1, 2. Агару Бичикти канайып јазап кычырар ла ӱренер? Тем куучындап беригер.

 СЛЕР тура садып аларга турганаар деп сананып ийзеер де. Тураны садып алардаҥ озо, оныҥ незин кӧрӧр эдеер? Јӱк ле фотозын кӧрӱп ийеле, садып алар эдеер бе? Јок эмей, аларга турган турагардыҥ ичине кирип, кыптарын ајыктап, оны айландыра ӱзе кӧрӧр эмес бедеер? Анайда ок бу тураныҥ канайып тудулганыныҥ чертёжторын да кӧрӧр болороор. Кандый да болзо, слер аларга турган турагарды бастыра јанынаҥ ширтеп кӧрӧргӧ кӱӱнзеер болороор.

² Анайып ла Агару Бичикти кычырып, ӱренип турганысты айдарга јараар. Бир библеист Агару Бичикти бийик шибеелерлӱ тереҥ фундаменттӱ јаан турага тӱҥдештирген. Андый болзо, бу бичикти ӱзе оҥдоп алатан арга бар ба? Слер бу бичикти тӱрген кычырып ийзеер, јӱк ле тӧс чындыктарды билип алараар (Евр. 5:12). Канайып тура алардаҥ озо слер ичиндӧӧн кирип јадаар, анайып ла Агару Бичиктиҥ ӱлгерлери бой-бойыла кандый колбулу болгонын кӧрӧргӧ албаданыгар. Слер јӱк ле кандый чындыкка бӱдӱп турганаар эмес, је нениҥ учун ого бӱдӱп турганаарды оҥдоп алыгар.

3. Апостол Павел ака-эјелерди неге кӱӱнзеткен ле нениҥ учун? (Эфестегилерге 3:14—19).

³ Агару Бичикти јакшы оҥдоорго, биске оны тереҥжиде шиҥдеер керек. Апостол Павел бойыныҥ ака-эјелерин  Кудайдыҥ Сӧзиниҥ «элбегин ле узунын, бийигин ле тереҥин оҥдоп алар[га]», Агару Бичикти јазап шиҥдезин деп кӱӱнзеткен. Ол тушта олордыҥ бӱдӱмјизи бек болор эди. (Эфестегилерге 3:14—19, ЈТ кычырыгар.) Биске де анайып эдер керек. Эмди дезе биске Агару Бичикти јазап шиҥдеерге не болужарын кӧрӱп ийектер.

4. Агару Бичикти тереҥ шиҥдегени Иеговага оноҥ јуук болорго канайып болужар? Темдер куучындап беригер.

⁴ Бис, христиандар, Агару Бичиктиҥ јӱк ле тӧс чындыктарыла болорзынбай јадыс. Бис Кудайдыҥ тереҥ де чындыктарын оҥдоорго кӱӱнзейдис. Олорды оҥдоорго биске агару тын болужар (1 Кор. 2:9, 10). Слерге јилбилӱ болуп турган кандый бир суракты эмезе теманы талдап алала, оны тереҥжиде шиҥдеп кӧрӱгер. Анайып этсеер, слердиҥ Иеговала колбулараар оноҥ тыҥ болор. Темдектезе, Кудай алдындагы ӧйдӧ ишчилерине канайып сӱӱжин кӧргӱскенин шиҥдезеер, ол слерди де сӱӱп турган деп кӧрӱп ийереер. Ол эмезе израильтяндардыҥ Кудайга бажырганы бӱгӱнги христиандардыҥ бажырыжыла незиле тӱҥей болгонын тӱҥдештиригер. Анайда ок Иисус јерде болордо, ого кандый судурлар бӱткенин шиҥдеерге јараар.

5. Слерде таҥынаҥ ӱренер тушта јазап оҥдоп аларга турган сурактар бар ба?

⁵ Агару Бичиктиҥ ченемелдӱ шиҥдеечилеринеҥ: «Слер кандый темаларды тереҥжиде шиҥдеер эдеер?» — деп сурагандар. Олордыҥ карууларыныҥ кезиги  «Таҥынаҥ ӱренер аргалар» деген рамкада берилген. Агару Бичикти мынай шиҥдегени сӱреен јилбилӱ болот. Анайда ок слер «Путеводитель по публикациям Свидетелей Иеговы» ла «Индекс публикаций Сторожевой башни» деген бичиктерди тузаланар аргалу. Кажы ла јанынаҥ Агару Бичикти шиҥдезеер, бӱдӱмјигер тыҥыыр ла «Кудай керегинде билгирди» таап алараар (Укаа 2:4, 5). Је эмди Агару Бичиктиҥ кезик тереҥ чындыктарын кӧрӱп ийектер, кийнинде олорды слер бойоор јазап шиҥдеер аргалу.

