1, 2. Бир ака бойыныҥ ич-кӧгӱзи керегинде нени билип алган ла ол нени эткен?

РОБЕРТ 15 јаштуда сууга чӧҥӱрилген, је чындыкты ол тыҥ баалабаган. Ол эске алат: «Мен јаман неме этпей де турган болзом, је кӧгӱс јанынаҥ ӧзӱм алынбагам. Тууразынаҥ кӧрзӧ кӧгӱс јанынаҥ менде ӱзе јакшы болгон: бир де туштажу божотпой туратам, јыл туркунына канча катап подсобный пионер де болотом. Је тӱҥей ле та не де јетпей турган деп билдирген».

² Роберттиҥ санаазыла болзо, ӱзе јакшы болгон. Је ол кижи алган кийнинде, не јетпей турганын билип ийген. Кезикте олор бой-бойына библиялык сурактар берип туратан. Оныҥ ӱйи тереҥ кӧгӱстӱ кижи болгон, оныҥ учун сурактардыҥ карууларын билер болгон. Је Роберт кандый каруу берерин билбей туратан. «Ол тушта: „Мен чек нени де билбес эмтирим. Оныҥ учун ӱйиме баш болорго турган болзом, та нени де солыыр керек“ — деп бойымга айткам». Анайып Роберт солынып баштаган. Ол айдат: «Агару Бичикти оҥдоп аларга, тереҥ шиҥдеерге албадангам,  анайып канча да ӧй ӧткӧн кийнинде, алган билгирлеримнеҥ бӱткӱл јурук јурала берген. Оноҥ ло бери мен чындыкты јакшы оҥдоп баштагам, је эҥ учурлузы — Иеговала колбуларым тыҥыган».

3. а) Роберттиҥ теми кандый ӱредӱ берет? б) Бис бу јӧрмӧлдӧ кандый сурактар шӱӱп кӧрӧрис?

³ Роберттиҥ теми биске јаан ӱредӱ болот. Бис библиялык кандый бир билгирлерлӱ болзоос, јуунныҥ туштажуларын божотпой турзаас, анайда ок јарлаар ишке туружып турзаас, бисти кӧгӱс кижи деп айдарга јараар ба? Јок. Ол эмезе бис кандый да кӧгӱс једимдерге јеткен де болзоос, биске тӱҥей ле та нени де солыыр керек деп оҥдоп јадыс (Флп. 3:16). Оныҥ учун кӧгӱзисти оноҥ ло ары ӧскӱрерге болужатан ӱч суракты шӱӱп кӧрӧрис: 1) Ич-кӧгӱзистиҥ кемин билип аларга, не болужар? 2) Кӧгӱзисти тыҥыдарга, нени эдер керек? 3) Кӧгӱс кӧрӱмдӱ болгоныс јӱрӱмиске кандый камаанын јетирет?

4. Ефестегилерге 4:23, 24-тӧ бичилген јӧп кемге тузалу болот?

⁴ Бис Кудайга иштеп баштайла, јӱрӱмисте јаан солынталар эткенис. Је солынталар эдери сууга чӧҥӱрилгениниҥ де кийнинеҥ токтобос керек. Агару Бичик санаабысты оноҥ ло ары тынла јаҥыртсын деп кычырат (Еф. 4:23, 24). Бис ончобыс толо кеминде эмезис, оныҥ учун оноҥ ло ары солынар керек. Керек дезе, Иеговага канча јылдарга иштеген де улуска, оныла колбуларын тыҥыдар керек (Флп. 3:12, 13).

5. Бойысты кандый сурактардыҥ болужыла шиҥдеерге јараар?

⁵ Ич-кӧгӱзисти тыҥыдарга, биске бойысты шиҥдеер керек. Бистиҥ кажыбыс ла, јааныс та, јажыс та бойынаҥ мынайып сураар аргалу: «Јӱрӱмимнеҥ кӧгӱзимди тыҥыдарга албаданганым кӧрӱнет пе? Христостоҥ тем аларга албаданадым ба? Јуунныҥ туштажуларында канайып тудунганым ла јуундарга кандый кӧрӱмдӱ болгоным мени кандый кижи деп кӧргӱзет? Мен кӧп сабада не керегинде куучындап тургам? Агару Бичикти канайып ӱренедим ле берилген јӧптӧрди канайып алынадым? Мениҥ кийимим ле тыш бӱдӱмим керегинде нени айдарга јараар? Ченелте болзо, нени эдедим? Мени кӧгӱзи тереҥ христиан деп айдарга јараар ба эмезе мен Агару Бичиктиҥ јӱк ле тӧс ӱредӱлериле болорзынадым ба?» (Еф. 4:13). Бу сурактарды шӱӱп сананганыс бойыстыҥ ич-кӧгӱзистиҥ кемин билип аларга болужар.

