1, 2. Иегова — кысканбас Кудай деп, недеҥ кӧрӱнет?

ИЕГОВА — кысканбас Кудай. Ончо немени биске Кудай берген. Јердиҥ бастыра алтыны да, мӧҥӱни де, анайда ок ар-бӱткенниҥ бар-јок байлыгы да Иегова Кудайдыҥ болот. Оныҥ кысканбазынаҥ улам, јерде јӱрӱм де бар (Сар. 104:13—15; Агг. 2:8). Иегова бойыныҥ ишчилерине болужарга, бары-јогыла тузаланганыныҥ кайкамчылу учуралдары Агару Бичикте бичилген.

² Темдектезе, Иегова Израильдиҥ албатызы 40 јылдыҥ туркунына чӧлдӧ јӱрерде, олорго манна ла суу берген (Чыг. 16:35). Бу ӧйдӧ «олор ончо јанынаҥ јеткил болгон» деп, Агару Бичикте айдылат (Неем. 9:20, 21). Иегова судурчы Елисей ажыра база бир кайкал эткен: Кудайга чындык јӱрген бир тул ӱй кижиде бир эмеш май болгон, је Елисей оны Кудайдыҥ болужыла кӧптӧдип ийген. Анайып бу тул ӱй кижи майды  садып ийеле, тӧлӱлерин тӧлӧп салган. Анайда ок ого бойына да, уулдарына да оноҥ ары јадатан акча болгон (2 Каан. 4:1—7). Иисус Иегованыҥ болужыла кайкал эдип кӧп улусты азыраган, керек дезе акча ла да јеткилдеген (Матф. 15:35—38; 17:27).

3. Бу јӧрмӧлдӧ бис нени шӱӱп кӧрӧрис?

³ Ончо неме Иегованыҥ болордо, ол бойыныҥ јайаандарын кичеер аргалу. Је ол, андый да болзо, бойыныҥ ишчилерин баалу немелериле оныҥ организациязына јӧмӧшсин деп кӱӱнзейт (Чыг. 36:3—7; Укаа сӧстӧр 3:9 кычырыгар *). Иегова бисти нениҥ учун быйанысты ого мынайып кӧргӱссин деп кӱӱнзейт? Иегованыҥ јебрен ӧйдӧги чындык ишчилери керектӱ иштер эдип тургандарга акча-јӧӧжӧлӧ канайып јӧмӧшкӧн? Бистиҥ берген берӱлерди Иегованыҥ организациязы канайып тузаланат? Бу сурактарды шӱӱжип кӧрӧӧктӧр.

4. Бис Иегованыҥ организациязына нениҥ учун акча-јӧӧжӧлӧ болужадыс?

⁴ Бис Иеговага берӱ бередис, нениҥ учун дезе оны сӱӱп јадыс ла ого быйанысты кӧргӱзерге кӱӱнзейдис. Иегованыҥ бергенин ончозын сананып ийзеес, јӱрегис томулат! Давид каан ӧргӧӧ тударына не керектӱ болорын јартап турарда, мындый шӱӱлтеге келген: ончо немени биске Иегова берген, оныҥ учун Кудайга бергенис те Кудайдыҥ болот. (1 Летопись 29:11—14 кычырыгар *.)

5. Бистиҥ берӱлерис — Иеговага бажырарыныҥ јаан бӧлӱги болот деп, Агару Бичик канайып кӧргӱзет?

