1. Вавилонныҥ улузы Даниилге нениҥ учун ајару эткен?

 ДАНИИЛ јиит болордо, оны тӧрӧл јеринеҥ алып, ыраак Вавилондӧӧн олјого апарган. Ондо оны улус капшай ајарып ийген. Не дезе ол «кеберкек» ле јамылу биледеҥ болгон. Оныҥ учун Вавилонныҥ улузы оны каанныҥ ӧргӧӧзинде иштезин деп, белетеп баштагандар (Дан. 1:3, 4, 6; 1 Сам. 16:7).

2. Иегова Даниилге кандый кӧрӱмдӱ болгон? (Иезекииль 14:14).

² Иегова Даниилди кеберкек ле јамылу болгоны учун эмес, је бастыра јӱрегинеҥ оны сӱӱндирип турганы учун сӱӱген. Сананып ийзеер де: Даниил 20 јаштаҥ јаҥы ла ашкан болгон, је Иегова оны канча јылдардыҥ туркунына Кудайга чындык иштеген улузыныҥ, Иов ло Нойдыҥ, тоозына кошкон (Баш. 5:32; 6:9, 10; Иов 42:16, 17; Иезекииль 14:14 кычырыгар). Даниил карыганча ла Иегованыҥ сӱӱжинде јӱрген, а оныҥ јӱрӱми сӱреен јилбилӱ ле кайкамчылу болгон (Дан. 10:11, 19).

3. Бу јӧрмӧлдӧҥ нени шӱӱжип кӧрӧрис?

³ Бу јӧрмӧлдӧ Даниилди Иегованыҥ кӧзинде кандый эки кылык-јаҥ баалу эткенин кӧрӱп ийерис. Озо баштап олордыҥ кажызын ла шӱӱжип ийерис, оныҥ кийнинде Даниил кандый учуралдарда бу кылык-јаҥдарын кӧргӱскенин кӧрӱп ийерис. Анайда ок Даниилге бу кылык-јаҥдарын тыҥыдарга не болушканын кӧрӧрис. Учында дезе Даниилдиҥ теминеҥ бис неге ӱренеристи шӱӱжип ийерис. Је бу јӧрмӧл јииттерге учурлалган да болзо, Даниилдиҥ теминеҥ бис ончобыс кӧп немеге ӱренер аргалу.

4. Даниил јалтанбас болгонын канайып кӧргӱскен?

⁴ Јалтанбас улус коркыырдаҥ айабас. Је олор коркыганына јай бербей, чын эдерге албаданып јат. Даниил сӱреен јалтанбас јиит кижи болгон. Бу чын ла  андый деп, оныҥ јӱрӱминде болгон эки учуралды кӧрӱп ийектер. Баштапкызы, вавилоняндар Иерусалимди јемирип салган кийнинеҥ эки јыл ӧткӧн кийнинде болгон болор. Вавилонныҥ каанына Навуходоносорго, тӱш јеринде коркышту јаан чалу кӧрӱнген. Ол бойыныҥ ойгор улузына, ол тоодо Даниилге, бу тӱшти куучындап береле, оныҥ учурын јартап берзин деп айткан. Олор оны эдип болбозо, олорды ончозын ӧлтӱрип салар эди (Дан. 2:3—5). Даниилге бу айалгада тӱргендеер керек болгон. Не дезе кӧп улустыҥ јӱрӱми јеткерлӱ айалгада болгон. Оныҥ учун «Даниил каанга барып, тӱшти јартап берерге, ӧй сураган» (Дан. 2:16). Мыны эдерге, ого јалтанбас болоры ла бӱдери керек болгон. Не дезе Даниил мынаҥ озо тӱштер јартаган деп, кайда да айдылбаган. Вавилондо Шадрах, Мешах ла Аведнего деп адаткан најыларына: «Кудай олорды килеп, бу јажытты ачып берзин... деп, ол олорды теҥериниҥ Кудайына мӱргӱзин» — деген (Дан. 2:18). Иегова олордыҥ мӱргӱӱлдерине каруузын берген. Кудайдыҥ болужыла Даниил Навуходоносорго тӱшти јартап берген. Мынайып, Даниил ле оныҥ најылары тирӱ артып калган.

