1. «Кудайды бедирегендер» ол кандый улус? Олор нениҥ учун ырысту?

 ЧЫННАҤ ЛА ырысту кижи јаантайын сӱӱнчилӱ јӱрет. Ол јӱк бир-эки ле кӱн сӱӱнчилӱ јӱрӱп турган эмес. Андый кижиниҥ сӱӱнчизи бастыра јӱрӱмине улалат. Канайып? Иисус бу керегинде мындый сӧстӧр айткан: «Кудайды бедирегендер ырысту» (Матф. 5:3, ЈТ). Иисус улусты бойыныҥ Јайаачызын, Иегова Кудайды, билерге турган эдип ле ого бажырарга кӱӱнзеп турган эдип јайалганын билген. А Иегова Кудай «ырысту Кудай» болордо, ого бажырып турган улус база ырысту болор аргалу (1 Тим. 1:11, ЈТ).

2, 3. а) Иисустыҥ сӧстӧриле болзо, кандый кижи ырысту? б) Бу јӧрмӧлдӧ бис нени шӱӱжерис? Оны нениҥ учун шӱӱжер керек?

² Ырысту болорго кижиниҥ јӱрӱми ӱзе јанынаҥ јакшы болор керек пе? Јок. Иисус айткан: «Ыйлап јӱргендер кежиктӱ [«ырысту», ЈТ]». Бу дегежин бойыныҥ кинчектери учун ла уур јӱрӱми учун ыйлап јӱргендер де ырысту болор аргалу деп кӧргӱзет. Анайда ок Иисус: «Чындык учун улуска кыстадып јӱргендер» ле оныҥ ады учун улуска «јаман айттыртып» јӱргендер ырысту — деп айткан (Матф. 5:4, 10, 11). Је мындый айалгадагы улус канайып сӱӱнчилӱ болотон?

³ Ырысту кижи болорго, јӱрӱмис ӱзе јанынаҥ јакшы болор керек эмес, је озо ло баштап биске кӧгӱс јанынаҥ бек болор керек ле Кудайла колбуларыс јакшы болор керек (Иак. 4:8). Мыны канайып эдер? Бу јӧрмӧлдӧ чыннаҥ ла ырысту кижи болорго кандый ӱч алтам болужарын шӱӱжип ийектер.

4. Ырысту болорго болужатан баштапкы алтам кандый? (Сарын 1:1—3).

⁴ 1-КЫ АЛТАМ. Ырысту болорго, кӧгӱс курсак јиир керек. Улуска да, тындуларга да јӱрӱм јӱрерге ажанар керек. Је тындуларга кӧрӧ улуска кӧгӱс курсак база јиир керек. Ол јогынаҥ јӱрӱм јок. Оныҥ да учун Иисус мындый сӧстӧр айткан: «Кижи јаҥыс калаш јип тирӱ јӱрер эмес, је Кудай [Иегова] айдып турган кандый ла сӧслӧ тирӱ јӱрер» (Матф. 4:4). Бу сӧстӧрлӧ болзо, бир де кӱн Агару Бичик кычырылбаган ӧтпӧс керек. Сарнаачы ырысту кижи керегинде мынайда бичиген: «Сӱӱнчини Иегованыҥ јасагынаҥ табат, оныҥ јасагын јарым ӱнле тӱн-тӱш кычырат». (Сарын 1:1—3 кычырыгар.)

5, 6. а) Агару Бичиктеҥ нени билип аларга јараар? б) Агару Бичикти кычырзаас, кандый туза аларыс?

⁵ Бистиҥ сӱӱштӱ Кудайыс бойыныҥ сӱӱжи ажыра јаан учурлу чындыктар ачып берген. Темдектезе, јӱрӱмниҥ учуры неде, Кудайга јууктаарга бис нени эдер аргалу, анайда ок Кудай кинчектеристи таштазын деп нени эдер керек деп билип алганыс. Бого ло коштой келер ӧйгӧ бисте сӱреен јакшы ижемји бар (Иер. 29:11). Бу чындыктарды билип алала, бистиҥ јӱрегис сӱӱнчиле толгон.

