1. Биске библиялык судурларды јакшызынып шиҥдеерге не болужар?

 БЕН деп атту карындаш: «Меге библиялык судурларды шиҥдеерге тыҥ јарап јат» — деп айдат. А слерге јарап турган ба? Ол эмезе библиялык судурларды оҥдоорго кӱч деп сананып турган болороор бо? Эмезе библиялык судурларды шиҥдееринде јилбилӱ неме јок деп сананып турганаар ба? Је Иегова судурларды Агару Бичикке нениҥ учун бичиткенин кӧптӧдӧ билип алзаар, кӧрӱмеер солына берер болор.

2. Бу јӧрмӧл не керегинде?

² Бу јӧрмӧлдӧ бис озо баштап библиялык судурларды нениҥ учун шиҥдеер керек ле оны канайып эдерин шӱӱжип кӧрӧрис. Оноҥ Даниилдиҥ бичиген эки судурын шӱӱжип ийеле, олор биске незиле тузалу деп кӧрӱп ийерис.

3. Агару Бичиктиҥ судурларын оҥдоорго биске нени эдер керек?

³ Бис Агару Бичиктеги судурларды болуш јогынаҥ оҥдоп болбозыс. Темдектезе, слер таныш эмес јерге келгенеер, карын јаныгарда најыгар бар. Ол бу јерди ле кажы јол кайдӧӧн апарып турганын ӱзе билер. Кудайыс Иегова андый најыга тӱҥей. Ол бисти кандый ӧйдӧ јадып турганысты ла удабас не болорын јакшы билер. Оныҥ учун Агару Бичиктиҥ судурларын оҥдоорго, јобош болуп, Иегованаҥ болуш сураар керек (Дан. 2:28; 2 Пётр 1:19,20).

4. Иегова судурларды нениҥ учун бичиткен? (Иеремия 29:11). (Јурукты база кӧрӱгер.)

⁴ Сӱӱштӱ ада-энелер балдарыныҥ јӱрӱмин јакшы болзын деп кӱӱнзеп јат. Иегова шак ла андый Ада. (Иеремия 29:11 кычырыгар.) Је Кудай улуска кӧрӧ, келер ӧйдӧ не болорын чике айдып берер аргалу. Оныҥ учун ол бистерге келер ӧйдӧ не болорын озодоҥ билип турзын деп, эр улус ажыра судурлар бичиткен (Иса. 46:10). Бу судурлар — бисти  тыҥ сӱӱп турган теҥеридеги Адабыстыҥ сыйы. Олор бӱдӱп калар деп, бис нениҥ учун алаҥзыбай јадыс?

5. Бистиҥ карындаштар ла сыйындар Макстаҥ неге ӱренер аргалу?

⁵ Школдо ӱренип турган бистиҥ јииттер Агару Бичикти тообой турган улустыҥ ортозында болуп јат. Олордыҥ сӧстӧрин, керектерин кӧрӱп тура, јиит Керечилер неге бӱдӱп турганына алаҥзып баштаардаҥ айабас. Макстыҥ темин кӧрӱп ийектер. Ол куучындайт: «Мен школдо ӱренип турарымда, ада-энемниҥ кудай јаҥы чындык деп ле Агару Бичик Кудайдаҥ деп алаҥзып баштагам». Макстыҥ ада-энези мыны билип ийеле, нени эткен? Макс оноҥ ары куучындайт: «Ада-энем мен учун тыҥ санааркап та турган болзо, мени арбанбаган. Карын бастыра мениҥ сурактарымныҥ карууларын Агару Бичиктиҥ болужыла кӧргӱзетен». Анайда ок Макс бойы база албаданган. «Мен Агару Бичикте бичилген судурларды таҥынаҥ шиҥдеп, јуундагы најыларымла билип алганымды шӱӱжип туратам. Анайып, Агару Бичик Кудайдаҥ деп билип алгам!»

6. Слерде алаҥзыштар бар болзо, нени эдер керек, нениҥ учун?

⁶ Слерде Макста ла чылап алаҥзыштар болуп турган болзо, бойоор керегинде јаман сананбагар. Андый айалганы ајару јок артыргыспас керек. Алаҥзыш татка тӱҥей. Татты јоголтпозо, ол керектӱ немени ӱзе јип салар. Оныҥ учун бӱдӱмјигерди «тат» тудуп јаткан ба деп билерге, бойыгарга мындый сурактар беригер: «Агару Бичиктеги келер ӧй керегинде бичилгенине мен бӱдӱп тургам ба?» Бу суракка алаҥзыш јоктоҥ «эйе» деп айдып болбой турган болзогор, Агару Бичиктиҥ бӱдӱп калган судурларын шиҥдеп баштаар керек. Мыны канайып эдер?

