1, 2. Иегова јабарладып турарда кандый сезимдерлӱ болгонын оҥдоорго кандый тем болужат?

 СӰӰГЕН кижигер слер керегинде коркышту јаман немелер айдып турган деп сананып ийзеер де. Слер оны тӧгӱн деп билереер, је кезик улус ого бӱдӱп јат. Керек дезе олор бу тӧгӱнди улуска оноҥ ары куучындап турарда, улус оны чын деп бодойдылар. Мындый ӧйдӧ слерде кандый сезимдер болор? Слер улусла эптӱ-јӧптӱ, амыр јӱрерге турган болзоор, мындый тӧгӱнди угарга слерге коркышту јаман болор эди (Укаа 22:1).

² Бу тем биске Иегованыҥ сезимдерин оҥдоорго болужат. Качан оныҥ кӧгӱс уулдарыныҥ бирӱзи Иегова керегинде тӧгӱн неме айдып ийерде, баштапкы кижи, Ева, бӱде берген. Мынаҥ улам Адам ла Ева Иеговага удура тӱймеен кӧдӱрген, а улус кинчектӱ ле ӧлӱмдӱ болуп калган (Баш. 3:1—6; Рим. 5:12). Бӱгӱнги кӱнде болуп турган кӱчтер — ӧлӱм, јуу-согуш, кыйын-шыра — Сатананыҥ Эдем садта айткан тӧгӱнинеҥ улам болуп јат. Иеговага бойы керегинде бу тӧгӱнди угарга ла эмдиги болуп турган кӱчтерди кӧрӧргӧ не аайлу ачу дезеер? Је андый да болзо, ол ачынбай јат, јаман санаалар да тутпай јат. Агару Бичикте айдылганыла, ол «ырысту Кудай» (1 Тим. 1:11, ЈТ).

3. Биске кандый кӱндӱ эдилген?

³ Биске Кудайдыҥ адын Сатананыҥ јабарлажынаҥ арутайтан кӱндӱ эдилген. Оныҥ учун «Иегованыҥ адын мактагар» деген јакаруны бӱдӱрип јӱректер (Сар. 113:1). А мыны эдерге, улуска Кудай керегинде чындыкты куучындаар керек. Слерде андый кӱӱн бар ба? Бу јӧрмӧлдӧ Кудайыстыҥ агару адын мактаарга кӱӱнзедетен ӱч шылтак кӧрӱп ийерис.

 КУДАЙДЫҤ АДЫН МАКТАП ТУРЗААС, ОНЫ СӰӰНДИРЕДИС

4. Нениҥ учун Иегова, бис оны мактап турзаас, сӱӱнип јат? Тем куучындап беригер. (Јурукты база кӧрӱгер.)

⁴ Бис теҥеридеги Адабысты мактап турзаас, ол сӱӱнип јат (Сар. 119:108). Је толо кемдӱ эмес улуска кӧрӧ Иегова, Кӱчтӱдеҥ Кӱчтӱ Кудай, бистиҥ мактаганыс ла сӱӱжис јогынаҥ да сӱӱнип јӱрер аргалу. Мыны оҥдоорго, тем кӧрӱп ийектер. Кичинек кызычак адазына јӱгӱрип келеле, оны кучактап: «Ада, сен эҥ ле јакшы!» — деп айдарда, адазы сӱӱнип, јӱрексирей берет. Нениҥ учун? Адазы кызыныҥ јӱк быйанын ла сӱӱжин кӧрӱп ийгенинеҥ улам ба? Јок! Кызы оны мактабаза да, ол канайып та калбас. Је ол билер, кызы јаанап келзе, бу кылык-јаҥдар ого ырысту јӱрерге болужар. Бот нениҥ учун бистиҥ теҥеридеги Адабыс, бис оны мактап турзаас, сӱӱнип јат.

5. Кудайдыҥ адын мактап турзаас, кандый сӧстӧрдиҥ тӧгӱнин кӧргӱзедис?