⁶ Агару Бичикте јӱрӱмге керектӱ јӧптӧр сӱреен кӧп. Бис ол јӧптӧрлӧ јӱрзеес, ырысту болодыс. Оныҥ учун кӱчтер болуп турза, Иегованыҥ Агару Сӧзин кӧптӧдӧ кычырып, шӱӱп сананып туругар. Иисус айткан эди: «Кудайдыҥ  сӧзин угуп, бӱдӱрип јӱргени кежиктӱ!» (Лука 11:28).

7. Агару Бичикти канайып кычырзаар, тузазы јаан болор?

⁷ Агару Бичикти тӱрген-тӱкей эмес, је јакшызынып кычырып туругар. Слерде мындый болгон бо? Кем-кем слерге амтанду курсак азып берген, је слер оны тӱргендеп турала ба, ол эмезе башта башка-башка санаалардаҥ улам чайнабай ла ажырып ийгенеер. Је курсак божой берерде, меҥдебей курсактыҥ амтанын алып туруп јиир керек болгон деп, оҥдоп ийедеер. Анайып ла Агару Бичикти јазап аайлабай, тӱрген-тӱкей кычырганаар ба? Је ырысту кижи болорго турган болзоор, Агару Бичикти кычырарга ӧй табып туругар, ондогы учуралдарды башта јурап, улустыҥ ӱндерин угарга албаданып туругар. Анайда ок кычырганаарды јазап шӱӱп сананып туругар.

8. «Бӱдӱмјилӱ ле керсӱ кул» бойыныҥ молјузын канайып бӱдӱрет? (Анайда ок сносканы кӧрӱгер.)

⁸ Иисус биске ӧйинде курсак берерге, «бӱдӱмјилӱ ле керсӱ кул» кӧстӧгӧн (Матф. 24:45) b. Оныҥ учун бисте кӧгӱс курсак јаантайын артыгынча болот. Оныҥ белетеп турган курсагыныҥ тӧс ингредиенти — Кудайдыҥ Агару Сӧзи (1 Фес. 2:13). Оныҥ да учун бӱдӱмјилӱ ле керсӱ кулдыҥ курсагы биске Иегованыҥ санаа-шӱӱлтезин оҥдоорго болужат. Темдектезе бис «Каруулчы шибее» ле «Ойгоныгар!» деген журналдарды эмезе jw.org сайттагы статьяларды кычырадыс. Анайда ок кажы ла неделе болуп турган јуунныҥ туштажуларына белетенедис ле кажы ла ай чыгып турган JW Broadcasting^®-ти, бистиҥ тилге бар болзо, кӧрӧдис. Бу бай кӧгӱс курсак чыннаҥ ла ырысту болорго болужатан экинчи алтамды эдерге болужат.

9. Ырысту болорго болужатан экинчи алтам кандый?

⁹ 2-ЧИ АЛТАМ. Ырысту болорго, Кудайдыҥ нормаларыла јӱрер керек. Сарнаачы мынайда айткан: «Иегованаҥ коркып, оныҥ јолдорыла јӱрген кандый ла кижи ырысту» (Сар. 128:1). «Иегованаҥ айап турзаас», оны ачындыратан керектерге јууктабай јадыс (Укаа 16:6). Оныҥ учун Агару Бичикте бичилген Кудайдыҥ нормаларыла јӱрерге, бастыра ийде-кӱчистеҥ албаданадыс (2 Кор. 7:1). Бис Иеговага јарап турган керектерди эдип, је ого јарабай турган керектерди этпей турзаас, ырысту болодыс (Сар. 37:27; 97:10; Рим. 12:9).

10. Римдегилерге 12:2-ле болзо, Иегова бистеҥ нени сакыйт?

¹⁰ Римдегилерге 12:2 (ЈТ) кычырыгар. Кижи Иегова јакшыныҥ ла јаманныҥ нормаларын тургузар јаҥду деп јӱк ле билер учурлу эмес, је ол бу нормаларла јӱрер учурлу. Мындый тем кӧрӱп ийектер. Ороонныҥ јаҥдары јолдо кандый скоростьту маҥтадатанына ээжилер тургузып турганын кижи билер де болзо, бойы олорды бӱдӱрбей, јарадылган скоростьтоҥ тӱрген маҥтадып турган болор. Айдарда, бис Иегованыҥ нормаларын эҥ јакшы деп сананып турганы́с бистиҥ керектеристеҥ кӧрӱнет (Укаа 12:28). Анайып ла ок Давид сананган, нениҥ учун дезе ол мындый сӧстӧр айткан: «Сен мени јӱрӱмниҥ јолын оҥдоорго ӱредедиҥ. Сениҥ јаныҥда јӱрери — ол эҥ јаан сӱӱнчи. Оҥ колыҥныҥ  јанында болоры — ӱргӱлјиге јаан ырыс» (Сар. 16:11).

