1. Бис сӱӱштӱ Иегова Адабыстаҥ неге ӱренер аргалу?

ИЕГОВА бисти тыҥ сӱӱп јат (Иоанн 3:16). Бис сӱӱштӱ Адабыстаҥ тем аларга кӱӱнзеп јадыс, оныҥ учун ончо улусты, анчада ла ака-эјелеристи оҥдоп, сӱӱп, килеп турарга албаданадыс (Гал. 6:10; 1 Петр 3:8). Бистиҥ ака-эјелеристе тӱбек болуп калза, олорго болужарга кӱӱнзейдис.

2. Бу јӧрмӧлдӧ нени шӱӱжерис?

² Иеговага иштеерге кӱӱнзеген улустыҥ ончозында ченелтелер болор (Марк 10:29, 30). Је Сатананыҥ телекейи учына јууктаган сайын кӱчтер оноҥ кӧп болордоҥ айабас. Оныҥ учун бой-бойыбыска канайып болужар керек? Агару Бичикте бичилген Лоттыҥ, Иовтыҥ ла Ноеминьниҥ учуралдары бисти неге ӱредер аргалу деп шӱӱжип ийектер. Анайда ок бистиҥ ака-эјелерде кандый кӱчтер болуп турганын ла олорго канайып болужарын база шӱӱжип ийектер.

3. 2 Петр 2:7, 8-ле болзо, Лоттыҥ тӱп-шӱӱлтези нениҥ учун јастыра болгон, бу неге экелди?

³ Лот јастыра тӱп-шӱӱлте эткен: ол јескинчилӱ балыр керектерле толуп калган Содом калада јадып алган. (2 Петр 2:7, 8 кычырыгар.) Содом бай кала болгон, је  Лот бойыныҥ талдажы учун јаан тӱбекке тӱшкен (Баш. 13:8—13; 14:12). Оныҥ ӱйи бу калага эмезе бу каланыҥ кезик улузына коркышту тыҥ ӱренип калганынаҥ улам Иегованыҥ сӧзин укпаган болор. Анайып Кудай бу каланы отло, кӱкӱрле јоголтып јадарда, ол божоп калган. Лоттыҥ эки кызы керегинде сананып ийигер. Олордыҥ колтулары (жених) база Содомдо божоп калган. Анайда ок анда Лот бойыныҥ туразын, јӧӧжӧзин, керек дезе ӱйин де, јылыйтып салган (Баш. 19:12—14, 17, 26). Бу айалгада Иегова нени этти?

4. Иегова Лотко канайып чыдамкай баштанган? (Кадарындагы јурукты кӧрӱгер.)

⁴ Лот Содомдо јадарга бойы кӱӱнзеген де болзо, Иегова оны ла оныҥ билезин килеп, олорго ангелдер ийген. Је Лот ангелдерди угуп, Содомноҥ тургуза ла чыгардыҥ ордына, јайымжып турды. Ол тушта ангелдерге Лотты ла оныҥ јууктарын јединип, каланаҥ чыгарарга келишкен (Баш. 19:15, 16). Мыныҥ кийнинде ангелдер олорды кырлардӧӧн качсын деп јакарарда, Лот јуугында јаткан каладӧӧн качарга суранган (Баш. 19:17—20). Иегова Лотты чыдамкай угуп, бу каладӧӧн барзын деп јӧпсинди. Соондо Лотко анда јадарга коркынчылу болуп турарда, ого тӱҥей ле кырлардӧӧн, озо баштап Иегованыҥ айткан јерлердӧӧн, кӧчӱп аларга келишкен (Баш. 19:30). Мынаҥ Иегованыҥ чыдамкайы кӧрӱнет! Бис оноҥ кандый тем алар аргалу?

5, 6. 1 Фессалоникадагыларга 5:14-тӧги сӧстӧрди Иегованаҥ тем алып канайып тузаланар?

⁵ Кезик христиандар Лот чылап јастыра тӱп-шӱӱлте эдип, јаан кӱчтерге туштаар болор. Мындый айалгада бис нени эдерис? Бис мынайып айдарга кӱӱнзеер болорыс: «Кижи нени ӱрендеер, оны јууп алар» (Гал. 6:7). Бистиҥ айтканыс чын да болотон болзо, је Иегова Лотко болушканы чылап, ого болужып берзеес, артык болор.