⁵ Берген берӱлерисле Иегованы тооп турганысты кӧргӱзедис. Бир катап элчи Иоаннга Кудайдыҥ теҥеридеги ишчилериниҥ Иегованы мактап кожоҥдогоны кӧрӱнген: «Сен, Кайракан [Иегова, ЈТ], макты, кӱндӱни ле кӱчти аларга јарамык, нениҥ учун дезе Сен ончоны јайагаҥ, Сениҥ табыҥла ончозы јӱрет, ончозы бӱткен» (Ачыл. 4:11). Иегова макты, кӱндӱни ле эҥ јакшыны аларга јарамык деп, слер јӧпсинбес бедигер? Иегова Израиль албатыга Моисей ажыра бир јылга ӱч байрам ӧткӱрерге јуулышсын деп јакарган. Бу байрамдарга олордыҥ кемизи де «Иегованыҥ алдына куру колду келбес» учурлу болгон (Јаҥ. т. 16:16). Бӱгӱнги кӱнде бистиҥ берӱлер Иеговага бажырарыныҥ база бир јаан учурлу бӧлӱги болот. Кысканбай берӱлер эткенисле Иегованыҥ организациязын ла оныҥ ижин баалап турганысты кӧргӱзедис.

6. Кысканбас болоры тузалу деп, нениҥ учун айдарга јараар? (Јӧрмӧлдиҥ бажындагы јурукты кӧрӱгер.)

⁶ Биске кысканбас болор керек, не  дезе берердиҥ ордына, јаҥыс ла алып турган болзоос, јакшы немеге ӱренип болбозыс. (Укаа сӧстӧр 29:21 кычырыгар *.) Балдар ада-энезиниҥ берген акчазын јууп, олорго сый алып берзе, олор сӱрекей тыҥ сӱӱнет! Эмезе ӧскӧ учуралды сананып кӧрӱгер: пионер болуп турган бала ада-энезиле кожо јадып турган болзын. Ол курсак-тамакка ла турага чыгып турган акчаны кожо тӧлӧжӧргӧ кӱӱнзейт. Ада-энези мындый болушты сакыбай да турган болзо, је балазыныҥ болужын аларга јӧпсинер болор. Мынайып ондо ада-энезиниҥ ончо немени берип турганы учун быйанын кӧргӱзетен арга болот. Анайып ла ок, баалу немегисти ӱлежип турганыс биске туза экелет деп, Иегова јакшы билет.

7, 8. Библиялык ӧйлӧрдӧ Иегованыҥ ишчилери берӱлерле канайып болушкан: а) аҥылу ишке? б) Кудайдыҥ албатызында керектӱ ишти бӱдӱрип тургандарга?

⁷ Агару Бичикте Иегованыҥ ишчилериниҥ берӱлер эткениниҥ учуралдары бичилген. Олор кезикте кандый бир аҥылу ишке акча-јӧӧжӧ јууган. Темдектезе, Моисей албатыны агару байканды тударга берӱ этсин деп сураган, Давид дезе — ӧргӧӧ тударына сураган (Чыг. 35:5; 1 Лет. 29:5—9). Иоас каанныҥ ӧйинде абыстар јуулган акчаны Иегованыҥ туразын јазаарына тузаланган (2 Каан. 12:4, 5). Баштапкы чактыҥ христиандары Иудей јериндеги тороноҥ улам ака-эјелерге болуш керек болгонын угуп ийеле, «арга-кӱчи јеткенче болужар болуп јӧптӧштилер» (Ап. ижи 11:27—30).

⁸ Иегованыҥ ишчилери Кудайдыҥ албатызында керектӱ иштерди бӱдӱрип тургандарга акча-јӧӧжӧлӧ ӧскӧ дӧ учуралдарда болушкан. Моисейдиҥ јасагыла болзо, левиттерге, ӧскӧ уктарга кӧрӧ, энчи эдип јер берилбеген. Оныҥ учун израильтяндар левиттерге онынчы ӱлӱни берген, мынайып олор байкандагы ишти кӧндӱрезинеҥ бӱдӱрер аргалу болгон (Тоол. 18:21). Анайып ла «бары-јогыла болужып турган» кысканбас ӱй улуска Иисус ла оныҥ ӱренчиктери быйанду болгон (Лука 8:1—3).

