1. Биске нениҥ учун јолды јакшы билер Иегова Кудайыстыҥ кийнинеҥ барар керек?

 СЛЕР койу агаштарлу аралда азып калганаар деп сананып ийзеер де. Слерди айландыра јерлик аҥдар, коронду курт-коҥыстар ла оҥкок-јиҥкек јерлер. Је јанаарда јеткерлӱ јолды канайып ӧдӧрин билер ченемелдӱ кижи болзо, слер ого не аайлу быйанду болор эдеер. Бу телекей коркымчылу аралга тӱҥей болот. Ол бистиҥ кӧгӱзиске каршузын јетирердеҥ маат јок. Је бистиҥ јаныста толо кемдӱ Иегова Кудайыс бар. Ол бисти једетен јерге — јаҥы телекейдеги ӱргӱлји јӱрӱмге — кандый ла јеткердеҥ корулап, башкарту берип, апарып јат.

2. Иегова бисти канайып башкарат?

² Иегова бисти канайып башкарып јат? Озо ло баштап, бойыныҥ Сӧзи, Агару Бичик, ажыра башкарат. Анайда ок улусты тузаланат, темдектезе, «бӱдӱмјилӱ ле керсӱ кулды». Бу кулдыҥ берип турган кӧгӱс курсагы биске ойгор болорго болужат (Матф. 24:45). Анайда ок Иегова башкарар аргалу ӧскӧ дӧ эр улусты тузаланат, темдектезе, аймак кӧрӧӧчилерди ле јербойындагы аксагалдарды. Олор бистиҥ кӱӱнисти кӧдӱрет ле кӱчтеристи ӧдӧргӧ болужып турган башкартулар берип јат. Бу башкартуларды бӱдӱрип турзаас, Иеговала колбуларыс тыҥып јат ла ӱргӱлји јӱрӱмге апарып јаткан јолдо бек турадыс. Калју телекейдиҥ калганчы кӱндеринде берилип турган башкарту учун бис сӱреен јаан быйанду болодыс.

3. Бу јӧрмӧлдӧ нени шӱӱжерис?

³ Андый да болзо, биске кезикте Иегованыҥ башкартузына  багынарга, анчада ла толо кемдӱ эмес улуска багынарга, јеҥил эмес болордоҥ айабас. Нениҥ учун дезе берилген јакару ичиске кирбей калат ол эмезе Иегова болгон болзо, андый башкарту бербес эди деп сананар болорыс. Андый ӧйдӧ башкартуны шак ла Иегова берди деп ле ол биске бойыска ла тузалу деп ундыбай турактар. Је башкарту Иегованаҥ болды деп бӱдӱп турарга, ӱч сурак кӧрӱп ийектер: 1) Иегова библиялык ӧйлӧрдӧ албатызын канайып башкарган? 2) Бӱгӱн бисти канайып башкарып турган? 3) Иегованыҥ башкартуларына нениҥ учун сӧсуккур болор керек?

ИЕГОВА ИЗРАИЛЬ АЛБАТЫНЫ КАНАЙЫП БАШКАРГАН?

4, 5. Иегова албатызын Моисей ажыра башкарып турганын канайып кӧргӱскен? (Кадарындагы јурукты кӧрӱгер.)

⁴ Иегова израильтяндарды Египеттеҥ чыгарарга, Моисейди кӧстӧгӧн. Кудай чыннаҥ ла Моисей ажыра башкарып турганын кӧскӧ кӧрӱнер немелер ажыра кӧргӱскен. Темдектезе, израильтяндар тӱште булуттый столмоны, а тӱнде оттый столмоны кӧргӧн (Чыг. 13:21). Моисей столмоныҥ кийнинеҥ израильтяндарды ээчидип, Кызыл талайдыҥ јаказына келген. Ол ӧйдӧ албаты чакпыга тӱжӱп калдыс деп бододы, нениҥ учун дезе алдында талай, кийни јанында Египеттиҥ черӱзи сӱрӱжип келип јаткан. Албаты коркышту тыҥ чуркурап, Моисейди: «Сен јастырдыҥ!» — деп айдышкан. Је мында бир де јастыра неме јок, нениҥ учун дезе ары албатыны Иегова бойы экелген (Чыг. 14:2). Оноҥ дезе Кудай израильтяндарды кайкал эдип, аргадап алган (Чыг. 14:26—28).