5. База кандый учуралда Даниилге јалтанбас болоры керектӱ болгон?

⁵ Бир канча ӧйдиҥ кийнинде Даниилге база јалтанбас болор керек болгон. Не дезе Навуходоносор коркышту јаан байбак агаш керегинде тӱш кӧргӧн. Бу тӱштеҥ улам каан коркышту санааркай берген. Бу ӧйдӧ Даниилге јалтанбас болор керек болгон. Нениҥ учун дезе ого, Навуходоносор бир канча ӧйгӧ сагыжы јок ло каанныҥ јамызын јылыйтып салар деп, кӧзине ле айдарга келишкен (Дан. 4:25). Каан оны ороонныҥ јаҥын аҥтарарга турган деп сананала, ӧлтӱрип салар эди. Је андый да болзо, Даниил бир де коркыбай, ӱзе немени јарт айдып берген.

6. Даниил нениҥ учун јалтанбас болгон?

⁶ Даниил недеҥ улам бастыра јӱрӱмине јалтанбас болгон? Ол јаштаҥ ла ала ада-энезиниҥ темин кӧргӧн. Олор Иегованыҥ ада-энелерге берген јакаруларын јакшы бӱдӱрген. Уулын да Кудайдыҥ јасагына ӱреткен болгон (Јаҥ. т. 6:6—9). Даниил он јасакты сӱреен јакшы билген.  Ол оныҥ оок-теек те немелерин јакшы аайлап туратан. Темдектезе, нени јиирин, нени јиирге јарабазын билген (Лев. 11:4—8; Дан. 1:8, 11—13) b. Анайда ок Кудайдыҥ албатызыныҥ тӱӱкизин сӱреен јакшы билген ле Иегованыҥ јасагын бӱдӱрбегени неге экелгенин кӧргӧн болгон (Дан. 9:10, 11). Ол бойыныҥ узак јӱрӱминде Иегованыҥ ла оныҥ ийде-кӱчтӱ ангелдериниҥ болужын јаҥыс катап кӧрбӧгӧн. Бу ончо неме Иегова оны качан да артыргыспас деп бӱдӱмјилеген (Дан. 2:19—24; 10:12, 18, 19).

7. Даниилге јалтанбас болорго база не болушкан? (Јурукты база кӧрӱгер.)

⁷ Даниил Кудайдыҥ судурчыларыныҥ бичиктерин шиҥдеген, ол тоодо Иеремияныҥ судурларын. Оныҥ болужыла ол Вавилондогы олјо удабас божоп калар деп оҥдоп ийген (Дан. 9:2). Судурлардыҥ бӱдӱп турганын кӧрӱп, Даниилдиҥ Иеговага бӱдери тыҥыган. А качан кижи бир де алаҥзыбай, Кудайга бӱдӱп турза, ол недеҥ де јалтанбас болуп калат. (Римдегилерге 8:31, 32, 37—39 тӱҥдештиригер.) Је эҥ учурлузы, Даниил теҥеридеги Адазына кӧп мӱргӱп туратан (Дан. 6:10). Ол Иеговага бойыныҥ кинчектерин, сезимдерин куучындаган. Анайда ок ол Иегованаҥ ийде-кӱч сураган (Дан. 9:4, 5, 19). Даниил бистий ле кижи болгон. Айдарда, ол энезинеҥ чыгарда, јалтанбас болуп чыкпаган. Даниилге јалтанбас болорго, Агару Бичимелдерди шиҥдегени, Иеговага мӱргӱгени ле ого бӱткени болушкан.

8. Бис канайып јалтанбас болорыс?