9. Јебрен ӧйдӧ Иегованыҥ ишчилери берӱ эдип беретен акча-јӧӧжӧни кайдаҥ алган?

⁹ Берӱ эдип беретен акча-јӧӧжӧни улус кайдаҥ алган? Темдектезе, израильтяндар агару байканды тударга, Египеттеҥ экелгенин берген (Чыг. 3:21, 22; 35:22—24). Баштапкы чакта кезик христиандар бойлорыныҥ тураларын, јерлерин ле ӧскӧ дӧ јӧӧжӧзин садып, элчилерге берген. Элчилер бу акчаны немеге јединбей турган улуска ӱлештирген (Ап. ижи 4:34, 35). Кезик христиандар берӱлерди улам сайын эдерге, акчаны озодоҥ јууган (1 Кор. 16:2). Анайып чыгымды бӧктӧӧрине бай да, јокту да улус туружар аргалу болгон (Лука 21:1—4).

10, 11. а) Библиялык ӧйдӧ јаткан Иегованыҥ кысканбас ишчилеринеҥ биске кандый тем аларга јараар? б) Иегованыҥ организациязына акча-манатла јӧмӧжӧтӧн арга керегинде нени сананадыгар?

¹⁰ Бӱгӱнги кӱнде кандый бир ишке  берӱлер эдери база керектӱ болот. Темдектезе, слердиҥ јуунга Каандыктыҥ јаҥы Туразын тударына эмезе оны јаҥыртып јазаарына; филиалды јаҥыртып јазаарына эмезе курултайды ӧткӱрериле колбулу чыгымдарды бӧктӧӧрине. Кезикте ар-бӱткенниҥ тӱбегинеҥ улам кӱч айалгада болуп калган акаларга болуш керек деп јар болот. Анайда ок, берӱлерис телекейлик тӧс башкаруда ла бастыра јердиҥ ӱстинде бар филиалдарда иштеп тургандарга јӧмӧжӧт. Бистиҥ кысканбай бергенистеҥ улам миссионерлер, аймак кӧрӧӧчилер ле специальный пионерлер Кудайга кӧндӱрезинеҥ иштеер аргалу. Слердиҥ јууныгар Каандыктыҥ Тураларын ла бастыра јердиҥ ӱстинде Курултайлардыҥ Тураларын тударына канча да кире акча аткарып турган болор.

¹¹ Бистиҥ кажыбыс ла бу телекейдиҥ калганчы кӱндеринде Иегованыҥ организациязыныҥ эдип турган ижине јӧмӧжӧр аргалу. Кӧп сабада кем канчаны берип турганын кем де билбей јат. Акчаны туштажулар ӧдӱп турган јерлерде берӱниҥ кайырчагына саладыс. Кезикте акчаны ас салганыс деп сананар болорыс. Је берӱге салынган акчаныҥ кӧбизи тоолу улустыҥ кӧп салган акчазынаҥ эмес, је кӧп улустыҥ ас салган акчазынаҥ јуулат. Бистиҥ ака-эјелер, керек дезе јокту да јадып тургандары, Македонияда јаткан христиандардаҥ тем алгылайт. Ол христиандар коркышту јокту да јаткан болзо, кысканбас болгон ло «болужарында туружарга» тыҥ кӱӱнзеген (2 Кор. 8:1—4).

12. Иегованыҥ организациязы берӱни эҥ јакшы эдип тузаланарга нени эдет?

