Кычыраачылардыҥ сурактары
Сарын 12:7-де: «Сен олорды корулаарыҥ» — деп айдылат. Мында не керегинде айдылган: «кыйналгандар» (5 ӱлгер) керегинде бе эмезе «Иегованыҥ сӧстӧри» (6 ӱлгер) керегинде бе?
Контекстин кӧрзӧ, бу ӱлгерде улус керегинде айдылат.
Сарын 12:1—4-тӧ сӧзине турар кижи артпаган деп бичилген. А 5-теҥ 7-ге јетире ӱлгерлерде мынайда айдылган:
«Кыйналгандарды базынадылар,
Јокту-јойу улус онтоп јат,
Је мен олор учун туруп чыгарым, — деп, Иегова айдат, —
Олорды электеечилердеҥ аргадап аларым».
Иегованыҥ сӧстӧри ару.
Олор балкаш печкеде кайылтылып, 7 катап арчылган мӧҥӱн ошкош.
Сен олорды корулаарыҥ, Иегова,
Бу ӱйенеҥ јаантайын корулаарыҥ.
5-чи ӱлгерде Кудай «кыйналгандарга» нени эдери керегинде айдылат. Ол олорды аргадап алар.
6-чы ӱлгерде «Иегованыҥ сӧстӧри ару», кайылтып аруталган мӧҥӱндий деп бичилген. Мыныла бастыра христиандар јӧпсинет (Сар. 18:30; 119:140).
7-чи ӱлгерде: «Сен олорды корулаарыҥ, Иегова, бу ӱйенеҥ јаантайын корулаарыҥ» — деп айдылат. Мында мындый сурак чыгардаҥ айабас: «олорды» деп сӧс кемди эмезе нени кӧргӱзет?
Бу ла ӱлгердеҥ озо «Иегованыҥ сӧстӧри» деп бичилген, оныҥ учун мында Кудай шак ла бойыныҥ сӧстӧрин корулаар деп билдирер болор. Бис билерис, Иегова бойыныҥ Сӧзин, Агару Бичикти, чын ла корулаган деп. Бу бичикти кем де јоголтып та, токтодып та болбогон (Иса. 40:8; 1 Пётр 1:25).
Је 5-чи ӱлгерде айдылган кыйналгандарды Иегова база корулап турган (Иов 36:15; Сар. 6:4; 31:1, 2; 54:7; 145:20).
Айдарда, 7-чи ӱлгерде «олорды» деп сӧс улусты кӧргӱзип турган ба эмезе Иегованыҥ сӧстӧрин кӧргӱзип турган ба?
Бӱдӱн сарынды јазап кычырып ийзеес, «олорды» деп сӧс улусты кӧргӱзет деп јартала берет.
Сарын 12:1-де «чындык улус» тӧгӱннеҥ улам шыралап турган деп айдылат. Оноҥ, тилиле улуска каршу јетирип тургандарга Иегова удура чыгар деп сӧзин берет. Бу 12-чи Сарынды бӱдӱнге кӧрзӧ, Иегова бойыныҥ ишчилерине болужарын кӧргӱзет. А бис Иеговага бӱдер аргалу, нениҥ учун дезе оныҥ сӧзи ару.
Айдарда, 7-чи ӱлгерде Кудай «олорды» кинчектӱлердиҥ колынаҥ корулаар деген сӧс кыйналгандарга айдылган.
Бу ӱлгерде турган «олорды» деп сӧс еврей масорет текстте улусты да, сӧстӧрди де кӧргӱзер аргалу. А грек тилге бичилген Септуагинтада бу јерде 2 катап «бисти» деп сӧс туштайт. Мында базындырып турган чындык ишчилерди корулаары керегинде айдылат. Анайда ок 7-чи ӱлгерде Иегова чындык улусты «бу ӱйенеҥ», ӧскӧртӧ айтса «кинчек эдерге јарап турган» улустаҥ корулаар деп айдылат. Бу ӱлгер арамей тилге бичилген Еврей Бичимелде мынайып айдылган: «Сен, о КАЙРАКАН, чындык улусты корулаарыҥ. Сен олорды бу калју ӱйенеҥ јажын-чакка аргадаарыҥ». Бу ӱзе неме, Сарын 12:7-де айдылганы Кудайдыҥ сӧстӧри керегинде эмес, је улус керегинде айдылат деп кӧргӱзет.
Бу ӱлгер биске Иегова чындык улузын јаантайын корулаар деп ижемји берет.
