Ровоамныҥ адызы, Соломон, Израильле 40 јылдыҥ туркунына башкарган (1 Каан. 11:42). Ровоам б. э. озо 997 јылда, адазы божогон кийнинде, Сихем деген калага барган. Ондо ол «каан эдип тургузылар» учурлу болгон (2 Лет. 10:1). Канайып сананып туругар, Ровоам адазындый ок ойгор каан болуп отурарга коркыган ба? Је кандый да болзо, ондо јаан удабай  ла кӱч ченелте болгон. Бу ченелте оны уур сурактардыҥ аайына чыгып болор бо деп кӧргӱзер эди.

Ровоам јеҥил эмес айалгага тӱшти. Ого израильтяндар келип, бойыныҥ сурагын айтты: «Сениҥ адаҥ мойныбыска уур јӱк салган, је сен бу уур јӱкти ле бӱдӱрип болбос ишти јеҥилтип салзаҥ, бис сеге иштеер эдис» (2 Лет. 10:3, 4).

Бу учуралда Ровоам тегин албатыныҥ јӱгин јеҥилтип ийзе, ого бойына, оныҥ билезине ле ишчилерине кирелтезин астадарга келижер эди. А јеҥилтпезе, албаты тӱймеп чыгар эди. Ровоам нени этти? Ол озо баштап, Соломонныҥ јӧптӧжип турган улузыла, аксагалдарла куучындашкан. Је оноҥ бойыла јажыт јииттерле јӧптӧшкӧн. Ровоам олордыҥ јӧбине кирип, оноҥ кату башкарарга сананган. Ол албатыга: «Мен јӱктиҥ ӱстине јӱк кожуп, јӱгеерди оноҥ уур эдерим. Адам слерди камчыла камчылаган, мен дезе слерди кадалгакту камчыла камчылаарым» — деп айткан (2 Лет. 10:6—14).

Бис мынаҥ неге ӱренерис? Јаан јашту кӧгӱзи тереҥ улустыҥ сӧзин укканы, ойгор болор эди. Нениҥ учун дезе олор кандый бир керектиҥ неге экелерин билип, јакшы јӧп берер аргалу (Иов 12:12).

Албаты Ровоамныҥ айтканын угала тӱймеп чыгарда, Ровоам тӱймеенди токтодорго, черӱ  јууган. Је Иегова бу ӧйдӧ судурчы Шемаия ажыра олорго мынайып айткан: «Слерге бойыгардыҥ карындаштарыгарла, Израильдиҥ уулдарыла, јуулажып барбас керек. Айлыгарга кайра јаныгар, нениҥ учун дезе бу ончо неме менеҥ болды» (1 Каан. 12:21—24) *.

Ровоамга Иегованыҥ тӱймеечилерле јуулажарга јарабас деген сӧзин угарга јеҥил болгон бо? Оныҥ улусты «кадалгакту камчыла» камчылаарым деп кезедип айткан сӧстӧриниҥ бӱтпей јатканын кӧрӱп, улус нени сананар эди? (2 Летопись 13:7 тӱҥдештиригер). Је андый да болзо, каан черӱзиле катай «Иегованыҥ сӧзин угуп, Иегованыҥ айтканыла айылдарына кайра јанган».

Бис бу учуралдаҥ неге ӱренедис? Улус биске каткырыжып та турза, бис Кудайды угар учурлу. Кудайга сӧсуккур болзоос, ол биске алкыжын јетирер (Јаҥ. т. 28:2).

Ровоам Кудайдыҥ сӧзин укканынаҥ улам, кандый алкыш алды? Оныҥ башкарузында Иуданыҥ ла Вениаминниҥ угы арткан. Ол јаҥы калалар тудуп, эскилерин «сӱреен бек эдип салган» (2 Лет. 11:5—12). Је эҥ учурлузы, Ровоам бир кезек ӧйгӧ Иегованыҥ јасагыла јӱрген. Израильдиҥ он уктаҥ турган каандыгын Иеровоам каан башкарып турарда, албаты чалуларга бажырган. Је олордыҥ кезиги «Ровоамга јӧмӧшкӧн», оныҥ учун чындык Кудайга бажырарга, Иерусалимдӧӧн келген (2 Лет. 11:16, 17). Анайдарда, Ровоам Кудайды угарда, оныҥ башкарузы тыҥыган.

