Озогы израильтяндар јуулашкан, а бистер нениҥ учун јуулашпай турганыс?
«СЛЕРДИҤ бир-бирӱгер ле Англияга эмезе Францияга удура јуулашпаза, ончогор ӧлӧрӧӧр!» — деп, нацистский офицер тӱрмеде отурган Иегованыҥ Керечилерине багырып ийди. Оныҥ јанында ал-камык мылтык-јепселдӱ эсэсовецтер де турган болзо, олордыҥ кемизи де оноҥ коркыбаган. Кандый јалтанбас улус! Бу темнеҥ Иегованыҥ Керечилери улустыҥ баштаган јуу-согуштарына кандый кӧрӱмдӱ болгоны јарт кӧрӱнет. Бис олорго турушпай јадыс. Керек дезе, бистерди ӧлӱмле де коркытса, бис бу телекейдиҥ блааш-тартыжуларына киришпей јадыс.
Је мындый кӧрӱмле кезик христиандар јӧпсинбей јат. Олор Кудайга бӱдӱп турган кижи бойыныҥ тӧрӧлин корулаар учурлу деп айдат. Анайда ок: «Алдында Кудайдыҥ еврей албатызы јуулашкан, а эмди христиандар нениҥ учун јуулашпайтан?» — деп сананар болор. Слер бу суракка кандый каруу берер эдеер? Мынайып айдарга јараар: «Алдындагы еврей албатыныҥ айалгазы эмдиги Кудайдыҥ албатызыныҥ айалгазынаҥ чек башка». Беш шылтак кӧрӱп ийектер.
1. КУДАЙДЫҤ БАСТЫРА ИШЧИЛЕРИ БИР АЛБАТЫ БОЛГОН
Озогы ӧйдӧ Иегова бойыныҥ ишчилерин бир албаты эдип јууп алган. Ол албаты — Израиль. Кудай израильтяндарга: «Албатылар ортозында мениҥ аҥылу калыгым болороор» — деп айткан (Чыг. 19:5). Анайда ок ол олорго јерлер берип салган. Оныҥ учун Иегова бойыныҥ албатызын ӧскӧ албатыга удура јуулашсын деп јакарза, олор бойыныҥ карындаштарыла јуулашпаган да, олорды ӧлтӱрбеген де a.
Эмдиги ӧйдӧ Кудайдыҥ албатызы «ончо уктардаҥ, ӱйелердеҥ, калыктардаҥ јуулган» (Ачыл. 7:9). Оныҥ учун Иегованыҥ ишчилери јуулажарга барза, олорго ака-эјелерине удура јуулажарга, олорды ӧлтӱрерге келижер эди. Мыны сананарга да коркымчылу!
2. ИЕГОВА ИЗРАИЛЬТЯНДАРГА ЈУУЛАШСЫН ДЕП БОЙЫ ЈАКАРАТАН
Озогы ӧйдӧ Иегова албатызына качан јуулажатанын ла нениҥ учун јуулажатанын бойы айдып беретен. Темдектезе, ханаан албатылар кӧрмӧстӧргӧ бажырып, балыр јӱрӱм јӱрӱп, балдарын тайылгага берип турарда, израильтяндарга олорды јоголтсын деп јакарган. Нениҥ учун дезе олордыҥ јаман керектери Ханаан јерде јадатан Кудайдыҥ албатызына каршу јетирген (Лев. 18:24, 25). Кийнинде, израильтяндар Ханаан јерде јадып турарда, олорды ӧштӱлердеҥ коруланзын деп, Иегова јарадып туратан (2 Сам. 5:17—25). Албаты јуулажар ба, јуулашпас па Иегова јӱк бойы кӧргӧн. Је израильтяндар баш билинип, бойлоры јуулажып барза, учы-тӱби коркышту јаман болотон (Тоол. 14:41—45; 2 Лет. 35:20—24).
