1. Биске нениҥ учун чыдамкай улус јарап јат?

 БИСКЕ чыдамкай улус јарап јат. Андый улус аларга турган немези келишпезе де токуналу артат. Оныҥ учун бис олорды тооп јадыс. Улус бистиҥ јастырабысты кӧрӱп, чыдажып турза, бис олорды баалап јадыс. Бисти Агару Бичикке ӱреткен ака-эјелер, чындыкты оҥдобой, тузаланып болбой турганысты кӧрӱп, чӧкӧбӧй јӱргени учун, јаан быйанысты айдып јадыс. Је элдеҥ озо бисти Иегова Кудайыс канча јылдарга чыдажып турганы учун јаан быйанду болодыс! (Рим. 2:4).

2. Кандый айалгаларда биске чыдамкай болуп артарга јеҥил эмес?

² Је бир немени ундыбактар: бис улустыҥ чыдамкайын баалап та турган болзоос, биске бойыска јаантайын чыдамкай болорго јеҥил эмес болот. Темдектезе, бис пробкада турганыс, ӱстинеҥ ары оройтып јаткан болзоос, чыдамкай болуп артарга кӱч болот. Эмезе та кем де биске јарабай турган неме эдип јатса, чыдажып болбой, јарыла бередис. А кезикте Иегованыҥ берер болгон јаҥы телекейин сакып болбозыс деп билдирет. Слер оноҥ чыдамкай болорго кӱӱнзейдеер бе? Бу јӧрмӧлдӧ бис чыдамкай болоры керегинде ле бу кылык-јаҥ нениҥ учун сӱреен керектӱ деп шӱӱжерис. Анайда ок бу кылык-јаҥды оноҥ јакшы кӧргӱзерге не болужарын база шӱӱжерис.

3. Чыдамкай кижини та кем де ӧнӧтийин ачындырарга турза, ол бойын канайып тудунат?

³ Эмди чыдамкай болорго болужатан тӧрт эп-арга кӧрӱп ийектер. Баштапкызы, чыдамкай кижи чугулданарга меҥдебей јат. Ол оны кем-кем ӧнӧтийин ачындырарга турза, эмезе айалга катулана берзе, ачынбаска  ла ӧштӧшпӧскӧ албаданат. Баштапкы катап «чугулданарга меҥдебей јат» деп сӧстӧр Агару Бичикте Иегова керегинде айдылып турарда бичилген: «килеҥкей ле буурзак Кудай. Ол чугулданарга меҥдебей јат, чындык сӱӱшле, чындыкла толо» (Чыг. 34:6).

4. Чыдамкай кижиге сакыырга келишсе, ол нени эдет?

⁴ Экинчизинде, чыдамкай кижи сакып билер. Андый кижи кандый ла немеге сананган ӧйинеҥ кӧп ӧй барып турза, шакпырап, кыртыштанбай јат (Матф. 18:26, 27). Кӧп айалгаларда биске сакып билер керек. Темдектезе, та кемде биске нени-нени куучындап јатса, сӧс блаашпай, оны лаптап угар керек (Иов 36:2). Анайда ок Агару Бичикти ӱренип турган кижиге кандый бир ӱредӱни јартап турзаас эмезе јаман кылык-јаҥнаҥ айрыларга болужып турзаас, чыдамкай болор керек.

5. Чыдамкай болотон база кандый арга бар?

⁵ Ӱчинчизинде, чыдамкай кижи нени де меҥдей-шиҥдей этпей јат. Тӱргедеп эдетен айалгалар јӱрӱмде болуп јат эмей. Је чыдамкай кижиге кандый бир јаан учурлу јакылта берилзе, ол оны јазап сананбай ла меҥдей-шиҥдей этпей јат. Карын, јакылтазын канай бӱдӱрер деп, меҥдебей, пландап алала, оны јазап бӱдӱрерге, ӧйди јеткилинче чыгарат.

6. Чыдамкай кижи кӱчтердиҥ ӧйинде бойын канайып тудунат?