⁶ Ангелдер Лотко Содом јоголтылар деп, јӱк айдып саларга эмес, је оны тирӱ артсын деп болужарга ийилген. Анайып ла бӱгӱн кандый бир христианныҥ тӱбекке экелгедий алтам эдерге турганын кӧрӱп ийзеес, ого Агару Бичикке тӧзӧлӧнгӧн јӧп берерге ле болужарга белен болодыс. Је ол јӧпти алынарга меҥдебей турза, биске чыдамкай болор керек. Андый кижинеҥ чӧкӧбӧгӧр. Ангелдердиҥ Лотко болушканын эске алып, анайып ла эдигер (1 Иоанн 3:18). Ӧскӧртӧ айтса, кижини колынаҥ јединип, берилген јӧпти бӱдӱрерге болужыгар. (1 Фессалоникадагыларга 5:14 кычырыгар.)

7. Ака-эјелерге, Иегова Лотко баштанганы чылап баштанарга, биске не болужар?

⁷ Иегова Лоттыҥ јастыраларын кӧргӧн дӧ болзо, элчи Петр ажыра Лотты чындык кижи деп адаган. Иегованыҥ бистиҥ јастыраларысты таштап турганы кандый јакшы! (Сар. 130:3). Ака-эјелерге, Иегова Лотко баштанганы чылап баштанарга, биске не болужар? Олордыҥ јакшы кылык-јаҥдарына ајарып турзаас, биске олорго чыдамкай болорго јеҥил болор. Олорго дезе, бистиҥ болужысты аларга јеҥил болор.

8. Килемји бисти неге кӱӱнзедет?

⁸ Иов Лотко кӧрӧ, јастыра тӱп-шӱӱлтелер этпеген. Је тӱҥей ле оныҥ јӱрӱминде кӧп кӱчтер болгон: ол јӧӧжӧзин, тоомјызын јылыйтып, јаан ооруга табарткан. Бого коштой, оныҥ ончо балдары божоп калган. Анайда ок ол «најыларына» бурулаткан.  Олор нениҥ учун Иовты килебеген? Бир шылтагы, олор Иовтыҥ айалгазын оҥдоп аларга албаданбаган. Мынаҥ улам олор јазап сананбаган шӱӱлтеге келип, Иовты јаргылап баштаган. Биске олор чылап јастырбаска, нени эдер керек? Ундыбагар, кижиниҥ айалгазын јӱк ле Иегова јакшы билер. Оныҥ учун тӱбекке тӱшкен кижини лаптап угугар. Оныҥ сезимдерин оҥдоорго албаданыгар. Јӱк ле анайып, слер оны чыннаҥ ла килеп турганаарды кӧргӱзеригер.

9. Кижини килеп турзаас бис нени этпезис, нениҥ учун?

⁹ Бис ака-эјелеристи килеп турган болзоос, олордыҥ кӱчтерин коптошпой јадыс. Коп јайаары јуунды бириктирердиҥ ордына, карын оны јайрадып јат (Укаа 20:19; Рим. 14:19). Копчы кижи сананбай айткан сӧстӧриле тегин де шыралап јӱрген кижиге оноҥ јаан ачу јетирет (Укаа 12:18; Еф. 4:31, 32). Айдарда, кижиниҥ јакшызын кӧрӧргӧ лӧ ого ченелтени ӧдӧргӧ канайып болужарын сананып турактар.

10. Иов 6:2, 3-теги сӧстӧр бисти неге ӱредет?

¹⁰ Иов 6:2, 3 кычырыгар *. Иов кезикте «ачу-коронду» сӧстӧр айткан да болзо, кийнинде јастыразын алынган (Иов 42:6). Кезик ака-эјелер, Иов чылап, стресстиҥ ӧйинде ачу сӧстӧр айдып, кийнинде айткан сӧстӧрине ачуурканардаҥ айабас. Мындый айалгада биске нени эдер керек? Олорды јамандаардыҥ ордына, килеер керек. Ундыбагар, Иегова улусты кӱчтерге туштап, стресске табартып шыралазын деп јайабаган. Оныҥ учун Кудайдыҥ чындык  ишчилери тӱбекке табартса, кезикте сананбаган ачу сӧстӧр айдат. Керек дезе олор Иеговага удура эмезе биске удура нени-нени айдып турза, олорго кыртыштанып, олорды јаргылабас керек (Укаа 19:11).