7. Судурларды шиҥдеп тура, Даниилдеҥ кандый тем аларыс? (Даниил 12:10). (Анайда ок јурукты кӧрӱгер.)

⁷ Агару Бичикти шиҥдеери јанынаҥ Даниил биске јакшы тем артыргызып койгон. Ол оны чын кӧрӱмдӱ шиҥдеп туратан — чындыкты билерге сӱреен кӱӱнзеген. Анайда ок Даниил јобош кижи болгон — ол, Иегова оны јакшы билер деп ле оныҥ јасагын бӱдӱрип турган улуска оҥдомол берип турган деп, билген (Дан. 2:27, 28; Даниил 12:10 кычырыгар). Оныҥ јобожы јаантайын Иегова Кудайга баштанып, болуш сурап турганынаҥ база кӧрӱнген (Дан. 2:18). Ол Агару Бичикти сӱреен тереҥ шиҥдейтен. Даниил ол ӧйдӧ бар болгон Агару Бичиктиҥ ӱзӱктерин лаптап кӧрӱп туратан (Иер. 25:11, 12; Дан. 9:2) Бис Даниилдиҥ кандый тем аларыс?

8. Нениҥ учун кезик улус Агару Бичиктеги судурларга бӱтпей јат? Нениҥ учун биске андый кӧрӱмди алынбас керек?

⁸ Бойоордыҥ кӧрӱмеерди шӱӱп сананыгар. Слер судурларды нениҥ учун шиҥдеп турганаар? Чыннаҥ ла чындыкты билип аларга ба? Андый болзо, Иегова слерге кыйалта јогынаҥ болужар (Иоанн 4:23, 24; 14:16, 17). А кандый кӧрӱмди  јастыра деп айдарга јараар? Кезик улус судурларды шиҥдеп тура, Агару Бичик Кудайдаҥ эмес деп, керелер табып аларга албаданат. Мынайып эдип, олор Агару Бичикте бичилген јӧптӧрди укпаска ла нези јакшы, нези јаман бойлоры талдаар аргалу деп сананат. Је бистиҥ кӧрӱмис чын болор учурлу. Анайда ок судурларды оҥдоорго биске база да бир јакшы кылык-јаҥ керек.

9. Агару Бичиктиҥ судурларын оҥдоорго биске кандый кылык-јаҥ керек? Јартап беригер.

⁹ Јобош болугар. Иегова јобош улуска болужып јат (Иак. 4:6). Оныҥ учун биске Иегованаҥ болуш сураар керек. Оноҥ башка бис судурларды оҥдоп болбозыс. Анайда ок кӧгӱс курсакты ӧйинде берип турган бӱдӱмјилӱ кулдыҥ болужы јогынаҥ судурларды оҥдоп болбозыс (Лука 12:42). Иегова ӱзе немени аайлу-башту эдет. Оныҥ учун бойыныҥ Сӧзиндеги чындыкты јӱк ле бу кул ажыра јартайт (1 Кор. 14:33; Эф. 4:4—6).

10. Эстердиҥ учуралы слерди неге ӱредет?

¹⁰ Тереҥжиде шиҥдегер. Озо баштап, слерге јилбилӱ болгодый судурды талдап алала, оны шиҥдегер. Анайып ла Э́стер эткен. Ол Мессияныҥ келери керегинде судурларды кӧптӧдӧ билип аларга кӱӱнзеген. Эстер куучындайт: «Меге 15 јаш болордо, мен бу судурлар Иисустыҥ чыкканынаҥ озо бичилген деп, керелер табып аларга шӱӱп алгам». Эстер Јӱрӱм јок талайдыҥ (Мёртвое море) тӱрбектери керегинде јетирӱлерди кычырала, бӱдӱмјизи тыҥыган. Ол оноҥ ары куучындайт: «Бу кезик тӱрбектер Иисустыҥ јаткан ӧйинеҥ канча кире озо бичилген. Андый болордо, ондо бичилген судурлар — Кудайдаҥ. Кезикте та нени де оҥдоп аларга, меге бир ле немени канча катап кычырарга келижип туратан». Је андый да болзо, Эстер мындый тереҥ шиҥжӱ ӧткӱргенине сӱреен тыҥ сӱӱнип, Агару Бичикке бӱдерге јараар деп бӱдӱмјиленип алган.

11. Агару Бичикте айдылган сӧстӧр ӱзе чын деп, нениҥ учун бӱдӱмјиленип алар керек?

