1. Бис нениҥ учун сӱӱнедис?

БИС Иегованыҥ албатызыныҥ эрчимдӱ иштенип турганын кӧрӱп, оныҥ јаркыны бастыра јердиҥ ӱстине јаркындалып турганына сӱӱнип јадыс. Ӧткӧн јылда бис 10 миллионноҥ ажыра библиялык ӱредӱ ӧткӱргенис. Анайда ок Кайраканныҥ Эҥирине миллиондор тоолу улус келип, толынтыны Кудай сӱӱжинеҥ улам берген деп билип алган (1 Иоанн 4:9).

2, 3. а) Биске «јарыткыштар чылап» јаркындаларга, не буудак этпей јат? б) Бу јӧрмӧлдӧ кандый сурак шӱӱжилер?

² Иегованыҥ Керечилериниҥ ортозында кандый ла тилдӱ улус бар. Је бу, теҥеридеги Адабысты, Иегованы, мактаарга бир де буудак этпей јат (Ачыл. 7:9). Бис кандый да тилге куучындазаас, кайда да јадып турзаас, «телекейдеги јарыткыштар чылап», јаркындаладыс (Флп. 2:15).

³ Кудайдыҥ албатызыныҥ тоозын кӧптӧдӧрине, бирлигине ле сергелеҥ болорына јӧмӧшсӧӧс, Иегованы  макка чыгарарыс. Оныҥ учун бу јӧрмӧлдӧ мындый ӱч арганыҥ болужыла бис Кудайдыҥ адын канайып мактаарыс деп сурак шӱӱжилер. (Матфей 5:14—16 кычырыгар.)

4, 5. а) Бистиҥ јаркыныс јаркындалзын деп, јарлаар иштеҥ ӧскӧ база нени эдерге јараар? б) Улуска тоомјылу баштанганыс кандый тӱжӱм экелердеҥ айабас? (Јӧрмӧлдиҥ бажындагы јурукты кӧрӱгер.)

⁴ 1925 јылдыҥ кичӱ изӱ айдыҥ 1 кӱниниҥ «Каруулчы баканазында» «Свет, сияющий во тьме» деген јӧрмӧлинде мындый сӧстӧр бичилет: «Бу телекейге берилген кӱндерде, бистиҥ јаркыныс јаркындалбаза, Кайраканга чындык болор аргабыс јок». «Оноҥ ары ондо мынайып јарталган: јаркыныс јаркындалзын деп, јердеги ончо албатыларга сӱӱнчилӱ јарды куучындап, јаркынныҥ јолыла јӱрер керек». Бис сӱӱнчилӱ јарды јарлап, ӱренчиктер белетеп турзаас, бистиҥ јаркыныс улуска јарыдып јат (Матф. 28:19, 20). Је Иегованы бис кылык-јаҥысла да мактаар аргалу. Јарлаар иште туштап турган улус бистиҥ канайып тудунып турганысты кӧрӱп јат. Бис кӱлӱмзиренип, олорло јакшылажып турзаас, олор бис ле бистиҥ Кудайыс керегинде јакшы сананар.

⁵ Иисус ӱренчиктерине: «Ӱйге кирзегер оны уткыгар» — деп айткан (Матф. 10:12). Иисустыҥ ла оныҥ элчилериниҥ јарлап турган јеринде, улус таныш эмес кижини айылдӧӧн кычырып турар јаҥду болгон. Је бӱгӱнги кӱнде андый јаҥ кезик албатыда јок. Кӧп сабада улус айылыныҥ эжигинде таныш эмес улусты кӧргӧндӧ, кыртыштанып јат. Је бис улуска тоомјылу баштанып, неге керектӱ келгенисти јартап берзеес, кижи токунап, бисти угарга кӱӱнзеер болор. Акту кӱӱнистеҥ кӱлӱмзирензеес, јакшы куучын башталардаҥ айабас. Бу јӧптӧр кӧп улус јуулыжып турган јерлерде стендтӱ јарлап турган ака-эјелерге де тузалу болор. Улуска кӱлӱмзиренип, олорло јакшылажып турзагар, улус стендке базып келип, бичиктер алат, керек дезе бисле куучындажа да берет деп ајаруга алган болороор.

