• «Меге ӧбӧӧним ӧскӧ кижиле конып турган деп билдирип туратан».

• «Мен бойымды јаман, јараш эмес ле ӧбӧӧнимге керек јок деп сескем».

• «Бу керегинде кемге де куучындап болбой, туйуксынып туратам».

• «Иегова мени сӱӱбей турган деп билдиретен».

Бу сӧстӧрлӧ болзо, ӧбӧӧни порнография кӧрӱп турза, ӱйине коркышту ачу болуп турганы кӧрӱнет. Ол мындый јаман кылыгын канча айлардыҥ, јылдардыҥ туркунына јажырган болзо, ӱйине ого бӱдерге кӱч болуп турган болор. Бир эје мынайда куучындаган: «Кӧрӧр болзо, ӧбӧӧнимди чек билбес эмтирим. Ол менеҥ база нени јажырып туру не?»

Бу јӧрмӧл ӧбӧӧндӧри узак ӧйдиҥ туркунына порнография кӧрӱп ӱренип калган ӱйлерге бичилген a. Мында ӱйлерин токунадатан, Иегова олорды сӱӱп турган деп бӱдӱмјилейтен ле кӧгӱс јанынаҥ болужатан библиялык шӱӱлтелер бичилген b.

Слер ӧбӧӧнӧӧрдиҥ јанында јаантайын болуп, оныҥ эдип турган кажы ла керегин кӧрӱп болбозоор. Андый да болзо, слерге санааркабаска болужатан бир канча јӧптӧр бар. Олорды кӧрӱп ийектер.

Бойоорды бурулабагар. Ӧбӧӧнӧӧр порнография кӧрӱп турганда бойоорды бурулап турган болороор. Алисага c оныҥ ӧбӧӧни ого ӱй кижиге чилеп кӧрбӧй турган деп билдирген. Ого мындый сурак амыр бербейтен: «Нениҥ учун мениҥ ӧбӧӧниме мендӧӧн эмес, је ӧскӧ ӱй улустӧӧн кӧрӧргӧ јарап турган?» Эмезе слер бу айалгада бойоорды канайып тудунганаар учун бурулап турган болороор. Айалганы слер бойоор ло уурладып турганаар деп сананып јадаар. Даниэ́лла куучындайт: «Ачынып, кородоп турала, тудунып болбой, билемди бойым ла бузып тургам деп билдирген».

Слерде мындый сезимдер болуп турган болзо, ундыбай туругар: Иегова слерди ӧбӧӧнӧӧрдиҥ эдип турган керектери учун каруулу деп кӧрбӧй  јат. Иаков 1:14-тӧ мынайда айдылат: «Кажы ла кижи акту бойыныҥ кычазына јилбиркедип ле мекеледип ченелет» (Рим. 14:12; Флп. 2:12). Айдарда, Иегова слерди бурулабай јат. Карын ол слерди ого чындык артып турганаар учун баалап јат (2 Лет. 16:9).

Слердиҥ ӧбӧӧнӧӧр порнография кӧрӱп турган болзо, керек слерде эмес. Бу теманы шиҥдеп турган эксперттердиҥ сӧстӧриле болзо, порнография бир де ӱй кижи бӱдӱрип болбос сексуальный кӱӱнди тыҥыдат.

Ӧйинеҥ ӧткӱре санааркабаска албаданыгар. Кэ́тринниҥ сӧстӧриле болзо, ӧбӧӧниниҥ порнография кӧрӱп турганы оныҥ бажынаҥ чек чыкпайтан . А Фра́нсес мынайып куучындаган: «Мениҥ ӧбӧӧним эмди кайда болгонын билбей турзам, мен санааркап баштайдым. Мынаҥ улам мен кере тӱжине санааркап јадым». Кезик христиандарга олордыҥ ӧбӧӧниниҥ мындый кылыгын билер ака-эјелердиҥ ортозында болорго эби јок болот. Ӧскӧлӧри олорды кем де оҥдобой турган деп сананып, јаҥысканзырап јат.