¹¹ Библиялык судурлардыҥ бӱдӱп турганын кӧрӱп турзаас, бистиҥ бӱдӱмјибис ӧзӧт. Иегованыҥ кӧргӱзип берген јолыла бис бир де алаҥзыбай, оноҥ ары барарыс. Анайда ок бисте кандый ла ченелте болотон болзо, бу судурлардыҥ бӱдӱп турганын кӧрӱп, келер ӧйдӧҥ коркыбай јадыс. А эмди Даниилдиҥ бичигинеҥ бӱгӱнги ле кӱнде бӱдӱп турган эки судурды кӧрӱп ийектер. Оны оҥдоп алзаас, ойгор тӱп-шӱӱлтелер эдер аргалу болорыс.

12. Чалуныҥ јымжак той балкашла булгаштырылган темирдеҥ эдилген јери нени темдектейт? (Даниил 2:41—43).

¹² Даниил 2:41—43 кычырыгар. Навуходоносор тӱш јеринде коркышту јаан чалу кӧргӧн, оныҥ буды шагайынаҥ ала таманына јетире «јымжак той балкашла булгаштырылган темирдеҥ» болгон. Бу судурды Даниилдиҥ бичигинде ле Ачылта деп бичиктеги судурларла тӱҥдештирип ийзе, оныҥ будыныҥ шагайынаҥ ала  таманына јетире тужы — Англо-Американыҥ державазы — деп јарт кӧрӱне берет. А бу дезе телекейде эҥ јаан держава болот. Бу держава керегинде Даниил: «Бу каандык та неде де бек, та неде де бортык болор» — деп айткан. Ол нениҥ учун та неде де бортык болор? Нениҥ учун дезе јымжак той балкаш эдип кӧргӱзилген тегин албаты бу державага бойыныҥ темирдий ийде-кӱчин толо тузаланарга бербей јат b.

13. Чалу керегинде судурды оҥдоп алзаас, кандый чындыктарды билип аладыс?

¹³ Даниилдиҥ чалу керегинде бичигенинеҥ јаан учурлу чындыкты билип аладыс. Баштапкызы, Англо-Американский держава коркышту ийде-кӱчтӱ, ол бойыныҥ ийде-кӱчин канча катап кӧргӱскен. Темдектезе, эки телекейлик јуу-согушта јеҥип алган ороондорго јаан камаанын јетирген. Је оныҥ ийде-кӱчин бойыныҥ ла албатызы кезикте бой-бойлорыла удурлажып, анайда ок башкарып турган јаҥга удура болуп, уйададып јат. Келер де ӧйдӧ андый ла болор. Экинчизинде, Кудайдыҥ Каандыгы бу телекейдиҥ башкаруларын јоголтып јатса, бу ла держава башкарып турган болор. Је кандый бир ороон Англо-Американский державаныҥ ордына турарга умзанза да, олор мыны болуп албас. Кудайдыҥ Каандыгын темдектеген «таш» учуп келеле, чалуныҥ шагайынаҥ ала таманына јетире тужын одо согор, а ол јер — Англо-Американский державаны темдектейт (Дан. 2:34, 35, 44, 45).

14. Чалуныҥ той балкаштаҥ ла темирдеҥ эдилген тужы керегинде судурды оҥдогоны ойгор јӱрерге канайып болужат?

¹⁴ Слер чалуныҥ той балкаштаҥ ла темирдеҥ эдилген тужы керегинде Даниилдиҥ судуры бӱдӱп турган деп бӱдедигер бе? Эйе болзо, бу слердиҥ јӱрӱмеердеҥ кӧрӱнер. Слер бого бӱдӱп турган болзогор, акча-јӧӧжӧ јуубазыгар, нениҥ учун дезе бу телекей удабас јоголып калар (Лука 12:16—21; 1 Иоанн 2:15—17). Анайда ок бу судур слерге, эм тура эҥ ле учурлу неме — улуска Кудайдыҥ Каандыгы керегинде куучындаары ла олорго Христостыҥ ӱренчиктери болуп каларга болужары — деп, оҥдоп ийерге болужар (Матф. 6:33; 28:18—20). Айдарда, бу судурды шиҥдеген кийнинеҥ, бойыгардаҥ сурап кӧрӱгер: «Удабас Кудайдыҥ Каандыгы улустыҥ бастыра башкаруларын јоголтып салар деп бӱдӱп тургам ба? Бӱдӱп тургам деп, јӱрӱмимнеҥ кӧрӱнет пе?»

15. Бӱгӱнги кӱнде «тӱштӱк каан» кем, «тӱндӱк каан» кем? (Даниил 11:40).

¹⁵ Даниил 11:40 кычырыгар. Даниил деп бичиктиҥ 11-чи бажалыгында эки «каан» керегинде бичилген. Олор бастыра телекейди бактырып аларга, бой-бойыла тартыжып јат. Бу судурды ӧскӧ судурларла тӱҥдештирип кӧрзӧ, «тӱндӱк каан» — Россия ла оныҥ союзниктери, а «тӱштӱк каан» — Англо-Американский телекейлик держава деп оҥдоп аладыс c.