Ровоам, башкарузы тыҥып каларда, Иегованыҥ јасагын укпай, тӧгӱн кудайларга бажырып баштаган. Нениҥ учун? Не дезе, ол аммонитян укту энезин уккан болор (1 Каан. 14:21). Је кандый да болзо, албаты оныҥ темиле барган. Оныҥ учун Иегова, Египеттиҥ кааны, Сусаким, Ровоамныҥ тыҥыдып салган калаларын јуулап турарда болушпаган (1 Каан. 14:22—24; 2 Лет. 12:1—4).

Сусаким Ровоам башкарып турган Иерусалим калага јууктап келерде, айалга оноҥ кӱч боло берген. Ол тушта Иегова Ровоамга ла оныҥ јайзаҥдарына судурчы Шемаия ажыра: «Слер мени артыргызып салараарда, мен де слерди артыргызып, Сусакимниҥ колына бергем» — деп айткан. Бу јарды угуп, Ровоам бойыныҥ бурузын алынган. Агару Бичикте мынайып айдылат: «Израильдиҥ јайзаҥдары ла кааны јобожып: „Иегова чындык“ — дешти». Оныҥ учун Иегова Ровоамды килеп, Иерусалимди корулап алган (2 Лет. 12:5—7, 12).

Мыныҥ кийнинде Ровоам тӱштӱк каандыкла оноҥ ары башкарган. Оныҥ ордына оныҥ уулы Авия каан болуп отурар учурлу болгон. Ол оныҥ учун Авияныҥ каан болор јаҥына оныҥ ака-карындаштарыныҥ кемизи де тӱймеен кӧдӱрбезин деп, божоор алдында уулдарына баалу сыйлар эткен (2 Лет. 11:21—23). Анайып, Ровоам алдындагызына кӧрӧ, канча кире ойгор болуп калган.

Ровоам кезикте јакшы да керектер эткен болзо, Кудайдыҥ јарадузын албаган. Агару Бичикте оныҥ башкарузы керегинде мынайда бичилген: «Ол јаманды эткен». Нениҥ учун дезе «оныҥ јӱрегинде Иегованы бедирейтен бек санаа болбогон» (2 Лет. 12:14).

Ровоамныҥ теми бисти неге ӱредет? Ол кезикте Кудайдыҥ башкарузын угуп, албатыга јакшы немелер эткен. Је ондо Иеговала јуук колбулар да, оны сӱӱндиретен тыҥ кӱӱн де болбогон. Учы-учында ол тӧгӱн кудайларга бажырып, Иеговага јарабай турган керектер эдип баштаган. «Ровоам Иегованы нениҥ учун уккан? Кинчегин акту кӱӱнинеҥ алынып, Кудайга јараарга кӱӱнзегенинеҥ улам ба эмезе улустыҥ айтканын бӱдӱрерге кӱӱнзегенинеҥ улам ба?» — деп, слер сананар болороор (2 Лет. 11:3, 4; 12:6). Је кандый да болзо, Ровоам такып  ла кинчек эдер болгон. Ол бойыныҥ карган адазынаҥ, Давид кааннаҥ, чек башка болгон. Давид база јастырып туратан, је ол Иегованы акту јӱрегинеҥ сӱӱген ле оныҥ чындык ишчизи болгон. Анайда ок ол бойыныҥ кинчектерин акту кӱӱнинеҥ алынган (1 Каан. 14:8; Сар. 51:1, 17; 63:1).

Ровоамныҥ јӱрӱми биске јаан ӱредӱ болот. Качан кижи бойыныҥ билезине ле ӧскӧ улуска болужып турза, сӱреен јакшы. Је Кудайдыҥ јарадузын аларга турган болзоос, бис озо ло баштап ого акту кӱӱнистеҥ иштеп, оныла колбуларысты тыҥыдар учурлу.

Кудайдыҥ јарадузын аларга, биске Иегованы тыҥ сӱӱр керек. Канайып отты ӧчӱрбеске, одын салар керек, анайып ла Кудайга сӱӱжис сообозын деп, улам сайын Оныҥ Сӧзин ӱренип, шӱӱп сананып, јаантайын мӱргӱп турар керек (Сар. 1:2; Рим. 12:12). Бу сӱӱш бисти Иегованы сӱӱндирерге кӱӱнзедер ле кинчек эткен тужыста, кинчегисти акту кӱӱнистеҥ алынарга кӱӱнзедер. Ол тушта бис, Ровоамга кӧрӧ, Иегованыҥ јолынаҥ качан да туура барбазыс (Иуда 20, 21).