11. Аксагалдар ака-эјелерди тӱзедип тура, Елиуйдаҥ кандый тем алар аргалу?

¹¹ Кезикте тӱбекке тӱшкен кижиге тӱзедӱ ол эмезе кӧгӱс јанынаҥ болуш керек болот (Гал. 6:1). Андый айалгада аксагалдарга нени эдер керек? Олорго Елиуйдыҥ Иовты лаптап укканынаҥ ла килегенинеҥ тем алар керек (Иов 33:6, 7). Елиуй Иовты тӱзедердеҥ озо, оныҥ айткан сӧстӧрин јазап оҥдоп аларга албаданган. Елиуйдаҥ тем алып турган аксагалдар, ака-эјелерди лаптап угуп, олордыҥ айалгазын јакшы оҥдоп аларга албаданат. Ол тушта, аксагалдардыҥ тӱзеткени ака-эјелердиҥ јӱрегин томултып ийер.

12. Ноеминьге ӧбӧӧниниҥ ле эки уулыныҥ ӧлӱми кандый салтарын јетирген?

¹² Ноеминь Иегованы тыҥ сӱӱп, ого чындык иштеп јӱрген. Је ӧбӧӧниниҥ ле эки уулыныҥ божогоныныҥ кийнинде, оны Мара деп адазын деп сураган. Мара дегени «ачу» деп кӧчӱрилет (Руфь 1:3, 5, 20 сноска, 21). Оныҥ келди Руфь кӱч ӧйлӧрдӧ Ноеминьди бир де артыргыспаган. Руфь кайын энезине јӱк ле болушкан эмес, је оны токунадып та туратан. Ол Ноеминьди сӱӱп турганын ла качан да артыргыспазын јылу, јалакай сӧстӧрлӧ бӱдӱмјилеген (Руфь 1:16, 17).

13. Эш-нӧкӧрин јылыйткан улусты нениҥ учун токунадар керек?

¹³ Кандый бир ака-эјениҥ эш-нӧкӧри божой берзе, ого токунаду керек болот. Нениҥ учун дезе эш-нӧкӧрлӧрди бой-бойына јуук ӧзӱп јаткан эки агашка тӱҥейлеерге јараар. Канча јылдарга олордыҥ тазылдары бой-бойына оролыжып калат. Андый агаштардыҥ бирӱзин казып, кодорып салза, экинчизине јаан каршу болордоҥ айабас. Анайып ла эш-нӧкӧрлӧрдиҥ бирӱзи божоп калза, экинчизи канча да ӧйдиҥ туркунына јаан ачу сезип јат. Ӧбӧӧни кенетийин божоп калган Пола * эје мынайып айдат: «Јӱрӱмим кенетийин аҥдана берген. Бойымды чек јаҥыскан деп сескем. Ӧбӧӧним мениҥ эҥ јакшы најым болгон, мен ого ӱзени куучындап туратам. Ол менле кожо сӱӱнип те, кунугып та туратан. Ого айдынып, ыйлап та алатам. Оныҥ учун эш-нӧкӧримди јылыйтканым мениҥ келтейимди кодорып салгандый билдирген».

14, 15. Эш-нӧкӧрин јылыйткан улусты канайып токунадарга јараар?

¹⁴ Эш-нӧкӧрин јылыйткан кижини канайып токунадар? Озо ло баштап, эби-јоксынып, нени айдарын билбей де турган болзогор, слерге оныла куучындажып ийер керек. Ӧрӧги айдылган Пола эје мынайып айдат: «Јуугын јылыйткан кижиле бойын канайып тудунарын улус кӧп сабада билбей турганын оҥдоп јадым. Олор јастыра неме айдарынаҥ коркып јат. Је чек нени де айтпаганча, јастыра да болзо, нени-нени айдып ийзе торт». Ачу-коронго алдырган кижи, бисти ого кандый бир тереҥ учурлу сӧстӧр айдарыс деп сакыбай јат. Пола эје анаҥ ары айдат: «Најыларымныҥ: „Бис сениле кожо кунугып јадыс“ — деп айткан тегин сӧстӧрин мен сӱреен баалап јадым».