6. а) Амадуныҥ ла планныҥ нези башка? б) Иегованыҥ јер ле улус аайынча амадузын нениҥ учун «ӱргӱлји» деп айдарга јараар? (Эфестегилерге 3:11).

⁶ Темдектезе, Агару Бичикте Кудайдыҥ амадузы керегинде не айдылганын кӧрӱп ийектер. План ла амаду чек эки башка неме. Планды једетен јерге апаратан јолго тӱҥдештирерге јараар. Јолдо не-не боло берзе, план бӱтпей калардаҥ айабас. А амаду ол једетен јер. Кижи једип баратан јерине канайып једерин билип турза, ого башка-башка јолдорло једип барар аргалу. Талдап алган јолыста не-не боло до берзе, ӧскӧ дӧ јолло једип барарыс. Бис Иегова Кудайыска јер ле улус аайынча «ӱргӱлји амадузы» (JT) учун јаан быйанду (Эф. 3:11). Ол оны биске Сӧзи ажыра араайынаҥ ачкан. Иегованыҥ јолында кандый да буудактар болзо, оныҥ амадузы тӱҥей ле бӱдӱп калат. Нениҥ учун дезе ол «бойыныҥ амадузын бӱдӱрерге ончоны эдет» (Укаа 16:4). Айдарда, Кудайдыҥ амадузын кем де, не де бузып болбос. Оныҥ амадузы кандый? Ол оны бӱдӱрерге кандый солынталар эткен?

7. Баштапкы улустыҥ тӱймеениниҥ кийнинде Иегова амадузын бӱдӱрерге нени эткен? (Матфей 25:34).

⁷ Кудай баштапкы улуска: «Ӧзигер, кӧптӧгӧр, јерди толтырып ээлегер... Тындуларга ээ ле баш болыгар» — деп айдып, нени амадаганын ачып берген (Баш. 1:28). Је Адам ла Еваныҥ тӱймеенинеҥ улам кижиликке кинчек кирген. Је бу Иегованыҥ амадузын бӱдӱрерге буудак болбогон. Иегова ӧскӧ эп-арга тузаланган. Ол баштапкы амадузына јединерге болужатан Каандык тургускан. (Матфей 25:34 кычырыгар.) Темдектелген ӧйдӧ Кудай јердӧӧн бойыныҥ Уулын ийген. Иисус улуска бу Каандык керегинде куучындап, бойыныҥ јӱрӱмин улус учун берип, олорды ӧлӱмнеҥ ле кинчектеҥ айрыган. Мынаҥ бис Иегованыҥ сӱреен јаан сӱӱжин кӧрӱп јадыс. Кийнинде Иисус теҥериде Кудайдыҥ Каандыгында каан болорго тирилген. Је Кудайдыҥ амадузы керегинде бис база да кӧп неме билип алар аргалу.

8. а) Агару Бичиктиҥ тӧс темазы кандый? б) Кудайдыҥ амадузына база не кирет? (Эфестегилерге 1:8—11). (Кадарындагы јурукты кӧрӱгер.)

⁸ Агару Бичиктиҥ тӧс темазы кандый? Иегованыҥ адын агарулаары. Ол мыны канайып эдер? Ол Христос башкарза, Каандыктыҥ болужыла јер аайынча амадузын бӱдӱрип салар. Иегованыҥ амадузын кем де солып болбос. Ол бойыныҥ айткан сӧзине турар (Иса. 46:10, 11; Евр. 6:17, 18). Удабас јердиҥ ӱсти рай болуп калар, ол тушта Адам ла Еваныҥ чындык балдары јерде ӱргӱлјиге јадар (Сар. 22:26). Је Кудайдыҥ амадузына мынаҥ да ӧскӧ кайкамчылу немелер кирет. Ол теҥеридеги ле јердеги ончо чындык ишчилерин бирлик эдип салар. Нениҥ учун дезе олор Иегованы бойыныҥ башчызы эдип тооп, ого сӧс јогынаҥ багынып јӱрет. (Эфестегилерге 1:8—11, ЈТ кычырыгар.) Иегова бойыныҥ амадузын канайып бӱдӱрип турганын билерге кандый кайкамчылу!

9. Агару Бичикти кычырып, келер ӧйдиҥ канча кирези керегинде билип аларга јараар?

