1. Ангел нени айдат ла оныҥ сӧстӧри бисти неге кӱӱнзедет?

 СЛЕРЛЕ ангел куучындажып баштаган болзо, слер оны угар эмес бедеер? Бӱгӱнги кӱнде андый ла неме болуп јат. Ангел «кандый ла укка, ӱйеге... калыкка» баштанат. Ол нени айдат? «Кудайдаҥ айап, ого мак јетиригер... Теҥерини ле јерди, талайды ла суулардыҥ агындарын јайаган Јайаачыга бажырар!» — деп айдат (Ачыл. 14:6, 7). Иегова — јаҥыс чындык Кудай болуп јат. Оныҥ учун ончозы јӱк ле ого бажырар учурлу. Иегова биске оныҥ улу кӧгӱс ӧргӧӧзинде иштеер кӱндӱ эткени учун бис ого јаан быйанысты айдып јадыс!

2. Иегованыҥ кӧгӱс ӧргӧӧзи ол не? ( «Кӧгӱс ӧргӧӧ — ол...» деген рамканы кӧрӱгер.)

² Кӧгӱс ӧргӧӧ ол не ле ол керегинде кӧптӧдӧ кайдаҥ билип аларга јараар? Кӧгӱс ӧргӧӧ — ол кандый бир тура эмес. Ол дезе Иеговага јарап турган бажырыш, бу бажырыш Иисус Христостыҥ толынты тайылгазына тӧзӧлӧнӧт. Апостол Павел бу ӧргӧӧ керегинде Иудеяда јаткан еврей укту христиандарга бичиген b.

3, 4. Нениҥ учун Павел Иудеядагы христиандар учун санааркаган ла олорго канайып болушкан?

³ Апостол Павел нениҥ учун Иудеядагы христиандарга самара бичиген? Ондо, ас ла салза, эки шылтак болгон болор. Баштапкызы, олордыҥ кӱӱнин кӧдӱрерге сананган.  Нениҥ учун дезе олордыҥ кӧп сабазы иудаизм јаҥда чыдаган. Олордыҥ алдындагы кудай јаҥныҥ башчылары олордо улу ӧргӧӧ, тагыл, абыс јок деп шоодып, каткырышкан болор. Оноҥ улам Иисус Христостыҥ кезик ӱренчиктери санааркаган ла олордыҥ бӱдӱмјизи уйадаган болор (Евр. 2:1; 3:12, 14). А кезиктери иудаизм јаҥга кайра барарга сананган болордоҥ айабас.

⁴ Экинчизинде, Павел ака-эјелерди Кудайдыҥ Сӧзиндеги «кату курсакты» — тереҥ кӧгӱс чындыктарды ол эмезе јаҥы ӱредӱлерди оҥдоорго албаданбай турган деп айткан (Евр. 5:11—14). Кезик христиандар эмдигенче ле Моисейдиҥ јасагын бӱдӱрип турган болгон. Је Павел ол јасак аайынча экелетен тайылгалар кижини кинчектеҥ бӱдӱнге арутабай турган деп јартап берген. Оныҥ учун Моисейдиҥ јасагын бӱдӱрери база керек јок болгон. Оноҥ ары самаразында Павел тереҥ чындыктарга ајару эдип јат. Ол христиандарга оноҥ «артык ижемјини» эске алындырат, ол ижемји Иисус Христостыҥ тайылгазына тӧзӧлӧнӧт лӧ Кудайга чыннаҥ ла јууктадар аргалу (Евр. 7:18, 19).

5. Еврейлерге бичилген самараны кычырып тура биске нени оҥдоп алар керек ле нениҥ учун?

⁵ Апостол Павел еврей акаларга ӧдӱп калганына кадалбазын деген. Олордыҥ алдында Кудайга бажырганы «келетен немелердиҥ кӧлӧткӧзи» болгон. А Иисуска бӱдӱп бажырганы — эмди бары болот (Кол. 2:17). Кӧлӧткӧ немениҥ јӱк ле сомын кӧргӱзет. Анайып ла еврейлердиҥ озогы ӧйдӧ бажырганы Кудайдыҥ келер ӧйдӧ тургузар эҥ артык бажырыжыныҥ «кӧлӧткӧзи» болот. Иегова бистиҥ јаманыс ташталзын ла ого јараар этире бажырзын деп нени эткенин оҥдоорго албаданактар. А эмди «кӧлӧткӧни» (озогы еврейлердиҥ бажырыжын) ла «эмди барын» (христиандардыҥ бажырыжын) тӱҥдештирип ийектер. Анайып, кӧгӱс ӧргӧӧ ол не ле биске ол кандый тузазын јетирип турганын јакшы оҥдоп аларыс.

