1. Библиялык ӧйлӧрдӧ јаткан чындык ишчилер недеҥ улам ийде-кӱчтӱ болгон?

 АГАРУ БИЧИКТЕ коркышту кайкамчылу керектер эткен кӱчтӱ, чындык ишчилер керегинде айдылат. Олор ийде-кӱчтӱ болгон до болзо, кезикте бойлорын уйан деп сескилейтен. Темдектезе, Давид каан бойын «кайадый ийде-кӱчтӱ» деп сананган, је кезик ӧйлӧрдӧ ол та недеҥ де коркый беретен (Сар. 30:7). Анайда ок Самсонго до Кудай агару тыны ажыра коркышту тыҥ ийде-кӱч берген. Оныҥ да учун ол Кудайдыҥ болужы јогынаҥ тегин ле кижи болуп каларын оҥдоп туратан (Јарг. 14:5, 6; 16:17). Айдарда, Кудайдыҥ бу чындык ишчилери Кудайдыҥ болужы эмес болзо, канайып ийде-кӱчтӱ болотон эди?!

2. Нениҥ учун апостол Павел бойын чыдалы чыгып калган тужында кӱчтӱ деп айткан? (2 Коринфтегилерге 12:9, 10).

² Апостол Павел Иегованыҥ ийде-кӱчин керексип турганын база оҥдоп туратан. (2 Коринфтегилерге 12:9, 10, ЈТ кычырыгар.) Бистиҥ кӧп сабагыста ла чылап ондо су-кадык јанынаҥ кӱчтер болгон (Гал. 4:13, 14). А кезикте ого Иегованы сӱӱндирерге кӱч болуп туратан (Рим. 7:18, 19). А качан јӱрӱминде нени эдетенин, канайдатанын билбей турза, ол санааркап баштайтан (2 Кор. 1:8, 9). Је Иегова ого ийде-кӱч беретен. Мынаҥ улам ол ӱзе ченелтелерди ӧдӱп чыккан.

3. Бу јӧрмӧлдӧҥ кандый сурактардыҥ карууларын билип аларыс?

³ Иегова бисти де ийде-кӱчтӱ эдер деп, сӧзин берет (1 Пётр 5:10). Је биске бойыска да та нени де эдер керек. Мындый тем кӧрӱп ийектер. Машина маҥтазын деп, энергия керек болуп јат. А энергияны двигатель берет. Водитель  кажы бир јерге једип аларга турган болзо, ого газтыҥ педалин јаантайын базар керек. Биске ийде-кӱчти Иегова берип јат. Је Иегованаҥ ийде-кӱчти аларга, биске та нени де эдер керек. Бисти ийде-кӱчтӱ болзын деп, Иегова нени берип салган? Биске ийде-кӱчтӱ болорго нени эдер керек? Бу сурактардыҥ карууларын аларга, Иегованыҥ ӱч ишчизиниҥ: судурчы Ионаныҥ, Иисустыҥ энезиниҥ, Марияныҥ, ла апостол Павелдиҥ темдерин кӧрӱп ийектер. Иегова бу ишчилерине канайып болушканын ла бӱгӱнги улузына канайып болужып турганын шӱӱжип ийерис.

4. Иегованаҥ болуш аларга, биске нени эдер керек?

⁴ Иегованыҥ болужын алатан аргалардыҥ бирӱзи — ого мӱргӱӱри. Бистиҥ сураганыска Иегова «артыкташкан кӱч» берер аргалу (2 Кор. 4:7). Анайда ок Агару Бичикти кычырып, оны тереҥ шӱӱп сананып турзаас, кӱчтӱ болорыс (Сар. 86:11). Не дезе библиялык јардыҥ ийдези сӱреен јаан (Евр. 4:12). Мӱргӱӱл ле Агару Бичикти кычырары биске ченелтелерди чыдажарга, сӱӱнчибисти јылыйтпаска ла уур јакылтаны бӱдӱрерге болужат. А эмди дезе Иегова Иона судурчызын канайып кӱчтӱ эткенин кӧрӱп ийектер.