¹² Башкару јӧп јуулган берӱни тузаланарында керсӱ ле бӱдӱмјилӱ болорго албаданат (Матф. 24:45). Ол мӱргӱп, акчаны канайып тузаланатаны јанынаҥ шӱӱп сананат (Лука 14:28). Библиялык ӧйлӧрдӧ берӱлерди башкарарына кӧстӧлгӧн улус, акча јӱк ле Иеговага бажырарына тузаланылат па деп, кӧрӱп туратан. Темдектезе, Ездра Иерусалимге кайра јанып барадарда Персид каанныҥ сыйын — алтын, мӧҥӱн, ӧскӧ дӧ баалу немелер апарган. Бу сыйдыҥ баазы США-ныҥ бӱгӱнги акчазыла кӧрзӧ, 100 миллион доллардаҥ кӧп болгон. Олорго ӧштӱлер табаргадый јеткерлӱ јерди ӧдӧр керек болгон. Ездра бу сыйды Иеговага берилген сый деп кӧргӧн, оныҥ учун оны Иерусалимге бӱткӱл-јеткил јетирерге белетенип алган (Езд. 8:24—34). Элчи Павел Иудей јериндеги немеге јединбей турган ака-эјелерге акча јууган. Јуулган акчаны Иудей јерине јетирген улус «јаҥыс та Кайраканныҥ [Иегованыҥ, ЈТ] алдында эмес, улустыҥ да алдында јакшы кылынарга» кичеенген деп, ол бӱдӱмјиленген. (2 Коринфтегилерге 8:18—21 кычырыгар.) Оныҥ учун бӱгӱнги кӱнде Иегованыҥ организациязы Ездра ла Павелдеҥ тем алып, берӱге берилген акчаны чебер тузаланат.

13. Бу јуукта Иегованыҥ организациязындагы солунталар недеҥ улам болгон?

¹³ Кезикте билелер акчазын канайып тузаланарын јаҥыдаҥ шӱӱп кӧрӧт. Нениҥ учун дезе билениҥ чыгымы кирелтенеҥ ажа берет эмезе  биле Иеговага кӧп иштеерге јӱрӱмин јеҥилтерге сананат. Иегованыҥ организациязында база мынайып болот. Калганчы јылдарда организация кӧп јаҥы немелер эткен, је кезикте чыгымы кирелтенеҥ ажып турарда, организация слердиҥ кысканбай берип турган берӱлереерди эҥ јакшы эдип тузаланарга, чыгымды астадарга ла ижин јеҥилтерге јаҥы аргалар бедирейт.

14—16. а) Слердиҥ берген берӱгеердеҥ кандый иштер эдилет? б) Бу слерге кандый туза экелет?

¹⁴ Иеговага кӧп јылдардыҥ туркунына иштеп тургандар, Кудайдыҥ организациязы бӱгӱнги кӱнде бистерди, алдындагызына кӧрӧ, оноҥ јакшы кичеейт деп айдыжат. Калганчы јылдарда бисте бойыста интернет-телевидение ле сайт иштейт. «Јаҥы телекейдиҥ кӧчӱрмези» оноҥ кӧп тилдерге чыгат. 2014, 2015 јылдарда бастыра јердиҥ ӱстинде 14 каланыҥ эҥ ле јаан деген стадиондорында ӱч кӱнниҥ туркунына «Элдеҥ озо Кудайдыҥ Каандыгын бедирегер!» деп адалган телекейлик курултайлар ӧткӧн. Бу курултайга јуулган улустыҥ ончозы сӱрекей јаан сӱӱнчи алган!

¹⁵ Кӧп ака-эјелер Иегованыҥ организациязыныҥ ижи учун јаан быйанын айдат. Азияда јарлап турган бир биле мындый сӧстӧр бичиген: «Бис кичинек калада јарлайдыс. Кезикте бойысты јӱрӱмнеҥ артып калганыс деп сезедис. Мынаҥ улам Иегованыҥ организациязыныҥ бастыра телекейлик ижи ундылып калар ошкош. Је интернет-телевидениениҥ кӧрӱлмелери телекейлик карындаштыкка кирип турганысты ундыбаска болужат. Јербойыныҥ ака-эјелерине бистиҥ телевидение база сӱреен тыҥ јарап јат. Олор кажы ла ай чыгып турган  программаны кӧргӧндӧ, бойлорын Башкару јӧпкӧ јуук болуп калганын сескилейт деп айдыжат. Эмди олор Кудайдыҥ организациязына кирип турганыла оморкойдылар!»