⁵ Моисей Иегованы бойыныҥ албатызын чӧл јерде, 40 јылдыҥ туркунына булуттый столмоныҥ болужыла башкарган деп бир де алаҥзыбаган a. Кандый да ӧйдӧ бу столмо Моисейдиҥ байканыныҥ ӱстинде турган, оныҥ учун оны ончо израильтяндар кӧрӱп туратан (Чыг. 33:7, 9, 10). Иегова Моисейле бу столмо ажыра куучындашкан, оноҥ ол албатыга Иегованыҥ башкартузын јетирип туратан (Сар. 99:7). Анайып, израильтяндар Иегова башкартуларды Моисей ажыра берген деп јарт кӧргӧн.

6. Израильтяндар Иегованыҥ башкартузына багынган ба? (Тоолор 14:2, 10, 11).

⁶ Је израильтяндардыҥ кӧп сабазы Кудай албатызын Моисей ажыра башкарган деп бӱтпеген. (Тоолор 14:2, 10, 11 кычырыгар.) Оныҥ учун Иегова ол ӱйени Ханаан јерге кийдирбеген (Тоол. 14:30).

7. Иегованыҥ башкартузына кемдер багынып јӱрген? (Тоолор 14:24). (Јурукты база кӧрӱгер.)

⁷ Је кезик израильтяндар Иегованыҥ башкартузына багынып јӱрген. Темдектезе, Кудай айткан: «Халев... меге акту јӱрегинеҥ багынып јӱрген». (Тоолор 14:24 кычырыгар.) Иегова оны алкап, керек дезе ого Ханаан јердеҥ јадатан јер талдап алар арга берген (Иис. Н. 14:12—14). Израильтяндардыҥ оноҥ арыгы угы база Иегованыҥ башкартузыла јӱргендер. Иисус Навин олорго башчы болордо, олор «оны Моисейди ле чилеп божоордыҥ божогончо тоогон» (Иис. Н. 4:14). Оныҥ учун Иегова олорды алкап, берер болгон јерди берген (Иис. Н. 21:43, 44).

8. Каандардыҥ ӧйинде Иегова албатызын канайып башкарган? Јартап беригер. (Јурукты база кӧрӱгер.)

⁸ Кийнинде Иегова бойыныҥ албатызын башкарарга, јаргычылар кӧстӧгӧн. Оноҥ, каандардыҥ ӧйинде, Кудай албатызын судурчылар ажыра башкарган. Чындык каандар судурчылардыҥ сӧзин  угуп туратан. Темдектезе, Давид каан судурчы Нафанныҥ айткан сӧзин јобош болуп, алынып туратан (2 Сам. 12:7, 13; 1 Лет. 17:3, 4). Иосафат каан дезе Яхазиилдиҥ айткан сӧзин угуп, Иудей албатыны судурчыларды уксын деп кӱӱнзеткен (2 Лет. 20:14, 15, 20). А Езекия каан кӱч айалгада боло берерде, судурчы Исайяга баштанып, болуш сураган (Иса. 37:1—6). Каандар Иегованыҥ башкартузын бӱдӱрип турза, Иегова бойыныҥ албатызын алкап, корулап туратан (2 Лет. 20:29, 30; 32:22). Бастыра Израиль албатыга Иегова олорды судурчылар ажыра башкарып турган деп оҥдоп турар керек болгон. Је кӧп саба каандар ла олордыҥ болушчылары Иегованыҥ судурчыларыныҥ сӧзин укпай туратан (Иер. 35:12—15).

