1. Иегова биске кандый ижемји сыйлаган?

 ИЕГОВА биске ӱргӱлјиге јӱретен сӱреен кайкамчылу ижемји сыйлаган. Кезигис ӱргӱлјиге теҥериде јадарга иженет (1 Кор. 15:50, 53). Је кӧп сабагыс ӱргӱлјиге јерде су-кадык ла ырысту јӱрерис деп иженип јадыс (Ачыл. 21:3, 4). Ижемјибис кандый да болзо, јерде јадатан ба, теҥериде јадатан ба, оны бис ончобыс сӱреен тыҥ баалап јадыс.

2. Бистиҥ ижемјибис неге тӧзӧлӧнӧт? Нениҥ учун мынайып айдарга јараар?

² Агару Бичикте «ижемји» деген сӧс ӱзе неме јакшы болор деп бӱдӱп турганын темдектейт. Келер ӧйгӧ ижемјибис бӱдӱп калар деп алаҥзыбай јадыс, нениҥ учун дезе бу ижемјини Иегова берген (Рим. 15:13). А ол дезе бойыныҥ сӧзин бӱдӱрип салат (Тоол. 23:19). Анайда ок Иеговада бойыныҥ сӧзин бӱдӱретен кӱӱни де бар, аргазы да бар. Бистиҥ ижемји бодоп ло куру сӧскӧ эмес, је чын ла болгон керелерге тӧзӧлӧнӧт.

3. Бу јӧрмӧлдӧ бис нени кӧрӧрис? (Сарын 27:14).

³ Бистиҥ теҥеридеги Адабыс бисти тыҥ сӱӱп јат, анайда ок ол бисти ого бӱдӱп турзын деп кӱӱнзеп турган. (Сарын 27:14 кычырыгар.) Иегова Кудайыска иженип турзаас, кӱчтерди ӧдӧргӧ јеҥил болор, анайда ок келер ӧйдӧҥ јалтанбазыс та, сӱӱнчибисти де јылыйтпазыс. А эмди ижемјибис бисти канайып корулап турганын кӧрӱп ийектер. Оноҥ ижемјини якорь ло јуучыл бӧрӱкле нениҥ учун тӱҥдештирип турганын кӧрӱп ийектер. Анайда ок ижемјибисти канайып тыҥыдарын база кӧрӱп ийектер.

4. Ижемјини нениҥ учун якорьго тӱҥейлеерге јараар? (Еврейлерге 6:19).

⁴ Павел еврейлерге бичиген самаразында ижемјини якорьго тӱҥейлеген. (Еврейлерге 6:19 кычырыгар.) Ол бойы талайла кӧп катап јорыктаган, оныҥ учун билген:  якорь керепти салкын туура апарбазын деп, тудуп алар аргалу. Бир катап Павел тыҥ јоткон болордо, талайчылар «ташту јерге табарбаска коркып, керептиҥ кийни јанынаҥ тӧрт якорьды тӱжӱрип» ийгенин кӧргӧн (Ап. ижи 27:29, 39—41). Јӱрӱмисте јоткондый кӱчтер болзо, ижемји биске якорь чылап Иегованаҥ бек тудунарга болужат. Анайда ок ижемји коркышту јаан толкулардый ченелтелерди ӧдӧргӧ болужат, нениҥ учун дезе бу толкулардыҥ кийнинде тымык јаратка чыгарыс деп иженип јадыс. Иисус оныҥ ӱренчиктерин ӧштӱлер истежер деп, озодоҥ айдып салган болгон (Иоанн 15:20). Оныҥ учун биске Иегованыҥ берерге турган кайралы керегинде шӱӱп сананып турар керек. Анайып бис чындыктыҥ јолынаҥ туура чыкпазыс.

5. Ижемји Иисуска божоор алдында канайып болушкан?

⁵ Иисус коркышту јаман ӧлӱмле ӧлӧрин билген де болзо, ижемјизи ого Иеговага чындык артарга канайып болушкан? Б. э. 33-чи јылыныҥ Беженинчи кӱнинде апостол Пётр Мессия керегинде Сарындарда бичилген судурды айткан. Ондо јараш тилле Иисустыҥ сӱреен токыналу бӱдӱмјизи бичилип калган: «Бастыра бойым ижемјиде јӱрет, нениҥ учун дезе сен мени сӧк салар јерде артырбазыҥ, чындык кижини чирип каларга бербезиҥ. [...] Мен сениҥ јаныҥда болзом, јӱрегим сӱӱнчиле толор» (Ап. ижи 2:25—28, ЈТ; Сар. 16:8—11). Иисус ӧлӧрин билген де болзо, Иегова Кудайга андый тыҥ бӱткен: оны теҥеридеги Адазы тиргизип алар деп ле оныла кожо ойто сӱӱнип куучындажып јӱрер деп (Евр. 12:2, 3).