5. Нениҥ учун Иона Иегованыҥ болужын сӱреен тыҥ керексиген?

⁵ Иона коркышту коомой айалгада болуп калган: Иегова ого јеҥил эмес јакылта берерде, ол кача берген. Учында јаан јотконго табартала, арай ла болзо, божоп калбаган. Оныҥ ӱстине керепте ӧскӧ дӧ улустыҥ јӱрӱмин јеткерлӱ айалгага тургускан. Оноҥ оны керептеҥ чыгара чачып ийерде, оны јаан балык келеле, ажырып ийди. Байа балыктыҥ ичинде болор деп, ол качан да сананбаган. Ол балыктыҥ ичинде коркымчылу ла караҥуй болгон болор. Иона балыктыҥ ичинде мынай санаган болбой: «Эмди мен мында божоп калатан эмтирим. Мени Иегова, байла, артыргызып салган». Иона чын ла коркыган болор.

6. Балыктыҥ ичинде болордо, Ионага коркыбаска не болушкан? (Иона 2:1, 2, 7).

⁶ Бу айалгада Ионага коркыбаска не болушкан? Мӱргӱӱл. (Иона 2:1, 2, 7 кычырыгар.) Иона Иегованыҥ сӧзин укпай, кача берген де болзо, Кудай оныҥ јастыразын алынганын кӧрӱп турган ла оныҥ мӱргӱӱлине каруузын берер деп, бир де алаҥзыбаган. Анайда ок ол Агару Бичимелдиҥ сӧстӧрин шӱӱп санаган болор. Нениҥ учун мынайып айдарга јараар? Нениҥ учун дезе Иона деп бичиктиҥ 2-чи бажалыгында Сарындардаҥ алынган сӧстӧр лӧ сӧсколбулар кӧп туштайт. (Темдектезе, Иона 2:2, 5-ти ле Сарын 69:1; 86:7-ни тӱҥдештиригер.) Иона Агару Бичиктиҥ бу ӱзӱктерин јакшы билген деп кӧрӱп јадыс. Ол бу ӱзӱктерди шӱӱп сананып тура, бис кандый да айалгага кирип калзаас, Иегова бисти болужы јок артыргыспас деп бӱдӱмјиленип алган. Оныҥ учун кийнинде, ол Иегованаҥ јаҥы јакылта аларга белен болгон (Иона 2:10—3:4).

7, 8. Тайваньда јадып турган акага ченелтелерле тартыжарга не болужат?

⁷ Бис јӱзӱн-јӱӱр ченелтелерге туштап турзаас, Ионаныҥ теми болужар аргалу. Темдектезе, Тайваньда јадып турган Чжими́н b деп ака јаан оорула ооруп јат. Бого коштой, Иеговага бӱдӱп турганы учун ого тӧрӧӧндӧри коркышту јаман баштанат. Чжимин ийде-кӱчти Агару Бичикти ӱренеринеҥ ле  мӱргӱӱлдеҥ алат. Ол мынайып куучындайт: «Качан кӧп кӱчтер боло берзе, мениҥ бажыма кӧп јаман санаалар келип баштайт. Мынаҥ улам меге амыр артарга ла Агару Бичикти ӱренерге кӱч болот». Је Чжимин колын бош салбай јат. Ол оноҥ ары куучындайт: «Озо баштап мен Иеговага мӱргӱп јадым. Оноҥ наушникти кийеле, Каандыктыҥ кожоҥдорын угуп баштайдым. А кезикте токунаганчам ол кожоҥдорды араайынаҥ кожо кожоҥдоп јадым. Токунай берзем, Агару Бичикти ӱренип баштайдым».

⁸ Чжимин акага таҥынаҥ ӱренген тушта алган билгирлери јаан тузазын јетирет. Ондо бир катап мындый учурал болгон. Кӱч операцияныҥ кийнинеҥ медсестра ого: «Сениҥ гемоглобиниҥ ас, оныҥ учун сеге кан урар керек» — деген. Мыныҥ ла алдында Чжимин ака мындый ла операция ӧткӧн эје керегинде кычырган. Оныҥ гемоглобини оноҥ јабыс болгон. Је ол кан урдырбаган. Кийнинде ол эје јазылып калган. Бу учурал Чжимин акага Кудайга чындык артарга болушкан.