⁹ Иегованыҥ Эдем садта айткан судурын кӧрӱп ийектер. Бу судур Башталганы 3:15-те b бичилген. Ондо Иегова амадузын бӱдӱрерге нени эдер деп јартап салган. Је ондогы учуралдар канча муҥ јылдар ӧткӧн кийнинеҥ араайынаҥ бӱдӱп баштаган.  Темдектезе, Кудай Авраамга оныҥ бала-барказынаҥ Христос чыгар деп сӧзин берген (Баш. 22:15—18). Оноҥ б. э. 33 јылында Иисус чоҥчойына чактырткан (Ап. ижи 3:13—15). А 1 000 јыл ӧткӧн кийнинде, качан Иисус Сатананыҥ бажын јара чапкан тушта, бу судур бӱдӱнге бӱдӱп калар (Ачыл. 20:7—10). Је Агару Бичикте Иегованыҥ организациязыныҥ ла Сатананыҥ телекейиниҥ тартыжузы учы-кыйузына једип келзе не болоры керегинде база да ӧскӧ јетирӱлер бар.

10. а) Удабас не болор? б) Бис бого јӱрегисти ле санаабысты канайып белетеп алар аргалу? (Сноскада айдылган бичикти кӧрӱгер.)

¹⁰ Агару Бичикте кайкамчылу учуралдар керегинде айдылып калганын сананып ийзеер де. Озо баштап албатылар: «Амыр, кайдаҥ да јеткер јок» — деп айдыжар (1 Фес. 5:2, 3). Оноҥ олор тӧгӱн кудай јаҥдарга табару эдер (Ачыл. 17:16). Анайып улу тӱбек башталар. Мыныҥ кийнинде улус «улу кӱчтӱ ле мактулу Кижи Уулы теҥериниҥ булудыла келип јатканын кӧрӱп ийер». Ол тушта кайкамчылу немелер болордоҥ айабас (Матф. 24:30). Оноҥ Иисус кижиликти јаргылап, койлорды эчкилердеҥ ылгап баштаар (Матф. 25:31—33, 46). Је бу ок ӧйдӧ Сатана колын бош салала отурбас. Ол кара санаазына јединерге, Кудайдыҥ ишчилерине албатылардыҥ коалициязын (Магог јериҥ Гог) табару этсин деп кӱӱнзедер (Иез. 38:2, 10, 11). Оноҥ кандый да ӧйдӧ јерде јадып турган майлаткандар теҥеридӧӧн алылар, олор Иисус ла оныҥ черӱзиле кожо Армагеддондо туружар. Мынайып улу тӱбек божоор (Матф. 24:31; Ачыл. 16:14, 16) c. Мыныҥ кийнинде Иисус 1 000 јылга башкарып баштаар (Ачыл. 20:6).

11. Ӱргӱлји јӱрӱм кандый аргалар ачат? (Јурукты база кӧрӱгер.)

¹¹ Эмди 1 000 јыл божогон кийнинде болотон јӱрӱмди сананып ийектер. Агару Бичикте бистиҥ Јайаачы «улустыҥ јӱрегине јажын-чакка јӱрер кӱӱнди» салып койгон деп айдылат (Эккл. 3:11). Бу не дегенин ле  Иеговала колбулараарга бу кандый камаанын јетирип турганын сананып ийзеер де. «Приближайся к Иегове» деген бичиктиҥ 319 бӱгинде мындый сӱреен јакшы сӧстӧр айдылат: «Јӱстер, муҥдар, миллиондор керек дезе миллиардтар да јылдар јӱрӱп, бис эмдигизине кӧрӧ Иегова Кудай керегинде канча киреге кӧпти билер болорыс. Је андый да болзо, биске сӱреен кӧп, јараш чындыктар ачылар. [...] Ӱргӱлји јӱрӱм јилбилӱ, солун ла кайкамчылу болор! Је эҥ учурлузы, Иеговага оноҥ ло ары јууктаарыс!» Агару Бичикти шиҥдеп тура, бис база нени билип алар аргалу?

12. Теҥериде не болуп турганын кӧрӱп ийерге биске не болужар? Тем куучындап беригер.

¹² Кудайдыҥ Сӧзи «бийикте јадып турган» Иегованыҥ јанында болгоны кандый кайкамчылу деп санаабыста јураарга болужат (Иса. 33:5). Агару Бичик Иегова ла оныҥ организациязыныҥ теҥеридеги бӧлӱги керегинде сӱреен јилбилӱ неме ачат (Иса. 6:1—4; Дан. 7:9, 10; Ачыл. 4:1—6). Темдектезе, «теҥерилер ачылган тушта» Иезекиильдиҥ кӧргӧн кӧрӱлтезин алза, кижиниҥ куйка бажы јымыраар! (Иез. 1:1).