6. Ижемји керегинде бир ака нени айткан?

⁶ Христиан ижемји бистиҥ ака-эјелерге кӱч ченелтелерди ӧдӧргӧ болужат. Англияда јаткан Ленард Чинн деген аканыҥ учуралын кӧрӱп ийектер. Оны Баштапкы телекейлик јуу-согуштыҥ ӧйинде черӱге барбаганы учун тӱрмеге отургызып салган. Эки айдыҥ туркунына оны јаҥыскан отургызып турган камерага туткан, оноҥ дезе коркышту кӱч иштерге аткарган. Соҥында ака бойы керегинде мындый сӧстӧр бичиген: «Бу кӱч ӧйдӧ мындый неме оҥдоп алгам: коркышту кӱч ченелтелерди ӧдӧргӧ, ижемји јогынаҥ не де болбос. Карын бисте Иисустыҥ, апостолдордыҥ ла судурчылардыҥ темдери бар, анайда ок Кудайдыҥ Сӧзиндеги бичилген ижемјини билерис. Бу ӱзе неме келер ӧйгӧ сӱреен кайкамчылу ижемји берет ле кӱч ченелтелерди ӧдӧргӧ ийде-кӱч берет». Ленард акага оныҥ ижемјизи якорь ошкош болгон. Бистиҥ де ижемји андый ла болор аргалу.

7. Ченелтелердиҥ ӧйинде бистиҥ ижемји канайып тыҥыыр аргалу? (Римдегилерге 5:3—5; Иаков 1:12).

⁷ Качан бис ченелтелерди турумкай ӧдӱп турзаас ла Иегованыҥ болужын, јарадузын сезип турзаас, ижемјис тыҥып јат. (Римдегилерге 5:3—5; Иаков 1:12 кычырыгар.) Анайып бистиҥ ижемји, чындыкты баштапкы ла катап уккан тужыска кӧрӧ, канча катапка тыҥып калат. Кӱчтердиҥ ӧйинде Сатана бисти Кудайга чындык артпазын деп албаданып јат, је бис Иеговала кожо кандый ла ченелтелерди ӧдӱп чыгар аргалу.

8. Нениҥ учун ижемјини јуучыл бӧрӱкле тӱҥдештирерге јараар? (1 Фессалоникадагыларга 5:8).

⁸ Агару Бичикте ижемјини јуучыл бӧрӱкле тӱҥдештирип јат. (1 Фессалоникадагыларга 5:8 кычырыгар, ЈТ.) Јуу-согушта јуучылдыҥ бажын јуучыл бӧрӱк ӧштӱниҥ табарузынаҥ корулап јат. Кӧгӱс јууда бис бажысты Сатананыҥ табаруларынаҥ база корулап јадыс. Нениҥ учун  дезе бистиҥ санаабысты ӱреерге, Сатана јӱзӱн-јӱӱр эп-аргалар ла ченелтелер тузаланып јат. Канайып јуу-согушта јуучылдыҥ бажын јуучыл бӧрӱк ӧштӱнеҥ корулап турган, анайып ла бистиҥ ижемјибис Иеговага чындык артарга санаабысты корулап јат.

9. Ӱргӱлји јӱрӱмге иженбей турган улус кандый јӱрӱм јӱрет?

⁹ Ӱргӱлји јӱрӱмге иженгенис биске ойгор јӧптӧр чыгарарга болужар. Је бистиҥ ижемјибис уйадай берзе, бажысты јаман санаалар олјолоп ийер, ол тушта ӱргӱлји јӱрӱм алатан амадубысты јылыйтып салардаҥ айабазыс. Јебрен Коринфте христиандарла не болгонын кӧрӱп ийектер. Олор Кудайдыҥ тирилиш болор деп берген сӧзине бӱтпей барган (1 Кор. 15:12). Келер ӧйгӧ ижемји јок улусты Павел бӱгӱнги ле кӱнле јӱргилейт деп бичиген (1 Кор. 15:32). Андый улус бӱгӱнги ле кӱнде јӱрӱмде не барын ӱзе алып, ичип-јип, јыргап јӱрет. Је бистер дезе, Кудайдыҥ берген сӧзи ӱзе бӱдӱп калар деп, бир де алаҥзыбай јадыс. Бу ижемјибис биске сӱрлеп айдылган јуучыл бӧрӱк болот. Ол бистиҥ бажысты бойыстыҥ јаман кӱӱн-санааларыстаҥ корулап јат, оноҥ башка Иеговага јуук најы болотон аргабысты јылыйтып салардаҥ айабазыс (1 Кор. 15:33, 34).