6. Англияда јадып турган јажы јаанап калган биле јарлаар ишке канайып кӧптӧдӧ иштеген?

⁶ Англияда јадып турган јажы јаанап калган бир билеге уйан су-кадыгынаҥ улам, айылдар сайын јарлаарга кӱч болот. Мынаҥ улам олор айылыныҥ јанында јарлаарга сананган. Олордыҥ јанында школ болгон. Оныҥ учун ада-энелер балдарын школдоҥ алар ӧйдӧ, айылыныҥ јанында стол тургузып, ого библиялык бичиктер салып јарлайт. Олордыҥ кезиги «Ответы на твои вопросы» деген бичикти ле кезик брошюраларды јилбиркеп алган. Бу билеге олордыҥ јуунынаҥ бир пионер эје кожулган. Балдардыҥ ада-энелери бу эјениҥ кӱӱнзек болгонын ла ол билениҥ улуска акту кӱӱнинеҥ болужарга турганын кӧргӧн, керек дезе олордыҥ бирӱзи Агару Бичикле ӱредӱ аларга јӧпсинген.

7. Слер качып келген улуска канайып болужар аргалу?

⁷ Калганчы јылдарда кӧп ороондордо качкындардыҥ (беженцы) тоозы кӧптӧгӧн. Олорго Иегова ла оныҥ амадузы керегинде куучындаарга, биске  нени эдерге јараар? Озо ло баштап, слердиҥ јерге качып келген улустыҥ тилине јакшылажарга ӱренип аларга јараар. Мында слерге тилдер ӱренерге болужып турган бистиҥ приложение болужар. Анайда ок, кижини јилбиркедерге, тоолу сӧстӧр ӱренип аларга јараар. Ол тушта интернеттеҥ олордыҥ тилине библиялык бичиктерди ле кӧрӱлмелерди канайып табатанын кӧргӱзип берер эдеер (Јаҥ. т. 10:19).

8, 9. а) Иштеер кӱндердеги туштажу незиле тузалу? б) Ада-энелер балдарына туштажуларга туружып турзын деп, канайып болужар аргалу?

⁸ Бис Иеговага «Јӱрӱмис ле ижибис» деген туштажу учун быйанду болодыс. Нениҥ учун дезе бу туштажу биске оноҥ јакшы јарлаарга болужат. Бу туштажуда берилип турган јӧптӧр, такып барарында ла Агару Бичикле ӱредӱлер ӧткӱреринде коркыбаска болужат.

⁹ Бистиҥ туштажуларга баштапкы катап келген улустыҥ кезиги балдардыҥ јартамалдарын јилбиркеп угат. Оныҥ учун, ада-энелер, балдарыгардыҥ јаркыны улуска јарытсын деп, олорды туштажуларда карууларды бойыныҥ сӧстӧриле берерине ӱредигер. Кезик улус балдардыҥ акту јӱрегинеҥ айткан карууларын угуп, чындыкты тапканын оҥдоп ийгилейт (1 Кор. 14:25).

10. Билегистиҥ бирлигин тыҥыдарга нени эдерге јараар?

¹⁰ Бис биледеги ле јуундагы бирлигисти тыҥыдып турзаас, бистиҥ  јаркыныс база јаркындалат. Оныҥ учун ада-энелер билелик бажырышты јаантайын ӧткӱрер учурлу. Кӧп билелерге билелик бажырыштыҥ ӧйинде бистиҥ интернет-телевидениеде ай сайын чыгып турган программаларды кӧрӧргӧ јарап јат. Программаны кӧргӧн кийнинде, олор билип алганын шӱӱжип јадылар. Је кичинек балдардыҥ ла эмеш јаанап калган балдардыҥ керексиништери башка болот деп, ундыбай туругар. Оныҥ учун билелик бажырышта шӱӱжилетен материал ӱзезине тузалу болзын деп белетегер (Сар. 148:12, 13).

11—13. Бис јуунныҥ бирлигин тыҥыдарга, нени эдер аргалу?