13. Слер Иисустыҥ теҥеридеги ижинеҥ нени баалап јадаар? (Еврейлерге 4:14—16).

¹³ Анайда ок Иисустыҥ теҥеридеги јаҥы керегинде сананып ийзеер де. Ол Каан болуп башкарып јат ла килемкей Улу абыс болуп јат. Бис оныҥ шылтуузынаҥ улам «иштеп албас Кудайдыҥ јалакайыныҥ ширеезине» јууктаар аргалу. Ӧскӧртӧ айтса, ол бисти килеп, «ӧйи-ӧйинде» болужар деп, алаҥзыбай мӱргӱӱр аргалу. (Еврейлерге 4:14—16, ЈТ кычырыгар.) Оныҥ учун кажы ла кӱн Кудайдыҥ ла Иисустыҥ теҥеридеҥ биске нени эткенин ле нени эдип турганын шӱӱп сананып турактар. Олордыҥ сӱӱжи бисти олорды сӱӱрге, Иеговага акту  јӱректеҥ иштеерге ле бажырарга кӱӱнзедер учурлу (2 Кор. 5:14, 15).

14. Бис Иегова ла Иисуска быйанду болгонысты канайып кӧргӱзер аргалу? (Јурукты база кӧрӱгер.)

¹⁴ Кудайды ла оныҥ Уулын тыҥ сӱӱп турга́ныс деп кӧргӱзетен эҥ артык эп-аргалардыҥ бирӱзи — улуска Иегованыҥ Керечилери ле Иисустыҥ ӱренчиктери болорго болужары (Матф. 28:19, 20). Апостол Павел Кудайга ла Иисуска быйанду болгон, оныҥ учун ол анайып ла эткен. Ол Иегованыҥ «ончо улус чындыкты билип, аргадалзын» (ЈТ) деп кӱӱнзеп турганын билген (1 Тим. 2:3, 4). Павел бастыра бойын јарлаар ишке берип, канча кире аргазы бар, ончо улуска јарлап туратан. Оныҥ учун ол: «Кезиктерин де болзо аргадап аларга, канча кире аргам бар ончоны эткем» (ЈТ) — деп, айдар аргалу болгон (1 Кор. 9:22, 23).

15. Сарын 1:2-ле болзо, бисти не ырысту эдер?

¹⁵ Ырысту ла једимдӱ кижи керегинде сарнаачы: «[Ол] сӱӱнчини Иегованыҥ јасагынаҥ табат, оныҥ јасагын јарым ӱнле тӱн-тӱш кычырат» — деп бичиген (Сар. 1:1—3, сноска). Бу ӱлгерди Агару Бичиктиҥ Джозеф Ротергам деп кӧчӱреечизи андый кижи керегинде мынайып айткан: «...ол Кудайдыҥ ӱредӱзин сӱреен тыҥ сӱӱп, оны бедиреп, тереҥжиде шиҥдеп, билип алганын узак шӱӱп сананат. [...] ...Кӱнниҥ учында ол библиялык ойгорды оноҥ јакшы оҥдоп алдым деп айдып болбос болзо, андый кӱн калас ӧткӧн деп айдарга јараар» (Joseph Rotherham. Studies in the Psalms). Агару Бичик сӱреен јилбилӱ, оныҥ оок-теек те јетирӱлери сӱреен кӧп. Олор бой-бойлорыла кандый колбулу болгонын шиҥдеери кӧп сӱӱнчи экелет. Агару Бичикти кажы ла јанынаҥ шиҥдеери кандый јакшы!

16. Келер јӧрмӧлдӧ бис нени шӱӱжерис?

¹⁶ Иегова бойыныҥ Сӧзинде кӧп јараш чындыктар ачып јат. Је та кемде мен качан да оны оҥдобозым деп коркыыр болор. Анайып айдарга меҥдебегер. Келер јӧрмӧлдӧ тереҥ чындыктардыҥ бирӱзин: Иегованыҥ улу кӧгӱс ӧргӧӧзи керегинде теманы шиҥдеерис. Бу керегинде апостол Павел еврейлерге бичиген самаразында айдат. Слер бу јӧрмӧлди шиҥдезеер, кӧп сӱӱнчи алараар деп алаҥзыбайдыс.