⁶ Тӧртинчизинде, чыдамкай кижи кӱчтердиҥ ӧйинде комудабай јат. Бу јанынаҥ чыдамкай болоры турумкай болорына сӱреен тӱҥей. Санааркаштарысты јуук најыбыска куучындаарында јастыра неме јок. Је чыдамкай кижи јӱрӱминде болуп турган јакшы немелерди сананып, Иеговага оноҥ ло ары сӱӱнчилӱ иштеерге албаданат (Кол.  1:11). Бис христиандар болуп, ӱстинде айдылган эп-аргаларды тузаланып, чыдамкай болорго кӱӱнзейдис. Нениҥ учун? Бир канча шылтактар кӧрӱп ийектер.

7. Иаков 5:7, 8-ле болзо, биске нениҥ учун чыдамкай болор керек? (Анайда ок јурукты кӧрӱгер.)

⁷ Чыдамкай болзоос, аргадаларыс. Алдындагы ӧйдӧ Кудайдыҥ чындык ишчилери Кудай айткан сӧзин бӱдӱрер деп сакыгандар (Евр. 6:11, 12). Биске база анайып ла эдер керек. Агару Бичик христиандарды јер ишчинеҥ тем алзын деп кӱӱнзедет. (Иаков 5:7, 8, ЈТ кычырыгар.) Јер ишчи јерди ӱрендеп, сугарат. Је ол ӱрен качан чыгып келерин билбес. Оныҥ учун ол отургызып салган ажыныҥ тӱжӱмин јууп алар деп иженип, чыдажып сакып јат. Анайып ла бис, Христостыҥ «кандый кӱнде келерин» билбес бе болзоос, оныҥ јакылтазын јакшы бӱдӱрерге албаданадыс (Матф. 24:42). Иегова берген сӧзин бӱдӱрип салар деп алаҥзыбай, сакып јадыс. Оноҥ башка Иегованыҥ кӱнин сакыырын кӱчсинип, Кудайдаҥ ыраап баштаарыс. Эмезе эмди ле јакшызынатан неме бедирей берердеҥ айабазыс. Је чыдамкай болзоос, учына јетире турумкай артарыс ла аргадаларыс (Мих. 7:7; Матф. 24:13).

8. Чыдамкай болоры улусла эптӱ-јӧптӱ јӱрерге канайып болужат? (Колоссыдагыларга 3:12, 13).

⁸ Чыдамкай болоры улусла эптӱ-јӧптӱ јӱрерге ле улусты јазап угарга болужат (Иак. 1:19). Анайда ок чыдамкай болоры амыр-энчӱге јӧмӧжӧт. Ол бисти немени сананбай айтпаска болужат. Айалга катулана да берзе, бис јаман неме айтпай јадыс. Анайда ок кем де бисти ачындырып турза, бис капшай ла ачынарга меҥдебей јадыс. Ӧчин алардыҥ ордына: «Бой-бойыгарга чыдамкай болыгар, кем кемигерге комыдалду болзо, акту јӱректеҥ јаманын таштагар» — деген сӧстӧр аайынча эдедис. (Колоссыдагыларга 3:12, 13 кычырыгар.)

9. Јӧп чыгарарында чыдамкай болоры канайып болужат? (Укаа сӧстӧр 21:5).

⁹ Чыдамкай болзоос, јакшы јӧптӧр чыгарарыс. Бис меҥдебей, айалганы бастыра јанынаҥ кӧрӱп, ойгор јӧп чыгарарыс. (Укаа сӧстӧр 21:5 кычырыгар.) Темдектезе, бис иш бедиреп турганыс. Баштапкы ла келишкен ишке јӧпсинип ийдис. Мынаҥ улам јуунныҥ туштажуларын божодып, јарлаар ишке ас туружадыс. Је чыдамкай болзоос, мындый немелерди, темдектезе, иштейтен јер кайда болгонын, канча саат иштеерин ле билегиске ле бойыстыҥ кӧгӱс јаныска кандый каршузын јетирерин ајаруга аларыс. Бис чыдамкай болзоос, каршу јетиргедий јӧптӧр чыгарбазыс.

10. Оноҥ ло ары чыдамкай болорго биске не болужар?