¹⁶ Бӱгӱнги кӱнде бастыра јердиҥ ӱстиле 2500 кире Каандыктыҥ Туралары тудылат эмезе јаҥыдаҥ јазалат. Гондурастагы јаҥы Каандыктыҥ Туразында јуулыжып турган бир јуунныҥ ака-эјелери мындый сӧстӧр бичиген: «Иегованыҥ бирлик билезине кирип турганыс кандый јакшы! Бӱткӱл телекейде бисте сӱреен кӧп ака-эјелер бар! Бойыста Каандыктыҥ Туразы болор деген санаабыска олордыҥ болужыла једингенис». Кӧп ака-эјелер Агару Бичикти ле ого тайанган бичиктерди бойыныҥ тӧрӧл тилине кычыратан арга учун ла ар бӱткенниҥ тӱбегинде берилген болуш учун јаан быйанын айдадылар. Анайда ок олорды кӧп улусту јерлерде јарлаганыныҥ једимдери кайкадат.

17. Иегова бойыныҥ организациязына болужып турган деп, бис кайдаҥ билерис?

¹⁷ Керечил эмес улуска, ӧрӧги тоололгон иш јӱк ле акту кӱӱннеҥ берилген берӱлердиҥ болужыла тудулганына бӱдерге кӱч болот. Бир катап бир јаан компанияныҥ башкараачызы бистиҥ типографияда экскурсияда болгон. Бу иш акту кӱӱннеҥ берилген берӱниҥ болужыла эдилгенин, мында улус бойыныҥ кӱӱниле иштегенин ле бу ишке акча јууп аларга кандый да неме ӧткӱрилбей турганын кӧрӱп, ол алаҥ кайкаган. Улус бойы мындый ишти качан да эдип болбос деп айткан. Бис оныҥ сӧстӧриле јӧп, нениҥ учун дезе ончо иш јӱк ле Иегованыҥ болужыла эдилет (Иов 42:2).

18. а) Каандыктыҥ ижине јӧмӧжип тура, бис кандый алкыштар аладыс? б) Балдарды ла Агару Бичикти ӱренип тургандарды Каандыктыҥ ижине јӧмӧжип турарына канайып ӱредер?

¹⁸ Иегова биске оныҥ Каандыгыныҥ ижине јӧмӧжӧтӧн арга берген. Ол јаан кӱндӱ болот. Бис мынайып јӧмӧшсӧбис, кӧп алкыштар аларыс деп, Иегова сӧзин берет (Мал. 3:10). Кудай кысканбас кижини ӧзӱп јаранар деп айткан. (Укаа сӧстӧр 11:24, 25 кычырыгар *.) Кысканбай берип турзаас сӱӱнчи аладыс, не дезе «алып турганы эмес, берип турганы оноҥ артык кежиктӱ» (Ап. ижи 20:35). Бис айткан сӧзисле, эткен керегисле балдарысты ла Агару Бичикти ӱренип турган улусты Каандыктыҥ ижине база јӧмӧжӧр аргалу деп ле бу олорго кӧп алкыштар экелер деп ӱредедис.

19. Бу јӧрмӧл слерди неге кӱӱнзедет?

¹⁹ Бистеги бар ончо неме Иегованаҥ берилген. Оныҥ учун бис ого берӱ эдип, сӱӱжисти ле быйанысты кӧргӱзер аргалу (1 Лет. 29:17). Израильдиҥ албатызы ӧргӧӧ тударына берӱ эдип турала «сӱӱнген, нениҥ учун дезе берӱлерди Иеговага акту јӱрегинеҥ берген» (1 Лет. 29:9). Иегованыҥ бергенин ого ойто кайра берип, јаантайын сӱӱнип јӱреектер!