Мындый сезимдерде јаман ла неме јок. Је јӱк ле бу керегинде сананзаар, оноҥ тыҥ санааркай беререер. Оныҥ ордына Иеговала колбулараарды шӱӱп сананыгар. Бу слерге ийде-кӱч берер (Сар. 62:2; Эф. 6:10).

Агару Бичикте кӱч айалгага кирген, је Иеговага мӱргӱп, токунал алган ӱй улустыҥ темдерин шӱӱп сананыгар. Иегова олордыҥ кӱчтерин јоголтпогон до болзо, јӱрегине амырды јаантайын берип туратан. Темдектезе, Анна ал-санаага тӱжӱп каларда, Иеговага узак мӱргӱген. Мыныҥ кийнинде ол айалга неле божоорын билбес те болгон болзо, санааркабай барган (1 Сам. 1:10, 12, 18; 2 Кор. 1:3, 4).

Анайда ок аксагалдарга баштаныгар. Олор слерге «салкыннаҥ корудый ла јуттаҥ јабынтыдый» болор аргалу (Иса. 32:2). Керек дезе олор слерге кандый бир эјени айдып берер болор, а ол эје слердиҥ айалгаарды оҥдоп, болужын јетирер аргалу (Укаа 17:17).

Ӱйи ӧбӧӧнине порнография кӧрӧринеҥ айрыларга болужып болор бо? Эйе, болужып ийер аргалу. Агару Бичикте айдылганыла, кижиге кандый бир кӱчтердиҥ аайына чыгып јатса эмезе ийде-кӱчтӱ ӧштӱле тартыжып јатса, «јаҥыскан болгончо, экӱ болгоны артык» (Эккл. 4:9—12).  Шиҥжӱлерле болзо, эш-нӧкӧрлӧр бу кылык-јанынаҥ айрыларга кожо тартыжып турза ла бой-бойына ойто бӱдӱп баштаарга кожо албаданып турза, једимдӱ болот.

Је кӧп неме слердиҥ ӧбӧӧнӧӧрдӧҥ камаанду. Ол јаман кылыгын токтодорго тыҥ кӱӱнзеп турган ба? Тӱзединерге белен бе? Иеговага ла аксагалдарга баштанып, болуш сураган ба? (2 Кор. 4:7; Иак. 5:14, 15). Канайып тӱзединерин шӱӱп алган ба? Темдектезе, электронный эдимдерин канай тузаланарын эмезе ченелте болгодый айалгадаҥ канайып кыйарын (Укаа 27:12). Ол слердиҥ болужыгарды аларга ла слерди тӧгӱндебеске белен бе? Эйе болзо, слердиҥ болужыгар једимдӱ болор.

Слер нени эдер аргалу? Фели́сияныҥ темин кӧрӱп ийектер. Ол И́тан деп кижиге барган, а Итан порнографияны кичинек тужынаҥ ала кӧрӱп баштаган. Фелисия ӧбӧӧнин оҥдоорго албаданат ла куучындажарга јаантайын белен. Оныҥ учун Итанныҥ порнография кӧрӧр кӱӱни келзе, ӱйине бу керегинде куучындап ийерге јеҥил болот. Итан мынайып куучындайт: «Мен ӱйиме ӱзе ачыгынча куучындап јадым, а ол меге интернетте кӧп отурбаска болужат ла мениҥ једимдеримди сурап угат». Фелисияга Итанныҥ мындый кылыгы тыҥ ачу јетирип те турган болзо, ол мынайып айдат: «Мен ачынып кородозом, бу ого болушпас. Оныҥ ордына отурып, айалганы шӱӱжип ийзеес, Итанга меге эмоциональный јанынаҥ болужарга јеҥил болот».

Мындый куучындар ӧбӧӧнине де, ӱйине де тузалу болот. Качан ӧбӧӧни кере тӱжине кайда болгонын, нени эткенин ле бойыныҥ уйан јандары керегинде куучындап турза, ӱйине ого бӱдерге јеҥил болор.