6. Кӧгӱс кӧрӱмистиҥ кемин билип аларга, биске база не болужар?

 ⁶ Бойыстыҥ кӧгӱс кемисти билип аларга, кезикте тууразынаҥ болуш керек болот. Элчи Павелдиҥ айтканыла болзо, «сезимиле јӱрген кижи», ӧскӧртӧ айтса, эт-канга башкарткан кижи бойын Кудайдыҥ алдында јастырбай јат деп сананат. Је кӧгӱс кижи кандый бир сурак аайынча Кудай нени сананып турганын ла кандый јолдоҥ кыйып турарын оҥдоп јат (1 Кор. 2:14—16; 3:1—3). Аксагалдар «Христос чылап сананып» турган болордо, эт-канга башкартып баштаганысты ајаруга алып ийзе, биске јӧп берер аргалу. Бис андый јӧпти угарыс па? Эйе болзо, кӧгӱс јанынаҥ ӧзӧргӧ турганыс кӧрӱнер (Јарл. 7:5, 9).

7. Кӧгӱс кижи болорго, нениҥ учун јӱк ле библиялык билгирлерлӱ болгоныла болорзынбас керек?

⁷ Ундыбагар: кӧгӱс кижи болуп каларга, јӱк ле библиялык билгирлерлӱ болгоныла болорзынбас керек. Соломон каан Иегова керегинде кӧпти билген. Керек дезе оныҥ сӧстӧри Агару Бичикке кирген. Је кийнинде Кудайга чындык артпай барала, кӧгӱс эмес кижи болуп калган (1 Каан. 4:29, 30; 11:4—6). Библиялык билгирлерлӱ болорынаҥ ӧскӧ, база нени эдер керек? Ич-кӧгӱс јанынаҥ оноҥ ло ары ӧзӧр керек (Кол. 2:6, 7). Анайып ӧзӧргӧ биске не болужар?

8, 9. а) Бӱдӱмјибисти тыҥыдарга биске не болужар? б) Бис нениҥ учун Агару Бичикти ӱренип, шӱӱп сананадыс? (Јӧрмӧлдиҥ бажындагы јурукты кӧрӱгер.)

⁸ Павел христиандарга: «Тереҥ кӧгӱстӱ болорго јӱткӱйли» деп бичиген (Евр. 6:1, ЈТ.) Биске бу јӧпти бӱдӱрерге не болужар? Темдектезе, библиялык принциптерди бойыстыҥ јӱрӱмисте канайып тузаланарын оҥдоорго болужып турган бичиктерди ӱренер керек. Бу бичиктеҥ библиялык принциптерди канайып тузаланарын оҥдоп аларыс. Оны ӱренип божодоло, ӧскӧзин ӱренерге јараар. Анаҥ улам бӱдӱмјибис тыҥыыр (Кол. 1:23). Анайда ок билип алганысты шӱӱп, оны тузаланарга Иегованаҥ болуш сураар керек.

 ⁹ Бис Иегованы сӱӱндирерге ле оныҥ јасактарын бӱдӱрерге кӱӱнзейдис, оныҥ учун мынайып эдерин ундыбай јадыс (Сар. 40:8; 119:97). Ого ӱзеери, кӧгӱс ӧзӱмиске буудак болгодый ончо немедеҥ кыйып јадыс (Титке 2:11, 12).

10. Јииттерге кӧгӱс јанынаҥ ӧзӧргӧ не болужар?

¹⁰ Јииттер, слер кӧгӱс амадулар тургузадыгар ба? Темдектезе, Бет-Элде иштеп турган ла аймак курултайларга барып турган бир ака программа башталардаҥ озо сууга чӧҥӱрилетен улусла куучындажарга албаданат. Олордыҥ кӧбизи јииттер болот. Ака олордыҥ кӧгӱс амадуларыла јилбиркейт. Олордыҥ кӧп сабазы Иеговага канайып иштеерге турганын јакшы билер: кезиги ӧйин толо берип пионер болорго амадайт, кезиги јарчылар јетпей турган јерде јарлаарга кӱӱнзейт. Је кезиги нени эдерин билбейт ошкош. Не дезе олор кӧгӱс амадулар тургузар керек деп сананбай да турган болор. Јииттер, бойыгардаҥ сурап кӧрӱгер: «Мен јуунныҥ туштажуларына ла јарлаар ишке ада-энемниҥ некегенинеҥ улам јӱредим бе? Иегова јуук најым болуп калзын деп албаданадым ба?» Је кӧгӱс амадуларды јаҥыс јииттер тургуспай јат. Андый амадулар Иегованыҥ ончо ишчилерине тузалу болор, не дезе олор биске кӧгӱс јанынаҥ бек болорго болужат (Јарл. 12:1, 13).

