1. Иегова бойыныҥ ишчилерин кӧрӱп, нени сезет?

 ИЕГОВА бойыныҥ кару ишчилерине коркышту јаан ајару эдет. Ол олордыҥ неге сӱӱнип, неге кунугып турганын кӧрӧт (Сар. 37:18). Оныҥ учун Иегова олорго ачу да болзо, агару ишке оноҥ ло ары эрчимдӱ туружып тургандарын кӧрӱп, оморкоп јат. Кудай олорды бир де јаҥыскан артыргыспай турган. Ол олорды токунадып ла кичееп јат.

2. Иегова јӱреги сыстагандарга канайып болужат? Оныҥ болужын аларга биске нени эдер керек?

² Сарын 147:3-те айдылганыла, Иегова «јӱреги сыстагандардыҥ» шырказын таҥып койот. Бу сӧстӧрдӧҥ, Иегова ачу сезимдерине алдырткан улуска болужарга тыҥ кӱӱнзеп турган деп кӧрӧдис. Је андый болушты аларга биске нени эдер керек? Мындый тем кӧрӱп ийектер. Шыркаладып ийген кижи врачка барып јат, ого јазыларга врачтыҥ айтканы аайынча эмденер керек. Бу јӧрмӧлдӧ Агару Бичикте шыркалаткан улуска кандый «рецепт» бичилгенин ле јазыларга биске нени эдер керек деп билип аларыс.

ИЕГОВА БИСТИ СӰРЕЕН ТЫҤ БААЛАП ТУРГАН

3. Кезик улус нениҥ учун бойын кемге де керек јок деп сананат?

³ Бис сӱӱш јок телекейде јададыс. Оныҥ да учун кӧп улус бойын кемге де керек јок деп сезип јат. Хе́лен a эје мынайып айдат: «Кичинек тужымда мен сӱӱш деп неме кӧрбӧгӧм. Адам коркышту кату, казыр кижи болгон. Ол мени кӱнӱҥ ле јамандап туратан». Мындый айалга слерде де болгон болор, оноҥ улам слер бойоорды эш кереги  јок, неге де турбас кижи деп сананып турган болороор. Анайда ок кемниҥ де сӱӱжине бӱтпей јадыгар.

4. Иегова биске Сарын 34:18 ажыра нени айдат?

⁴ Улус слерге канайып та баштанып турган болзо, Иегова слерди сӱӱп ле баалап јат. Агару Бичикте айдылганыла, Кудай «кунугып јӱрген улусты артыргыспай јат». (Сарын 34:18 кычырыгар.) Иегова јӱрегерди кӧрӱп, слерди бойына јууктадып алган (Иоанн 6:44). Ол слерге болужарга јаантайын белен, нениҥ учун дезе слерди сӱреен тыҥ сӱӱп јат.

5. Иисус јаман кӧрдӱрип тургандарга канайып баштанганынаҥ бис неге ӱренедис?

⁵ Иегованыҥ сезимдери керегинде тереҥжиде билип аларга, Иисустыҥ темин кӧрӧр керек. Иисус јерде болуп турарда улуска јаман кӧрдӱрип тургандарга јалакай ла јымжак баштанар болгон (Матф. 9:9—12). Темдектезе, бир катап кӧп јылдарга ооруп јӱрген ӱй кижи јазыларга болуп, Иисустыҥ кийимине тийип ийген. Иисус дезе ол ӱй кижини токунадып, бӱдӱмјизи учун мактаган (Марк 5:25—34). Ол улуска Адазыла чылап баштанган (Иоанн 14:9). Оныҥ учун Иегова слерди баалап турган ла слердиҥ јакшы кылык-јаҥдараарды кӧрӱп турган, анайда ок слердиҥ ого бӱдӱп турганаарды ла оны сӱӱп турганаарды кӧрӱп јат.

6. Бойоорды уйан кӧрӱп турган болзоор, канайдар?