11, 12. а) Кунугып, неге-неге санааркап турзаас, нениҥ учун ајарыҥкай болор керек? б) Филиппыдагыларга 4:8-теги сӧстӧр амырашты чын талдаарга канайып болужар?

¹¹ Кезикте бис кунугып, неге-неге санааркап турзаас, нени этсем амырап аларым деп сананардаҥ айабазыс. Амырашта јаман неме јок. Је андый ӧйдӧ Иеговага јарабагадый керек эдип ийбеске, ајарыҥкай болор керек (Эф. 5:10—12, 15—17).

¹² Апостол Павел Филиппыдагыларда христиандарга самара бичип, олорды јаантайын «нези чындык, нези ару... нези мактаарга ла тоорго јарамыкту» онызын јаантайын шӱӱп сананзын деп кӱӱнзеткен. (Филиппыдагыларга 4:8 кычырыгар.) Павел мында чике ле амыраш керегинде айтпаган да болзо, је бу сӧстӧр амырашты чын талдаарга болужар. Оныҥ учун бу сӧстӧрди эмеш солып ийеле, мынайда кычырактар: «Слердиҥ угуп турган кожоҥдороор, кӧрӱп турган кинолороор, кычырып турган бичиктереер, анайда ок ойноп турган видео ойындараар ару ба? Мактаарга ла тоорго јарамыкту ба?» Мынайда бистиҥ амыраш Иеговага јарап турган ба деп билип аларыс (Сар. 119:1—3). Бис Иегованыҥ бийик нормаларыла јӱрерге турган эмейис, а бийик нормаларыла јӱрзеес, бистиҥ уйадыс ару болор, ол тушта чыннаҥ ла ырысту кижи болорго болужатан ӱчинчи алтамды эдип ийерис (Ап. ижи 23:1).

13. Ырысту болорго болужатан ӱчинчи алтам кандый? (Иоанн 4:23, 24).

¹³ 3-ЧИ АЛТАМ. Иеговага бажырарын баштапкы јерге тургузар керек. Иегова Кудай бистиҥ Јайаачы болордо, бис јӱк ле ого бажырар учурлу (Ачыл. 4:11; 14:6, 7). Оныҥ учун Иеговага бажырарын јӱрӱмисте баштапкы јерге тургузадыс. Агару Бичикте айдылганыла, Иегова бисти ого «тынла, чындыкла» бажырзын деп јат. (Иоанн 4:23, 24, ЈТ кычырыгар.) Бисти Иегованыҥ агару тыны башкарзын деп кӱӱнзеп јадыс, ол тушта Иеговага бажырып турганы́с Агару Бичиктеги чындык аайынча болор. Бистиҥ ижиске кандый да токтодулар тургузып салза, ол эмезе чек токтодып салза да Иеговага бажырарын биске баштапкы јерге тургузар керек. Эм тургуза јӱк ле Иегованыҥ Керечизи болуп турганы учун тӱрмеде 100-теҥ ажык ака-эјелер отурат c. Је андый да болзо, олор ырысту. Нениҥ учун дезе олор оноҥ ло ары Иеговага мӱргӱӱр, ӱренер, улуска Кудай керегинде ле оныҥ Каандыгы керегинде куучындаар аргалу. Айдарда, бисти јамандап та, истежип те турза, бис ырысту болор аргалу. Нениҥ учун дезе Иегова бистиҥ јаныста ла ол бисти кайралдаар деп, бир де алаҥзыбай јадыс (Иак. 1:12; 1 Пётр 4:14).

14. Таджикистанда јадып турган карындашла кандый учурал болгон? Недеҥ улам?