БАШТАПКЫ ХРИСТИАНДАРДЫ КАНАЙЫП БАШКАРГАН?

9. Баштапкы чакта Иегова христиандарды канайып башкарган? (Јурукты база кӧрӱгер.)

⁹ Бистиҥ эраныҥ баштапкы чагында Иегова христиан јуун тӧзӧгӧн. Кудай оны канайып башкарган? Ол јуунныҥ башчызы эдип, Иисусты тургускан (Эф. 5:23). Је Иисус башкартуны ӱренчиктериниҥ кажызына ла башка эдип эмес, а Иерусалимдеги апостолдор ло аксагалдар ажыра берген (Ап. ижи 15:1, 2). Анайда ок бастыра јуундарды башкарарга, аксагалдар кӧстӧлгӧн (1 Фес. 5:12; Титке 1:5).

10. а) Баштапкы чакта кӧп саба христиандар башкартуларды канайып алынган? (Апостолдордыҥ ижи 15:30, 31). б) Библиялык ӧйдӧ кезик улус Иегованыҥ кӧстӧгӧн улузын нениҥ учун јектеп туратан? ( «Кезик улус нениҥ учун бӱтпеген?» деген рамканы кӧрӱгер.)

¹⁰ Баштапкы чакта христиандар башкартуларды канайып алынган? Олордыҥ кӧп сабазы башкартуларды акту кӱӱнинеҥ бӱдӱрген. Темдектезе, ӱренчиктер Иерусалимдеги акалардыҥ чыгарган јӧбин кычырала, тыҥ сӱӱнгилеген. (Апостолдордыҥ ижи 15:30, 31, ЈТ кычырыгар.) А бӱгӱнги кӱнде Иегова бистерди канайып башкарат?

БӰГӰНГИ КӰНДЕ БИСТИ КАНАЙЫП БАШКАРАТ?

11. XIX чактыҥ учында ла XX чактыҥ бажында Иегова албатызын кӧп эмес улус ажыра канайып башкарган? Тем куучындап беригер.

¹¹ Бӱгӱнги кӱнде Иегова албатызын бойыныҥ Сӧзи ажыра ла јуунныҥ бажы,  Иисус ажыра, башкарат. Је Кудай бойыныҥ албатызын улус ажыра башкарып турган деп керелер бар ба? Бар. Темдектезе, XIX чактыҥ учында не болгонын кӧрӱп ийектер. Чарлз Тейз Расселл ле оныла кожо Агару Бичикти шиҥдеген улус 1914 јылды Кудайдыҥ Каандыгыныҥ аҥылу јылы болор деп оҥдоп ийген (Дан. 4:25, 26). Олор мыны канайып оҥдогон дезе, олор Агару Бичикти тереҥжиде шиҥдеп, анда бичилген судурларга бӱткен. Бу улусты чындыкты таап алзын деп, Иегова башкарган ба? Алаҥзу јогынаҥ «эйе» деп айдадыс. Чын ла, 1914 јылда болгон телекейдеги айалганы кӧрзӧӧс, Кудайдыҥ Каандыгы ол јылда башкарып баштаганын јарт кӧрӧдис. Нениҥ учун дезе ол јылда јердиҥ ӱстинде Баштапкы телекейлик јуу-согуш башталган, эпидемиялар, јерсилкиништер ле торо ӧйлӧр башталган (Лука 21:10, 11). Айдарда, Иегова бойыныҥ албатызына болужарга, Агару Бичикти акту јӱрегинеҥ шиҥдеген улусты тузаланган деп алаҥзу јок.

12, 13. Јарлайтан ла ӱредӱлер ӧткӱретен ишти тыҥыдарга, организация Экинчи телекейлик јуу-согуштыҥ ӧйинде нени эткен?