6. Агару байкан канайып тузаланылган?

⁶ Еврейлердиҥ јебрен ӧйдӧ бажырганы. Апостол Павел Иегованыҥ кӧгӱс ӧргӧӧзин шӱӱжип тура, б. э. озо 1512 јылда  Моисейдиҥ тургускан агару байканыла тӱҥдештирген («Еврейлердиҥ јебрен ӧйдӧ бажырганы. Христиандардыҥ бажырганы» деген схеманы кӧрӱгер.) Оны израильтяндар ары-бери кӧчӱп турза, кожо апарып туратан. Оны олор Иерусалимдеги ӧргӧӧ тудулганча 500 јыл кире тузаланган (Чыг. 25:8, 9; Тоол. 9:22). Бу туштажулардыҥ байканына израильтяндар Кудайга бажырарга ла тайылгалар экелерге јуулыжатан (Чыг. 29:43—46). Је агару байкан келер ӧйдӧ христиандарда оноҥ артык неме болор деп кӧргӱскен.

7. Кӧгӱс ӧргӧӧ качан тӧзӧлгӧн?

⁷ Христиандардыҥ бажырганы. Јебрен ӧйдӧги агару байкан «теҥеридеги немелердиҥ... кӧлӧткӧзи» болгон. Павел оны эмди бар немениҥ — Иегованыҥ улу кӧгӱс ӧргӧӧзиниҥ — «сӱр-кебери болуп јат» (ЈТ) деп айткан (Евр. 8:5; 9:9). Айдарда, Павел еврейлерге самараны бичип турарда, кӧгӱс ӧргӧӧ болгон. Ол б. э. 29 јылында тӧзӧлгӧн. Ол јылда Иисус сууга чӧҥӱрилип, агару тынла майладып, Иегованыҥ кӧгӱс ӧргӧӧзинде «улу абыс» болуп баштаган (Евр. 4:14; Ап. ижи 10:37, 38) c.

8, 9. Израильдиҥ улу абыстары эҥ Улу абыстаҥ, Иисус Христостоҥ, незиле башка болгон? (Еврейлерге 7:23—27).

⁸ Еврейлердиҥ јебрен ӧйдӧ бажырганы. Улу абыс албатыныҥ адынаҥ Кудайдыҥ алдына турар јаҥду болгон. Израильдиҥ баштапкы улу абызы Аарон болгон. Иегова бажырышка агару байканды тузаланып баштаарда ла, Ааронды бу агару ишке кӧстӧп салган. Апостол Павел мынайып јартаган, «абыстарга бой-бойын солыырга келишкен, нениҥ учун дезе ӧлӱм олорго ижин оноҥ ары бӱдӱрерге бербей турган» d. (Еврейлерге 7:23—27, ЈТ кычырыгар.) Ол улу абыстар толо кеминде эмес болгонынаҥ улам бойлорыныҥ кинчеги учун тайылга экелип туратан. Мынызыла олор улу абыстаҥ, Иисус Христостоҥ, башка болгон.

⁹ Христиандардыҥ бажырганы. Бистиҥ улу абыс — Иисус Христос — кижиниҥ эмес, је Иегованыҥ тургускан чындык байканында иштеп јат (Евр. 8:1, 2). Павел, Иисус «ӱргӱлјиге јӱрет, оныҥ ижи ӱргӱлјиге» деп јартаган. Анайда ок Иисус «агару, кинчектӱлердеҥ башкалалган» ла Израильдиҥ улу абыстарына кӧрӧ, бойыныҥ кинчектери учун ого «кӱнӱҥ сайын тайылга эдери керек јок» болгон деп айткан. А эмди, јебрен ӧйдӧги еврейлердиҥ ле эмдиги ӧйдиҥ христиандарыныҥ тайылгаларыныҥ ла тагылдарыныҥ башказын кӧрӱп ийектер.

10. Јес тагылга экелген еврейлердиҥ тайылгалары нени кӧргӱскен?

¹⁰ Еврейлердиҥ јебрен ӧйдӧ бажырганы. Улу байканныҥ эжигинде Иеговага тайылгалар эдетен јес тагыл турган (Чыг. 27:1, 2; 40:29). Је ол тайылгалардыҥ болужыла албаты кинчектердеҥ бӱдӱнге айрылар аргазы јок болгон (Евр. 10:1—4). Агару байканда јаантайын тайылгалар эдилгени келер ӧйдӧ кижиликти кинчектердеҥ бӱткӱлинче јайымдайтан тайылга эдилер деп кӧргӱскен.

