1. Биске Иисустыҥ сӧстӧрине нениҥ учун јаан ајару эдер керек?

ИИСУС ХРИСТОС калганчы кӱндер керегинде айдып тура, бойыныҥ ӱренчиктерине мындый сӧстӧр айткан: «Бойыгарды тудуныгар... јадын-јӱрӱмниҥ сурактары [ӧскӧртӧ айтса акчаны канайып иштеп аларыла колбулу санааркаштар] јӱрегерди олјолоп јоботпозын» (Лука 21:34). Бу сӧстӧргӧ јаан ајару эдер керек. Нениҥ учун дезе бу телекейдеги улустыҥ санааркаштары ла шакпыражы бисте де болуп јат.

2. Кезик ака-эјелерде кандый кӱчтер болот?

² Кезикте уур-кӱчтер бир уунда уурылып келет. Эки тем кӧрӱп ийектер. Рассеянный склерозло ооруп турган Джон * аканы 19 јыл кожо јуртаган ӱйи таштап ийген. Мыныҥ кийнинеҥ оныҥ эки кызы Иеговага иштебей барган. Боб ло Линда деген эш-нӧкӧрлӧр ӧскӧ кӱчтерге туштаган. Олор ижин јылыйтып, тура јок артып калды. Анайда ок Линданыҥ јӱрегинде ӧлӱмге экелгедий оору табылган. Мыныҥ ӱстине оныҥ иммунный системазын уйададып турган оору табылды.

3. Филиппыдагыларга 4:6, 7-деги сӧстӧр бисти неде бӱдӱмјилейт?

³ Бис алаҥзыбай јадыс: бистиҥ Јайаачыбыс ла сӱӱштӱ Иегова Адабыс стресс биске кандый каршузын јетирип турганын оҥдоп јат. Оныҥ учун ол биске болужарга белен. (Филиппыдагыларга 4:6, 7 кычырыгар.) Агару Бичикте Иегованыҥ ишчилери кандый кӱчтерге туштаганы ла Кудай олорго канайып болушканы керегинде бичилет. Тоолу темдер кӧрӱп ийектер.

4. Ильяда кандый ченелтелер болгон ло ол олорды канайып ӧткӧн?

⁴ Илья Иеговага јеҥил эмес ӧйдӧ иштеп, јаан кӱчтерге туштаган. Ол ӧйдӧ Израильде Кудайга чындык эмес Ахав каан башкарат. Оныҥ Иезавель ӱйи Ваалга бажырган кара санаалу јаман ӱй кижи болгон. Олор экӱнеҥ улам бӱдӱн ороон Ваалга бажырып баштаган. Бого коштой олор Иегованыҥ кӧп судурчыларын ӧлтӱрген. Је Илья тирӱ артып калган. Анайда ок Иеговага иженип турганынаҥ улам, коркышту торо ӧйди ӧтти (1 Каан. 17:2—4, 14—16). Илья Ваалдыҥ судурчыларына ла оныҥ бажыраачыларына удурлажып турарда да Иеговага иженген. Ол Израиль албатыны Иеговага иштеерине кӱӱнзеткен (1 Каан. 18:21—24, 36—38). Илья бу кӱч ӧйлӧрдӧ Иегованыҥ болужын јаантайын сезип туратан.

5, 6. 1 Каандар 19:1—4-лӧ болзо, Илья нени сескен ле Иегова ого сӱӱжин канайып кӧргӱскен?

⁵ 1 Каандар 19:1—4 кычырыгар *. Је Иегова Ильяга болушкан да болзо, ол Иезавельге ӧлтӱртеринеҥ тыҥ коркып, Вирсавиядӧӧн кача берген. Ол коркышту тыҥ кунугып, Иегованаҥ «ӧлӱм сураган». Нениҥ учун? Нениҥ  учун дезе Илья толо кеминде эмес, «бистий ле [сезимдерлӱ] кижи» болгон (Иак. 5:17). Илья стресстеҥ ле тыҥ арып калганынаҥ улам арай ла болзо чӧкӧй бербеген болор. Ол Израиль албатыны Иеговага кайра экелерге албаданганы калас болгон деп, анайда ок чын Кудайдыҥ ишчилеринеҥ јӱк ол тирӱ артып калган деп сананган болор (1 Каан. 18:3, 4, 13; 19:10, 14). Бу чындык судурчыныҥ ӧлӱм сураганы биске саҥ башка деп билдирердеҥ айабас. Је Иегова Ильяны јакшы оҥдогон.

⁶ Иегова Ильяны оныҥ айткан сӧстӧри учун јаман сананбай, карын ойто ийде-кӱч алынарга болушкан (1 Каан. 19:5—7). Оноҥ Иегова Ильяга бойыныҥ јаан ийде-кӱчин кӧргӱзип, кӧрӱмин солыырга болушкан. Мыныҥ кийнинде Иегова ого Израиль албатынаҥ Ваалга бажырбай турган база 7000 чындык кижи бар деп айткан (1 Каан. 19:11—18). Мынайып Иегова Ильяга бойыныҥ сӱӱжин кӧргӱскен.