¹⁰ Чыдамкай болорго мӱргӱгер. Чыдамкай болоры — агару тынныҥ тӱжӱми (Гал. 5:22, 23). Бу јараш кылык-јаҥга бойыстыҥ кӱчисле ӱренип болбозыс. Кезикте кандый бир кӱч айалгада биске чыдамкай болорго кӱч болуп турза, Иеговага мӱргӱп, агару тын сурап јадыс (Лука 11:9, 13). Анайда ок бис ӱзе немеге Иегованыҥ кӧрӱмиле кӧрӧргӧ, болуш сураар аргалу. Мӱргӱген кийнинеҥ  чыдамкай болорго, кажы ла кӱн албаданар керек. Канча ла кире кӧп мӱргӱп, албаданып турзаас, ончо ло кире чыдамкай болорына ӱренип аларыс.

11, 12. Иегова чыдамкайын канайып кӧргӱзет?

¹¹ Агару Бичиктеги темдерди шӱӱп сананыгар. Агару Бичиктеги чыдамкай болгон кӧп улустыҥ темдери бичилип калган. Ол улустыҥ јӱрӱмин шӱӱп сананзаас, бис кӧп немеге ӱренип алар аргалу. Је озо ло баштап чыдамкай болорыныҥ улу темин — Иегованыҥ темин — кӧрӱп ийектер.

¹² Эдем садта Сатана Иегованыҥ адын јамандап, ол улусты сӱӱбей турган ла олорды тӧгӱндеп турган деп бурулаган. Иегова Сатананы капшай ла јоголтпой, чыдамкайын кӧргӱскен. Нениҥ учун дезе Кудай оныҥ башкарузы эҥ ле јакшы деп кӧргӱзерге, ӧй керек деп оҥдогон. Канча муҥ јылдардыҥ туркунына Сатана оныҥ агару адын јамандап турганын чыдажат. Анайда ок Иегова канча кире кӧп улус ӱргӱлји јӱрӱм јӱрер аргалу болзын деп, чыдамкай сакыйт (2 Пётр 3:9, 15). Мынаҥ улам миллиондор тоолу улус Иегованыҥ најылары болуп калган. Иегова недеҥ улам чыдамкай болуп турганын ундыбай турзаас, јаманды јоголтотон ӧйди биске сакыырга јеҥил болор.

13. Иисус канайып Адазы чылап чыдамкай болгон? (Анайда ок јурукты кӧрӱгер.)

¹³ Иисус, Адазы ла чылап, чыдамкай болгон. Ого, јерде јӱрерде, чыдамкай болорго, кезикте јеҥил эмес болгон. Анчада ла јасактыҥ эки јӱстӱ ӱредӱчилериле, фарисейлерле куучындашкан туштарда (Иоанн 8:25—27). Иисус, Адазы ла чылап, ачынарга, бир де  меҥдебеген. Олор Иисусты ӧнӧтийин јамандап та турарда, Иисус олорло тартышпаган (1 Пётр 2:23). Иисус кӱч те ӧйлӧрдӧ бир де чугулданып комудабаган. Оныҥ да учун Агару Бичик бисти: «Кинчектӱ улустыҥ удурлашканына чыдашкан Иисус керегинде шӱӱп кӧрӱгер» — деп, кӱӱнзедип јат (Евр. 12:2, 3). Иегованыҥ болужыла бис те кандый ла ченелтени ӧдӱп ийерис.

14. Авраамныҥ чыдамкайынаҥ неге ӱренедис? (Еврейлерге 6:15). (Анайда ок јурукты кӧрӱгер.)