⁵ Бис теҥеридеги Адабыстыҥ адын мактап турзаас, Сатананыҥ айтканы тӧгӱн деп кӧргӱзип јадыс. Оныҥ айтканыла болзо, кижи Кудайга јакшы неме аларга ла болуп иштеп турган (Иов 1:9—11; 2:4). Је Иов Кудайга чындык артып, Сатананы тӧгӱнчи деп кӧргӱскен. А бис нени эдер аргалу? Бис оныҥ адын корулаарыс ла Кудайды сӱӱндирерге, ого чындык артарыс (Укаа 27:11). Иегованыҥ адын корулаары биске кажыбыска ла јарап јат!

6. Бис Давидтеҥ ле левиттердеҥ неге ӱренедис? (Неемия 9:5).

⁶ Иегованы сӱӱп турган улус оныҥ адын акту јӱрегинеҥ мактаарга кӱӱнзейт. Темдектезе, Давид каан: «Иегованы акту кӱӱнимнеҥ мактаарым! Мениҥ бастыра эди-каным оныҥ агару адын мактазын» — деп кожоҥдогон (Сар. 103:1). Давид Иегованыҥ адын мактаганы — Кудайды бойын мактаганы — деп оҥдоп турган болгон. Качан бис Иегованыҥ адын угуп ийзеес, санаагыста капшай ла оныҥ сӱреен јараш кылык-јаҥдары ла коркышту кайкамчылу керектери јуралат. Давид теҥеридеги Адазыныҥ адын сӱреен тыҥ баалаган ла оны акту јӱрегинеҥ мактаарга кӱӱнзеген. Бу јанынаҥ темди биске левиттер база кӧргӱскен. Олор Кудайга тоомјызын кӧргӱзип, оныҥ агару адын мактаарга сӧс тӧ јетпес деп айткандар. (Неемия 9:5 кычырыгар.) Чын ла, бис теҥеридеги Адабысты тооп,  оныҥ адын мактап турзаас, оныҥ јӱрегин сӱӱндиредис.

7. Бис Иегованы јарлаар ижисле, анайда ок јӱрӱмисле канайып мактаар аргалу?

⁷ Иегова керегинде куучыныс јылу, быйанду, сӱӱжисти кӧргӱзип турган болзо, Кудайысты сӱӱндирип јадыс. Јарлаар иштиҥ эҥ ле јаан амадузы — улусты Кудайга јууктадары деп ундыбай јадыс (Иак. 4:8). Бис улусты Иеговага бис ле чилеп јуук болзын деп кӱӱнзеп јадыс. Биске Агару Бичиктеҥ Иегованыҥ сӱӱжин, справедливый болгонын, ойгорын, ийде-кӱчин ле оноҥ до ӧскӧ кылык-јаҥдарын улуска кӧргӱзерге сӱреен јарап јат. Анайда ок кажы ла кӱн Иегованыҥ темиле јӱрӱп турзаас, Кудайысты сӱӱндирип јадыс (Эф. 5:1). Мынаҥ улам улус бисти бу телекейдеҥ башка болгонысты кӧрӱп, шылтагын билерге сураар болор (Матф. 5:14—16). Ол тушта бисте олорго бу суракты јартап беретен арга ачылар. Анайып акту јӱректӱ улус Иеговага најы болуп калар. Бис јарлаар ижисле, кылык-јаҥысла Иегованы мактап турзаас, Кудайыс сӱӱнер (1 Тим. 2:3, 4).

КУДАЙДЫҤ АДЫН МАКТАП ТУРЗААС, ИИСУСТЫ СӰӰНДИРЕДИС

8. Иегованы мактаары јанынаҥ эҥ јакшы темди Иисус кӧргӱскен деп нениҥ учун айдарга јараар?