11. Иисус бойын тайылга эдип кандый тагылда экелген? (Еврейлерге 10:5—7, 10).

 ¹¹ Христиандардыҥ бажырганы. Иисус, Иегова оны јердӧӧн улус учун бойыныҥ јӱрӱмин толынты эдип берзин деп аткарганын билген (Матф. 20:28). Бойыныҥ сууга чӧҥӱрилгениле, Иисус, Кудайдыҥ кӱӱн-табын бӱдӱрерге белен болгонын кӧргӱскен (Иоанн 6:38; Гал. 1:4). Сӱрлеп айдылган Иисустыҥ божогон тагылы — Кудайдыҥ «кӱӱн-табы» болгон. А Кудайдыҥ табыла болзо, Кудайдыҥ Уулы бойыныҥ толо кемдӱ јӱрӱмин тайылга эдип берер учурлу болгон. Иисус ого бӱдӱп турган кажы ла кижиниҥ кинчегин бӧктӧӧргӧ, бойын «бир катап ла ӱргӱлјиге» берип салган. (Еврейлерге 10:5—7, 10, ЈТ кычырыгар.) А эмди, агару байканныҥ ичинде не болгонын кӧрӱп ийектер.

12. Агару байканныҥ кыптарына кемдер кирер аргалу болгон?

¹² Еврейлердиҥ јебрен ӧйдӧ бажырганы. Агару байканныҥ ла Иерусалимде тудулган ӧргӧӧлӧрдиҥ ичи тӱҥей болгон. Олор эки кыптаҥ турган: Агару ла Агарудаҥ агару. Олордыҥ ортозында кӧжӧгӧ болгон (Евр. 9:2—5; Чыг. 26:31—33). Агару деп кыпта јарыткыш, фимиам ӧртӧйтӧн тагыл ла агару калаш салатан стол турган. Ары бойыныҥ молјуларын бӱдӱрерге, јӱк ле «майлаткан абыстар» кирер аргалу болгон (Тоол. 3:3, 7, 10). А Агарудаҥ агаруда Иегова бар деп кӧргӱзип турган јӧптӧжӱниҥ  алтын ковчеги турган (Чыг. 25:21, 22). Бу кыптӧӧн, кӧжӧгӧниҥ ары јанындӧӧн, јылдыҥ ичинде, бир катап кинчектер ташталар кӱнде, јӱк ле улу абыс киретен (Лев. 16:2, 17). Ол ары кирзе, бойыныҥ ла албатыныҥ кинчектери ташталзын деп, тындулардыҥ канын алып туратан. Јылдаҥ јылга анайып эдилген. Кийнинде Иегова агару тыныныҥ болужыла бойыныҥ ишчилерине агару байканныҥ кыптары нени темдектеп турганын јартап берген (Евр. 9:6—8) e.

13. Агару ла Агарудаҥ агару нени темдектейт?

¹³ Христиандардыҥ бажырганы. Агару тынла майлаткан 144 000 Христосло кожо теҥериде абыстар болуп иштеер (Ачыл. 1:6; 14:1). Иегова олорды јерде јаткан тужында майлап, бойыныҥ балдары эдип алат. Агару кып олордыҥ Иеговала аҥылу колбуларын темдектейт (Рим. 8:15—17). Агарудаҥ агару кып Иегованыҥ теҥериде јадып турган јерин темдектейт. «Кӧжӧгӧ» дезе Иисус Христостыҥ эди-каны болот. Качан Иисус јерде болордо, ондо теҥери барар аргазы јок болгон. Иисус Христос эди-канын албаты учун тайылгага берип, теҥериге барган кийнинде бастыра майлаткандарга јол ачкан. Майлаткандарга теҥеридеги кайралын аларга, эди-канынаҥ база айрылар керек (Евр. 10:19, 20; 1 Кор. 15:50). Иисус тирилген кийнинде кӧгӱс ӧргӧӧниҥ Агарудаҥ агару кыбына кирген, кийнинде бастыра майлаткандар ого кожулар.

14. Иеговага бӱгӱнги кӱнде јарап турган бажырыш јебрен ӧйдӧги бажырыштаҥ нениҥ учун артык болот? (Еврейлерге 9:12, 24—26).