¹² Анайда ок Экинчи телекейлик јуу-согуштыҥ ӧйинде не болгонын кӧрӱп ийектер. Тӧс башкарудагы каруулу акалар Ачылта 17:8-теги судурды шиҥдеп ийеле, бу јуу-согуштыҥ кийнинде Армагеддон эмес, је кӧптӧдӧ јарлаар арга ачатан бир эмеш амыр-энчӱ ӧй болор деп оҥдоп ийгендер. Бу олорго саҥ башка деп билдирген де болзо, Иегованыҥ организациязы Каруулчы шибеениҥ Галаад деп библиялык колледжин b тӧзӧгӧн. Бу колледж миссионерлерди бастыра јердиҥ ӱстиле јарлаарга ла ӱредӱлер ӧткӱрерге белетеген. Олор бу колледжти божодоло, кӧстӧлгӧн јерлерге јуу-согуштыҥ да ӧйинде барып туратан. Анайда ок бӱдӱмјилӱ кул Теократиялык иштиҥ курсын c тӧзӧгӧн. Бу курста бастыра јуундардагы јарчылар ченемелдӱ јарчылар ла ӱредӱчилер болорго ӱредилет. Бу солынталар Кудайдыҥ албатызын келер ӧйдӧ болотон ишке белетеген.

¹³ Тӱӱкини кӧрзӧӧс, кӱч ӧйлӧрдӧ Иегова бойыныҥ албатызын башкарган деп,  јап-јарт кӧрӱнет. Экинчи телекейлик јуу-согуш токтой берерде, Иегованыҥ Керечилери кӧп-кӧп јерлерде јайым јарлап баштагандар. Оноҥ улам кӧп улус Иегова керегинде билип алган. Анайып, Каандык керегинде јар бӱгӱнги кӱнде бастыра јердиҥ ӱстинде јарлалат.

14. Иегованыҥ организациязыныҥ ла аксагалдардыҥ башкартузына бис нениҥ учун бӱдер аргалу? (Ачылта 2:1). (Јурукты база кӧрӱгер.)

¹⁴ Бӱгӱнги кӱнде Башкару јӧп оноҥ ло ары Христоско багынат. Оныҥ учун олордыҥ ака-эјелерге берип турган башкартулары Иегованыҥ ла Христостыҥ кӧрӱмине чике келижип турзын деп албаданат. А аймак кӧрӧӧчилер ле аксагалдар јуундарга башкартулар берет d. Майлаткан аксагалдар дезе — ол тоодо јуундардагы ончо аксагалдар — Христостыҥ «оҥ колында» болот. (Ачылта 2:1 кычырыгар.) Бу акалардыҥ кемизи де толо кеминде эмес, кезикте олор јастырып јат. Моисей де, Иисус Навин де, апостолдор до јастырып туратан (Тоол. 20:12; Иис. Н. 9:14, 15; Рим. 3:23). Је андый да болзо, Иисус бӱдӱмјилӱ кулды ла аксагалдарды тузаланып турган. Ол бу акалар ажыра «бу телекейдиҥ учы келгенче» бойыныҥ албатызын башкарар (Матф. 28:20, ЈТ). Оныҥ учун кӧстӧлгӧн акалардыҥ башкартуларына бӱтпес аргабыс јок.

ИЕГОВАНЫҤ БАШКАРТУЗЫНА НЕНИҤ УЧУН СӦСУККУР БОЛОР КЕРЕК?

15, 16. Иегованыҥ башкартузыла јӱрген улустаҥ слер неге ӱренедеер?

