СРЕДАДА, 2023 јылдыҥ чаган айыныҥ 18 кӱнинде, сайтта бир солун јар чыккан. Ондо айдылганыла, Иегованыҥ Керечилериниҥ Башкару јӧбине эки ака кожулган, олордыҥ аттары: Гейдж Флигл ле Джеффри Уиндер. Бу эки ака Иеговага узак јылдардыҥ туркунына иштейт.

Флигл ака США-да, штат Пенсильванияныҥ кӱнбадыш јанында, Иегованыҥ Керечилериниҥ билезинде чыдаган. Ол бала тужында, оныҥ билези Керечилер јетпей турган кичинек каладӧӧн кӧчкӧн. Оныҥ кийнинде, јаан удабай ла, 1988 јылдыҥ кӱчӱрген айыныҥ 20 кӱнинде ол сууга чӧҥӱрилген.

Флигл аканыҥ ада-энези Иеговага ӧйин толо берип иштезин деп јаантайын кӱӱнзедип туратан. Олордыҥ айылына јаантайын ла аймак кӧрӧӧчилер ле Бет-Элде иштеп турган улус келетен, а Гейдж ол ака-эјелердиҥ сӱӱнчизин кӧрӱп туратан. Бу ака чӧҥӱрилген кийнинеҥ бир јыл ӧткӧлӧктӧ, 1989 јылдыҥ сыгын айыныҥ 1 кӱнинеҥ ала текши пионер болуп баштаган. Оноҥ эки јылдаҥ, 1991 јылда, ӱлӱрген айда Бруклиндеги Бет-Элде иштеп баштаган. Ол ондо иштеерге, 12 јаштаҥ ала амадаган.

Бет-Элде Флигл ака 8 јылдыҥ туркунына переплётный цехте иштеген. Оноҥ служебный отделге кӧстӧлгӧн. Ол ӧйдӧ ол канча јылдыҥ туркунына орус јуунда иштеген. А 2006 јылда дезе Надя деп сыйынды алган. Ӱйи ого Бет-Элдеги ишке кожулган. Олор экӱ озо португальский јуунда иштеген, а кийнинде 10 јылдаҥ ажыра испанский јуунда иштеген. Оноҥ оны, служебный отделде узак иштеген кийнинеҥ, Ӱредӱ учун каруулу комитеттиҥ бюрозына, а кийнинде Служебный комитеттиҥ бюрозына кӧстӧгӧн. А 2022 јылдыҥ тулаан айында ол Башкару јӧптӧ Служебный комитеттиҥ болушчызы болуп калган.

Уиндер ака Маррие́та деп калада чыдаган (Калифорния штат, США). Ол Иегованыҥ Керечилериниҥ  билезинде ӧскӧн. 1986 јылда, тулаан айдыҥ 29 кӱнинде сууга чӧҥӱрилген. Сууга чӧҥӱрилген кийнинеҥ бир ай ӧдӧ берерде, ол подсобный пионер болуп иштеп баштаган. Бу иш ого сӱреен јараган, оныҥ учун ол оны артыргыспас деп сананды. Оноҥ, тоолу айдаҥ, 1986 јылдыҥ ӱлӱрген айдыҥ баштапкы кӱнинеҥ ала текши пионердиҥ ижин баштаган.

Джеффри јаанап келеле, кожо чыккан эки аказына айылдап јӱрген. Олор ол тушта Бет-Элде иштеген. Бу јол-јорыктыҥ кийнинеҥ Джеффри база Бет-Элде иштеерге кӱӱнзей берген. Оныҥ учун ол јаажы једе ле берзе, заявление бичип ийерге шӱӱп алган. Анайып, 1990 јылда, кӱӱк айда оны Уолкиллдеги Бет-Элдӧӧн кычырып јадылар.

Ондо Уиндер ака арутаар отделде, фермада ла Бет-Элдиҥ бюрозында иштеген. Оноҥ 1997 јылда ол А́нджела деп сыйынды алган, оноҥ ло бери олор экӱ Бет-Элде иштеп јат. А 2014 јылда олорды Уорвиктӧӧн кӧчӱрип ийген, ондо Уиндер ака телекейлик тӧс башкаруныҥ тураларын тударга болушкан. Је 2016 јылда олор Паттерсондо Каруулчы шибеениҥ Ӱредӱ ӧткӱрер центрына кӧчкӧн, ондо бистиҥ ака аудио ло видео записьтер эдер отделде иштеген. Тӧрт јыл ӧдӧ берерде, олор ойто Уорвиктӧӧн келген. Уиндер ака ондо Комитет по кадрамныҥ бюрозында иштеген. А 2022 јылдыҥ тулаан айында ол Башкару јӧптӧ Комитет по кадрамныҥ болушчызы эдип кӧстӧлгӧн.

Бис Иегова Кудайыска бу улус учун јаан быйанду болодыс, олор Кудайдыҥ сыйы болот. Каандыктыҥ ижин јӧмӧп, албаданып иштеп турганы учун Иегова олорды артыгынча алказын деп мӱргӱп јадыс (Эф. 4:8).