¹¹ Јииттер, слер јуунныҥ бирлигин тыҥыдып, улуска бойын керектӱ деп сезерине канайып болужар аргалу? Темдектезе, јажы јаанап калган ака-эјелерге ајару эдип туругар. Олор канча јылдардыҥ туркунына Иеговага канайып чындык артканын сурап угугар. Мындый куучын слердиҥ кӱӱнигерди кӧдӱрип, слерге де, олорго до Иегованы оноҥ ло ары мактаарга болужар болор. Анайда ок, бистиҥ кажыбыс ла Каандыктыҥ Туразына баштапкы катап туштажуга келген улусты уткыыр аргалу. Олорго кӱлӱмзиренип, бош јер табып аларга болужыгар ла ака-эјелерле таныштырыгар. Олор бойлорын айылда чылап сезип турзын.

¹² Слерди јарлаар иштиҥ туштажуларын ӧткӱрерге кӧстӧгӧн болзо, слер јажы јаанаган ака-эјелерге јарлаар ишке туружарга болужар аргалу. Олордо јарлаарга јеҥил участок бар ба? Јарлаар ишке кезикте олорды јиит акала эмезе эјеле ийерге јараар. Анайып јииттер олорго јарлайтан јерине једип, ойто кайра келерге болужар эди. Анайда ок, уйан су-кадыгынаҥ ла кандый бир айалганаҥ улам кӧп јарлап болбой турган јарчыларды база оҥдоор керек. Слер ака-эјелердиҥ айалгаларын ајаруга алып турзагар, јииттер де, јажы јаанагандар да, ченемелдӱ де, јаҥы јарлап баштаган да јарчылар сӱӱнчилӱ јарды јарлаарына эрчимдӱ туружар (Лев. 19:32).

¹³ Израильтяндар Иеговага кожо бажырарга сӱӱнер болгон. Сарнаачы мынайып бичиген: «Ака-эјелерле бирлик јӱргени кандый јакшы, кандый эптӱ!» (Сарын 133:1, 2 кычырыгар *.) Ол бирликти майлаарга тузаланып турган јараш јытту майга тӱҥдештирген. Анайып ла бистиҥ куучыныс ака-эјелердиҥ кӱӱнин кӧдӱрзин ле олорго сӱӱнчи экелзин деп кӱӱнзейдис. Оныҥ учун олорло јууктада таныжып алзаар, јуунныҥ бирлигин тыҥыдарыгар (2 Кор. 6:11—13). Је слер мынайып эдип турган болзогор, слерди мактап јадыс.

14. Айылдаш јаткан улуска библиялык чындыктыҥ јаркынын кӧрӧргӧ, бис канайып болужарыс?

¹⁴ Библиялык чындыктыҥ јаркынын кӧрӧргӧ, айылдаш јаткан улуска канайып болужар? Олор бу јаркынды бистиҥ јалакай сӧстӧристеҥ ле эткен керектеристеҥ кӧрӧр. Бойыгардаҥ сурагар: «Мен керегинде айылдаштарым нени сананат? Айылымныҥ ичи-тыштын  ару тудуп, јаткан јеримди ару тударына јӧмӧжӧдим бе? Айылдаштарыма болужадым ба?» Ака-эјелердиҥ јалакайы ла јакшы кылык-јаҥы тӧрӧӧндӧрине, айылдаштарына, кожо иштеп турган улузына эмезе школдо кожо ӱренип турган балдарына кандый тузазын јетиргенин сурап угугар. Олор јилбилӱ учуралдар куучындаар болор (Еф. 5:9).

15. Бис нениҥ учун сергелеҥ болор учурлу?

¹⁵ Бистиҥ јаркыныс оноҥ ло ары јаркындалзын деп турган болзоос, бис кандый ӧйдӧ јадып турганысты ундыбас учурлу. Иисус ӱренчиктерине: «Ойгу болыгар» — деп, јаҥыс катап айтпаган (Матф. 24:42; 25:13; 26:41). Бис «улу тӱбек, ЈТ» эм тургуза болбос деп сананып турзаас, јарлаарга тыҥ ла кӱӱнзебезис (Матф. 24:21). Мынаҥ улам бистиҥ јаркыныс јазап јаркындалбай барар, керек дезе чек ӧчӱп те калардаҥ айабас.

16, 17. Сергелеҥ болорго, нени эдерге јараар?