Эмдиги ӧйдӧ Иегова улусты јуулашсын деп айтпай јат. Албатылар Кудайдыҥ кӱӱни учун эмес, бойыныҥ кӱӱни учун тартыжарга јуулажат. Темдектезе, олор јаҥы јерлер аларга ла экономиказы ла политиказы учун јуулажат. Кезиги дезе бис Кудай учун јуулажып, оныҥ ӧштӱлерин ӧлтӱрерге ле бойыстыҥ бӱдӱмјисти корулаарга јуулажадыс дежет. Је Иегова ӧштӱлерин бойы јоголтор, ишчилерин бойы корулаар. Бу келер ӧйдӧ — Армагеддон деп јууда болор (Ачыл. 16:14, 16). Бу јууда улус эмес, оныҥ теҥеридеги јайаандары — ангелдер туружар (Ачыл. 19:11—15).
3. ИЗРАИЛЬТЯНДАР КУДАЙГА БӰТКЕН УЛУСТЫ ӦЛТӰРБЕГЕН
Озогы ӧйдӧ Кудай Иерихондо Раавты ла оныҥ билезин корулап алганы чылап, эмдиги јуу-согуштар Кудайдыҥ чындык ишчилерин килеп турган ба?
Озогы ӧйдӧ Израильдиҥ албатызы Иегова кемдерди ӧлӱмге јаргылаар, јӱк ле олорды ӧлтӱретен. Је Кудайга бӱткен улусты килеп, тирӱ артыргызып салатан. Темдектезе, Кудай Иерихонды јоголтсын деп јакыган да болзо, израильтяндар, Раав ла оныҥ јуук улузын тирӱ артыргыскан. Нениҥ учун дезе Раав Иеговага сӱреен тыҥ бӱткен (Иис. Н. 2:9—16; 6:16, 17). Кийнинде дезе Иегова бӱдӱн каланы, Гаваонды, андагы албаты оны тоогоны учун јоголтпогон (Иис. Н. 9:3—9, 17—19).
Эмдиги ӧйдӧ јуулажып турган улус кемди де килебей јат. Кудайга бӱдӱп те турган болзын, бӱтпей де турган болзын. Кӧп сабада бу мындый јуу-согуштарда тегин албаты божойт.
4. ИЗРАИЛЬТЯНДАР КУДАЙДЫҤ ЈАКАРГАНЫЛА ЈУУЛАЖАТАН
Озогы ӧйдӧ Израиль албатыныҥ јуу-согуштары Иегованыҥ башкартузыла болуп туратан. Оныҥ учун израильтяндар јуулажардаҥ озо ӧштӱлерине «амыр-энчӱниҥ јӧптӧжӱзин» јарлаар учурлу болгон (Јаҥ. т. 20:10). Анайда ок Иегова јуучылдарды эт-кан јанынаҥ ла нравственный јанынаҥ ару болзын деп некеген (Јаҥ. т. 23:9—14). Нениҥ учун дезе јанында јаткан албатылардыҥ эр улузы олјолоп алган ӱй улусты базынып туратан. Је Иегова мындый немени чек јаратпаган. Бого коштой израильдиҥ јуучылы ӱй кижини олјого алган болзо, оныла јӱк ле бир айдаҥ биле тӧзӧӧр аргалу болгон (Јаҥ. т. 21:10—13).
Эмдиги ӧйдӧ кӧп саба ороондор канайып јуулажатаны јанынаҥ телекейлик јӧптӧжӱлер тургузат. Бу јӧптӧжӱлердиҥ амадузы — амыр јаткан улусты корулаары да болзо, је олор кӧп сабада бӱдӱрилбей јат.
5. КУДАЙ АЛБАТЫЗЫ УЧУН БОЙЫ ЈУУЛАШКАН
Кудай Иерихонныҥ јанында албатызы учун јуулашканы чылап, эмдиги ӧйдӧ кажы бир албаты учун јуулажат па?