9. Ченелте слердиҥ кӱчеерди айрып алган болзо, нени эдерге јараар? (Јурукты база кӧрӱгер.)

⁹ Слерге санааркаштардаҥ улам, мӱргӱӱрге кӱч болот по? Эмезе ӱренерге ийде-кӱч јетпейт пе? Слерди Иегова сӱреен јакшы оҥдоп турган деп ундыбагар. Оныҥ учун слердиҥ мӱргӱӱлеер тоолу ла сӧстӧҥ турган да болзо, Иегова керектӱ немени слерге тӱҥей ле берер (Эф. 3:20). Слерге эмоциональный ла физический оорунаҥ улам кычырарга јеҥил эмес болзо, Агару Бичиктиҥ ле бистиҥ бичиктердиҥ аудиозын угарга јараар. Анайда ок бистиҥ сайтта кандый бир кожоҥдорды угарга ла видеолорды кӧрӧргӧ јараар. Слер Иеговага мӱргӱп, организацияныҥ берген кӧгӱс курсагын тузаланып турзаар, Иегова слерди кӱчтӱ эдип салар.

10. Ака-эјелер бисти канайып тыҥыдар аргалу?

¹⁰ Иегова бисти ака-эјелер ажыра кӱчтӱ эдер аргалу. Качан бис ченелтеге туштазаас эмезе уур јакылта алзаас, најыларыс биске болужар аргалу (Кол. 4:10, 11). Бис анчада ла кӱч ӧйлӧрдӧ најыларды керексип  јадыс (Укаа 17:17). Качан бойысты уйан, ийде-кӱч јок деп сезип турзаас, ака-эјелер биске болужарга, кӧгӱс јанынаҥ јӧмӧжӧргӧ лӧ бисти токунадарга белен болуп јат. А эмди, Иисустыҥ энезине, Марияга, ӧскӧ улус канайып болушканын кӧрӱп ийектер.

11. Нениҥ учун Марияга Иегованыҥ ийде-кӱчи керек болгон?

¹¹ Марияга Иегованыҥ кӱӱн-табын бӱдӱрерге оныҥ ийде-кӱчи керек болгон. Гавриил деп ангелдеҥ ол кижиге баргалакта табынып алар деп билип ийген. Сананып ийзеер де, ого мындый јеҥил эмес јакылта берилгенин билип ийеле, ол нени сескен болор? Марияда балдар таскадар ченемел де јок болгон. А эмди ого Мессия болор баланы чыдадар керек. Бого коштой, Иосифке ӱзе мыны јартаар керек болгон. Ол эр кижиле конголокто табынып алганын канайып јартады не? (Лука 1:26—33).

12. Мария керектӱ ийде-кӱчти кайдаҥ алды? (Лука 1:39—45).

¹² Мария јеҥил эмес каруулу јакылтаны бӱдӱрерге ийде-кӱчти кайдаҥ алды? Ол болушты ӧскӧ улустаҥ бедиреген. Озо баштап Мария Гавриилди бу јакылтаны кӧптӧдӧ јартап берзин деп сурады (Лука 1:34). Оныҥ кийнинде, ол «Иудеяныҥ кырларындагы каладӧӧн» Елизавета тӧрӧӧнине барды. Мынайып эткени сӱреен јакшы болгон. Нениҥ учун дезе Елизавета Марияны мактайла, агару тынга баштадып, оныҥ келер ӧйдӧ чыгатан уулы керегинде судур айткан. (Лука 1:39—45 кычырыгар.) Мария ого Иегова «Бойыныҥ колыла улу неме этти» деп айтты (Лука 1:46—51). Гавриил ле Елизавета ажыра Иегова Марияга ийде-кӱч берди.