16. «Тӱндӱк каанныҥ» јеринде јадып турган Керечилерде кандый ченелтелер болот?

¹⁶ «Тӱндӱк каан» оныҥ јеринде јадып турган Кудайдыҥ ишчилерин тыҥ истежип јат. Олорды Кудайга бӱткени учун согуп, тӱрмелеп те јадылар. Је «тӱндӱк каан» ака-эјелерди коркыдып болбой турганын кӧрӧдис. Карын, истежӱлердеҥ улам олордыҥ бӱдӱмјизи там тыҥыйт. Нениҥ учун дезе олор Даниилдиҥ  судурыныҥ чике бӱдӱп јатканын бойыныҥ кӧзиле кӧрӧт (Дан. 11:41) d. Бис мыны ундыбай турзаас, ижемјибис бек болор ло Иеговага чындык артарыс.

17. «Тӱштӱк каанныҥ» јеринде јадып турган Иегованыҥ Керечилеринде кандый ченелтелер болот?

¹⁷ Озогы ӧйдӧ «тӱштӱк каан» Иегованыҥ Керечилерине коркышту тыҥ истежӱлер эткен. Темдектезе, XX чактыҥ баштапкы ӱзӱгинде кӧп саба акаларды нейтралитет учун тӱрмеге отургыскан, а кезик Иегованыҥ Керечилериниҥ балдарын школдоҥ чыгара сӱрген. Је бу калганчы ӧйдӧ ченелтелер чек башка болуп калган. Олор кӧскӧ илинбей јат. Темдектезе, талдаштардыҥ ӧйинде христиан кижи кандый бир кандидатты ол эмезе партияны талдап ийердеҥ маат јок. Олор талдаштарга барып турушпаза да, је јӱрегинде ле санаазында кирижердеҥ айабас. Оныҥ учун биске христиан нейтралитетти  јаҥыс ла керектеристе эмес, санаабыста да, јӱрегисте де буспас керек! (Иоанн 15:18, 19; 18:36).

18. Бис «тӱндӱк» ле «тӱштӱк» каандардыҥ тартыжузын кӧрӱп канайдадыс? (Анайда ок јурукты кӧрӱгер.)

¹⁸ Библиялык судурларга бӱтпей турган улус «тӱндӱк» ле «тӱштӱк» каандардыҥ бой-бойыла тартыжып турганын кӧрӱп, санааркап јат (Дан. 11:40). Бу эки каанда јердиҥ ӱстиндеги јӱрӱмди јоголтып салатан ядерный јепсели јеткилинче. Је бис билерис, Иегова олорго јерди јоголтып саларга бербес (Иса. 45:18). Оныҥ учун «тӱндӱк» ле «тӱштӱк» каандардыҥ тартыжузы бисти коркыдардыҥ ордына, бӱдӱмјисти тыҥыдат. Бу тартыжу Сатананыҥ телекейиниҥ учы јуук деп јарт кӧргӱзет.

19. Библиялык судурлар аайынча нени оҥдоп турар керек?

¹⁹ Бис библиялык судурлардыҥ кезиги канайып бӱдерин билбезис. Судурчы Даниил де бичигенин оҥдобогон (Дан. 12:8, 9). Је бис кандый бир судурды јетире оҥдобой турган болзоос, ол судур бӱтпес дегенин темдектебей јат. Иегова бойыныҥ ӧйинде биске нени билер керек ӱзе ачып берер деп, бир де алаҥзыбай јадыс. Нениҥ учун дезе Иегова јаантайын анайып ла эдип јат (Ам. 3:7).

20. Удабас ла библиялык кандый судурлар бӱдер? Биске оноҥ ло ары нени эдер керек?

²⁰ Кандый да ӧйдӧ улус: «Амыр, кайдаҥ да јеткер јок» — деп айдыжар (1 Фес. 5:3). Оноҥ телекейдиҥ башчылары тӧгӱн кудай јаҥга табару эдип, оны јоголтып салар (Ачыл. 17:16, 17). Оныҥ кийнинде олор Кудайдыҥ ишчилерине табару эдер (Иез. 38:18, 19). Бу табаруныҥ кийнинде Армагеддон деп јуу-согуш башталар (Ачыл. 16:14, 16). Бис бу судурларды удабас ла бӱдӱп калар деп, бир де алаҥзыбас аргалу. Је эмди дезе, ол ӧй келгелекте, библиялык судурларды оҥдоп турактар ла оны улуска јартаарга болужактар. Анайып, теҥеридеги сӱӱштӱ Адабыска быйанысты кӧргӱзерис.