¹⁴ Бӱгӱнги кӱнде Иеговага кандый бажырыш јарап турганын кӧрӱп ийдис. Иисустыҥ толынты тайылгазы ла оныҥ абыс болотон јаҥы — андый бажырыштыҥ тӧзӧлгӧзи. Израильде улу абыс кижиниҥ туткан байканыныҥ Агарудаҥ агару кыбына тындулардыҥ каныла киретен. Је Иисус Иегованыҥ алдына турарга, эҥ ле агару јерге — «теҥериниҥ бойына» кирген. Анда ол Иеговага «кинчекти јоголтып саларга», јерде толо кемдӱ кижи эдип јӱретен аргазын берип ийген. (Еврейлерге 9:12, 24—26, ЈТ кычырыгар.) Иисустыҥ бу баалу тайылгазы бисти кинчектеҥ бӱдӱнге арутап јат, ол јажын-чакка болот. Је оноҥ ары, бис ончобыс, теҥериде јӱрерис пе эмезе јерде јадарыс па, Иеговага оныҥ кӧгӱс ӧргӧӧзинде бажырар аргалу деп кӧрӱп ийерис.

15. Агару байканныҥ кӱрентигинде кемдер иштеген?

¹⁵ Еврейлердиҥ јебрен ӧйдӧ бажырганы. Агару байканда айландыра чедендеп салган јер, кӱрентик, болгон. Ондо абыстар бойыныҥ молјуларын бӱдӱретен. Анайда ок ондо јаан јес тагыл ла суулу јес чан болгон. Абыстар бойыныҥ ижин бӱдӱрерге, оноҥ суу алып јунунгылап туратан (Чыг. 30:17—20; 40:6—8). Кийнинде тудулган ӧргӧӧлӧрдӧ, тыш јанында кӱрентик база болгон, ары Кудайга бажырарга, ӧскӧ албатылардаҥ улус келип туратан.

16. Кӧгӱс ӧргӧӧниҥ ич јанындагы ла тыш јанындагы кӱрентигинде кемдер иштегилейт?

¹⁶ Христиандардыҥ бажырганы. Иисустыҥ майлаткан карындаштары оныла кожо теҥериде абыстар болуп иштеердеҥ озо, кӧгӱс ӧргӧӧниҥ ич јанында кӱрентикте чындык иштегилеп јат. Јаан суулу чан олорго ло бастыра христиандарга нравственный ла кӧгӱс јанынаҥ ару артар керек  деп эске алындырат. Майлаткандарды јӧмӧп турган «кара-бајырт» улус керегинде нени айдарга јараар? Олор кайда иштегилеп јат? Апостол Иоанныҥ кӧргӧниле болзо, олор «ширеениҥ алдында... тургандар». Бу дезе олор кӧгӱс ӧргӧӧниҥ тыш јанында кӱрентикте Кудайга «тӱни-тӱжи бажырып јадылар» деп кӧргӱзет (Ачыл. 7:9, 13—15). Бис Иегова Кудайыска јаан быйанду, нениҥ учун дезе ол биске оныҥ улу кӧгӱс ӧргӧӧзинде бажыратан арга берген!

17. Бис Иеговага кандый тайылгалар эдедис?

¹⁷ Бӱгӱнги кӱнде христиандардыҥ ончозында Иеговага тайылгалар эдетен сӱреен јакшы арга бар. Андый сыйлардыҥ тоозына Каандыктыҥ ижине берип турган ӧйис, ийде-кӱчис ле акча-јӧӧжӧбис кирет. Апостол Павелдиҥ айтканыла, Кудайыска оныҥ ады керегинде куучындап, оосторыстыҥ тӱжӱмин ӧскӧртӧ айтса «макташтыҥ тайылгазын» јаантайын экелип турактар (Евр. 13:15). Бис Иеговага эҥ артыгын берип турзаас, бажырар арганы баалап турганыс деп кӧргӱзерис.

18. Биске нени качан да ундыбас керек? (Еврейлерге 10:22—25).

¹⁸ Еврейлерге 10:22—25, ЈТ кычырыгар. Еврейлерге бичиген самараныҥ учы јаар Апостол Павел ундыбайтан немелерди тоолоп салган. Ол мӱргӱӱл, јарлаар иш, јуунныҥ туштажулары ла бой-бойына болужары. «Кайраканныҥ кӱни јууктап келеткенин» кӧрӱп тура, биске бу керектерде мынаҥ артык албаданар керек. Ачылта деп бичиктиҥ учында Иегованыҥ ангелы: «Кудайга бажыр!» — деп, эки катап кычырат (Ачыл. 19:10; 22:9). Ангел бу сӧстӧрди эки катап айтканынаҥ ол сӧстӧрди угар керек деп кӧрӧдис. Оныҥ учун Иегованыҥ улу кӧгӱс ӧргӧӧзи керегинде тереҥ чындыктарды ундыбай, Кудайга бажырар арганы баалап јӱректер!