⁸ Биске јалтанбас болорго нени эдер керек? Ада-энелер балдарын јалтанбас болорго кӱӱнзедип јат. Је бу кылык-јаҥ ӱйенеҥ ӱйеге кӧчпӧй јат. Канайып јаҥы немени эдерге ӱренип турганы чылап, јалтанбас болорго база ӱренер керек. Јаҥы немеге ӱренерге турган болзоос, ӱредӱчи канай эдип турганын јазап кӧрӧлӧ, бис база оной эдерге албаданып јадыс. Анайып ла јалтанбас болорго ӱренип аларга турган болзоос, ӧскӧ улустыҥ јалтанбас болгонын кӧрӱп, анайда ла эдерге албаданадыс. Бис Даниилдеҥ неге ӱренер аргалу? Биске база ла ол чылап, Агару Бичикти тереҥ шиҥдеп турар керек. Оноҥ Иеговага ичисте не барын ӱзе чыгара айдып турар керек. Ол тушта, бисте Кудайла јуук колбу болор. Иегова бисти јаантайын јӧмӧӧр деп, ого бӱдӱп, бир де алаҥзыбас керек. Ол тушта ченелтелер болзо, бис јалтанбас болорыс.

9. Биске нениҥ учун јалтанбас болор керек?

⁹ Јалтанбас болоры биске сӱреен керектӱ. Германияда јадып турган Бенниҥ учуралын кӧрӱп ийектер. Оныҥ ӱренип турган школында ончозы эволюцияга бӱдет. Олор ӱзе немени Кудай јайаган деп айдылганын чӧрчӧк деп бодогылайт. Бир катап ого бӱдӱн класстыҥ алдына бар јокты ӱзе Кудай јайаган деп куучындайтан арга ачылган. Ӱредӱчи мени лаптап угала, белетеп алган материалдарымныҥ копияларын эделе, балдарга ӱлеп берген. Кӧп балдар соныркап уккан. Оныҥ кийнинде: «Сен биске сӱреен јарап јадыҥ» — деп, айдышкан. Бенниҥ учуралынаҥ јалтанбас кижини улус тооп турган деп кӧрӱнет. Јалтанбас болзоос, ачык јӱректӱ улусты Кудайла таныштырарга јеҥил болор. Бу сӱреен  јакшы кылык-јаҥга биске ончобыска ла оноҥ ло ары ӱренер керек.

10. Чындык болоры ол не дегени?

¹⁰ Агару Бичикте «чындык болоры» ол эмезе «чындык сӱӱш» деп кӧчӱрилген сӧс јуук, бек колбуларды кӧргӱзет. Андый сӱӱшле Кудай бойыныҥ најыларын сӱӱген. Бу сӧс Кудайдыҥ албатызыныҥ сӱӱжин кӧргӱзерге тузаланылат (2 Сам. 9:6, 7). Мындый сӱӱш бир канча ӧйдӧҥ оноҥ тыҥ болуп калар аргалу. Оны дезе Даниилдиҥ теминеҥ јарт кӧрӱп јадыс.

11. Карып калган тушта, Даниилдиҥ Иеговага чындыгы канайып ченелген? (Кадарындагы јурукты кӧрӱгер.)

¹¹ Даниилдиҥ Иеговага чындыгы бастыра јӱрӱмине ченелген. Эҥ кӱч ченелтелердиҥ бирӱзи ол 90 јаштаҥ ажа берерде болгон. Ол тушта Вавилонды мидяндар ла перстер јуулап алган болгон ло ондо Дарий деп каан башкарган. Каанныҥ улузына Даниил јарабай турган болгон ло олор оныҥ бажырган Кудайын чек тообойтон. Мынаҥ улам олор Даниилди ӧлтӱрерге шӱӱп сананып алгылаган. Оныҥ учун олор каанды мындый јасак чыгарзын деп бӱдӱмјилегендер. Ол јасактыҥ болужыла Даниил бойыныҥ Кудайына ба эмезе каанга чындык па деп кӧрӱне берер эди. Бу јасак аайынча јажы јаанап калган судурчыга 30 кӱнниҥ туркунына Иеговага мӱргӱбес керек болгон. Анайып эткен болзо, Даниил каанга чындык болгонын кӧргӱзип, кату каруузына турбас эди. Је Даниил бу јасак аайынча этпеген. Оныҥ учун оны карагулаларлу ородӧӧн таштап ийгендер. Иегова Даниилди чындыгы учун кайралдап, карагулалардаҥ аргадап алган (Дан. 6:12—15, 20—22). Бис канайып Иеговага чындык болор аргалу?

12. Даниил Иеговага чындык болорын канайып тыҥыткан?