⁸ Теҥериде де, јерде де Иисустаҥ јакшы Иегованы кем де билбес (Матф. 11:27). Иисус Адазын сӱӱп турган, оныҥ учун оныҥ адын канай мактаарыныҥ темин кӧргӱзип салган (Иоанн 14:31). Божоордоҥ бир кӱн озо эҥирде, Иисус јердеги ижи керегинде мындый сӧстӧр айткан: «Мен олорго адыҥды ачтым» (Иоанн 17:26). Бу сӧстӧр нени темдектейт?

9. Биске теҥеридеги Адабысты оноҥ јакшы билип аларга, Иисус кандый укаа сӧс куучындаган?

⁹ Иисустыҥ ӱреткен ӱренчиктери, еврейлер, Кудайдыҥ ады — Иегова деп билетен болгон. Оныҥ учун Иисус, јаҥыс ла, Кудайдыҥ ады — Иегова деп куучындаган эмес, је улуска Кудай керегинде билгирин кӧптӧдӧргӧ болушкан (Иоанн 1:17, 18). Темдектезе, Еврей Бичимелдерде Иегова јалакай ла килеҥкей Кудай деп кӧргӱзилет (Чыг. 34:5—7). Мыны јартаарга, Иисус тенибер уул ла оныҥ адазы керегинде укаа сӧсти куучындаган. Анда адазы јастыразын алынган уулын кӧрӧлӧ, удура јӱгӱрип, оны кучактап, акту јӱрегинеҥ јаманын таштаганы айдылат. Бу учуралды кычырган улус Кудайдыҥ килеҥкейин ле јалакайын кӧрӱп јат (Лука 15:11—32). Анайып, Иисус Иегованыҥ чыннаҥ ла кандый болгонын кӧргӱскен.

10. а) Иисус Адазына адыла баштанган деп ле улусты да анайып ӱреткен деп бис кайдаҥ билерис? (Марк 5:19). (Јурукты база кӧрӱгер.) б) Иисус бисти бӱгӱнги кӱнде нени этсин деп кӱӱнзейт?

¹⁰ Иисус улусты Кудайдыҥ адын адап турзын деп кӱӱнзеген бе? Кӱӱнзеген эмей! Ол ӧйдиҥ кудай јаҥныҥ башчылары Кудайдыҥ ады сӱрекей агару, оныҥ учун оныҥ адын айтпас керек деп ӱредип туратан. Је Иисус андый немени бир де јаратпайтан. Оныҥ ӱреткениле болзо, оныҥ теҥеридеги Адазыныҥ адын мактаарга, улустыҥ чӱм-јаҥдары буудак болбос учурлу. Бир катап Герас деген јерде, кӧрмӧстӧр кирип калган бир эр кижини Иисустыҥ јасканын эске алынып ийзеер де. Улус мыны кӧрӧлӧ, Иисустаҥ коркып, оны кедери јӱрзин деп сурагандар (Марк 5:16, 17). Иисус  олордыҥ айтканыла јӱре берген де болзо, бу улусты Иегованыҥ адын база билзин деп кӱӱнзеген. Оныҥ учун ол кӧрмӧстӧрдӧҥ јайымдалган эр кижини бу керегинде јууктарына куучындазын деп айткан. Је јаҥыс, ого мындый кайкалды Иисус эткен эмес, је Иегова эткен деп айдар керек болгон. (Марк 5:19 a кычырыгар.) Анайып ла бӱгӱнги кӱнде Иисус улусты Кудайдыҥ адын билзин деп кӱӱнзеп јат (Матф. 24:14; 28:19, 20). Оныҥ учун јарлап јӱреле, Кудайдыҥ адын адап турзаас, бистиҥ Каанысты, Иисусты, сӱӱндиредис.

11. Иисус ӱренчиктерин не керегинде мӱргӱӱрге ӱреткен ле нениҥ учун? (Иезекииль 36:23).