11. а) Тереҥ кӧгӱстӱ болорго, нени эдер керек? б) Бис Кудайдыҥ ишчилериниҥ кемизинеҥ тем алар аргалу?

 ¹¹ Нени јазап этпей турганысты билип ийзеес, биске тӱрген тӱзединер керек. Кӧгӱзи тереҥ болоры јаан учурлу, не дезе мынаҥ јӱрӱмис камаанду (Рим. 8:6—8). Је тереҥ кӧгӱстӱ болоры толо кемдӱ болорын темдектебей јат. Мындый амадуга једерге, Иегованыҥ агару тыны болужар. Је биске бойыстыҥ јаныстаҥ база албаданар керек. Башкару јӧпкӧ кирген Джон Барр канча да јыл кайра Лука 13:24-ти јартап тура: «Кӧп улус „тапчы эжиктеҥ“ кирип болбой јат, нениҥ учун дезе олор бойлорыныҥ кӧгӱзин тыҥыдарга јакшы албаданбай турган» — деп айткан. Биске, Кудайдыҥ алкыжын алардаҥ алганча ангелле тартышкан Иаковтоҥ, тем алар керек (Баш. 32:26—28). Бис Агару Бичикти ӱренгенинеҥ сӱӱнчи аладыс. Је Агару Бичик, јилбилӱ романды кычыргандый чылап, јеҥил кычырылбай јат. Айдарда, кӧгӱс эрјинелерди таап аларга, олорды јазап бедиреер керек.

12, 13. а) Римдегилерге 15:5-те бичилген сӧстӧрди бӱдӱрерге биске не болужар? б) Элчи Петрдыҥ теми ле оныҥ берген јӧби биске кандый туза берет? в) Кӧгӱс јанынаҥ ӧзӧргӧ, биске не болужар? («Кӧгӱс јанынаҥ ӧзӧргӧ слерге не болужар?» деген рамканы кӧрӱгер.)

¹² Бис кӧгӱс јанынаҥ ӧзӧргӧ албаданып турзаас, агару тынныҥ болужыла Христос чылап сананарга араайынаҥ темиге берерис (Рим. 15:5). Анайда ок Кудайдыҥ тыныла бойыстыҥ јастыра кӱӱнисти солып, Кудайга јараар кылык-јаҥга ӱренип аларыс (Гал. 5:16, 22, 23). Је акча-јӧӧжӧлӱ болоры ла соот-јыргалдарга тартылары јӱрӱмисте оноҥ ло ары баштапкы јерде болуп турган болзо нени эдер? Бир де чӧкӧбӧгӧр! Иегованаҥ агару тынды оноҥ ло ары сурагар, ол слерге чын кӧрӱмдӱ болорго болужар (Лука 11:13). Элчи Петрды эске алыгар. Ол кезикте кӧгӱс кӧрӱмдӱ эмес боло беретен (Матф. 16:22, 23; Лука 22:34, 54—62; Гал. 2:11—14). Је Петр бир де чӧкӧбӧйтӧн. Кийнинде ол Иегованыҥ болужыла Христос чылап сананарга ӱренип алган. Бис те анайып ӱренип алар аргалу.

¹³ Соондо, Петр Христос чылап сананарга нени этсе јакшы болор деп бичип салган. (Петрдыҥ 2-чи самаразы 1:5—8 кычырыгар.) Биске кӱӱнистиҥ ээзи болорго, турумкай болорго ло карындаштарды сӱӱрге ончо кӱчисти салар керек. Бойыгарга кажы ла кӱн мындый суракты берип кӧрӱгер: «Мен кӧгӱс јанынаҥ оноҥ ло ары ӧзӧргӧ, бӱгӱн нени эдер эдим?»

14. Кӧгӱс кӧрӱмдӱ болгоны биске кандый камаанын јетирет?

¹⁴ Христос чылап сананганы бистиҥ куучыныска, иште ле школдо бойысты канайып тудунганыска ла кӱнӱҥ сайынгы чечимдериске камаанын јетирет. Бистиҥ чечимдеристеҥ Христостыҥ ӱренчиктери болорго турганыс кӧрӱнип турар учурлу. Бис кӧгӱс керектерди баштапкы јерге тургузадыс, оныҥ учун кандый бир немедеҥ улам теҥеридеги Адабысла колбуларыс ӱрелип калзын деп кӱӱнзебей јадыс. Ченелтелер боло берзе, тургуза ла алаҥзу јогынаҥ турумкай артарга албаданарыс. Је нени-нени эдердеҥ озо, меҥдебей, мындый сурактарды шӱӱп кӧрӧрис: «Чын јӧп чыгарарга, меге кандый библиялык принциптер  болужар? Мындый айалгада Иисус Христос нени эдер эди? Иегова кандый чыгарган јӧпти јарадар эди?» Је эмди, кезик учуралдарда чын јӧп чыгарарга болужатан библиялык принциптер кӧрӱп ийеектер.