¹⁴ Бис бу телекейдиҥ учын узак сакып турала, ол ӧйди сакып болбозыс деп, санааркаардаҥ айабазыс. Је биске чыдамкай болорго не болужар? Авраамныҥ теми. Авраамга 75 јаш болордо ло балдар јок тужында, Иегова: «Мен сенеҥ улу калык эдерим» (ЈТ) — деп, сӧзин берген (Баш. 12:1—4). Авраам бу сӧстӧрдиҥ бӱткенин кӧргӧн бӧ? Јок. Ол јӱк ле башталганын кӧргӧн. Авраам Евфрат сууны кечкен кийнинде, база да 25 јыл ӧдӧ берерде, Исаак деп уулду болуп калган. Бу сӱреен јаан кайкал болгон! А база да 60 јылдаҥ Иаков ла Исав деп баркалары чыккан. (Еврейлерге 6:15, ЈТ кычырыгар.) Је Авраам бала-барказынаҥ улу албаты болуп калганын ла Ханаан јерге киргенин анайып ла кӧрбӧгӧн. Андый да болзо, оныҥ Иеговала колбулары божоордыҥ божогончо бек болгон (Иак. 2:23). Сананып ийзеер де, Авраам тирилип келзе, оныҥ бӱдӱмјизинеҥ ле чыдамкайынаҥ улам јердиҥ бастыра улузы Иегованыҥ алкыжын алган деп билип ийеле, не аайлу сӱӱнгей не! (Баш. 22:18). Бис неге ӱренедис? Бистиҥ кезигис Иегованыҥ сӧзи канайып бӱдерин бойыныҥ кӧзиле  кӧрбӧстӧҥ айабас, је Авраам чылап чыдамкай болзоос, Иегова бисти эмди де кайралдаар, келер ӧйдӧ оноҥ јаан алкыштар берер деп, бир де алаҥзыбас аргалу (Марк 10:29, 30).

15. Таҥынаҥ ӱренген тужыста нени шиҥдеп кӧрӧргӧ јараар?

¹⁵ Агару Бичикте чыдамкай болгон улустыҥ темдери кӧп бичилген (Иак. 5:10). Биске ол улустыҥ јӱрӱмин не јакшы шиҥдеп кӧрбӧс? b Темдектезе, Давидтиҥ јӱрӱмин. Давидти Иегова Израильдиҥ кааны эдип кӧстӧп турарда, ол јиит уул болгон. Је ол каан болуп башкаратан ӧйди узак јылдарга сакыган. Симеон ло Анна да келер болгон Мессияны узак сакып, чындык иштегендер (Лука 2:25, 36—38). Бу чындык улустыҥ јӱрӱмин шиҥдеп турала, бойыгарга мындый сурактар беригер: «Ого чыдамкай болорго не болушкан? Мынаҥ ого кандый туза болгон? Мен оноҥ неге ӱренер аргалу?» Је Агару Бичикте чыдамкай эмес те улустыҥ темдери бар. Бис олордоҥ до кӧп немеге ӱренер аргалу (1 Сам. 13:8—14). Бойоордоҥ сурагар: «Ого чыдамкай болорго не чаптыгын јетирген? Бу неге экелген?»

16. Чыдамкай болоры незиле тузалу?

¹⁶ Чыдамкай болорыныҥ тузазын сананыгар. Чыдамкай кижи кӧп сабада ырысту ла амыр јӱрет. Оныҥ учун чыдамкай болуп турзаас, су-кадыгыс та јакшы болот. Анайда ок улусла јакшы колбуларлу болуп, јууныстыҥ бирлигин кичеейдис. А кем-кем бисти ачындырарга албаданып турган ӧйдӧ, бойысты тудунып турзаас, айалганы јымжадып саладыс (Сар. 37:8, сноска; Укаа 14:29). Је эҥ учурлузы — чыдамкай болуп турзаас, теҥеридеги Адабыска тӱҥей болуп, ого оноҥ јуук болуп каладыс.

17. Бис нени эдерге бек шӱӱп алдыс?

¹⁷ Чыдамкай болоры кажы ла кижини јарандырып турган сӱреен јараш ла тузалу кылык-јаҥ. Бу кылык-јаҥга ӱренип аларга јеҥил эмес те болзо, Иегованыҥ болужыла бис оноҥ ло ары ӱренер аргалу. Эмди јаҥы телекейдиҥ келерин сакып тура, бис «Иегова оноҥ айап тургандарды ла оныҥ чындык сӱӱжине иженип тургандарды кӧрӱп јӱрет» деп, алаҥзыбай јадыс (Сар. 33:18). Оныҥ учун чыдамкай болорын кийим чилеп кийип алала, оны уштыбай јӱректер!