⁶ Слер кезикте ол эмезе јаантайын бойоорды неге де турбас уйан кижи деп кӧрӧдӧӧр бӧ? Андый болзо, Иегованыҥ сӱӱжин кӧргӱзип турган библиялык ӱлгерлерди кычырып, шӱӱп сананыгар (Сар. 94:19) b. Ол эмезе слер тургускан амадугарга јединип болбой турган болороор, ӧскӧ улус чылап кӧп неме  эдип болбой турганаар. Андый болзо, бойоорды бир де јаман кӧрбӧгӧр, Иегова слердеҥ эдип болбос неме сакыбай јат (Сар. 103:13, 14). Ол эмезе слерди кем-кем соккон, айткылаган, керек дезе сексуальный базыныш болгон болзо, бойоорды бир де бурулабагар. Бурулу кижи, ол слерди базынган кижи. Ол бойыныҥ јаман керектери учун Иегованыҥ алдына кату каруузына турар (1 Пётр 3:12). Кичинек тушта улуска јаман кӧрдӱртип, базындырган Сандра айдат: «Мен јаантайын Иеговага мӱргӱп, бойыма оныҥ кӧзиле кӧрӧргӧ болуш сурап јадым».

7. Бисле болгон јаман учурал, неде тузалу болор аргалу?

⁷ Слер бойоорды неге де турбас кижи деп сананып турган болороор, је Иегова анайып сананбай јат. Карын ол слерге оныҥ ишчизи болотон ло сӱӱнчилӱ јарды јарлайтан арга берген (1 Кор. 3:9). Иегова слер ажыра кемге-кемге болужар аргалу. Слер кандый бир кӱч айалганы ӧдӱп чыккан болзоор, андый ок айалгага тӱшкен улусты оҥдоп, олорго болужар аргалу. Андый болушты ӧрӧ айдылган Хелен алган, ол эмди улуска болужып јат. Хелен куучындайт: «Мен бойымды кереги јок, неге де турбас кижи деп сананатам. А Иегова анайып кӧрбӧй јат. Мен оныҥ сӱӱжин сезип јадым». Эмди Хелен текши пионердиҥ ижин бӱдӱрет.

ИЕГОВА БИСТИ ЈАМАНЫС ТАШТАЛГАНЫНА БӰТСИН ДЕП КӰӰНЗЕЙТ

8. Исайя 1:18 биске нени айдат?

⁸ Иегованыҥ кезик ишчилери сууга чӧҥӱрилердеҥ озо эмезе кийнинде эткен кандый бир јастыразы учун тыҥ јинип турган. Је Иегова слерди сӱӱп јат, ол слер учун толынты эткен. Ол слерди бу сыйды алзын деп кӱӱнзеп јат. Иегова слердиҥ кинчектереерди таштап койгон болзо c, ол оны ойто качан да эске алындырбас. (Исайя 1:18 кычырыгар.) Карын Иегова бистиҥ кинчектеристи ундып салат, је јакшы керектеристи бир де ундыбай јат (Сар. 103:9, 12; Евр. 6:10).

9. Ӧдӱп калган немени нениҥ учун сананып јӱрбес керек?

⁹ Слер кандый бир неме учун бойоорды јинип турган болзоор, ӧдӱп калган немени сананбай, је эмдиги айалгагарды ла келер ӧйди сананыгар. Апостол Павел анайып эткен. Ол озо баштап христиандарды коркышту тыҥ истешкен, мынаҥ улам јаман керектери учун бойын јинип јӱрер эди. Је Иегова оныҥ кинчектерин таштап койгон деп, ол бӱткен (1 Тим. 1:12—15). Оныҥ учун ол ӧдӱп калган немени сананып јӱрбеген. Канайып иудаизмде јеткен једимдерин ундып салган, анайып ла бойыныҥ јастыраларын ундып салган (Флп. 3:4—8, 13—15). Павел бастыра ийде-кӱчинеҥ Иеговага иштеген, анайда ок ичкери кӧргӧн. Слер де Павел ле чилеп ӧдӱп калган немени солып болбозоор. Оныҥ ордына Иегованы эмдиги айалгагарда сӱӱндирип, келер ӧйди сананып турар аргалу.

10. Слер та кемди де ачындырган болзоор, нени эдер аргалу?

¹⁰ Слер байла, алдындагы ӧйдӧ та кемди де ачындырып салганаар учун санааркап јӱредеер. Андый учуралда нени эдер керек? Слер ол кижинеҥ јаманыгарды таштазын деп сураар аргалу (2 Кор. 7:11). Анайда ок Иеговага слердиҥ ачындырган улусты токунадып салзын деп мӱргӱгер.  Кудай ол улуска да, слерге де амырын берер ле чындыктыҥ јолында артарга болужар.

11. Ионаныҥ теминеҥ неге ӱренедис? ( јурукты база кӧрӱгер.)