13. Боливияда јадып турган эјеге ака-эјелер канайып болушты?

¹³ Бис те Мария чилеп, болушты Кудайдыҥ ишчилеринеҥ бедиреер аргалу. Темдектезе, Боливияда јадып турган Дасури́ деп эјеге мындый болуш керек болгон. Оныҥ адазына ӧлӱмге экелетен диагноз тургузып саларда, ол больницада јаантайын оныҥ јанында болуп, оны кичееп кӧрӧргӧ кӱӱнзеген (1 Тим. 5:4). Је кезикте оныҥ чыдалы чек ле чыгып калатан. Эје айдат: «Мен база чыдажып болбозым деп санаалар кӧп катап келип туратан». Ол ака-эјелердеҥ болуш сураган ба? Озо баштап јок. Ол айдат: «Мен ака-эјелерге јӱк болорго кӱӱнзебегем. Мынайда сананып туратам: менде Иегова бар не. Ака-эјелерди тегин јерге не чаксырадатан? Је оноҥ мен ака-эјелеримнеҥ тууралап, кӱчтеримниҥ аайына јаҥыскан чыгарга албаданып тургам деп оҥдоп ийгем» (Укаа 18:1). Оноҥ Дасури эје бойыныҥ айалгазы керегинде најыларына куучындап берген. «Кару ака-эјелерим меге ондый јаан болуш јетирген. Олор меге больницадӧӧн курсак экелип туратан, Агару Бичиктеҥ токунал беретен ӱлгерлерле ӱлежип туратан. Мындый кӱч айалгада сен јаҥыскан эмес болгоныҥ кандый јакшы! Иегованыҥ билези андый јаан. Бу биледе најылар сеге болужарга, сенле кожо ыйлаарга ла учына јетире тартыжарга јаантайын белен» — деп, ол куучындаган.

14. Биске аксагалдардыҥ болужын нениҥ учун алар керек?

¹⁴ Анайда ок Иегова биске аксагалдар ажыра болужат. Бу оныҥ јаан сыйы болот. Иегова аксагалдарды оныҥ ишчилериниҥ кӱӱнин кӧдӱрзин деп кӱӱнзейт (Иса. 32:1, 2). Оныҥ учун слерди та не де санааркадып турган болзо, бойоордыҥ аксагалдараарла куучындажып ийеер. Олордыҥ болужын јектебей, карын, быйанду  болуп, алыгар. Ол тушта Иегова слерди кӱчтӱ эдип салар.

15. Христиандар кандый ижемјини баалап јат?

¹⁵ Агару Бичикке тӧзӧлӧнгӧн ижемји биске ийде-кӱч берет (Рим. 4:3, 18—20). Христиандарда јажын-чакка јӱретен кайкамчылу арга бар. Кезиги — јердеги райда јадар, а кезиги — теҥеридеги Каандыкта јадар. Бу ижемји кандый ла ченелтелерди ӧдӧргӧ, сӱӱнчилӱ јарды јарлаарга, анайда ок јуундагы берген јакылталарды бӱдӱрерге ийде-кӱч берет (1 Фес. 1:3). Бу ижемји апостол Павелди де тыҥыткан.

16. Нениҥ учун Павелге Кудайдыҥ ийде-кӱчи керек болгон?

¹⁶ Апостол Павелге нениҥ учун Кудайдыҥ ийде-кӱчи керек болгон? Ол Коринфтеги јуунга бичиген самаразында бойын јеҥил оодыла бергедий той балкаш јыракыга тӱҥдештирген. Ол «кӱч айалгаларда јӱр[ет]», улус оны «кыстайдылар», «истейдилер» деп бичиген. Ол, керек дезе, ӧлӱмниҥ кырында да болгон (2 Кор. 4:8—10). Бу сӧстӧрди Павел ӱчинчи миссионер јорыгында бичиген. Је кийнинде, ондо оноҥ јаан ченелтелер болгон: ол соктырткан, арестке алдырган, керептӱ чӧҥгӧн лӧ тӱрмелеткен.