Озогы ӧйдӧ Иегова Израиль албатыны ӧштӱлерин јеҥип алзын деп, кандый бир кайкалдар эдип туратан. Темдектезе Кудай израильтяндарга Иерихонды јеҥип аларга канайып болушкан? Израиль албаты Иегованыҥ јакарузыла јуулажып чыгарга, тыҥ кыйгырыжып ийерде, каланыҥ стенелери јемириле берген. Мынайып, олор каланы јеп-јеҥил јуулап алган (Иис. Н. 6:20). А аморейлерди јеҥип аларга, Иегова канайып болушкан? «Иегова олордыҥ ӱстине... јаан мӧндӱр таштап турды. Израильдиҥ уулдарыныҥ кылыжынаҥ ӧлгӧнинеҥ кӧрӧ мӧндӱрдеҥ ӧлгӧни кӧп болды» (Иис. Н. 10:6—11).
Эмдиги ӧйдӧ Иегова кажы бир албаты учун јуулашпай јат. Иисус Христостыҥ колында оныҥ Каандыгы «бу телекейдиҥ каандыктары ошкош эмес, ЈТ» (Иоанн 18:36). Бу телекейдиҥ башкарузы бӱткӱлинче Сатананыҥ колында. Аайы-баажы јок јуу-согуштар оныҥ калју јӱзин кӧргӱзип јат (Лука 4:5, 6; 1 Иоанн 5:19).
ЧЫНДЫК ХРИСТИАНДАР — АМЫР ЈАЙАП ЈАТ
Бӱгӱнги айалга јебрен Израильдеги айалгага кӧрӧ, чек башка. Је бис јӱк ле бу шылтактаҥ улам јуулашпай турган эмезис, ӧскӧ дӧ шылтактар бар. Темдектезе, Кудайдыҥ судурларын кӧрзӧ, калганчы кӱндерде оныҥ албатызы «јуулажарга ӱренбес» те, јуу-согуштарга турушпас та (Иса. 2:2—4). Анайда ок Иисус бойыныҥ ӱренчиктерине: «Слер телекейдеҥ эмес» — деп айткан (Иоанн 15:19). Андый болордо, Иисустыҥ ӱренчиктери кандый да тӱймеен кӧдӱрилзе, кемниҥ де јанын талдабай јадылар.
Анайда ок Христос бойыныҥ ӱренчиктерин чугулга, ачынышка, ӧштӧшкӧ экелетен санааларды бажына кийдирбезин деп ӱреткен (Матф. 5:21, 22). Бого коштой оныҥ ӱренчиктери амыр јайап, ӧштӱлерин сӱӱр учурлу (Матф. 5:9, 44).
Иисустыҥ бу сӧстӧрин канайып тузаланар? Бистиҥ кемибис те јуулажарга кӱӱнзебес эмей. Је бис јуунда та кемди де јаргылап, јаратпай турган болзоос нени эдерис? Андый сезимдердеҥ айрыларга тыҥ албаданарыс! (Иак. 4:1, 11).
Албатылардыҥ ортозында тӱймеен кӧдӱрилзе, та кемниҥ де јанын талдаганча, бис ака-эјелердиҥ ортозында сӱӱш ле амыр-энчӱ болзын деп албаданадыс (Иоанн 13:34, 35). Оныҥ учун бастыра јердиҥ ӱстинде Иегова јуу-согушты токтотпогончо, бастыра кӱчистеҥ нейтралитетти буспаска јӱткӱктер (Сар. 46:9).
a Кезикте Израильдиҥ уктары бой-бойыла јуулажып туратан. Иегова мындый јуу-согуштарды бир де јаратпаган (1 Каан. 12:24). Је јӱк кезик учуралдарда јараткан. Нениҥ учун дезе Израильдиҥ кезик уктары Иеговага чындык болбогон, ол эмезе коркышту јаман кинчектер эткен (Јарг. 20:3—35; 2 Лет. 13:3—18; 25:14—22; 28:1—8).
