӱге барарга алдыртып јат b. «Јаҥы телекей» деп кӧчӱрмени ле Агару Бичикке тӧзӧлӧнгӧн бичиктерди тузаланарга јаратпай јадылар. Анайда ок јарлаар ишке туружарга ла Кудайга бажырарына ла јуулыжарга јаратпай јат. Башкарулар бойыныҥ јаҥын јастыра тузаланып, Христостыҥ ӱренчиктерин истежип турза, Кудайдыҥ алдына кату каруузына турар! (Эккл. 5:8). Иегова ӱзе кӧрӱп јат!

8. «Бийик јаҥдардыҥ» ла «эҥ бийик јаҥныҥ» нези башка?

⁸ Римдегилерге 13:1-де айдылган «бийик» деген сӧс «эҥ бийигин» кӧргӱспей јат. Агару Бичикте кижиниҥ башкарулары «бийик јаҥдулар» деп айдылып та турган болзо, «оноҥ бийик јаҥ» база бар деп айдылат. Анда Иегова Кудай «Эҥ Бийик» деп кӧп катап айдылган (Дан. 7:18, 22, 25, 27).

9. Судурчы Даниил кандый кӧрӱлтелер кӧргӧн?

⁹ Судурчы Даниилге Иегованыҥ јаҥы ончо бар јаҥдарга кӧрӧ, эҥ ле бийик деп кӧргӱзилген. Озо баштап Даниил «талайдаҥ коркышту јаан тӧрт тынду чыкканын» кӧргӧн. Бу тындулар алдындагы ӧйдӧ болгон телекейлик державаларды темдектеген: Вавилонды, Мидо-Персияны, Грецияны ла Римди. Римди дезе бистиҥ ӧйдӧ башкарып турган — Англо-Американский держава солыган (Дан. 7:1—3, 17). Оноҥ судурчы теҥеридеги ширеезинде отурган Иегова Кудайды кӧрӱп ийген (Дан. 7:9, 10). Даниилдиҥ оноҥ ары кӧргӧн кӧрӱлтези бӱгӱнги кӱнниҥ башкаруларына чочыдылу болот.

10. Иегова јерле башкарар јаҥды кемге берер? Мынаҥ бис Иегова керегинде нени билип алдыс? (Даниил 7:13, 14, 27).

¹⁰ Даниил 7:13, 14, 27 кычырыгар. Иегова јердеги башкарулардыҥ јаҥын айрып, олордоҥ бийик ийде-кӱчтӱлерге берип ийер. Кемдерге? «Кижи уулына тӱҥей та кемге де», Иисус Христоско,  анайда ок «Эҥ Бийиктиҥ агаруларына», 144 000-га, берип ийер. Олор «јажын-чакка» башкарар (Дан. 7:18). Айдарда, Иегова — Эҥ бийик јаҥду. Нениҥ учун дезе мындый јаан солынталарды јӱк ле ол эдер аргалу.

11. Албатыларды Иегова башкарып турганы керегинде Даниил база нени бичиген?

¹¹ Даниилдиҥ «теҥериниҥ Кудайы» «каандарды аҥтарат, каандарды тургузат» деген сӧстӧри чын деп, оныҥ кӧргӧн кӧрӱлтезинеҥ јарт кӧрӱнип јат. Анайда ок ол мындый сӧстӧр бичиген: «Улустыҥ јаҥдары Эҥ Бийик Кудайдыҥ колында, ол башкарар јаҥды кемге берерге турган ого берет» (Дан. 2:19—21; 4:17). Тӱӱкини кӧрзӧ, Иегова башкараачыларды аҥтарган ла тургускан учуралдар болгон бо? Эйе, болгон. Јаҥыс катап эмес!

12. Иегова каандарды канайып аҥтарган? Темдер куучындап беригер. (Јурукты кӧрӱгер.)

¹² Иегова бойын «бийик јаҥдардаҥ» канча кире кӱчтӱ деп, кӧп катап кӧргӱскен. Ӱч тем кӧрӱп ийектер. Баштапкызында: Египеттиҥ фараоны Кудайдыҥ албатызын кулданып, олорды чек божодор кӱӱни јок болгон. Је Иегова албатызын јайымдап алган. Фараонныҥ бойын Кызыл талайда чӧҥдӱрип салган (Чыг. 14:26—28; Сар. 136:15). Экинчи учуралда, Вавилонныҥ Валтасар деп кааны коркышту јаан јыргал ӧткӱрип, бойын «теҥериниҥ Кайраканынаҥ» бийик деп мактанган. Ол бойы да, оныҥ айылчылары да Иегованы эмес, је «алтын-мӧҥӱн кудайларын мактагандар» (Дан. 5:22, 23). Иегова бу бийиркек каанды уйатка тӱжӱрип салган. «Ол ло тӱнде Валтасар... божоп калган», оныҥ Каандыгы «мидяндарга ла перстерге берилген» (Дан. 5:28, 30, 31). Ӱчинчи учуралда, Палестинаныҥ Ирод Агриппа I кааны апостол Иаковты ӧлтӱрген, апостол Пётрды Иаков ло чылап ӧлтӱрерге тӱрмеге отургызып салган. Је Иегова оныҥ калју санаазын токтодорго, ангелди ийген. «Кайраканныҥ ангели оны ол ло тарый јыга со[гуп]» ийерде ол божоп калган (Ап. ижи 12:1—5, 21—23).

13. Иегова башкараачылардыҥ коалицияларын канайып оодо согуп салган?