¹¹ Иисус Адазыныҥ бойыныҥ адын агарулаарга ла кандый ла јамандаштаҥ арутаарга турганын билер болгон. Оныҥ учун бойыныҥ ӱренчиктерин: «Теҥеридеги Адабыс! Улус сениҥ адыҥды тооп јӱрзин» — деп мӱргӱӱрге ӱреткен (Матф. 6:9). Иисус Иегованыҥ адын агарулаары — эҥ јаан сурак деп ле бу сурак кажы ла јайаанныҥ алдына ачык турат деп билер болгон. (Иезекииль 36:23 кычырыгар.) Кудайдыҥ адын Иисустаҥ ӧскӧ ангелдердеҥ де, кижидеҥ де кемизи де кӧп агарулабаган. Андый болзо, улус Иисусты нениҥ учун бурулаган? Бурулаачылардыҥ санаазыла болзо, Иисус Адазыныҥ агару адын јабарлаган. Је ол Адазын канайып јабарлайтан эмеш?! Иисус мыны јаан кинчек деп билген эмей. Байла, мыныҥ да учун Иисус арестке алдыртардаҥ озо «коркышту тыҥ санааркаган» (ЈТ) (Лука 22:41—44).

12. Иисусты Адазыныҥ адын агарулаган деп нениҥ учун айдарга јараар?

¹² Иисус Адазыныҥ адын агарулаарга, коркышту тыҥ шыралаган, јамандаткан ла јабарлаткан. Је ол Адазына сӧсуккур болгон ло оныҥ уйады ару болгон (Евр. 12:2). Анайда ок ого Сатана табару эдет деп билер болгон (Лука 22:2—4; 23:33, 34). Сатана Иисусты Кудайдаҥ јана болор деп иженген де болзо, оныҥ санаазы бӱтпеди. Иисус Сатананы тӧгӱнчи деп ле Иегованыҥ  ишчилери коркышту кӱч ченелтелерде де ого чындык артар аргалу деп кӧргӱскен.

13. Слер Иисус Каанды канайып сӱӱндирер аргалу?

¹³ А слер башкарып турган Иисус Каанысты сӱӱндирерге кӱӱнзейдеер бе? Андый болзо, улусты Иеговала таныштырып, оныҥ агару адын оноҥ ло ары мактагар. Бу слерди Иисустыҥ јолыла барып турганаарды кӧргӱзер (1 Пётр 2:21). Анайып, Иегованы сӱӱндиредеер ле оныҥ ӧштӱзин — Сатананы — тӧгӱнчи деп кӧргӱзедеер.

КУДАЙДЫҤ АДЫН МАКТАП ТУРЗААС, УЛУСТЫ АРГАДААРГА БОЛУЖАДЫС

14, 15. Улусты Иегова керегинде чындыкка ӱредип турзаас, не болуп јат?

¹⁴ Кудайдыҥ адын мактап турзаас, улусты аргадаарга болужадыс. Нениҥ учун мынайып айдарга јараар? Бис Сатананы улустыҥ «сагыжын сокорткон» деп билерис (2 Кор. 4:4). Мынаҥ улам улус Кудай јок, Кудай улусты сӱӱбей турган ла кинчектӱлерди кыйнап турган деп тӧгӱнге бӱткӱлеп баштаган. А бу тӧгӱнниҥ амадузы — улуста Кудайды билетен кӱӱн болбозын деп, оныҥ адын јабарлап салары. Је бистиҥ эдип турган ижис Сатананыҥ санааларын бузып јат. Бис Кудайдыҥ адын мактап, Адабыс керегинде улусты чындыкка ӱредедис. Бу кандый једим экелет?

¹⁵ Кудайдыҥ Сӧзиндеги чындык сӱреен јаан ийделӱ. Бис улуска Кудай ол кем андый деп ӱредип турзаас, сӱреен кайкамчылу неме болот. Сатананыҥ тӧгӱни ачыла берзе, улус Кудайдыҥ сӱреен јараш кылык-јаҥдарын кӧрӱп баштайт. Оныҥ сӱреен јаан ийде-кӱчин кӧрӧт (Иса. 40:26). Кудай качан да јаман неме этпей турган деп оҥдоп алат (Јаҥ. т. 32:4). Ойгор болорго ӱренет (Иса. 55:9; Рим. 11:33). Анайда ок Иегованы сӱӱштиҥ Кудайы деп билип алат (1 Иоанн 4:8). Бу билгирлердеҥ улам улус ӱргӱлји јӱрӱмге иженип баштайт. Айдарда, Кудайга болужары ла улуска Кудайла јуук најылажарга болужары — сӱреен јаан кӱндӱ! (1 Кор. 3:5, 9).