17. Павелге ченелтелерди ӧдӧргӧ не болушкан? (2 Коринфтегилерге 4:16—18).

¹⁷ Павелге ченелтелерди чыдажып ӧдӧргӧ ижемји болушкан. (2 Коринфтегилерге 4:16—18 кычырыгар.) Ол Коринфтеги ака-эјелерге оныҥ «эди-каны уйадап та» турган болзо, чӧкӧбӧй јат деп бичиген. Апостол ичкери кӧргӧн. Ол бойыныҥ теҥериде јадар ижемјизин сӱреен тыҥ баалап, ол учун кандый ла шыраны ӧдӧргӧ белен болгон. Павелди ижемји керегинде тереҥ шӱӱп сананганы кӱчтӱ эдетен.

18. Тихомирге ле оныҥ билезине ижемји кандый ийде-кӱч берет?

¹⁸ Болгарияда јадып турган Тихомир деп акага кӱчтерди ӧдӧргӧ ижемји болушкан.  Канча да јыл мынаҥ кайра автокатастрофада оныҥ Здра́вко деп карындажы божоп калган. Тихомир коркышту тыҥ ачу-коронго алдырткан. Оноҥ ол ӧткӱре санааркабаска, ӱйи ле уулчагыла кожо тирилиш керегинде сананып баштаган. Тихомир куучындайт: «Бис Здравко тирилип келзе, оны канайып уткыырысты, кемдерди кычырарысты, анайда ок калганчы кӱндерде не болгонын куучындаарысты шӱӱжип јадыс». Тихомирге ижемји чӧкӧбӧскӧ лӧ Иегова оныҥ карындажын тиргизер ӧйди оноҥ ло ары сакыырга болужат.

19. Келер ӧйгӧ ижемјини канайып тыҥыдарга јараар? (Јурукты база кӧрӱгер.)

¹⁹ Келер ӧйгӧ ижемјини тыҥыдарга нени эдерге јараар? Слер ӱргӱлјиге јердеги райда јадарга турган болзоор, Агару Бичикте бу јӱрӱм керегинде не айдылганын кычырып туругар (Иса. 25:8; 32:16—18). Бойоорды ондо деп сананып туругар. Слер ондо кемди кӧрӧдӧӧр? Нени угадыгар? Нени сезедеер? Келер јӱрӱм санаагарда оноҥ јакшы јуралзын деп турган болзоор, бистиҥ бичиктерде райды јурап салган јуруктарды кӧрӱп туругар. Анайда ок «Јаҥы јӱрӱм келди!», «Сакыган кӱн сӱреен јуук!» ла «Јаҥы јӱрӱмди сананып тур» деген видеолорды кӧрӱгер. Ижемјини јаантайын сананып турзагар, бӱгӱнги кӱнде болуп турган кӱчтер «кыска ӧйгӧ» лӧ «јеҥил» деп билдирер (2 Кор. 4:17). Иегова ижемјини бисти ийде-кӱчтӱ болзын деп берген.

20. Ийде-кӱчеер чыгып калган деп билдирип турза, слерге не болужар?

²⁰ Кезикте слер бойоорды чыдал јок деп сезип турган болзоор, чӧкӧбӧгӧр. Иегова слерге алаҥзу јогынаҥ болужар (Сар. 108:13). Нениҥ учун дезе ол биске ийде-кӱчтӱ болорго болужатан немелерди берип јат. Оныҥ учун слерге уур јакылтаны бӱдӱрерге, ченелтени чыдажарга эмезе сӱӱнчини јылыйтпаска нени эдер керек? Иеговага баштанып, оныҥ башкартузын таҥынаҥ ӱренген тужыгарда бедирегер. Ака-эјелердиҥ болужын јектебегер. Анайда ок санаагарда јаантайын јаҥы телекейди јурап туругар. Ол тушта «сӱреен кӱчтӱ Кудай слерге ончо немени чыдажып, сӱӱнчилӱ ӧдӱп турарга, керектӱ ийде-кӱчти бер[ер]» (Кол. 1:11, ЈТ).