7. Иегованыҥ Ильяга болушканы бисти канайып токунадат?

⁷ Кӱч ӧйлӧр слерде де болуп турган болор. Андый болзо, Иегова Ильяныҥ сезимдерин канайып ајаруга алганын шӱӱп ийигер. Бу бисти токунадып, Кудай бистиҥ санааркаштарысты оҥдоп турган деп бӱдӱмјилеер. Иегова бистиҥ ийде-кӱчис неге једерин, неге јетпезин, керек дезе бистиҥ санааларысты да, сезимдеристи де билер (Сар. 103:14; 139:3, 4). Айдарда, бис Илья чылап Иеговага иженип турзаас, ол биске амырысты айрып турган уур-кӱчтерди ӧдӧргӧ болужар (Сар. 55:22).

8. Иегова слерге стрессти ӧдӧргӧ канайып болужар?

⁸ Кӱч айалгада ӱзе ле неме јаман деп билдирер болор, мынаҥ улам тыҥ санааркаш башталардаҥ айабас. Је стресстиҥ ӧйинде Иегова болужар деп ундыбас керек. Ол канайып болужар? Ол бисти бойыстыҥ санааркаштарысты ого куучындап турзын деп кӱӱнзедет. Иегова бистиҥ јайнап болуш сураганыска кыйалта јогынаҥ каруузын берер (Сар. 5:3; 1 Петр 5:7). Оныҥ учун Иеговага кӱчтереер керегинде такып-такып мӱргӱп туругар. Слер Ильяныҥ учуралында чылап Иегованыҥ ӱнин укпас та болзогор, је ол слерге бойыныҥ Сӧзи, Агару Бичик, ажыра, анайда ок организациязы ажыра баштанар. Агару Бичиктеҥ кычырып алганаар, слерди токунадып, ижемји берер аргалу. Анайда ок слер јуундагы ака-эјелердеҥ оморкоду алар болороор (Рим. 15:4; Евр. 10:24, 25).

9. Биске најыбыс канайып болужар аргалу?

⁹ Иегова Ильяны Елисейге кезик молјуларын берип ийзин деп айткан. Анайып Иегова Ильяга кӱч ӧйлӧрдӧ болужатан најы берген. Бӱгӱнги де кӱнде бис бойыстыҥ сезимдеристи најыбыска куучындап берзеес, тыҥ санааркабай барарыс (2 Каан. 2:2; Укаа 17:17). Је јаныгарда андый кижи јок болзо, слерге болужатан кӧгӱзи тереҥ најы табылзын деп, Иегованаҥ болуш сурагар.

10. Ильяныҥ учуралы бисти неде бӱдӱмјилейт? Исаия 40:28, 29-та бичилгени биске кандый болужын јетирет?

¹⁰ Иегова Ильяга стрессти ӧдӧргӧ болужып берерде, ол бойыныҥ ижин база да канча јылдардыҥ туркунына бӱдӱрген. Ильяныҥ учуралы бистиҥ бӱдӱмјибисти тыҥыдат. Тыҥ стресс кижиниҥ эди-канына ла эмоцияларына јаан каршу јетирет. Је бис Иеговага иженип турзаас, ол биске оноҥ ары иштейтен ийде-кӱч берер. (Исаия 40:28, 29 кычырыгар *.)

11—13. Јебрен ӧйдӧ јаткан Кудайдыҥ ӱч ишчизине кӱчтер ле санааркаштар кандый каршузын јетирген?

¹¹ Агару Бичикте айдылган Иегованыҥ ӧскӧ ишчилеринде база кӱч ӧйлӧр болгон. Темдектезе,  Анна балдар јок болгонынаҥ улам шыралаган, нениҥ учун дезе андый неме ол ӧйлӧрдӧ јаан уйат болгон. Анайда ок Анна ӧбӧӧниниҥ экинчи ӱйиниҥ ӧчӧп каткырганын чыдажып јӱрген (1 Сам. 1:2, 6). Анна мындый кӱчтердеҥ улам, ыйлап, курсак јибей јӱрген (1 Сам. 1:7, 10).

¹² Давидте база стресс болгон. Ондо кандый кӱчтер болгонын сананып ийзеер. Ол кӧп јастыраларынаҥ улам амыр таппай туратан (Сар. 40:12). Оныҥ сӱӱген уулы, Авессалом, ого удура тӱймеен кӧдӱрип, кийнинде божоп калган (2 Сам. 15:13, 14; 18:33). Анайда ок Давидти јуук најызы садып ийген (2 Сам. 16:23—17:2; Сар. 55:12—14). Сарындарда Давид бойыныҥ ачу сезимдерин ле Иеговага алаҥзу јоктоҥ бӱдӱп турганын јаҥыс катап айтпаган (Сар. 38:5—10; 94:17—19).