10. Ижемји бисти јастыра санаалардаҥ канайып корулаар?

¹⁰ Ижемјибис, ол эмезе јуучыл бӧрӱгис, Иеговага јараар арга јок деп санаалардаҥ бисти корулап јат. Темдектезе, бистиҥ кезигис мынайып сананар болор: «Меге ӱргӱлји јӱрӱмди Кудай бербес. Мен неге де турбас кижи. Мен качан да Иегова Кудайдыҥ јасагыла јӱрӱп болбозым». Эске алып ийектер, тӧгӱнчи токунадаачы, Элифаз, Иовко нени айткан эди: «Ӧлӱмдик кижи канайып ару болотон?» — деп сураган. Анайда ок Кудай керегинде мынайып айткан: «Ол бойыныҥ агару ангелдерине де бӱтпей турган, керек дезе, теҥери де оныҥ кӧзине ару эмес» (Иов 15:14, 15). Кандый јаман тӧгӱн! Качан да ундыбагар, бу мындый тӧгӱнниҥ ары јанында Сатана турган. Ол билер, слердиҥ бажыгарга андый кара санаалар кирип калза, ижемјигер сооп калар. Оныҥ учун бу тӧгӱнди бойоордоҥ ыраадып, Иегова Кудайдыҥ берерге турган кайралын сананып туругар. Качан да алаҥзыбагар: бистиҥ теҥеридеги Адабыс бисти ӱргӱлјиге јӱрзин деп кӱӱнзеп јат, анайда ок бу амадуга једерге болужар (1 Тим. 2:3, 4).

11. Биске Кудайдыҥ сӧзиниҥ бӱдерин нениҥ учун чыдажып сакыыр керек?

¹¹ Ижемјини јылыйтпай јӱрери јеҥил неме эмес. Бис Кудайдыҥ айткан сӧзиниҥ качан бӱдерин сакып болбой барардаҥ айабазыс. Је Иегова Кудай јаантайын болгон, ого ӧй биске кӧрӧ, башка ӧдӱп јат (2 Пётр 3:8, 9). Иегова амадузын бойыныҥ ӧйинде кыйалта јогынаҥ бӱдӱрип салар. Је Кудайдыҥ сӧзиниҥ бӱдери бистиҥ сакыган ӧйгӧ келишпес болордоҥ айабас. Айдарда, ижемјибистеҥ бек тудунарга ла Кудайдыҥ сӧзиниҥ бӱдӱп каларын чыдажып сакыырга, биске не болужар? (Иак. 5:7, 8).

12. Еврейлерге 11:1, 6-ла болзо, ижемјиде ле бӱдӱмјиде кандый колбу бар?

¹² Ижемјистеҥ бек тудунарга, Иеговала јуук колбуларлу артар керек. Нениҥ учун дезе шак ла Кудай бистиҥ ижемјибисти бӱдӱрер. Агару Бичик ижемјини ле бӱдӱмјини јуук колбулу деп кӧргӱзет. Качан бис Кудай чын ла бар, ол «оны тыҥ бедиреген улусты кайралдаар» деп бӱдӱп турзаас, ижемјибис бек болот. (Еврейлерге 11:1, 6 кычырыгар.) Иегова биске канча ла кире јуук болзо, ол берген сӧзин ӱзе  бӱдӱрип салар деп, ончо ло кире тыҥ бӱдедис. Эмди дезе, Иеговала колбуларысты тыҥыдатан кезик јӧптӧр кӧрӱп ийектер. Оныла јуук најылашканыс ижемјибистеҥ бек тудунарга болужар.

13. Кудайла канайып најылажар арга бар?