15, 16. Јакшы кӧгӱс кӧрӱмдӱ болгоны канайып болужат деп јартап беригер: а) эш-нӧкӧрди талдаарында; б) кандый улусла најылажарында?

¹⁵ Эш-нӧкӧрди талдаарында. Бу учуралда 2 Коринфтегилерге 6:14, 15-теги (кычырыгар) принцип тузаланылат. Павел кӧгӱс кижи ле эт-канга башкарткан кижи качан да эптӱ-јӧптӱ јадып болбос деп бичиген. Бу принцип эш-нӧкӧрди талдаарында канайып болужар?

¹⁶ Кандый улусла најылажарында. 1 Коринфтегилерге 15:33-теги (кычырыгар) принципти ајарып кӧрӱгер. Бис Кудайла колбуларысты тыҥ баалап турган болзоос, кӧгӱс кӧрӱмиске салтарын јетиретен кижиле најылашпазыс. Бу берилген принципти канайып тузаланарын сананып кӧрӱгер. Темдектезе, социальный сетьтерди канайып тузаланар? Слерди онлайн-ойындарга таныш эмес улусла ойнозын деген болзо, нени эдер эдигер?

17—19. Кӧгӱс кӧрӱмдӱ болгоны биске канайып болужат: а) тузазы јок керектердеҥ кыйарга? б) кӧгӱс амадулар тургузарга? в) блааш-тартыштардыҥ аайына чыгарга?

¹⁷ Кӧгӱс јанынаҥ ӧзӧргӧ бербей турган керектер. Еврейлерге 6:1-де (кычырыгар) чеберлеп айдылган сӧстӧр бичилген. Бис туза јок керектердеҥ, ӧскӧртӧ айтса, кӧгӱс ӧзӱмиске салтарын јетиргедий керектердеҥ кыйар учурлу. Бу принцип башка-башка учуралдарда тузалу болор, темдектезе, мындый сурактар чыкса: «Эдерге турган кандый бир керегим, туза јок керектерге кирет пе? Акчаны кӧптӧдӧ иштеп алатан арга боло берзе, иштеерге јӧпсинерим бе? Јӱрӱмниҥ айалгазын солыырга тартыжып турган улуска нениҥ учун бирикпес керек?»

¹⁸ Кӧгӱс амадулар. Иисус Кырдагы куучынында баштапкы јерге нени тургузарын чокум јарт айткан (Матф. 6:33). Кӧгӱс кижиниҥ амадулары Кудайдыҥ Каандыгыла колбулу болот. Бу принцип мындый сурактарга каруу берерге болужар: «Мен бийик ӱредӱге ӱренерим бе? Мен кандый бир ишке иштеерге јӧпсинерим бе?»

¹⁹ Блааш-тартыштар. Элчи Павелдиҥ Римдеги христиандарга берген јӧби блааш-тартыштардыҥ аайына чыгарга биске канайып болужар? (Рим. 12:18). Бистер, христиандар болгон адыста, «ончо улусла амыр» јӱрерге албаданадыс. Блааш-тартыштар болуп турза, бис бойысты канайып тудунадыс? Биске улустыҥ башка кӧрӱмиле јӧпсинерге јеҥил бе? Эмезе бисти амыр-энчӱни сӱӱп турган улус деп билер бе? (Иак. 3:18).

20. Слер нениҥ учун кӧгӱс јанынаҥ ӧзӧргӧ кӱӱнзейдеер?

²⁰ Библиялык принциптерди шӱӱп сананганы биске Кудайды сӱӱндирерге болужар деп, тоолу учуралдар кӧрдис. Кӧгӱс кӧрӱмдӱ болгоныстаҥ улам јӱрӱмис ырысту ла сӱӱнчилӱ болор. Јӧрмӧлдиҥ бажында айдылган Роберт мынайып куучындайт: «Кудайла колбуларым тыҥыган, оноҥ улам мен јакшы эш-нӧкӧр лӧ јакшы ада болуп калгам. Бого тыҥ сӱӱнедим!» Кӧгӱс јанынаҥ ӧзӱп турзаас, Иегова биске де алкыжын берер. Анайып, бис бӱгӱнги де кӱнде чыннаҥ ырысту болуп, келер ӧйдӧ «ӱргӱлји јӱрӱм» алар аргалу болорыс (1 Тим. 6:19).