16. Кудайдыҥ адын билип алганы кандый туза јетирет? Учуралдар куучындап беригер.

 ¹⁶ Бис баштап тарый улуска Кудайдыҥ ады — Иегова деп айдар аргалу. Бу да, чындыкла јилбиркеп турган улустыҥ јӱрегин томултып јат. Темдектезе, христиан эмес биледе чыдаган Али́я b деп јиит ӱй кижиниҥ учуралын кӧрӱп ийектер. Ол јӱрӱп турган кудай јаҥында бойын керек јок деп сезип туратан ла Кудай ого ыраак деп билдиретен. Је Агару Бичикти Иегованыҥ Керечилериле ӱренип баштаарда, оныҥ кӧрӱми солынган. Али́я Кудайды најы деп кӧрӱп баштаган. Кудайдыҥ адын кӧп Агару Бичиктердеҥ јоголтып, титулдарга, темдектезе, Кайракан деп титулга солып салганы, оны коркышту тыҥ кайкаткан. Кудайдыҥ адын билип алганы Алияныҥ јӱрӱмин коркышту тыҥ солыган. Ол керек дезе мынайда кыйгырып ийген: «Эҥ ле јакшы Најымда ат бар турбай!» Мынаҥ улам не болгон? Ол куучындаган: «Бу чындыктаҥ улам јӱрегим амырла толо берген. Кудайдыҥ адын билери не аайлу јакшы!» А эмди дезе Стив деген кижиниҥ учуралы. Ол еврей биледе чыдаган, је андый да болзо, кандый да кудай јаҥга кирерге кӱӱнзебеген, нениҥ учун дезе кӧп кудай јаҥдардаҥ тӧгӱнди кӧргӧн. Ого дезе кӱӱ јарап туратан. Је энези божоп каларда, јаан удабай ол Иегованыҥ Керечизи ӧткӱрген ӱредӱде болуп ийерге јӧпсинген. Бу ӱредӱде Кудайдыҥ ады Иегова деп билип алганы оныҥ јӱрегин коркышту тыҥ томулткан. «Мен мынаҥ озо Кудайда ат бар деп билбегем» — деп, ол куучындаган. Стив оноҥ ары айдат: «Јӱрӱмимде баштапкы ла катап Кудай чын ла бар деп оҥдоп ийгем. Мен Најы таап алгам!»

17. Слер Иегованыҥ адын нениҥ учун оноҥ ло ары мактаарга кӱӱнзейдеер? (Јурукты база кӧрӱгер.)

¹⁷ Слер улуска јарлап турзаар эмезе ӱредӱ ӧткӱрип турзаар, Иегованыҥ агару ады керегинде куучындап турганаар ба? Анайда ок улуска Иегова ол кандый Кудай деп оҥдоп аларга болужып турганаар ба? Эйе болзо, слер Кудайдыҥ адын мактап јадыгар. Оныҥ учун улуска Кудайдыҥ сӱреен јараш кылык-јаҥдарын куучындап, Иегованыҥ агару адын оноҥ ло ары мактагар. Анайып слер олордыҥ јӱрӱмин аргадаараар, Иисус Христостыҥ, бистиҥ Кааныбыстыҥ, јолыла барараар. А эҥ ле керектӱзи — бисти сӱӱп турган Иегова Адабысты сӱӱндиререер. Айдарда, «[оныҥ] адын јажын-чакка мактап» јӱректер! (Сар. 145:2).