¹³ Иеговага мӱргӱп, оныҥ Сӧзин кычырыгар. Кудайды кӧрбӧй дӧ турган болзоос, бис оныла најылажар аргалу. Оныла мӱргӱӱл ажыра куучындажып турзаас, Кудай бисти угуп турган деп бӱдӱп јадыс (Иер. 29:11, 12). Је бис Кудайды канайып угарыс? Оныҥ Сӧзин кычырып, шӱӱп сананып турзаас. Иегова јебрен ӧйдӧ бойыныҥ чындык ишчилерин канайып корулаганын билер болзоос, ижемјибис там тыҥыыр. Оныҥ Сӧзи «бисти ӱредерге бичилген. Бис олордоҥ чыду ла кӧкӱдӱ алып, ижемјибисти јылыйтпазыбыс» (Рим. 15:4).

14. Иегова улуска канайып болушканын нениҥ учун шӱӱп сананып турар керек?

¹⁴ Иегова берген сӧзин канайып бӱдӱрип турганын шӱӱп сананыгар. Авраам ла Сарраныҥ учуралын эске алып ийектер. Бу јажы јаанап калган эш-нӧкӧрлӧр бала јок болгон, је Иегова олорды балалу болор деп айткан (Баш. 18:10). Авраам мыны угала нени сананды не? Кижиниҥ кӧрӱмиле кӧрзӧ, јажы јаанап калган эш-нӧкӧрлӧрдӧ бала болор аргазы јок ошкош, је Авраам Иегова берген сӧзин бӱдӱрип салар деп бир де алаҥзыбаган. Ол «кӧп калыктардыҥ адазы» болор деп бӱткен (Рим. 4:18). Соҥында олор чын ла балалу болуп калды (Рим. 4:19—21). Мындый учуралдарды кычырып турзаас, Иегова берген сӧзин, айалга кандый да кӱч болзо, бӱдӱрип салат деп бӱдӱмјибисти тыҥыдып јат.

15. Кудай слерге нени эткенин нениҥ учун сананар керек?

¹⁵ Иегова слерге нени эткенин сананып  туругар. Кудайдыҥ айдып салган сӧзиниҥ бӱткени слерге кандый туза экелгенин сананыгар. Темдектезе, Иисус оныҥ Адазы биске јӱрӱмге ончо керектӱ немени берер деп айткан (Матф. 6:32, 33). Анайда ок слер Кудайдаҥ агару тын суразаар, ол кыйалта јогынаҥ берер деп айткан (Лука 11:13). Иегова бу берген сӧзин бӱдӱрип јат. Ол слерге мынаҥ да ӧскӧ болужын берип турган болор. Темдектезе, ол слерди кӧгӱс јанынаҥ кичеер, јаманыгарды таштаар ла токунадар деп сӧзин берген (Матф. 6:14; 24:45; 2 Кор. 1:3). Иегова слерди ӧткӧн ӧйдӧ канайып кичеегенин сананып турзаар, ол слерди келер де ӧйдӧ бир де артыргыспас деп ижемјигер тыҥыыр.

16. Ижемји нениҥ учун баалу сый?

¹⁶ Јажын-чакка јӱретен ижемји Иегованыҥ сӱреен баалу сыйы. Бис бу сыйды энчикпей сакып јадыбыс. Анайда ок ол ӧй келер деп, бир де алаҥзыбайдыс. Ижемји якорь чылап Иегованаҥ бек тудунарга, ченелтелерди ле истежӱлерди ӧдӧргӧ, керек дезе ӧлӱмнеҥ де коркыбаска болужат. Анайда ок ижемји јуучыл бӧрӱк чилеп јаман неме этпеске, карын јакшыны эдерге санаабысты корулайт. Агару Бичикке тӧзӧлӧнгӧн ижемјибис Кудайла колбуларысты тыҥыдат ла ол бисти тыҥ сӱӱп турган деп кӧрӱп турарга болужат. Ижемјибис уйадап калбаза, Иегованыҥ берген сӧстӧриниҥ бӱдерин кӧрӧрис.

17. Нениҥ учун ижемји сӱӱнчи берет?

¹⁷ «Ижемји слерге сӱӱнчи экелзин» — деп, апостол Павел Римдеги христиандарга бичиген (Рим. 12:12). Павел бойыныҥ ижемјизине сӱӱнген, нениҥ учун дезе ол Кудайга чындык артып калза, теҥериде ӱргӱлјиге јӱрер деп алаҥзыбаган. Бис те ижемјибиске сӱӱнер аргалу, нениҥ учун дезе Иегова бойыныҥ сӧзин бӱдӱрер деп, бис бир де алаҥзыбайдыс. Сарнаачыныҥ: «Кудайга иженген кижи ырысту... Ол ончо берген сӧзин бӱдӱрип салат» — деп айткан сӧстӧриле јӧпсинип јадыс! (Сар. 146:5, 6).