¹⁴ Ӧрӧги чоттолгон ӱч алтам, јӱрӱмис катулана да берзе, биске сӱӱнчилӱ артарга болужат. Бу дезе Таджикистанда јадып турган 19 јашту Джовидон Бободжонов карындашла болгон учуралдаҥ кӧрӱнет. Бу учурал 2019 јылдыҥ ӱлӱрген айыныҥ 4-чи кӱнинде болгон. Карындаш черӱге барбаска турарда, оны  айылынаҥ албан кӱчле арестке алып, канча айларга божотпой тургылады. Ого коркышту јаман баштангандар. Карындаштыҥ учуралы ӧскӧ ороондордо угула берерде, јаан тал-табыш чыккан. Јетирӱлерле болзо, оны присяга берип, военный кийимди кийип алзын деп, кӧп соккылаган. Кийнинде оны тӱрмеге отургызып салгандар. Учы-учында Таджикистанныҥ президенти Джовидонды килеп, оны јайымдап ийген. Бу ченелтеде Джовидон карындаш Кудайга чындык арткан ла сӱӱнчизин јылыйтпаган. Ого не болушкан? Ол качан да кӧгӱс керектерин токтотпогон.

15. Джовидон тӱрмеде кӧгӱс јанынаҥ канайып ажанган?

¹⁵ Джовидон тӱрмеде болордо, ондо Агару Бичик те, бистиҥ бичиктер де јок болгон. Андый да болзо, ол кӱнӱҥ сайын кӧгӱс јанынаҥ ажанган. Канайып? Ака-эјелер ого курсак-тамак экелзе, пакетке кӱнниҥ ӱлгерин бичип салатан. Мынаҥ улам ондо кӱнӱҥ ле Агару Бичикти кычырып, шӱӱп сананатан арга болгон. Кийнинде, оны јайымдап ийерде, ол бистерге мындый сӧстӧр айткан: «Эм тура слерде кӱч айалга болголокто, јайымда болороордо, Агару Бичикти ле бистиҥ бичиктерди кычырып,  Иеговала колбугарды тыҥыдып туругар».

16. Джовидон нени шӱӱп сананарга албаданган?

¹⁶ Джовидон Иегованыҥ нормаларыла јӱрген. Јаман, кирлӱ санааларга алдыртпаска ла јаман керектерге кирип калбаска, ол Иегова керегинде ле ол нени баалап турганы керегинде шӱӱп сананган. Оныҥ учун ол Иегованыҥ сӱреен јараш јайаандарын ајыктаган. Кажы ла эртен тура Джовидон карындаш кучыйактардыҥ кожоҥдожына ойгонып келетен, а тӱнде теҥериде јылдыстарды ла айды ајыктап туратан. Ол айдат: «Иегованыҥ бу сыйлары сӱӱнчи ле ийде-кӱч берген». Айдарда, Иеговага бастыра сыйлары учун, ол тоодо кӧгӱс курсак учун быйанду болзоос, сӱӱнчисти јылыйтпазыс. А сӱӱнчи дезе, бастыра кӱчтерди ӧдӧргӧ болужар.

17. 1 Пётр 1:6, 7-деги сӧстӧр Джовидон карындаштыҥ айалгазында болуп калган кижиге канайып болужар?

¹⁷ Джовидон карындаш Иеговага бажырарын баштапкы јерге тургускан. Ого јӱк ле Иегова Кудайга чындык артар керек деп ол билген. Иисус мынайда айткан эди: «Кайраканга, бойыҥныҥ Кудайыҥа [Иеговага], бажыр, јаҥыс Ого јалчы бол» (Лука 4:8). Офицерлер ле солдаттар Джовидон карындашты Кудайынаҥ јана болзын деп, канайып ла базынгылаган. Джовидон дезе Иеговага тӱни-тӱжи мӱргӱп, ого чындык артарга болушсын деп сурап туратан. Эмди дезе Джовидон карындаш ырысту. Нениҥ учун дезе ол тӱрмелеткен де, соктырткан да болзо, бӱдӱмјизи оноҥ бек болуп калган. (1 Пётр 1:6, 7, ЈТ кычырыгар.)

18. Ырысту артарга не болужар?

¹⁸ Ырысту болорго чыннаҥ ла не керектӱзин Иегова билер. Бу јӧрмӧлдӧ кӧрӱлген ӱч алтам, кандый да кӱчтер болотон болзо, ырысту артарга болужар. Ол тушта бис: «Кудайы Иегова болгон албаты — ырысту!» — деп, айдар аргалу болорыс (Сар. 144:15).