¹³ Иегова башкараачылардыҥ бӱдӱн  коалицияларын да јоголтып саларын кӧргӱскен. Темдектезе, израильтяндарга Ханаан јердиҥ кӧп саба јерин јуулап аларга ла коркышту јаан биригӱ тӧзӧп алган 31 каанды оодо согорго болушкан (Иис. Н. 11:4—6, 20; 12:1, 7, 24). Анайда ок Иегова Бен-Хадад деп каанныҥ черӱзин ле Сирияныҥ 32 башкараачызын оодо согуп салган (1 Каан. 20:1, 26—29).

14, 15. а) Навуходоносор ло Дарий каандар Иегованыҥ башкарар јаҥы керегинде нени айткан? б) Сарнаачы Иегова ла оныҥ албатызы керегинде нени айткан?

¹⁴ Иегова бойын Эҥ Бийик деп, ӧскӧ дӧ учуралдарда кӧргӱскен. Бир катап Вавилонныҥ кааны, Навуходоносор, Иегованы мактаардыҥ ордына бойыныҥ ийде-кӱчиле, магыла мактанган. Оныҥ учун Иегова оны јӱӱлтип салган. Навуходоносордыҥ сагыжы кирип келерде, ол «Эҥ Бийик Кудайды мактап», «оныҥ башкарузы јажын-чакка турар» деп айткан. Анайда ок: «Ого кем де, не де чаптык јетирип болбос» — деп айткан (Дан. 4:30, 33—35). Иегова Даниилди карагулалардаҥ аргадаарда, Дарий каан «бастыра улус Даниилдиҥ Кудайынаҥ айап јӱрзин, нениҥ учун дезе ол јажын-чакка јӱрген тирӱ Кудай» деп јасак чыгарган. Каан дезе, Иегова керегинде айткан: «Оныҥ каандыгы качан да јоголбос, оныҥ башкарузы јажын-чакка болор» (Дан. 6:7—10, 19—22, 26, 27).

¹⁵ Сарнаачы айткан: «Иегова албатылардыҥ санаазын ла улустыҥ амадуларын бузып салат. Кудайы — Иегова болгон калык ырысту. Бу албаты Кудайдыҥ энчизи болуп талдалган» (Сар. 33:10, 12). Бу ончо немени билип алала, Кудайдыҥ кӧзинде јик јок болорго албаданарыс!

16. Улу тӱбек керегинде сананзаас, бис неге алаҥзыбай јадыс? Нениҥ учун? (Јурукты кӧрӱгер.)

¹⁶ Иегова алдындагы ӧйдӧ бойыныҥ  албатызын канайып корулап алганын кӧрдис. А келер ӧйдӧ не болор? Удабас, јууктап келеткен «улу тӱбектиҥ» ӧйинде, Иегова бойыныҥ чындык ишчилерин корулап алар деп, бир де алаҥзыбай јадыс (Матф. 24:21; Дан. 12:1). Качан бастыра јердиҥ ӱстинде Магог јериниҥ Гогы, ӧскӧртӧ айтса, албатылардыҥ коалициязы, Иегованыҥ чындык улузына табару этсе, Кудай бойыныҥ албатызын корулап алар. Керек дезе, бу коалицияга ООН-ныҥ 193 орооны да кожулза, олордыҥ ийде-кӱчи Эҥ Бийик Кудайдыҥ ла оныҥ теҥеридеги черӱзиниҥ ийде-кӱчине бир де турбас. Иегова биске сӧзин берип јат: «Мен магымды ла агару болгонымды кӧргӱзерим, кӧп албатылар алдында бойымды ачарым. Анайып, олор мени Иегова деп билип алар» (Иез. 38:14—16, 23; Сар. 46:10).

17. Агару Бичик аайынча, келер ӧйдӧ јердиҥ каандарыла не болор, ак-чек улусла не болор?

¹⁷ Гог табару этсе, Иегова Армагеддон деп јуу-согушты баштаар. Ол анда «бастыра телекейдиҥ каандарын» јоголтып салар (Ачыл. 16:14, 16; 19:19—21). Кудайдыҥ ӧштӱлери јоголып калза, «чындык улус јерде јадар, ак-чек улус ондо артар» (Укаа 2:21).

18. Кӧп чындык христиандар неге белен болгон? Нениҥ учун? (Даниил 3:28).

¹⁸ Канча јӱс јылдардыҥ туркунына кӧп чындык христиандар бойыныҥ јайымын да јылыйтарга, јӱрӱмин де берерге бир де коркыбаган. Нениҥ учун дезе олор Эҥ Бийик башкараачыга, Иегова Кудайына, чындык болгон. Бу улус Шадрах, Мешах ла Аведнего деген ӱч еврей уулга тӱҥей. Олор улустыҥ башкараачыларына садынбаган. Оныҥ учун Эҥ Бийик Кудай олорды отту печкенеҥ аргадап алган. (Даниил 3:28 кычырыгар.)

19. Иегова улусты неге тӧзӧлӧнип јаргылаар?

¹⁹ «Иегова албатыларга јаргы чыгарып салар. Јаргыла мени, Иегова, мениҥ чындыгым аайынча, мениҥ јек јогым аайынча» (Сар. 7:8). Бу сӧстӧрлӧ, Давид каан бис Кудайдыҥ алдында јек јок болор учурлу деп айткан. База ӧскӧ сарында ол: «Јек јок болоры ла чындык болоры мени корулазын» — деп сураган (Сар. 25:21). Не де болзо, Иеговага чындык артарынаҥ артык неме јок. Бис Иеговага чындык артсаас, сарнаачы чылап мынайып айдарыс: «Јек јок јӱрген ле Иегованыҥ јасагыла јӱрген кижи ырысту» (Сар. 119:1).