Слер ӧбӧӧнӧӧргӧ мынай болужарга белен бе? Эйе болзо, бу јӧрмӧлди ӧбӧӧнӧӧрлӧ кожо кычырып, шӱӱжип ийигер. Эш-нӧкӧрӧӧр порнография кӧрӧринеҥ айрыларга ла слердиҥ бӱдӱмјигерге кирерге амаду тургузып алзын. Бу суракты слер оныла куучындажарга јатсаар, ӧбӧӧнӧӧр слерге ачынбай, карын слерге кандый ачу јетирип турганын оҥдоп алар учурлу. А слерге ӧбӧӧнигерге јӧмӧжип, ол бу тартыжуны јенип алар деп иженер керек. Айдарда, слер экилегерге ле кижи порнографияны кӧрӧргӧ нениҥ учун ӱренип калат ла оныла канайып тартыжарын оҥдоп алар керек d.

Слер байла, куучындажып јатсаар, ачыныжараар деп, коркып турган болороор. Андый болзо, слер куучындажып јаткан ӧйгӧ экилегерге  ле јарап турган аксагалды кычырып алар аргалу. Је эш-нӧкӧрӧӧр јаман кылыгынаҥ айрылып та калза, слерге ого бӱдерге ӧй керек болор. Чӧкӧбӧгӧр. Оныҥ бир де кичинек тӱзедингенине ајару эдип туругар. Качан-бирде билегерге сӱӱнчи ойто келер деп иженигер (Эккл. 7:8; 1 Кор. 13:4).

Ӧбӧӧнӧӧр ойто ло порнография кӧрӱп ийген болзо, ол кинчегин алынбаган ла ол качан да солынбас деп сананар керек пе? Јок. Ол порнографияны кӧрӧргӧ ӱренип калган болзо, ого бу кылыктаҥ айрыларга кӧп јылдардыҥ туркунына тартыжарга келижер болор. Кӧп јылдар ӧткӧн дӧ кийнинде, бу кылык ойто чыгып келердеҥ айабас. Андый болбозын деп, ӧбӧӧнӧӧргӧ ээжилерди тургузып, ого бу ээжилердеҥ, ӱзе јакшы болуп калган да деп билдирип турган тушта, тудунар керек (Укаа 28:14; Матф. 5:29; 1 Кор. 10:12). Слердиҥ ӧбӧӧнӧӧргӧ санаазын јаҥыртып, јаманды кӧрӧр кӱӱни јок болзын деп ӱренер керек — порнография кӧрӧрин, анайда ок ӧскӧ дӧ ару эмес керектерди, темдектезе, мастурбацияны (Эф. 4:23; Сар. 97:10; Рим. 12:9). Ӧбӧӧнӧӧр тартыжарга белен бе? Эйе болзо, ол бу тартыжуда јеҥип алар аргалу e.

Је слердиҥ ӧбӧӧнигер јаман кылыгын солыырга тыҥ ла кӱӱнзебей турза канайдараар? Андый ӧйдӧ слер санааркап, ачынып, бойоорды ӧбӧӧнӧӧргӧ керек јок болуп калганаар деп, сананар болороор. Бу ӧйдӧ болушты Иегованаҥ бедирегер (1 Пётр 5:7). Санааркаштараарды ого ӱзе куучындап берзеер, јӱрегерге амыр келер. Оныҥ учун Иеговага јуук болорго, оныҥ Сӧзин кычырып, ого кӧп мӱргӱп туругар. Анайып, Кудай да слерге јууктаар. Исайя 57:15-те Кудай «кунугып, ал-санаага тӱшкен улусла» кожо јӱрет ле олорго ийде-кӱч берет деп айдылганын ундыбагар. Христиан кылык-јаҥаарды оноҥ ло ары тыҥыдып, Иеговага эҥ јакшызын беригер. Аксагалдарга да баштанып туругар. Анайда ок ӧбӧӧнӧӧр качан-бирде солынып калар деп иженип јӱрӱгер (Рим. 2:4; 2 Пётр 3:9).