¹² Ӧрӧги абзацтарда айдылганыла, Кудайыска чындык болорго, бис те сӱӱжисти тыҥыдар аргалу. Даниил Иегованы сӱреен тыҥ сӱӱген. Оныҥ учун ондо Кудайынаҥ јана болор санаа бир де болбогон. Мындый сӱӱшти ӧскӱрерге, ол байла, Иегованыҥ кылык-јаҥдарын сӱреен тереҥ шӱӱп сананган болор (Дан. 9:4). Анайда ок Даниил Кудайдыҥ ого ло албатызына јакшы нени  эткенин сананып, быйанду болгон (Дан. 2:20—23; 9:15, 16).

13. а) Јииттердиҥ чындыгы канайып ченелет? Тем куучындап береер. (Јурукты база кӧрӱгер.) б) Иегованыҥ Керечилери гомосексуалисттерге канайып кӧрӱп турган деп сураза, слер нени айдараар? (jw.org сайттаҥ «Чындык болоры амырга экелер» деген видеоны кӧрӱгер.)

¹³ Бӱгӱнги кӱнде Даниилдиҥ ле ӧйинде чилеп, бистиҥ балдарды айландыра Иегованыҥ ла оныҥ нормаларын тообой турган балдар јӱрет. Олор Кудайды сӱӱп турган балдарды кыйа кӧргӱлейт. Кезиктери Кудайдыҥ јасактарын бузып ийзин деп, коркыдарга албаданат. Австралияда јадып турган Гре́йм деп карындаштыҥ јаан класстарда ӱренип турарда не болгонын кӧрӱп ийектер. Бир катап ӱредӱчи балдардаҥ мынайып сураган: «Слердиҥ нӧкӧрӧӧр: „Мен гомосексуалист“ — деп айтса, слер мыны канайып кӧрӧрӧӧр?» Бу мыны јарадып турганы бир јанындӧӧн турзын, а јаратпай турган балдар база бир јанындӧӧн турзын деген. Класс бӱдӱнге јарадып турган јанындӧӧн тура берген. «Је мен ле база бир Иегованыҥ Керечизи јаратпай турган јанындӧӧн тура бердис». Грейм айдат: «Оноҥ ары не болгонын сананып ийзеер де. Меге чындык артарга коркышту тыҥ ченелте болгон. Уроктыҥ учына јетире ӱредӱчи ле балдар биске каткырыжып, канайып ла шооткылаган. Мен бӱдӱмјимди корулаарга, кандый ла ойгор шӱӱлтелер де айткан болзом, олор мыны чек укпаган». Бу ченелтени Грейм канайып ӧткӧн? Ол айдат: «Балдар сени канайып ла шоодып, каткырып турганында бир де јакшы неме јок. Је мен сӱӱнип јадым, олорго јайылбай, бӱдӱмјимди корулап алганымга».

14. Бис Иеговага чындык болорын канайып тыҥыдар аргалу?

¹⁴ Бис теҥеридеги Адабыска сӱӱжисти тыҥыдып турзаас, Даниил ле чилеп, Иеговага чындык болор аргалу, а оныҥ кылык-јаҥын шиҥдеп турзаас, ого сӱӱжисти оноҥ тыҥ эдип алар аргалу болорыс. Иегованыҥ кылык-јаҥын кӧрӱп аларга, оныҥ јайаандарын ајыктаар керек (Рим. 1:20). Мында слерге «Бу ончо неме бойы табылган ба?» деп рубрикадагы видеолор ло јӧрмӧлдӧр болужар. Олордыҥ болужыла слер Иегованы оноҥ тыҥ сӱӱреер ле оноҥ тыҥ тооп баштарыгар. «Была ли жизнь создана?» ла «У истоков жизни. Пять вопросов, которые требуют ответа» деген брошюраларды јаҥыдаҥ кычырып аларга јараар. Бу брошюралар керегинде Данияда јадып турган Э́стер деп сыйын мынайда айдат: «Ондо бичилген керелер сӱреен кайкамчылу! Сеге неге бӱдетенин айтпай јат. Брошюраларда јӱк керелер бичилип калган. А неге бӱдетенин сен бойыҥ талдап јадыҥ». Ӧрӧги айдылган Бен мынайда айдат: «Бу брошюралар мениҥ бӱткенимди тыҥыткан. Оны кычырган кийнинде, ончо немени Кудай јайаган деп, мен бир де алаҥзыбай јадым». Бу материалдарды шиҥдеген кийнинде, слер Ачылта 4:11-де бичилген: «Сен, Иегова, бистиҥ кӱчтӱ Кудайыс, макты, кӱндӱни аларга јарамык, нениҥ учун дезе сен ончоны јайагаҥ» — деп сӧстӧрлӧ јӧпсинер болороор c.