¹⁵ Иегованыҥ башкартуларын бӱдӱрип турзаас, туза аладыс. Темдектезе, Э́ндрю e ле Ро́уз эш-нӧкӧрлӧр јӱрӱмин јеҥилтерге, солынталар эткен. («Агару Бичиктиҥ ӱренетен чыгармазында» Матфей 6:22-ге берилген јартамалды кӧрӱгер.) Мынаҥ улам олор теократиялык туралар тударында турушкан. Роуз куучындайт: «Бис кезикте кичинек кыптарда јадып туратаныс, ондо курсак белетеер јер де болбойтон. Оноҥ меге фотолор согорго јарап јат. Качан фотокамераларымды ла объективтеримди садарга келижерде, мен тыҥ ыйлагам. Је мен Авраамныҥ ӱйи, Саррадый, болорго кӱӱнзегем. Оныҥ учун кийниндезин артыргызып, ичкери кӧрӧр деп бек шӱӱп алгам» (Евр. 11:15). Бу биле кандый алкыштар алган? Роуз мынайда куучындаган: «Бары-јогысты Иеговага берип турганыстаҥ јаан сӱӱнчи аладыс. Кудайдыҥ јакылталарын бӱдӱрип јӱреле, јаҥы телекейде јӱрӱм кандый болор деп карап, кӧрӱп ийгендий  билдирген». Эндрю дезе ӱйиле јӧпсинип, мынайда айткан: «Бис ырысту улус, нениҥ учун дезе ӧйисти ле кӱчисти Иеговага берип јадыс».

¹⁶ Иегованыҥ башкартузыла јӱргенинеҥ база кандый туза бар? Марси́я сыйын школды божодоло, текши пионер болорго кӱӱнзеген (Матф. 6:33; Рим. 12:11). Ол куучындайт: «Менде университетке акча тӧлӧбӧзинеҥ ӱренетен арга болгон. Је мен Иеговага эҥ артыгын берерге кӱӱнзегем, оныҥ учун јӱк курстар ӧткӧм. Эмди менде јакшы иш бар, бу иш меге Иеговага кӧп иштеерге болужат. Школды божодоло, мындый алтам эткеним јӱрӱмимде эҥ јакшы алтамдарымныҥ бирӱзи болот. Нениҥ учун дезе эптӱ иш табып алганымнаҥ улам мен Бет-Элдиҥ ижине болужадым ла Иеговага ӧскӧ дӧ кӧп иш эдип јадым. Анайда ок мен текши пионер болодым».

17. База нениҥ учун Иегованыҥ башкартузына сӧсуккур болор керек? (Исайя 48:17, 18).

¹⁷ Кезикте биске јӧптӧр берилет, је олор биске кору болот. Темдектезе, Иегованыҥ организациязы бисти акча-јӧӧжӧгӧ тартылбазын деп ле Кудайдыҥ јасагын бускадый керектер этпезин деп кӱӱнзедет. Бу јӧптӧрди угуп турзаас, бис ару уйатту артадыс, анайда ок керек јок санааркаштарга алдырбай јадыс (1 Тим. 6:9, 10). Анайып, бис Иеговага акту јӱректеҥ иштеер аргалу болодыс ла бу биске јаан сӱӱнчи ле амыр берет. (Исайя 48:17, 18 кычырыгар.)

18. Слер Иегованыҥ башкартузын бӱдӱрип турарга нениҥ учун бек шӱӱп алганаар?

¹⁸ Улу тӱбектиҥ де ӧйинде, бир муҥ јылга Христостыҥ башкаратан да ӧйинде Иегова башкартуны улус ажыра берер деп бир де алаҥзу јок (Сар. 45:16). Ол ӧйдӧ олордыҥ берген башкартуларын, ичиске кирбей де турза, бӱдӱрерис пе? Иеговага эмди ле сӧсуккур болуп турган болзоос, биске мыны эдерге јеҥил болор. Оныҥ учун Иегованыҥ башкартузына, ол тоодо кӧстӧлгӧн эр улус ажыра оныҥ берип турган башкартузына, јаантайын сӧсуккур болуп јӱректер (Иса. 32:1, 2; Евр. 13:17). Нениҥ учун дезе бисте јолды јакшы билер Иегова Кудайыска алаҥзыйтан шылтак бир де јок. Ол бисти кандый ла кӧгӱс каршудаҥ корулап, бистиҥ амадубыска — јаҥы телекейдеги ӱргӱлји јӱрӱмге — апарып јат.