¹¹ Эткен јастыралараардаҥ ӱредӱ алыгар ла Иегова нени айдар, оны ла эдерге белен болугар. Андый учурал Ионада болгон. Иегова ого Ниневия барзын деп айткан, је Иона чек ӧскӧ јанындӧӧн кача берген. Андый да болзо, Иегова ого јастыразын алынарга болушкан (Иона 1:1—4, 15—17; 2:7—10). Ол бойыныҥ судурчызынаҥ бир де чӧкӧбӧгӧн. Карын ого база бир арга берген. Ол Ионаны Ниневиядӧӧн барзын деп ойто катап айткан, бу учуралда Иона Кудайдыҥ айтканын бӱдӱрип салган. Айдарда, Иона јастыразын алынган да болзо, је ӧйинеҥ ӧткӱре бойын јинип отурбаган. Оныҥ ордына Иегованыҥ берген јакылтазын бӱдӱрген (Иона 3:1—3).

ИЕГОВА БИСТИ АГАРУ ТЫНЫЛА ТОКУНАДАТ

12. Иегова биске ачу-коронды ӧдӧргӧ канайып болужат? (Филиппыдагыларга 4:6, 7).

¹² Бистиҥ јӱрӱмисте коркышту јаан ачу-корон болзо, Иегова агару тыны ажыра бисти токунадып салат. Мындый учурал Рон ло Кэ́рол деп эш-нӧкӧрлӧрдӧ болгон. Олордыҥ јажы јаанап калган уулы бойына кол салынган. Бу эш-нӧкӧрлӧр мынайып куучындаган: «Јӱрӱмисте кандый ла кӱчтер болгон, је мынаҥ јаан ачу-корон болбогон. Уйку јок тӱндер болзо, экӱ таҥ атканча ла мӱргӱйтенис. Анайып Филиппыдагыларга 4:6, 7-де (кычырыгар) айдылган амырды сезип туратаныс». Слерде кандый бир коркышту кӱч неме болуп калза, Иеговага сезимдереерди куучындаарга бир де уйалбай туругар. Андый ӧйлӧрдӧ Иеговага канча да катап мӱргӱзеер, ол слердиҥ мӱргӱӱлдереерди тӱҥей ле угар (Сар. 86:3; 88:1). Кудайдаҥ агару тын суразаар, ол кыйалта јогынаҥ берер (Лука 11:9—13).

13. Агару тын биске Иеговага чындык иштеерге канайып болужар? (Эфестегилерге 3:16).

¹³ Кӱч ченелтенеҥ улам бис колысты бош салып ийердеҥ айабазыс. Слер де андый ченелтени ӧткӧн болороор. Андый болзо, слерге де агару тын Иеговага оноҥ ло ары иштеерге болужар. (Эфестегилерге 3:16, ЈТ кычырыгар.) Фло́раныҥ јӱрӱминде болгон учуралды кӧрӱп ийектер. Ол ӧбӧӧниле кожо миссионерлер болуп иштеген. Је оноҥ Флора ӧбӧӧни ӧскӧ уй кижиле конгонын билип ийген, мынаҥ улам олор айрылыжып калган. Флора куучындайт: «Ӧбӧӧнимниҥ мынайып кылынганынаҥ меге андый ачу болгон, ӧскӧ неме керегинде сананар да аргам јок болгон. Мен мындый немени чыдажып болбозым деп санангам. Мен Иегованаҥ агару тын сураарымда, ол меге бу кӱч айалганаҥ чыгарга болужып, шыркамды јазып салган». Эмди Флора Кудайга оноҥ тыҥ бӱдет. Ол Иегованыҥ болужыла кандый ла ченелтени ӧдӱп чыгар деп бир де алаҥзыбай јат. Ол айдат: «Мен Сарын 119:32-де айдылган сарнаачыныҥ сӧстӧриле јӧпсинедим: «Сениҥ јасактарыҥды мен белен болуп бӱдӱрерим, нениҥ учун дезе сен олорды оҥдоорго болужып јадыҥ» (Сар. 119:32).

14. Агару тынды кӧптӧдӧ аларга нени эдер керек?

¹⁴ Иегованаҥ агару тын сураган кийнинде нени эдер керек? Агару тынды кӧптӧдӧ алатан керектер эдер керек. Јууныҥ туштажуларына јӱрӱп туругар, јарлаар ишке туружыгар. Анайда ок Кудайдыҥ Сӧзин кажы ла кӱн кычырып, оныҥ кӧрӱм-санаазын кӧптӧдӧ билип алыгар (Флп. 4:8, 9). Анда кандый ла кӱчтерге  туштаган улустыҥ темдери бар. Иегова олорго ченелтелердиҥ ӧйинде чындык артарга канайып болушканына ајарып туругар. Ӧрӧги 6-чы абзацта айдылган Сандра кӧп шыра кӧргӧн. Ол мынайып айдат: «Кӱч ӧйлӧрдӧ меге Иосифтиҥ теми сӱреен болушкан. Ол кандый да кӱчтер болуп турарда, Иегованаҥ бир де ыраабаган» (Баш. 39:21—23).