15. Слерге Иегованыҥ јуук најызы болорго база не болужар?

¹⁵ Иеговага сӱӱжисти тыҥыдатан база бир арга — оныҥ Уулыныҥ јердеги јӱрӱмин тереҥ шиҥдеп кӧрӧри. Анайып, Германияда јадып турган Сами́ра сыйын эткен. Ол куучындайт: «Иисус керегинде кычырып турала, Иегованы јакшы билип  алгам». Бу сыйынга кичинек тужында, Иеговада сезимдер бар деп, бӱдерге јеҥил эмес болгон. Је ого Иисус керегинде билерге бир де кӱч болбогон. Самира айдат: «Меге Иисус сӱреен јарап туратан. Нениҥ учун дезе ол јалакай болгон ло балдарды сӱӱген». Самира Иисус керегинде канча ла кире кӧп билип турарда, Иеговага ончо ло кире јууктаган. Нениҥ учун? «Кийнинде мен Иисус ӱзе немени Адазы ла чылап эдип турган деп оҥдоп алгам. Ол экӱ бой-бойына сӱреен тӱҥей. Эмди, Иегова Иисусты јердӧӧн нениҥ учун ийген деп, билерим. Анайып, улус Кудай керегинде јакшы билип алар аргалу» — деп, Самира айдат (Иоанн 14:9). Слер Иеговага јуук најы болорго турган болзогор Иисус керегинде билип аларга ӧйди бир де карамдабагар. Анайып, Иеговага сӱӱжигер тыҥыыр ла чындык артарыгар.

16. Биске нениҥ учун Кудайга чындык артар керек? (Сарын 18:25; Михей 6:8).

¹⁶ Бис улуска чындык болзоос, бисти качан да таштабайтан најыларлу болорыс (Руфь 1:14—17). Бис Иегова Кудайга чындык артсаас, бистиҥ јӱрегисте амыр болор. Нениҥ учун дезе Иеговага чындык улуска, ол бойы да чындык болор. (Сарын 18:25; Михей 6:8 кычырыгар.) Сананып ийзеер де, Кӱчтӱдеҥ Кӱчтӱ Јайаачы слердиҥ јуук најыгар болорго кӱӱнзеп јат! Слер ого јуук најы болзоор, ӧштӱлер де, ченелтелер де, ӧлӱм де оноҥ айрып болбос (Дан. 12:13; Лука 20:37, 38; Рим. 8:38, 39). Кудайга чындык арткан Даниилдеҥ бойыска сӱреен јакшы тем алып јӱректер!

17, 18. Келер јӧрмӧлдӧ бис нени шӱӱжерис?

¹⁷ Бу јӧрмӧлдӧ бис Даниилдиҥ эки кылык-јаҥын кӧрдис. Бу кылык-јаҥдарга биске де ӱренер керек. Је бу судурчынаҥ бис ӧскӧ дӧ немеге ӱренер аргалу. Темдектезе Иегова ого кӧрӱлтелер, тӱштер кӧргӱскен, анайда ок судурлар јартаар јайалта берген. Бу судурлардыҥ кезиги эм тургуза бӱдӱп калган. Је кезиги келер ӧйдӧ бӱдер. Ол судурлар бӱдӱп јатса, оноҥ кем де тура калбас.

¹⁸ Келер јӧрмӧлдӧ бис Даниилдиҥ бичиген эки судурын шӱӱжерис. Биске ончобыска, јаан да болзоос, јаш та болзоос, олорды оҥдоп турар керек. Олор биске ойгор тӱп-шӱӱлтелер чыгарарга болужар. Анайда ок олор биске јалтанбас болорго ло Иеговага чындык болорго болужар. Анайып бис удабас ла болотон учуралдарга белетенип аларыс.