¹⁵ Канча јылдар кайра ӱйин јылыйткан Уильям ака мынайып куучындайт:  «Најыларым ӱйим керегинде нени-нени куучындап турза, сӱӱнип јадым. Олордыҥ мындый куучындары улус ӱйимди сӱӱген ле баалаган деп кӧргӱзет. Бу меге јаан болуш болот, нениҥ учун дезе мен ӱйимди тыҥ баалагам». Бьянка деп эје мынайып айдат: «Меге ака-эјелер Агару Бичиктеҥ тоолу ӱлгерлер кычырып, кожо мӱргӱп, обӧӧним керегинде эске алынып турза, эмезе ӧбӧӧним керегинде куучындаганымды олор угуп турза, меге јеҥил боло берет».

16. а) Эш-нӧкӧрин јылыйткан улуска канайып болужарга јараар? б) Иаков 1:27-ле болзо, Иегова биске кандый јакару берген?

¹⁶ Биске јуугын јылыйткан кижиге, Ноеминьди бир де артыргыспай јӱрген Руфь чылап, болужар керек. Пола айдат: «Ӧбӧӧнимниҥ божогоныныҥ кийнинеҥ ончозы меге болужып туратан. Је бир эмеш ӧйдӧҥ олор бойлорыныҥ кажы ла кӱн эдип турган керектерине бурулган, је мен ачу-коронымла артып калгам. Јуук кижизин јылыйткан улуска јӱк ле бир ай эмезе бир јыл болужар керек эмес, оноҥ до кӧп ӧйгӧ болужар керек болор деп, улус оҥдоп турза јакшы». Је кажы ла кижи башка. Кезиги тӱрген токунап калат. Кезиги эш-нӧкӧриле кожо эткен керектерди эдип јатса, ойто ло ачу сезимдерине алдыртат. Айдарда, эш-нӧкӧрин јылыйткан улуска болужары — Иегованыҥ берген јакарузы деп ундыбай турактар. Бу јакару јаан кӱндӱ ле каруулу иш болот. (Иаков 1:27 кычырыгар.)

17. Эш-нӧкӧрине таштаткан улуска нениҥ учун болужар керек?

 ¹⁷ Анайда ок эш-нӧкӧрине таштаткан улус база коркышту јаан ачу сезет. Джойс эјени ӧбӧӧни таштап, ӧскӧ ӱй кижиге јӱре берген. Джойс эје мынайып айдат: «Ӧбӧӧним божоп калган болзо, андый тыҥ ачу болбос эди. Нениҥ учун дезе авариянаҥ эмезе кандый бир оорунаҥ улам божогон улуста, талдаар арга болбой јат. Је мениҥ ӧбӧӧним, ӧскӧ кижи талдап, мени таштап ийген. Меге коркышту тыҥ ачу болгон!»

18. Эш-нӧкӧри јок арткан улуска канайып болужар?

¹⁸ Эш-нӧкӧри јок арткан улуска болужып турзаас, олорды сӱӱп турганысты кӧргӱзедис. Андый најылар олорго сӱреен керектӱ (Укаа 17:17). Слер јакшы најы болорго, нени эдер эдигер? Темдектезе олорды кожо ажанып аларга, амыраарга, јарлаар ишке, анайда ок билелик бажырышка кычырарга јараар. Анайып слер Иегованы сӱӱндиреригер, нениҥ учун дезе ол «ачу-коронго бастырткандарга јуук» болот ло «ӧбӧӧни јок артып калган ӱй улусты» корулап јат (Сар. 34:18; 68:5).

19. 1 Петр 3:8-теги сӧстӧр бисти неге кӱӱнзедет?

¹⁹ Кудайдыҥ Каандыгы јерле башкарып баштаза, «озогы кыйын-шыра ундылып калар». Бис «озогызы санаага да, јӱрекке де келбес ӧйди» энчикпей сакып јадыбыс (Иса. 65:16, 17). Је бу ӧй келгелекте бой-бойыска болужып туралы. Бистиҥ айткан сӧстӧристеҥ ле эткен керектеристеҥ ака-эјелеристи акту јӱректеҥ сӱӱп турганыс кӧрӱнип турзын! (1 Петр 3:8 кычырыгар.)