ИЕГОВА АКА-ЭЈЕЛЕР АЖЫРА ТОКУНАДАТ

15. Иегова биске ака-эјелер ажыра канайып болужат? (Јурукты база кӧрӱгер.)

¹⁵ Биске кӱч болуп турза, Иегова биске ака-эјелер ажыра болужат (Кол. 4:11). Мынайып оныҥ сӱӱжин кӧрӧдис. Олор биске канайып болужат? Темдектезе, јӱрегисте јуулган ачуубысты куучындазаас, олор бисти угуп, оҥдоп јат. Олордыҥ јӱк келгени де јаан болуш болот. Олордыҥ кезиги кӱӱнисти кӧдӱретен библиялык ӱлгер d айдып берет ол эмезе бисле кожо мӱргӱп ийет (Рим. 15:4). Кезиги бистиҥ айалгага Иегованыҥ кӧрӱмин оҥдоп аларга болужып берет. Керек дезе чек ийде-кӱч јок ӧйдӧ, олор биске курсак та азып берет. Бу мындый болуштаҥ улам бистиҥ санаабыс јарый берет.

16. Болуш аларга, кезикте нени эдер керек?

¹⁶ Кезикте болушты сураар керек болуп јат. Ака-эјелер бисти сӱӱп јат, оныҥ  учун олор биске болужарга кӱӱнзеп турган (Укаа 17:17). Је олор бистиҥ сезимдеристи ле бис нени керексинип турганысты билбей турган болор (Укаа 14:10). Кӱч болуп турза, кӧксигерде санаалараарды кӧгӱзи тереҥ најылараарга куучындап туругар. Болуш керек болуп турганын јажырбагар. Ол эмезе слерди оҥдогодый кажы бир аксагалла куучындажып ийерге јараар. Кезик сыйындар кӧгӱзи тереҥ эјелерге баштанып јадылар.

17. Недеҥ улам болуш аларга кӱч болуп турган болор, је нени эдер керек?

¹⁷ Кезикте јаҥыскан болор кӱӱнеер келип турза, улусла куучындажар кӱчеер јок болзо, ол эмезе ака-эјелер слерди јазап оҥдобой турган деп билдирип турза, керек дезе олордыҥ сӧстӧри ачынчылу да болуп турза, узак ӧйгӧ јаҥыскан болбогор (Иак. 3:2). Олордоҥ тууралабагар. Не дезе Иегова слерди олор ажыра токунадар аргалу. Гэ́вин деп аксагал депрессияла ооруп турган. Ол мындый сӧстӧр айдат: «Меге эҥ ле кӱч неме — ол улусла куучындажары». Је Гэвин сезимдерине јай бербей јат. Ол ака-эјелерле кожо кӧп болуп турган. Олорло куучындашкан эштеген кийнинеҥ, ого бир эмеш јеҥил боло берет. Э́ми эје куучындайт: «Јӱрӱмимде болгон учуралдардаҥ улам меге улуска бӱдерге кӱч. Је мен ака-эјелерди сӱӱрге ле олорго бӱдерге ӱренедим. Нениҥ учун дезе мен Иеговага тӱҥей болорго кӱӱнзейдим. Мындый кӱӱнимле Иегованы да сӱӱндиредим, бойым да сӱӱнедим».

СЛЕРДИ ИЖЕМЈИ ТОКУНАТСЫН

18. Иегова биске нени белетеп салган? Биске эмди ле нени эдер керек?

¹⁸ Удабас Иегова бисти физический ле эмоциональный оору-јоболдоҥ јазып салар (Ачыл. 21:3, 4). Ол ӧйдӧ алдындагы болгон кандый ла јаман немелер јӱрекке ачу сыс экелбес (Иса. 65:17). Бу јӧрмӧлдӧ кӧргӧнисле, Иегова бистиҥ јӱректеристеги шыркаларды јазарга эмди ле кӧп неме эдет. Оныҥ учун бу јӧптӧрдиҥ ончозын тузаланыгар. «Ол слерди кичееп кӧрӱп јӱрген» деп бир де алаҥзыбагар (1 Пётр 5:7).