¹³ Бир сарнаачы (Кудайдыҥ ӧргӧӧзинде левит болуп иштеген Асафтыҥ калдыгы болгон болор) калју улуска кӱйӱнип баштаган. Ол јаман сезимдеринеҥ улам сӱӱнчизин јылыйткан, анайда ок бойыныҥ јӱрӱмине комудап баштаган. Керек дезе Кудайга иштегенинеҥ алып турган алкыштар да оны сӱӱндирбей барган (Сар. 73:2—5, 7, 12—14, 16, 17, 21).

14, 15. Бисти бу ӱч тем неге ӱредет?

¹⁴ Бу ӱчӱниҥ кажызы ла Иегованаҥ болуш сураган. Олор бойлорыныҥ сезимдерин ле неге санааркап турганын тереҥ мӱргӱӱлде ачыгынча куучындап туратан, анайда ок Кудайдыҥ ӧргӧӧзине оноҥ ло ары јӱрерин токтотпогон (1 Сам. 1:9, 10; Сар. 55:22; 73:17; 122:1).

¹⁵ Иегова олордыҥ кажызын ла оҥдоп, болужын јетирген. Анна јӱрегине амыр тапкан (1 Сам. 1:18). Давид бичиген: «Чындык кижиде кӧп уур-кӱчтер болот. Је Иегова оны олордыҥ ончозынаҥ јайымдап јат» (Сар. 34:19). Сарнаачы дезе, Иегова оны јалакай тӱзедип турарда, Ол оны оҥ колынаҥ тудуп алган деп  сезип, мынайып бичиген: «Меге Кудайга јууктаарга јарап јат... Кайракан Иегова Кудай меге коруланатан јер болот» (Сар. 73:23, 24, 28). Бу темдер бисти неге ӱредет? Бистиҥ јӱрӱмисте уур-кӱч ӧйлӧр болордоҥ айабас. Је бис Иеговага мӱргӱп, оныҥ сӧзин угуп турзаас, анайда ок Кудай бойыныҥ улузына канайып болушканын шӱӱп сананзаас, бис те ӱзени ӧдӱп чыгарыс (Сар. 143:1, 4—8).

16, 17. а) Биске нениҥ учун Иегованаҥ ла јууннаҥ тууралап башкаланбас керек? б) Биске ийде-кӱчти не берер аргалу?

¹⁶ Агару Бичиктеҥ кӧргӧн ӱч темде база бир јаан учурлу ӱредӱ бар: биске Иегованаҥ ла оныҥ албатызынаҥ тууралап башкаланбас керек (Укаа 18:1). Ӧбӧӧни таштап ийерде, коркышту јаан стресс ӧткӧн Нэнси эје куучындайт: «Улусты кӧрӧр дӧ, олорло куучындажар да кӱӱним јок болгон. Мынайып кӧп кӱндер ӧткӧн. Улустаҥ канча ла кире тууралап турарымда, ончо ло кире кунугып туратам». Је Нэнси кӱчтерге туштаган улуска болужатан аргалар бедиреп баштаарда, оныҥ айалгазы солына берген. Ол айдат: «Улус меге кӱчтерин куучындап турза, мен олорды јазап угуп туратам. Анайып, улусты килеп турала, бойымныҥ кӱчтеримди кӧп сананбай баргам».

¹⁷ Јуунныҥ туштажулары база ийде-кӱч берер аргалу. Бу туштажулар ажыра, Иегова  биске болужын ла токуналын берет (Сар. 86:17). Каандыктыҥ Туразында ол бистиҥ бӱдеристи бойыныҥ агару тыны, Агару Бичиги, анайда ок ишчилери ажыра тыҥыдып јат. Туштажуларда бис бой-бойысты оморкодып јадыс (Рим. 1:11, 12). София деген эје мынайып куучындайт: «Ончо кӱчтерди ӧдӧргӧ, меге Иегова ла бистиҥ карындаштык албаты болушкан. Сӱреен јаан болушты христиан туштажулар берген. Јарлап турзам, анайда ок јуунныҥ кандый бир иштерине канча ла кире кӧп туружып турзам, ончо ло кире кӱчтерди ӧдӧргӧ јеҥил болот деп, оҥдоп алгам».

18. Јаман сезимдерле тартыжарга Иегова канайып болужат?

¹⁸ Слердиҥ јӱрегерге кӱч болуп турган болзо, ундыбагар: Иегова бисти кӱчтердеҥ јаҥыс ла келер ӧйдӧ айрыыр эмес, ол бӱгӱнги де кӱнде кӱчтерди ӧдӧргӧ болужат. Ол биске јаман сезимдерле тартыжатан ийде-кӱч ле кӱӱн берет (Флп. 2:13).

19. Римдегилерге 8:37—39-тагы сӧстӧр бисти неде бӱдӱмјилейт?

¹⁹ Римдегилерге 8:37—39 кычырыгар. Элчи Павелдиҥ сӧстӧриле болзо, бисти не де «Кудайдыҥ сӱӱжинеҥ айрып болбос». Је кӱчтерге туштаган ака-эјелерге канайып болужар? Келер јӧрмӧлдӧ кӱчтерге туштаган улусты Иегова чылап килеп, олорго болужарга нени эдер керек деген сурак шӱӱжилер.