¹⁶ Телекейдеги айалга там ла кӱч болуп барат, оныҥ учун биске сергелеҥ  болор керек. Иегованыҥ кӱни чике тургузылган кӱнде келер деп, бис алаҥзыбай јадыс (Матф. 24:42—44). Бу ӧй келгелекте, келер ӧйдӧ не болорын ундыбай, чыдамкай болуп артыгар. Кажы ла кӱн Кудайдыҥ Сӧзин кычырып, «мӱргип, сергек болугар» (1 Петр 4:7). Иеговага узак јылдарга чындык иштеген христиандардаҥ тем алыгар. Мындый темдердиҥ бирӱзин «Видите ли вы руку Бога в своей жизни?» деген брошюраныҥ 14—17 бӱктериндеги «Решение, о котором он ни разу не пожалел» деген јӧрмӧлинеҥ кычырарга јараар.

¹⁷ Иеговага оноҥ ло ары эрчимдӱ иштегер. Улуска болужыгар ла ака-эјелерле ӧй ӧткӱрип туругар. Бу слерге кӧп сӱӱнчи экелер ле ӧйдиҥ ӧткӧнин де билбей каларыгар (Еф. 5:16). Иегованыҥ ишчилери ӧткӧн јӱс јылдыҥ туркунына кӧп иш бӱдӱрип, јаан једимдерге јединген. Је бӱгӱнги кӱнде эдетен иш оноҥ до кӧп, оны бӱдӱрерге, Иегова биске болужып ийер. Бистиҥ јаркыныс мынайып јаркындалар деп, бис билбегенис те!

18, 19. Иеговага эрчимдӱ иштеерге, аксагалдар биске канайып болужар аргалу? Тем куучындап беригер.

¹⁸ Бис толо кемдӱ эмес те болзоос, је Иегованы тӱҥей ле сӱӱндирер аргалу. Мыны билгенис бистиҥ бӱдеристи тыҥыдат. Иегова биске болужарга, «сый эдип берилген улусты» — аксагалдар берген. (Ефестегилерге 4:8 ЈТ; Ефестегилерге 4:11, 12 кычырыгар.) Оныҥ учун слерге аксагалдар келзе, олордыҥ айткан ойгор јӧптӧрин угугар, не дезе олордыҥ јӧптӧри качан да калас болбой јат.

¹⁹ Англияда болгон учуралды кӧрӱп ийеектер. Эки аксагал кӱчтер болуп турган бир билеге барып јӱрген. Ӱйи ӧбӧӧниниҥ Иеговага бажырарында бойына башкарту алынбай турганына комудаган. Ӧбӧӧни бойын јакшы ӱредӱчи эмес деп айдып, билелик бажырышты јаантайын ӧткӱрбей турганын куучындаган. Аксагалдар Иисус Христостыҥ темине ајару эткен. Иисус ӱренчиктерин кичееп, олордыҥ керексиништерин ајаруга алар болгон. Оныҥ учун акалар ӧбӧӧнин Иисуска тӱҥейлешсин деп, а ӱйин чыдамкай болзын деп кӱӱнзеткен. Анайда ок, олорго эки балазыла билелик бажырышты канайып ӧткӱретени јанынаҥ јӧптӧр берген (Еф. 5:21—29). Соондо аксагалдар бу аканы албаданып солынганы учун мактап, јеткен једимдерине токтобой, оноҥ ло ары албаданзын деп кӱӱнзеткен ле агару тын ого билениҥ бажы болотон молјузын јакшы бӱдӱрерге болужар деп айткан. Аксагалдардыҥ сӱӱжи ле јалакайы бу билеге јаан болужын јетирген.

20. Бистиҥ јаркыныс улуска јаркындалып турза, бис кандый једимдерге једерис?

²⁰ «Иегованаҥ коркып, оныҥ јолдорыла јӱрген кандый ла кижи ырысту» — деп, сарнаачы бичиген (Сар. 128:1). Слердиҥ јаркыныгар улуска јарыдып турган болзо, слер ырысту болорыгар. Оныҥ учун улуска Иегова керегинде куучындап туругар. Слердиҥ билегерде де, јууныгарда да бирлик болзын деп, ончо кӱчигерди салыгар. Анайда ок сергелеҥ болуп артыгар. Анайып, улус слердиҥ јакшы керектеригерди кӧрӱп, теҥеридеги Адабысты мактаар (Матф. 5:16).